¿CHUYMANKIPSTAÑAT lupʼirïtati? Waljanejj wal llakisipjje, yaqhepasti ajjsarayasipjjewa, kunattejj chuymankipstasajj janqʼo ñikʼutani, jañchipas sipʼu ukhamäjjapjjewa, kuns armasjjapjjakiwa, kunayman jan walin uñjasipjjaraki.

Yaqhepajj jañchinsa, amuyunsa khusakïsipkiwa. Yaqhepanakasti, qollanak utj-jjepanwa jan sinti usuntapkiti. Yaqhep markanakanjja, waljaniw kusisita, kʼumara jakasipjjaraki.

Kʼumaraskstansa janisa, taqeniw chuymankipstkasajj kusisit jakasiñ muntanjja. ¿Kunjamatsa ukham jakassna? Chuymankipstañar suma chuymampi uñjañäni ukat ukarjam lurarakiñänejja, kusisitaw jakasiñäni. Jumatï chuymanëjjsta ukhajja, Biblian aka ewjjtʼanakapaw yanaptʼiristam uk mä qawqha uñjañäni.

LLAMPʼU CHUYMANÏÑAMAWA. “Yatiñ kankañasti llampʼu chuymaninakamp chikawa.” (Proverbios 11:2.) Chuymankipstjjasin llampʼu chuymanïñajja, kuntï lurirjamäktan ukak luraña sañwa muni. Brasil markankir Charles sat chachajja, akham siwa: “Maynitï walja maranak jakjjchejja, awkiptjjewa. Janiw qhepar kuttʼkaspati” sasa, jupajj 93 maraniwa.

Ukampis llampʼu chuymanejja, janiw aynachtʼkiti, janirakiw akham amuykiti: “Wali chuymanëjjtwa janiw kunatakis askëjjti” sasa. Ukham amuyasajj llakisjjakispawa. Proverbios 24:10 qellqatajj akham siwa: “Tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” sasa. Yatiñani, llampʼu chuymanejja, kuntï lurirjamäki ukakwa luri.

Italia markankir Corrado sat chachajja, uka toqet amuytʼañatakejj akham siwa: “Saytʼat thaki pasañatakejj auto apirejj janiw kunjamtï pampan apki ukham apkaspati, mayjtʼayañapaw wakisi, jan uk lurkaspajja, autojj sayatatjjaspawa” sasa, jupajj 77 maraniwa. Maynejj chuymankipstjjasajja, ukhamarakiw amuyumpi sarnaqjjañapa. Jupasa, esposapasa uk lurañ yateqawayapjje, utanjja kuntï lurirjamäpki ukak lurapjje, ukhamatwa jan sinti qaripkiti. Brasil markankir Marian sat warmejja, ukhamwa luraraki, jupajj akham siwa: “Kʼachatakwa sarnaqta. Samartʼañ  munta ukhajja, samartʼastwa, jan ukajj liytʼañatakiw qontʼasta, awisajj musicsa istʼaraktwa. Qawqha lurirjamätsa uk amuyasisajja, ukarjamakiw lurta” sasa, jupajj 81 maraniwa.

AMUYTʼASIRÏÑAMAWA. “Warminakajj kunatejj isisiñäki ukak isisipjjpan; janirak sinti jiljañampisa.” (1 Timoteo 2:9.) ‘Isisiñäki ukak isisipjjpan’ sasinjja, amuyumpi sum isthaptʼasiña sañwa muni. Canadá markankir Bárbara sat warmejja, akham siwa: “Suma isthaptʼataw kawkirus sarta. Yaqhepajj ‘taykäjjtwa’ sasajj janiw sum isisjjapjjeti, nayajj janiw ukham amuykti” sasa, jupajj 74 maraniwa. Brasil markankir Fern sat mä warmejja, akham sarakiwa: “Sum jikjjatasiñatakejja, awisajj machaq isinaksa alasiraktwa” sasa, jupajj 91 maraniwa. ¿Chachanakajj kamsapjjarakisa? Brasil markankir Antônio chachajj akham siwa: “Qʼoma isimpi isthaptʼataw kawkirus sarta. Sum jareqtʼasiwayta, sapa ururakiw sunkhajsa khuchurtʼasta” sasa, jupajj 73 maraniwa.

Sum isthaptʼasiñajj walikïskiwa, ukampis amuytʼasirïñasawa. Corea del Sur markankir Bok-im sat warmejja, akham siwa: “Tawaqökasajj kuntï isiskayät ukjja, janiw isisjjeristi” sasa, jupajj 69 maraniwa.

KUSISITÄÑAMAWA. “Llakitäki ukatakejj taqe urunakasa jan walikamakiwa; khititejj kusisitäki ukatakisti jan tukuskiri kusisiñawa.” (Proverbios 15:15.) Kunjamsa waynäkasajj jan ukajj tawaqökasajj wal irnaqayäta ukanak amtasisajja, inas llakisjjakchïta. Kunanaktï nayrajj lurkayätan ukanakat sapa kuti lupʼiñajja, jukʼampikiw maynir llakisiyjjaspa. Kuntï lurirjamäkta ukanakatwa lupʼiñama. Canadá markankir Joseph sat chachajj ukhamwa luri, jupajj akham siwa: “Kuntï lurirjamäkta ukanak kusisitaw lurta, janiw kuntï jan lurirjamäjjta ukanak jan lurjjasajj llakiskti” sasa, jupajj 79 maraniwa.

