1-3. 1) ¿Kunjamanakansa wayn tawaqonakajj uñjasipjje, ukat kuna uñachtʼäwimpis uk qhanañchtʼsna? (Aka paginankir foto uñjjattʼäta). 2) Jan walinakan uñjasipjjani ukhajja, ¿kunas cristiano wayn tawaqonakar yanaptʼaspa?

MÄ WALI wakiskir tantachäwirus jaya markar sarañamäkasma ukham amuytʼañäni. Autonakajj mistki ukar purisajj walja jaqenak uñjtajja, autonakas waljarakiwa, uk uñjasajj janiw kawkirus sarirjamäktati. Ukampis kawkirutï sarañamäki uk sum yatisajja, kawkïr autotï ukar apkiristam ukwa thaqtajja, janiw yaqha cheqar sariri autorojj makatkasmati.

² Jakäwejja, yaqha markar sarañampi sasiwa, wayn tawaqonakasti, kawkjattï autonakajj mistupki ukankir jaqenakjamäpjjewa. Niyakejjay jupanakajj walja amtanakar puripjjañapächejja, awisajj jan kun lurirjamaw amuyasipjjaspa. Ukampis kunsa lurañ munapjje uk sum yatipjje ukhajja, suma amtanakaruw puripjje.

³ Aka yatichäwejja, Jehová Diosar serviñ nayrar uchapjjañapatakiw wayn tawaqonakar yanaptʼani. Jupanakatï Diosatakjam sarnaqañ munapjjchi ukhajja, kunsa estudiapjjani, kunansa trabajipjjani, casarasipjjaniti janicha, wawanïpjjaniti janicha ukanak amtañatakejj Jehová Diosan ewjjtʼanakaparjamaw lurapjjañapa.  Diosar jukʼamp serviñatak amtanïpki uk phoqañatakis chʼamachasipjjañaparakiwa. Jehová Diosar serviñ nayrar uchapki uka wayn tawaqonakajja, walja bendicionanakwa katoqapjjani, jakäwipansa suma amtanakaruw puripjjani (Proverbios 16:3 liytʼañataki).

4. ¿Kunanakatsa aka yatichäwin yatjjataskañäni?

⁴ Wayn tawaqo, ¿kunatsa Jehová Diosar jukʼamp serviñ amtañama? Ukwa aka yatichäwin kimsa toqet uñjaskañäni. Mayïrimpi payïrimpejja, Jehová Diosar jukʼamp serviñatak chʼamachasiñajj kunjamsa Jupan suma amigopäñatak yanaptʼiristam ukwa qhanañchaskani. Kimsïrinsti, wayn tawaqökasin Jehová Diosar jukʼamp serviñ amtañajj kunatsa wakisi uk amuytʼañatakiw yanaptʼarakïtam.

5. ¿Kunatsa Jehová Diosar jukʼamp serviñ amtañama?

⁵ Maya. Jehová Diosajj qhawqsa jumar munastam, kunanaktï juma layku lurawayki ukanakat yuspärañatakiw Jupar jukʼamp serviñ amtañama. Diosan mä serviripajj akham sänwa: “Alajjpachankir Tatay, jumar jachʼañchañajj sumapuniwa” sasa. Ukatsti akham sarakïnwa: “Tatay, luräwinakamajj nayatak kusisiñawa, luratanakamajj kusisiñampiw phoqtʼitu” sasa (Sal. 92:1, 4). Wayn tawaqonaka, kunsa Jehová Diosajj churapjjtam uka toqet amuytʼapjjam, Jupaw jakañsa, cheqa yatichäwinaksa, Arupsa, jilat kullakanaksa, jutïritak mä suma suytʼäwsa churistu, Jupar uñtʼañatakis yanaptʼarakistuwa. Diosar serviñatï jumatak nayrankani ukhajja, janiw aleqak yuspärkätati, jan ukasti jukʼampiw Jupar jakʼachasïta.

6. 1) ¿Kunatakis Diosar jukʼamp serviñ amtañajj yanaptʼätam? 2) Waynitükasa, jan ukajj tawaqetäkasajja, ¿kunanak lurañsa amtasma?

