Omar: Nayajj janiw kuna religionarus sarkti. Ukhamajj janjakiw kunat parlañas utjkaniti.

Bruno: Walik ukham awistʼistajja. Nayajj Bruno satätwa, ¿jumasti?

Omar: Nayajj Omar satätwa.

Bruno: Waliki, ukhamajj uñtʼasiñäniwa.

Omar: Jïsa, uñtʼasiñäniwa.

Bruno: May jisktʼañ munirisma: ¿jumajj janipunit kunapachas mä religionar sarawaykta?

Omar: Janiwa, wawäkasajj sarayätwa. Universidadar mantjjasaw jan mayamps sarjjtti.

Bruno: Ukhamäpachawa. ¿Kunsa universidadan estudiawayta?

Omar: Historia ukat Ciencias sociales ukanakwa estudiawayta. Jaqenakajj kuntï nayratpach lurawayapki ukanakat yatjjatañ munapunirïtwa.

Bruno: Ukanakat yatjjatañajj wali askiwa. Bibliajj sarnaqäwinakat parlirïtap inas yatsta. ¿Biblia toqet kunapachas yatjjatawaytati?

Omar: Janiwa. Mä suma librötap yattwa, ukampis sarnaqäwinakat parlirïtap janiw yatkayätti.

Bruno: Jumajj Bibliar askit uñjatamawa. Tiemponïstajja, mä qawqha minutonakanwa Bibliajj sarnaqäwinakat cheq parlatap mä qawqhanak uñachtʼayirisma.

Omar: Walïspawa, ukampis janiw Biblianïkti.

Bruno: Jan llakisimti. Nayan utjituwa. Nayraqatjja, 1 Crónicas 29:26, 27 qellqat liytʼañäni. Ukan akham siwa: “Isaí [‘Jesé’, NM] chachan David yoqapajj, taqe Israel markpachanwa reyipäna. Jupasti Israel markanjja pusi tunka marawa apnaqäna, ukanakatjja Hebrón markanjja paqallq maraw apnaqäna, Jerusalenansti kimsa tunka kimsani mararaki”.

Omar: ¿Ukham siti? Janiw sum amuykti.

Bruno: Jïsa. Mä tiemponjja, Bibliajj janiw cheqäkiti sirinakajja, ‘Davitan sarnaqäwipajj mä cuentokiwa’ sasaw sapjjäna.

Omar: ¿Cheqa? ¿Kunata?

Bruno: David chachajj cheqapun utjaskatapatjja, mä jukʼakiw yatisïna, Biblianakwa Davitat jilpach qhanañchäna. Ukampis 1993 maranjja, arqueología toqet yatjjatirinakajj qalat khitsuta mä monumenton pä aru qellqat jikjjatapjjatayna, uka arunakajj “Davitan utapa” ukat “Israelan reyipa” sañ muni.

Omar: Wali muspharkañarakisä.

Bruno: Poncio Pilato chachatjja ukhamarak sapjjäna, Jesusajj aka Oraqenkkäna ukhaw jupajj mä marka apnaqäna. Jupatsti, Lucas 3:1 qellqatanwa qhanañchasi. Ukanjja, uka tiempon marka apnaqerinakan sutinakap chikaw sutipajj uñsti.

 Omar: Cheqarakisä, “Poncio Pilatojj Judea marka apnaqarakïna, Herodesasti apnaqarakïnwa Galilea” siwa.

Bruno: Ukham saskapuniwa. Yatjjatirinakajja, walja maranakaw Poncio Pilato chachan utjatapat pächasipjjäna. Ukampis khä 50 maranak nayrajja, khaysa Asia cheqanakanjja, qalat khitsut yaqha qellqat jikjjatapjjäna, ukanwa sutipajj uñstäna.

Omar: Uk janiw nayajj yatkayätti.

Bruno: Jumar ukanak yatiyañajj nayatejj wali askiwa.

Omar: Qhana arunjja, Bibliajj mä aleq librokïkaspas ukhamakiw nayatakejja. Inas sarnaqäwinakat parlchi, ukampis janjakiw yanaptʼkistaspati.

Bruno: Waljaniw jumjam amuyapjje, ukampis nayajj janiw ukham amuykti. ¿Kunatäpachas uk yatiñ munasmati? Cheqas aka Oraqen jakäwejj qalltkäna ukhatpachwa manqʼsa, issa, ukat jakasiñatak mä utsa munayätanjja. Ukat parltʼasiñsa, mä suma familianïñsa munarakiyätanwa. Jichhakamas ukanak munaskaktanwa ¿janich ukhamäkejja?

Omar: Jïsa, ukhamapunïskiwa.

Bruno: Bibliakiw yanaptʼistaspa. Nayras qellqaskchïnjja jichha tiempotakejj askikïskiwa.

Omar: ¿Cheqapunit yanaptʼistaspa?

Bruno: Jïsa. Jichhajj yaqha toqet amuytʼarakiñäni: Biblia qellqaskäna uka tiemponakanjja, Biblian ewjjanakapajj uka tiempotakejj askïnwa, jichhürunakatakis askikïskiwa.

Omar: ¿Kunjama? Janiw sum amuykti.

