ESPOSAPAN kusisitäñapatakejj ¿kunsa mä chachajj lurañapa? Jan kunats llakisiñapatakejj utan janipuniw qollqe faltayañapäkiti; chacharojj uk lurañapaw waktʼi sasaw waljanejj sapjjaspa. Ukatï ukhamäspajja, ¿kunatsa walja warminakajj qollqenïkasas jan kusisitäpkpacha? España markankir Rosa warmejj casaraskäna uka chachapatjja, akham siwa: “Jaqenak jakʼatjja suma jaqeriwa, ukampis panijakejjapjjerït ukhajja, wali qhoröjjeriwa” sasa. Nigeria markankir Joy sat warmejja, akham sarakiwa: “Jan pachpa amuyjjapjjerïta ukhajja, chachajajj akham siritu: ‘Nayajj chachamatwa, kuntï sisksma ukjja lurañamawa’” sasa.

Esposonakajj ¿kunanakatï jupanakar lurañ waktʼki uk kunjamsa phoqapjjaspa? Esposapan jan llakisiñapataki, antisas wali munata ukat ‘utapan kusisita jikjjatasiñapatakejj’ ¿kunsa mä chachajj luraspa? (Rut 1:9.)

Diosajj chacharus warmirus pachpaks uñjkchejja, familianjja sapa mayniw yaqha luräwinïpjje, siw Bibliajja. Romanos 7:2 qellqatajja, warmejj ‘chachan leyiparojj’ respetañapawa sasaw qhanañcharaki. Mä empresanjja mä pʼeqtʼirejj utjapuniwa, Diosajj ukhamarakiw familia pʼeqtʼañapatakejj chacharu uttʼayi (1 Corintios 11:3). Ukhamajja, chachaw warmin pʼeqepajja.

Ukhamasti ¿kunjamsa pʼeqtʼañapa? Uka toqetjja, Efesios 5:25 qellqatajj akham siwa: “Munasipjjam warminakamaru. Kunjämtejj Cristojj iglesiaru munasi, [...] ukhama” sasa. Jesucristojj janiw casaraskänti, ukampis sarnaqäwipajj suma esposoñatakejj yanaptʼiristamwa. Kunjamsa yanaptʼiristam uk yatjjatañäni.

Jesusajj jaqenakar yanaptʼañatakiw chʼamachasïna. Aynachtʼatanakarojja, akham sasaw Jesusajj säna: “Nayar jutapjjam [...], nayaw samarayapjjäma” sasa (Mateo 11:28, 29). Jesusajja, jan sinti aynachtʼatapjjañapatakiw jaqenakar yanaptʼäna, usunakapwa qolläna, ukat Diosar jakʼachasipjjañapatakis yanaptʼarakïnwa. Ukatwa jaqenakajj jupat jan jitheqtañ munapkänti.

Kunjamsa Jesusat yateqasisma. Kunjamanakatsa esposamar yanaptʼasma uk sum amuytʼañama. Walja warminakajja, Rosjamaw jikjjatasipjje, jupajj akham sänwa: “Chachajajj sirvientaparjamaw uñjitäna” sasa. Ukampis Kweku  sat chachajj akham siwa: “¿Kunañch yanaptʼirisma? sasajj warmijar sapunirïtwa. Niyakejjay wal munstjja, yanapa jan maykitu ukhas utan yanaptʼapuntwa” sasa.

Kunjamäsipkisa uk Jesusajj amuytʼirïnwa ukat khuyaptʼayirïnwa. Mä warmejja, 12 maraw mä usump tʼaqhesiskäna, ukampis Jesusan milagronakapat istʼasajja, akham amuytʼasïna: “Isipak llamktʼä, ukat walikëjjäwa” sasa. Ukham amuyatapajj cheqaskänwa, kunattejj Jesusar jakʼachasisin isip mä jukʼa llamktʼasajja, usupat qollatäjjänwa. Ukham luratap jan walits yaqhepanakajj uñjapkchïnjja, kunjamsa uka warmejj wal tʼaqhesïna uk Jesusajj sum amuyäna. * Ukatwa akham sasin chuymachtʼäna: “Wawa, [...] usumatsti kʼumaräjjtawa” sasa. Uka luratapampejja, Jesusajj kunjam jaqënsa uk qhan uñachtʼayäna, cheqas kunjamsa mayninakajj tʼaqhesipjje uk sum amuyirïna (Marcos 5:25-34).

 Kunjamsa Jesusat yateqasisma. Esposamajj jan sum jikjjataskani ukhajja, wali paciencianïñamawa ukat yanaptʼañamarakiwa. Kunatsa ukham jikjjatasi uk sum amuyañatakiw chʼamachasiñama. Uka toqet Ricardojj akham siwa: “Warmijan mayjätap amuyta ukhajja, jan jukʼamp aynachtʼayañatakiw chʼamachasta” sasa.

Arkirinakapampejj Jesusajj parltʼasipunirïnwa. Jupanakarojj amigonakaparjamaw uñjäna ukat parltʼasipunirïnwa. Mä kutejja, akham sänwa: ‘Kuntejj Awkejjajj siskitu ukwa jumanakar yatiyapjjsma’ sasa (Juan 15:15). Awisajja, lupʼiñataki ukat awkipar mayisiñatakejj sapapakïñsa munarakirïnwa, ukampis jila partejja, kunjamas jikjjatasïna ukanakjja arkirinakaparojj yatiyapunirïnwa. Amuytʼañataki, jan wali jaqerjam juchañchañatak janïr katuntapkäna uka arumajja, kunja llakitaskänsa ukjja jupanakar yatiyänwa (Mateo 26:38). Kuntï arkirinakapajj lurapkän ukajj janis jupatak askikchïnjja, jupanakampejj parlaskakirïnwa (Mateo 26:40, 41).

Kunjamsa Jesusat yateqasisma. Esposamampejj parltʼasiñamapuniwa. Kunsa amuyta ukat kunjamsa jikjjatasta ukanakwa yatiyañama. Walja warminakajj akhamwa chachapat sapjje: “Jaqenak jakʼatjja esposojajj parliwa, ukampis utanjja amukëjjewa” sasa. Esposojajj kunjamsa jikjjatasi uk awistʼitu ukhajja, “wals munaskitaspa ukat mayachtʼatäpkiristsa ukham amuyasta” sasaw Ana warmejj qhanañchi.

Janipuniw esposamarojj jan parljjayasa castigañamäkiti. Mä warmejj akham siwa: “Esposojajj nayatak coleratäjjeri ukhajja, walja urunakaw jan parljjayjjerituti. Ukampejj nayas juchanïkirista ukat jiskʼachatäkiristsa ukham amuyasirïta” sasa. Ukampis Edwin chachajja, Jesusat yateqasiñatakiw chʼamachasi, jupajj akham siwa: “Colerataskt ukhajja, janiw jankʼak kuns parlkti. Antisas yaqha horasan askichañatakiw chʼamachasta” sasa.

Jehová Diosan Qhanañchiripampi Bibliat yateqañ qalltjjasajj kunjamsa esposopajj jan nayrjamäjje ukjja, Joy sat warmejj akham sasaw saraki: “Jukʼat jukʼatjja, esposojajj janiw nayrjamäjjeti, Jesusjam suma jaqëñatakiw chʼamachasiski” sasa. Bibliajj walja millón millón casadonakaruw yanaptʼawayi, jumajj ¿yanaptʼayasiñ munarakismati? Jehová Diosan mä qhanañchiriparuw Bibliat yatjjatañ munta sasin yatiyasma; jan qollqe mayisakiw yatichapjjätam.