⁶ Paya. Jehová Diosar jukʼamp serviñ amtatamajja, Diosatakejj wali askiwa, Jupar jukʼampi jakʼachasiñatakis yanaptʼaraktamwa. Apóstol Pablojj akham sänwa: “Diosajj cheqapar uñjir Diosawa, jupajj janiw luratanakamatsa ni sutipar munasipjjatamatsa armaskaniti” sasa (Heb. 6:10). Cheqas taqeniw Diosar jukʼamp serviñ amtapjjaspa. Amuytʼañataki, Christine kullakitajj 10 maranïkasaw Diosar jan jitheqtas serviri jilat kullakanakan experiencianakap liytʼañ amtäna. Toby jilatajja, 12 maranïkasaw janïr bautisaskasajj Biblia phoqatpach liytʼañ amtäna. Maxim jilatasti, 11 maranïkäna ukhaw 10 marani Noemi kullakapampejj bautisasipjjäna. Ukatjja, panpachaniw Betelan serviñ amtapjjäna. Jan armasiñatakejja, uta perqaruw Betelar sarañatak solicitud papel lipʼkatayapjjäna. ¿Jumajj kun lurañsa amtarakta, uka amtam phoqañatakejj janit chʼamachaskarakisma? (Filipenses 1:10, 11 liytʼañataki).

7, 8. 1) Jehová Diosar jukʼamp serviñ amtañajj ¿kunjamsa suma amtanakar puriñatak yanaptʼiristam? 2) ¿Kunatsa mä tawaqetajj universidadar jan sarkäna?

⁷ Kimsa. Jehová Diosar jukʼamp serviñ amtañajja, waynäkasa, jan ukajj tawaqökasajj kunsa estudiäta, kunansa trabajïta, jan ukajj yaqha ukham amtanakar puriñatakiw yanaptʼätam. Mä amtar puriñajja, pä thakejj crusjaski ukar purisin kawkïr thaknämsa saräta uk ajlliñampi sasiwa. Kawkirus sarañama uk sum yatïta ukhajja, kawkïr thaknämsa sarañama uk sum ajllïta. Jakäwiman kuns luräta uk sum yatsta ukhajja, ukhamarakiw suma amtanakar purïta. Proverbios 21:5 textojj akham siwa: “Suma amuytʼampi kuna amtäwinaka wakichatasa sumakiwa phoqhasi” sasa. Jumatï Diosar jukʼamp serviñ jankʼak amtätajja, jankʼakirakiw bendicionanak katoqäta. Damaris tawaqetajj ukhamwa luräna.

⁸ Damaris tawaqetajja, suma notanakaniw colegio tukuyäna. Ukhamïpansti, universidadan abogadatak estudiañapatakiw mä beca  churañ munapjjäna. Ukampis jupajja jukʼa qollqe ganañ trabajokwa ajllïna. ¿Kunatsa? Jupajj akham siwa: “Nayajj precursoräñwa munayäta. Ukatakejj janiw jurnälpach trabajiñajäkänti. Abogadañataki estudieriskäyäta ukhajja, walja qollqwa ganiriskäyäta, ukampis uru jornal trabajiñajaw wakisispäna” sasa. Kullakajja, 20 maranakaw jichhakamajj precursorat serviski. Ukham amtatapat janiw arrepentiskiti. Jupajj akham siwa: “Trabajojanjja, walja abogadonakaruw uñtʼta, nayatï abogadañatak estudieriskäyäta ukhajja, jupanakjamaw trabajiriskayäta. Ukampis jupanakat waljanejj janiw trabajopampejj kusisitäpkiti. Nayajja, Diosar precursorat walja maranaka servisajj wali kusisitätwa” sasa.

9. ¿Kunatsa wayn tawaqonakar chʼamañchtʼañasa?

⁹ Aka oraqpachanjja, walja wayn tawaqonakaw Jehová Diosar jukʼamp serviñ amtasajj taqe chuyma servisipki. Ukatwa ‘walik ukham lurapjjtajja’ sasin chʼamañchtʼañasa. Ukham servisajj kusisitaw jakasipjje, Diosan Aruparjam sarnaqañsa yateqapjjarakiwa. Sañäni, kunsa estudiapjjani, kunansa trabajipjjani, familianïpjjaniti janicha uka toqenakat sum amuytʼasipjje. Salomón reyejj akham sänwa: “[Jehová] Tatitur taqe chuymamampi katuyasim [...]. Taqe luräwinakamanjja Tatitutjja amtasipunim, ukatsti jupajj cheqa thakinjamwa irpaskätam” sasa (Prov. 3:5, 6). Jehová Diosatakejja, wayn tawaqonakajj wali wakiskirïpjjewa. Jupajj wal jupanakar munasi, ukatwa yanaptʼi, bendisi, jan walinakatsa jarkʼaqaraki.

