1, 2. 1) Apóstol Pablojj jakkäna uka tiemponjja, ¿kunas jaqenakar llakisiyäna? 2) Apóstol Pablon arunakaparjamajja, ¿khitis cheqpachapun libre jakasiñ churistaspa?

ROMA markan jakasir jaqenakajja, leyinakarjam uñjatäsasa, cheqaparjam uñjatäsasa, libre jakasisasa, jachʼa jachʼaw tukupjjäna. Ukampis jupanakajj esclavonakar trabajiyasaw ukham jakapjjäna. Uka markanjja, sapa patakat 30 jaqenakaw esclavot trabajipjjäna. Ukatwa uka markan jakasir cristianonakarusa, yaqha jaqenakarus ukajj wal llakisiyäna.

² Apóstol Pablojj libre jakasiñ toqet walja kutiw qellqäna. Uka tiemponjja, jaqenakajj jan walinak askichañwa munapjjäna, sum jakasiñwa thaqapjjarakïna. Ukampis apóstol Pablojj janiw uk askichañ amtampi qellqkänti. Jan ukasti, Diosan Reinopata, Jesusan jiwas layku jiwatapajj kunjamsa yanaptʼistu ukanak yatiyañatakiw jupasa, mayni cristianonakas wal chʼamachasipjjäna. Kawkinsa cheqpachapun libre jakasiñ jikjjatapjjaspa ukwa cristiano masinakapar akham sasin qhanañchäna: “Jehová Diosajj Espirituwa, ukhamajj kawkjantï Jehová  Diosan espiritupajj utjki ukanjja, libre jakasiñaw utji” sasa (2 Cor. 3:17).

3, 4. 1) Apóstol Pablojj 2 Corintios 3:17 textot janïr qhanañchkasajja, ¿kuna toqetsa nayrïr versiculonakan parläna? 2) Jehová Diosat libre jakasiñ katoqasajja, ¿kunsa kusisit jakasiñatakejj lurañasa?

³ Apóstol Pablojja, Moisesajj Diosan angelapamp parlanisin Sinaí qollut saraqankäna ukhajj kunas pasäna ukwa corintonakar payïr cartapan qhanañchäna. Moisesan ajanupajj wal kʼajäna. Israelitanakasti jupar uñjasajj wal ajjsarayasipjjäna, ukatwa Moisesajj mä telampi ajanup imtʼasïna (Éx. 34:29, 30, 33; 2 Cor. 3:7, 13). Apóstol Pablojj uka toqet akham sasaw qhanañchäna: “Maynejj Jehová Diosan ukar kuttʼanjje ukhajja, telajj apaqatäjjewa” sasa (2 Cor. 3:16). ¿Ukampejj kamsañsa munäna?

⁴ Kunjamtï nayrïr yatichäwin yatjjataniwayktanjja, Jehová Diosakiw taqe kun Lurirïtap laykojj taqe kunats librejja. Ukhamajj Jehová Dios nayraqatansa, kawkjantï espiritupajj utjki ukansa, cheqapuniw libre jakasiñajj utji. Ukampis kusisita jakasiñatakisa libre jakasiñatakisa, Jehová Diosan ukaruw kuttʼañasa, mä arunjja, Jupampejj jukʼamp sumwa apasiñasa. Israelitanakajj wasaranjja, chuymanakapwa qalarayasipjjäna, janiw kunjamtï Diosajj munki ukham lurjjapjjänti. Amuyupasa chuymapas mä telampi tapantatäkaspas ukhamänwa. Diosat libre jakasiñ katoqasajj janiw sum sarnaqjjapjjänti, munañanakapampikiw apayasjjapjjäna (Heb. 3:8-10).

5. 1) Jehová Diosan espiritupajj ¿kunanakatsa qhespiyistu? 2) Esclavonakasa, carcelankirinakas librëpjjaspawa sasajj ¿kunatsa sissna? 3) ¿Kuna jisktʼanakarus qhanañchaskañäni?

⁵ Jan esclavöjjañat sipansa, Jehová Diosan espiritupajj libre jakasiñ churkistu ukaw jukʼamp wakiskirejja. Diosan espiritupaw juchatsa, jiwañatsa, falso religionatsa, costumbrenakapatsa qhespiyistu. Jaqenakajj janiw uk lurapkaspati (Rom. 6:23; 8:2). Esclavonakasa, carcelankirinakas librew jakasipjjarakispa (Gén. 39:20-23). Ukaw Harold King jilatampejj pasäna, jupajj walja maranakaw Diosar servitap laykojj carcelan jistʼantata uñjasïna. Uka experienciapjja, JW Broadcasting programanwa VIDEONAKA > ENTREVISTANAKAMPI EXPERIENCIANAKAMPI > KUNAYMAN JAN WALTʼÄWINAKANWA UÑJASIWAYAPJJE siski uka cheqar mantasin uñjsna. Jichhajj aka jisktʼanakar qhanañchañäni: ¿Kunjamatsa Diosajj libre jakasiñ churkistu uk wali valoranit uñjsna, ukat kun lurañatakis chʼamachasiñasa?