Liyiñasa ukat yatjjatañasa, jan sinti aynachtʼañatakiw yanaptʼätam. Kunsa liytʼañamapuniwa ukat yateqañamarakiwa. Filipinas markankir Ernesto chachajja, bibliotecanwa liyiñatakejj suma libronak thaqti, jupajj siwa: “Kusiskañ sarnaqäwit liytʼasajj kusistwa, yaqha markarus viajkirista ukham amuyasta” sasa, jupajj 74 maraniwa. Suecia markankir Lennart sat chachajja, yaqha arwa yateqaski, jupajj 75 maranirakiwa.

WAJJTʼASIRÏÑAMAWA. “Churapjjam, jumanakarusti Diosaw churapjjätam.” (Lucas 6:38.) Mayninakampi parltʼasiñataki jan ukajj kun lurañatakis tiempo apstʼasïtajja, kusisitäyätawa. Brasil markankir Hosa sat warmejja, usutäkchi ukhas mayninakar yanaptʼañatakiw chʼamachasi, jupajj akham siwa: “Usuta amigonakajarojj telefonot jawsapuntwa jan ukajj mä cartsa qellqapuntwa.  Awisajj mä regalo apayta, jan ukajj manqʼwa phaytʼarapta” sasa, jupajj 85 maraniwa.

Wajjtʼasirïñajja, mayninakar wajjtʼasirïpjjañapatakiw yanaptʼi. Suecia markankir Jan sat chachajja, akham siwa: “Munasiñampi maynir uñjtan ukhajja, munasiñampiw uñjarakistu” sasa, jupajj 66 maraniwa. Ukajj cheqäskapuniwa. Wajjtʼasir jaqejj mayninakar wali sum uñji, ukatwa mayninakas jupampïsajj kusisitäpjje.

MUNASIRÏÑAMAWA. “Jupatakiki kuns munki ukajja, munañaparukiwa sarnaqe, ukatsti taqe suma amtäwinak contraw tuku.” (Proverbios 18:1.) Awisajj sapakïñ munasma, ukampis janiw sapakipuni kuns lurañamäkiti, ni utansa qheparañamäkiti. Nigeria markankir Innocent sat chachajja, akham siwa: “Kunayman marani jaqenakamp chikachasiñaw gustitu” sasa, jupajj 72 maraniwa. Suecia markankir Börje sat chachajja, akham sarakiwa: “Wayn tawaqonakampïñatakiw chʼamachasta, ukajj jupanakjam kusisitäñatakiw yanaptʼitu. Waynäkiristsa ukham jupanakampïsajj amuyasta” sasa, jupajj 85 maraniwa. Janiw mayninakan invittʼayasiñak suyañamäkiti, awisajj jumaw invittʼañama. Corea del Sur markankir Han-sik sat chachajja, akham siwa: “Esposajampejj kunayman marani amigonakaruw jawstʼapjjta; mä kun lurañatakisa jan ukajj manqtʼasiñatakisa” sasa, jupajj 72 maraniwa.

Kunjamas jikjjatasipjje ukjja, munasirinakajj awistʼasipjjewa. Ukhamajja, parltʼatajj sum istʼañama, mayninakatsa llakisiñamarakiwa. Mozambique markankir Helena sat warmejja, akham siwa: “Taqenir munasiñamp uñjañatakiw chʼamachasta. Kunsa amuyapjje, kunanak lurañsa munapjje uk yatiñatakejja, sum jupanakar istʼarakta” sasa, jupajj 71 maraniwa. Brasil markankir José chachajja, akham sarakiwa: “Sum istʼapkistu, jiwasat llakisipki, chuymachtʼkistu ukat kusisitäpki ukanakampïñjja, taqeniw muntanjja” sasa, jupajj 73 maraniwa.

“Parlatanakamasti sumäñapapuniwa” uk amtañamapuniwa (Colosenses 4:6). Suma arumpiw chʼamañchtʼañama.

YUSPÄRTʼASIRÏÑAMAWA. “Yuspagarapjjarakim.” (Colosenses 3:15.) Yanaptʼatajj yuspärañamawa. Yuspärtʼasirinakajja, taqenin munatawa. Canadá markankir Marie-Paule sat warmejja, akham siwa: “Esposojampejj jichhakiw yaqha utar sarjjapjjta. Yanaptʼirejj waljaniw jutapjjatayna. Yuspärañatakejja, sapa mayniruw mä jiskʼa qellqata apayapjjta, yaqheparojj utaruw manqtʼasiñatak jawstʼapjjarakta” sasa, jupajj 74 maraniwa. Corea del Sur markankir Jae-won sat warmejja, Jehová Diosan Testigopawa, jupajj tantachäwir jilat kullakanakapan irpatapatjja, wal yuspärtʼi. Jupajj akham siwa: “Nayar yanaptʼapjjatapat walpun yuspärta... Gasolinatakis mä jukʼa qollq churapuntwa. Awisajj yuspärtʼañatakejj kuna jiskʼa regalsa wakichtʼaraktwa mä jiskʼa qellqtʼatampi” sasa, jupajj 76 maraniwa.

Jakäwejj mä suma regalowa, ukatwa yuspärtʼañasa. Salomón reyejj akham sänwa: “Jiwat leonat sipana jakaskir anuwa askejja” sasa (Eclesiastés 9:4). Chuymankipstañar suma chuymampi uñjañäni ukat ukarjam lurarakiñäni ukhajja, kusisitakiw jakasiñäni.