Bruno: Bibliajja, qollqe toqetsa, familiatsa, amigoniñatsa mä suma amtar puriñatakiw yanaptʼistu. Bibliajj mä mapjamaw kawknämsa sarañasa uk sum uñachtʼayistu. Amuytʼañataki, jichhürunakanjja mä suma esposöñas, mä suma awkïñas chʼamakiwa ¿janicha?

Omar: Ukhamäskapuniwa. Esposajampejj maraw casadojjapjjta, ukampis mä amtar puriñajj chʼamakiwa.

Bruno: Biblianjja amuykay ewjjtʼanakaw utji, ukat yanaptʼasipuniwa. Amuytʼañatakejj Efesios 5:28 qellqat uñjjattʼañäni. ¿Liytʼasmati?

Omar: Jïsa akham siwa: “Ukhamwa chachajj warmiparojj munasiñapa, pachpa jañchiparjama. Khititejj warmiparojj munaski ukajj jupa pachpaw munasi”.

Bruno: Yuspära. Mä chachatï uka ewjjtʼar istʼaspajja, familjamajj sum jakasipjjaspa.

Omar: Cheqas ukhamäspawa, ukampis parlañajj facilakipï phoqañaw chʼamajja.

Bruno: Ukhamapunïskiwa, taqeniw pantjasirïtanjja. Ukhamarusa, uka pachpa jalja ukat yaqha jiskʼa tʼaqanjja, amuytʼasirïñasatakiw ewjjtʼistu. * Mä chacha warmejja, purapatwa sum uñjasipjjañapa, janiw maynin askipak thaqañapäkiti. Esposajampirojj purapat sum uñjasiñatakiw Bibliajj yanaptʼawayapjjetu.

Omar: Cheqas ukhamäpachawa.

Bruno: Jehová Diosan Qhanañchirinakapanjja, mä cheqaw Internetan utjapjjetu, ukanwa casadonakatakisa, familianakatakis suma ewjjtʼanakajj utji. Kunanakas uka cheqan utji ukanak mä rato uñachtʼayäma.

Omar: Mä ratokïchi ukajj walikïniwa.

Bruno: Uka cheqajja, jw.org satawa. Akawjitajj mantañatakiwa.

Omar: Wali suma fotonakarakisä.

Bruno: Jupanakajj amigonakajawa, kunayman markanakanwa Diosan arunakap yatiyasipki. Akawjitanjja “Qellqatanaka” siwa. Ukansti machaq revistanaka ukat kunayman toqet parlir qellqatanakaw utji, ukanwa familia toqetsa parlaraki. Ukatakejja “Diosan apayanit suma yatiyäwinaka” sat folleto uñjjattʼañäni. Uka folleton  mä yatichäwipajj akham pʼeqeñchäwiniwa: “¿Kunjamsa familianakajj kusisit jakasipjjaspa?” sasa.

Omar: Uka yatichäwejj askipuniwa. Uka jisktʼan qhanañchäwip yatjjatañ munirista.

Bruno: Chacha warmjamajj kunjamatsa kusisitässna uka toqetwa aka yatichäwin waljanak qhanañchaski. Amuytʼañataki, aka payïr jisktʼan tʼaqap uñjjattʼañäni. ¿Qhep qhepa pä oracionanak liytʼasmati?

Omar: Jïsa, akham siwa: “Panpachaniw munasipjjañapa ukat respetasipjjañapa. Ukat niyakejjay pantjasir jaqëpjjchejja, kusisit jakasiñatakejj perdonasirïpjjañapawa”. Ukajj cheqäskapuniwa.

Bruno: Yuspära liytʼatamata. Ukanjja, Efesios 5:33 qellqataw uñstaraki. Mirä ampsuma, Bibliajat uk ¿liytʼasmati?

Omar: Akham siwa: “Sapa mayni jumanakajj warminakamaru munasipjjañamawa juma pachpas munaskasma ukhama, warmisti chacharojj istʼañaparakiwa”.

Bruno: Uka ewjjtʼajj ¿wali sumajjaya? Cheqas chacha warmjam purapat sum uñjasipjjañapatakiw ewjjtʼaski.

Omar: Mmm... janiw sumpach amuykti. ¿Qhanañchtʼitasmati?

Bruno: Cheqas taqe chachanakaw warmipampi respetatäñ munapjje. Warminakas ukhamarakiw chachapampi sum uñjatäñ munapjjaraki ¿janich ukhamäkejja?

Omar: Jïsa, ukhamäskapuniwa.

Bruno: Mä chachatï munasiñampipuni warmipar uñjani ukhajja, warmejj chachapar respetaniwa.

Omar: Jïsa ukajj ukhamapunïskiwa.

Bruno: Uka ewjjtʼan qellqasitapat niya pä waranqa maranakas pasjjchejja, jichha tiempotakis askikïskiwa. Maynitï uka ewjjtʼanakarjama sarnaqani ukhajja, chacha warmjamajj purapat sum uñjasipjjani.

Omar: Biblian suma ewjjtʼanakarakis utjataynajjä, janiw nayajj uk yatkayätti.

Bruno: Walikpun ukham amuytajja. “¿Jan waltʼayasiñajj utjani ukhajj jaljtapjjañapati?” siski uka kimsïr jisktʼar qhanañchañatakejj wasitampiw jumamp parltʼañ munirista.

Omar: Walikïspawa. Warmijampiw uk liytʼapjjä.