6. Jehová Diosat libre jakasiñ katoqasajja, ¿kunsa israelitanakajj lurapjjäna?

⁶ Maynejj wali valorani mä regalo churistu ukhajj wal yuspärtanjja. Israelitanakarojj Jehová Diosaw ukham suma regalo churäna, Egipto markan esclavöñatwa qhespiyäna. Ukampis jupanakajj janiw Jehová Diosar yuspärapkänti. Mä qhawqha phajjsinak pasjjäna uka qhepatjja, kuntï Egipto markan manqʼapjjerïkäna umapjjerïkäna ukanakwa wal munjjapjjäna. ‘Chawllasa, pepinonakasa, melonanakasa, puerronakasa, cebollanakasa, ajosanakasa inakiw utjäna, ukampis jichhajj manqʼatjamaw jiwarasktan, janirakiw kunas utjkiti, aka maná manqʼakiw utjaski’ sasaw sapjjäna. Libre jakasiñat sipansa, israelitanakajj Egiptoruw kuttʼañ munjjapjjäna, ukatwa Jehová Diosajj wal colerasïna (Núm. 11:5, 6, 10; 14:3, 4). ¿Kunsa ukat yateqsna?

7. 1) ¿Kunsa apóstol Pablojj 2 Corintios 6:1 textorjam luräna? 2) ¿Kunjamsa jiwasajj jupat yateqasiraksna?

 ⁷ Apóstol Pablojja, Jehová Diosajj Jesucristo taypi qhespiykistu uk wali valoranit uñjañatakiw cristianonakar chʼamañchistu (2 Corintios 6:1 liytʼañataki). Jupajja, juchampin jiwañampin esclavopäsajj wali aynachtʼatänwa. Ukampis akham sänwa: “¡Jesucristo Tatitus taypiw nayajj Diosar yuspärta!” sasa. ¿Kunatsa ukham sispachäna? Cristiano masinakaparojj akham sänwa: “Espíritu santon leyipaw jakañ churapjjtamjja, ukhamat Cristo Jesusamp mayaki jakapjjañamataki. Uka leyirakiw juchan leyipatsa jiwañan leyipatsa jumanakar salvapjjtamjja” sasa (Rom. 7:24, 25; 8:2). Jiwasarojj ukhamarakiw Jehová Diosajj juchan esclavopäñata, jiwañata salvistu, uk amtañasapuniwa. Jesusaw jiwas layku jiwawayi ukatwa Diosarojj qʼoma concienciani sirvtanjja (Sal. 40:8).

8, 9. 1) ¿Kunsa apóstol Pedrojj ewjjtʼäna? 2) ¿Kunanakatsa jichhürunakan wal amuyasiñasa?

⁸ Jehová Diosat libre jakasiñ katoqasajja, janiw yuspärañasakïkiti jan ukasti sum sarnaqañatakiw chʼamachasiñasa. Apóstol Pedrojj akham sänwa: “Librëpjjatam laykojj kunatï jan walïki ukjja jan lurapjjamti” sasa (1 Pedro 2:16 liytʼañataki). Uka ewjjtʼapajja, kuntï israelitanakajj wasaran lurapkäna ukwa amtayistu. Ukampis jiwasatakejj uka tiempot sipansa jukʼamp wakiskiriwa. Supayasa, jupan apnaqat akapachasa, cosasanaka, isinaka, manqʼaña, umaña, kusistʼañanaka ukat yaqha ukhamanakwa churañ munistu. Suma uñnaqtʼani jaqenakampiw ukanak alañasatakejj chʼamañchistu. Ukhamatwa Supayajj jan amuykañaki engañjistaspa, jan walinaksa librëtwa sasakiw lurjjsna.

⁹ Apóstol Pedron ewjjtʼapajja, estudiañ toqetsa, trabajiñ toqetsa, suma amtar puriñatakiw yanaptʼarakistu. Sañäni, wayn tawaqonakarojja, escuelankasipki ukhaw wali uñtʼat universidadan yateqapjjañapataki chʼamañchapjje. ‘Universidadar saräta ukhaw suma trabajonïsajj walja qollqe ganäta’ sasaw sapjje. Ukatakejj qhawqha qollqsa universidadar saririnakajj ganapjje, jan sarapki ukanakajj qhawqhaksa ganapjjaraki ukwa uñachtʼayapjje. Uk uñjañajja, wayn tawaqonakatakejj wali munañjamäspawa, ukampis kuntï amtapkani ukarjamaw walinsa jan walinsa uñjasipjjani. Ukhamajj ¿kunsa jupanakasa awk taykanakapas jan armapjjañapäki?