10. 1) ¿Kunatsa yatiyañatak jukʼamp chʼamachasiñama? 2) ¿Kunas Diosan arunakap jukʼamp sum yatiyañatak yanaptʼiristam?

¹⁰ Mä waynatï jan ukajj tawaqotï Jehová Diosatakjam sarnaqañ munchi ukhajja, arunakap yatiyañatakiw jukʼamp chʼamachasiñapa. Jesucristojj uka toqet akham sänwa: “Nayraqatajj taqe markanakanwa suma yatiyäwinakajj yatiyasini” sasa (Mar. 13:10). Kunjamtï uñjktanjja, predikañaw jiwasatakejj nayrankañapa. Ukhamajja, wayn tawaqo ¿Diosan arunakap jukʼamp yatiyañatakejj janit chʼamachaskasma, janit precursorat sirvkasma? Predikañajj jumatak chʼamakïchi ukhajja, ¿kunsa lurasma? ¿Kunas jukʼamp sum yatiyañatakejj yanaptʼiristam? Ukatakejja, sum wakichtʼasiña, kunanaktï Diosat yatkta uk yaqhanakar yatiyaskakiñaw yanaptʼiristamjja. Diosan arunakap ukham yatiyasajj kusisitaw jakasïta.

11, 12. 1) ¿Kunjamsa wayn tawaqonakajj yatiyañatak wakichtʼasipjjaspa? 2) ¿Kunjamsa mä wayna jilatajj escuelapan Diosan arunakap yatiyäna?

¹¹ Nayraqatajj kunanaktï yateqer masinakamajj jisktʼapkiristam ukanakar qhanañchtʼañatakiw wakichtʼasisma. Inas jupanakajj ¿kunatsa Diosar creyta? sasin jisktʼapjjeristam. Ukatakejja, Internetan jw.org cheqaruw ENSEÑANZAS BÍBLICAS > JÓVENES > PONLO POR ESCRITO siski ukar español arut mantasma. Ukanwa wayn tawaqonakatakejj walja yanaptʼanakajj utji. “¿Qué razones tengo para creer en Dios?” sat pʼeqeñchäwini mä hojas phoqantañatakejj utjarakiwa. Ukanjja, Hebreos 3:4, Romanos 1:20, Salmo 139:14 textonakaw utjaraki. Ukanakamp yanaptʼayasisaw jisktʼapar qhanañchtʼasma. Yaqha jisktʼanakar qhanañchañatakis uka pachpanwa yaqha hojanakajj utjaraki (1 Pedro 3:15 liytʼañataki).

¹² Yateqer masinakamampi parlañjamäkani ukhajja, Internetan jw.org cheqar mantapjjañapatakiw chʼamañchtʼasma. Luca sat jilatajj ukwa luräna, escuelapan religionanakat parlasipkäna ukhajja, kawkïr librottï yateqasipkäna ukajj janiw Testigonakat yaqhep cheqajj sum parlkänti. Uk uñjasajja, kunatsa ukajj jan cheqäki uk qhanañchtʼañatakiw profesorapar  permiso mayïna. Ajjsartʼayaskchïnsa, nayraqatat taqeniruw qhanañchäna, ukatsti Internetan jw.org cheqwa uñachtʼayarakïna. Profesorajja, Kunjamsa jan nuwasisajj jarkʼaqasisma sat video utanakapan uñtapjjañapatakiw yateqerinakar mayïna. Luca sat jilatajj walpun ukham lurasajj kusisïna.

13. ¿Kunatsa jan walinak utjkipansa jan aynachtʼasa yatiyaskakiñama?

¹³ Amtanakam phoqañajj inas awisajj chʼamächini, ukhamäkchini ukhasa janiw aynachtʼañamäkiti (2 Tim. 4:2). Katharina kullakajj ukwa luräna. 17 maranikäna ukhajja, taqe trabajir masinakapar predikañwa amtäna. Jupanakat maynejj walja kutiw jan wali arunak parlas ajjsarayañ munäna. Ukampis kullakajj janiw aynachtʼkänti. Uk uñjasajja, Hans sat trabajiri masipajj wal musparäna. Bibliat apstʼat qellqatanak leyiñsa qalltarakïnwa, maynimpi Bibliat yatichayasisajj bautisasjjänwa. Katharina kullakajj yaqha cheqar sarjjatap laykojj janiw uk yatkänti. 13 maranak pasatatjja, kullakajj familiapampiw Tantachasiñ Utankaskäna, ukanwa Hans jilatajj mä discurso arstʼäna. Jupajja, Katharina kullakan Diosan arunakap jan aynachtʼasa yatiyatap laykuw Diosar uñtʼäna.

