Daca (Bangladés) markankir 35 maran Zulma * sat casada warmejja, munasiri, kusisit sarnaqtʼasiri, trabajtʼiri, jaqenakan Diosar uñtʼapjjañapatak yanaptʼirit uñtʼatänwa. Ukampis usuntasinjja, mä semanat jiwjjakïnwa, familiapajj qʼala aynachtʼataw jikjjatasipjjäna.

Jaimempi warmipampejj Zulma warmjam suma jaqet uñtʼatäpjjarakïnwa, jupanakajj niya 35 maranïpjjänwa. Mä qawqha maranak nayrajja, Estados Unidos markan jakapkäna uka amigonakapar visittʼiriw sarapjjäna, ukampis janipuniw Nueva York markaparojj kuttʼjjapjjänti. Kunattejj autompi usuchjayasisaw jiwjjapjjäna, ukajj familiaraparusa amigonakaparus wali llakitwa jaytawayäna.

Taqewjanwa tʼaqhesiñas, jan waltʼäwinakas utji: guerranakajja, soldadonakaru ukat aleq jaqenakarus mä khuskatwa jiwarayi; lunthatasiñanakasa, nuwasiñanakasa ina chʼusatwa waranq waranqaninakar jiwarayi; chijinakasa, jan qollkay usunakasa wawanakaru, chuymankipstatanakaru taqeniruw jiwarayi; Oraqen jan waltʼäwinakapajj markpachanak chhaqtayi; yaqhachasiñas, ina chʼusat tʼaqhesiñas sapüruw utjaraki. Inas jumajj ukhaman uñjasirakirïsta.

Ukatwa akham jisktʼastanjja:

• ¿Kunatsa suma jaqenakar jan walinakajj paspacha?

• ¿Diosat juchanïpacha?

• ¿Ina chʼusatakti uka jan walinakajj utjpacha, jan ukajj jaqenakach utjaypacha?

• ¿Karma siski ukat jan walinak utjaypacha? ¿Kuna jan walinaktï nayra jakäwisan lurawayktan ukanakatti tʼaqhespachätanjja?

• Taqe Chʼamani mä Dios utjchi ukhajja, ¿kunatsa suma jaqenakar jan walinakat jan jarkʼaqkpacha?

• Jan walinakasa, tʼaqhesiñanakas ¿tukuspachäniti?

Uka jisktʼanakan qhanañchäwip jikjjatañatakejja, aka pä jisktʼanakar qhanañchañasawa: ¿kunatsa jan walinakajj paspacha? ukat ¿kunsa Diosajj ukanak chhaqtayañatakejj lurani?