10. ¿Kunsa mä amtar purkasajj jan armañasäki?

¹⁰ Maynejj kunsa estudiani kunansa trabajini, uk amtañatakejj sapa mayniw librejja sasaw yaqhepajj amuyapjje, concienciaparjam walikïskchi ukhajj luraspawa sasaw sapjjaraki. Inas apóstol Pablojj kuntï Corinto markankirinakar manqʼañ toqet siskäna uk amtapjjchispa, jupajj akham sänwa: “Nayajj kun lurañatakis librëtwa, ukampis libre jaqëtaj laykojja janiw yaqhan concienciapampi juchañchatäñ munkti” sasa (1 Cor. 10:29). Cheqansa kunsa estudiañäni kunsa jakäwisampejj lurañäni uk amtañatakejj librëtanwa. Ukampis janiw taqe kunsa munañasarjam lurksnati uk janiw armañasäkiti. Ukatjja kuntï lurkañäni ukarjamaw walinsa jan walinsa uñjasiñäni. Apóstol Pablojj akham sänwa: “Taqe kunas walikïskiwa, ukampis janiw taqe kunas yanaptʼaskapuniti. Taqe kunas walikïskiwa, ukampis janiw taqe kunas chʼamañchaskiti” sasa (1 Cor. 10:23). Uka arunakajja, kunsa lurañäni uk amtkasajj janiw munañasak thaqañasäkiti ukwa amuytʼayistu.

11. ¿Kuna amtampis Diosajj juchampit jiwañampit salvistu?

¹¹ Apóstol Pedrojja, librëpjjatam laykojj kunatï jan walïki ukjja jan lurapjjamti sasinjja, kunsa lurañasäspa uk akham sarakïnwa: “Diosan esclavonakapjam jakapjjam” sasa. Ukhamasti Jehová Diosajja, jupar serviñasatakiw Jesús taypejj juchampit jiwañampit salvistu.

12. ¿Kunsa Noé chachampita familiapampit yateqsna?

¹² Diosat libre jakasiñ katoqasajja, Jupar serviñatakiw chʼamachasiñasa. Ukhamatwa akapachampisa ni munañasampisa apayaskañäniti (Gál. 5:16). Noé chachampita familiapampit amtañäni. Jupanakajj qʼañu juchanaka, jan walinak lurir jaqenak taypinsa jakasipkchïnjja, janiw jupanakjam sarnaqapkänti. ¿Kunas jupanakarojj yanaptʼäna? Kuntï Jehová Diosajj lurapjjañap maykäna ukwa taqe chuyma lurapjjäna. Noé chachasa familiapasa arca lurañatakiw chʼamachasipjjäna, jupanakatakisa uywanakatakisa manqʼwa imapjjäna, ukatjja jaqenakaruw Uma Juiciot yatiyapjjäna. Biblianjja “Noesti kunjämtejj Diosajj siskatayna ukhamwa taqe kunsa luräna” sasaw qhanañchi (Gén. 6:22). Ukham lurapjjatapatwa Noé chachasa familiapasa salvasipjjäna (Heb. 11:7).

13. ¿Jehová Diosajj kun lurañassa mayistu?

¹³ ¿Kun lurañassa Jehová Diosajj muni? Jesusan arkirinakapjamajj predikañasawa, ukwa Jehová Diosajj mayistu (Lucas 4:18, 19 liytʼañataki). Jichhürunakanjja, jilaparte jaqenakan amuyunakapajj Supayan chʼamaktʼayatawa. Ukatwa falso religionanakarusa politiconakarus jan amuyasis servipjje, cosasanaksa jan ukajj yänaksa jan tiemponi thaqapjje (2 Cor. 4:4). Ukampis jiwasajj Jesusan kayupwa arktanjja, jaqenakarus Diosar uñtʼapjjañapataki, servipjjañapatakiw yanaptʼtanjja (Mat. 28:19, 20). Uk lurañajj chʼamakiwa, awisajj jan walinakanwa uñjasiraktanjja. Yaqhep markanakanjja, jaqenakajj janiw Diosan arup istʼañ munjjapjjeti,  awisajj yamas wal colerasjjapjje. Niyakejjay Jehová Diosajj libre jakasiñ churchistojja, ¿kunsa Jupar jukʼampi serviñatakejj lursna?

14, 15. ¿Kun lurañsa Jehová Diosan walja servirinakapajj amtawayapjje? (Página 8 ukankir fotonak uñjjattʼäta).

¹⁴ Jehová Diosan walja servirinakapajja, akapachan tukusiñapajj wali jakʼankjjatap amuyasajj precursorat serviñwa amtapjje. Ukatakisti, kunatï wakiski ukampikiw jakasipjje (1 Cor. 9:19, 23). Yaqhepanakajj pachpa congregacionapanwa precursorat servipjje, yaqhepasti kawkjantï yatiyirinakajj munaski ukaruw sarapjjaraki. Aka qhepa phesqa maranakanjja, 250.000 jilat kullakanakaw precursorat serviñ qalltawayapjje. Jichhakamajja, 1.100.000 jilaw precursor regularanakajj aka oraqpachan utj-jje. Jehová Diosat libre jakasiñ katoqasajj Jupar serviñatakiw chʼamachasipjje, uk uñjañajj wali kusiskañawa (Sal. 110:3).

¹⁵ ¿Kunas uka jilat kullakanakarojj ukham amtapjjañapatak yanaptʼawayi? Kunas John jilatarusa Judith kullakarus yanaptʼatayna uk uñjañäni. Jupanakajj 30 maranakaw precursorat kunayman markanakan serviwayapjje. Jupanakajj akham sapjjewa: “Precursoranakatak Escuelajj 1977 maran qalltkäna ukhajja, yateqerinakarojj kawkjantï yatiyirinakajj wal munaski ukar sarapjjañapatakiw chʼamañchasirïna” sasa. Precursorat serviskakiñatakisa, kunatï wakiski ukampik jakasiñatakisa, John jilatajj walja kutiw trabajop jaytäna. Ukampis tiempompejja, yaqha markaruw predikir sarjjapjjäna. Ukanwa Jehová Diosar orasiñasa, confiyañasa kunjamsa yaqha aru yateqañatakisa, yaqha markan yatinoqtañatakis yanaptʼäna uk amuyapjjäna. ¿Jupanakajj uka toqet kamsapjjesa? John jilatajj akham siwa: “Jehová Diosaru ukan serviñajj wali kusiskañapunïnwa, janiw yaqhajj ukham utjkiti. Jehová Diosajj nayatakejj mä suma awkipuniwa, kuntï Santiago 4:8 texton siski uka arunak jichhaw sum amuyta. Ukan akham siwa: ‘Diosar jakʼachasipjjam, jupajj jumanakar jakʼachasirakiniwa’ sasa. Nayajj ukham jakasiñpunwa thaqaskayäta” sasa.

16. ¿Kunjamsa walja jilat kullakanakajj Diosar jachʼañchapjje?

¹⁶ Yaqhep jilat kullakanakajja, mä qhawqha tiempokiw precursorat servirjamäpjje. Ukampis yaqhepanakajja, Jehová Diosar serviñataki Utanakajj aka oraqpachan luraski ukanwa yanaptʼapjjaraki. Amuytʼañataki, 27.000 jilat kullakanakaw Warwick (Nueva York) markankir Betel uta lurañan yanaptʼawayapjje. Yaqhepajj pä semanaw yanaptʼapjjäna, yaqhepajj walja phajjsinaka, yaqhepasti mä mara, jan ukajj mä mara jilaw yanaptʼapjjarakïna. Jupanakat jilapartejj Diosar ukham serviñatakejj wal chʼamachasiwayapjje. Cheqas taqe jupanakaw Jehová Diosat libre jakasiñ katoqasajj Juparu jachʼañchapjje. Ukajj wali yateqaskayawa.

17. Jiwasatï Jehová Diosar taqe chuyma serviñäni ukhajja, ¿kunsa katoqañäni?

¹⁷ Jehová Diosat libre jakasiñ katoqatasatsa, Jupar uñtʼatasatsa walpun yuspärtanjja. Ukham libre jakasiñajj kunja wakiskirisa ukjja, suma amtanakar purisaw uñachtʼaytanjja. Janiw librëtwa sasakejj jan walinak lurañasäkiti, jan ukasti Diosar serviñatakiw chʼamachasiñasa. Ukhamtï lurañänejja, kuntï churapjjämaw siskistu ukwa katoqañäni. Jupajj akham sistuwa: “Diosan luratanakapajj tukusir cuerpon esclavopjam jakañatjja, librëjjapjjaniwa, Diosan wawanakapjamaw libre jakapjjarakini” sasa (Rom. 8:21).