14, 15. 1) Masinakamajj jan walinak lurayañ munapjjeristam ukhajja, ¿kunatakis chʼamachasiñama? 2) Mayninakajj jan walinak lurayañ munapjjätam ukhajja, ¿kunsa lurasma?

¹⁴ Akhakamajja, kunjamsa Diosar serviñ nayrar uchasma, Jupar jukʼamp serviñatakis chʼamachasisma ukatakiw aka yatichäwejj yanaptʼtamjja. Inas masinakamajj kusistʼañaru sapakuti sarapjjchi, jan ukajj invitapjjarakstam. Ukampis amtanakam phoqañajj jumatak kunja wakiskirisa uk mayninakajj amuyapjjaniwa. Inas jupanakajj jan walinak lurayañ munapjjchïtam ukampis amtanakam phoqañatakiw chʼamachasiñama. Qalltan parlaniwayktan uka uñachtʼäwit amtañäni. Maynejj janiw jaqenakar mä auton kusistʼaskir uñjasakejj yaqha cheqar sarkipansa makatkakispati ¿janicha?

¹⁵ Masinakamatï jan walinak lurayañ munapjjeristam ukhajja, ¿kunsa lurasma? Kunanakatï jan walinakar purtʼaykiristam ukanakat  amuyasiñamawa (Prov. 22:3). Jan walinak lurasajj kuna jan walinakansa uñjasisma ukanakatsa amuytʼañamarakiwa (Gál. 6:7). Sapamakejj janiw jan walinakar atipjkasmati uksa amtañamarakiwa. Humilde chuymaniyäta ukhajja, awk taykamana, jilat kullakanakan ewjjtʼanakap taqe chuymaw istʼäta (1 Pedro 5:5, 6 liytʼañataki).

16. Humilde chuymanïñajj kunatsa wali wakiskiri uk mä experienciampi qhanañchtʼma.

¹⁶ Christoph jilatat jichhajj parltʼarakiñäni. Jupajj humilde chuymanïnwa, ewjjtʼanaksa katoqasirakïnwa. Bautisasjjäna uka qhepatjja, gimnasioruw sarañ qalltäna. Ukanwa wayna masinakapajj anatañataki mä grupon (club deportivo) qellqayasiñapataki mayipjjäna. Jupasti, mä jilïr irpir jilataruw uk yatiyäna. Janïr uka grupor qellqayaskasajja, kuna jan walinakansa uñjasispa, kunjamsa ukajj mayninakar atipañ munañaru tukuyaspa ukanakat sum amuytʼasiñapatakiw ewjjtʼäna. Ukham ewjjtʼatpachasa, jilatajj uka grupor qellqayasïnwa. Qhepatakwa uka anatañajj kunja jan walisa, kuna jan walinakarus puriyaspa uk amuyasïna. Ukatwa walja jilïr irpirinakamp parläna, jupanakajj Bibliarjamaw ewjjtʼapjjäna. Jilatajj akham siwa: “Jehová Diosaw uka jilatanakarojj nayar ewjjtʼañapatak khitanïna. Janis qalltan jupanakar istʼkchiyätjja, qhepat istʼjjayätwa” sasa. ¿Jumajj ewjjtʼanakar istʼañatak humilde chuymanirakïtati?

17, 18. 1) ¿Wayn tawaqonakan kunjam jakasipjjañapsa Jehová Diosajj muni? 2) Jan qhepat arrepentisiñatakejja, ¿kunsa wayn tawaqökasin lurañama? Uk mä experienciamp qhanañchtʼma.

¹⁷ Wayn tawaqonaka, Jehová Diosajj akham sapjjtamwa: “Jumajj wayna [jan ukajj tawaqo] kusisim, wayna kankañamana; kʼuchiki sarnaqarakim waynäkasina” sasa (Ecl. 11:9). Jupajj kusisitäñamwa muni. Kunjamtï aka yatichäwin uñjawayktanjja, Diosaru jukʼamp serviñ amtasa, taqe kunansa Jupan ewjjtʼaparjam sarnaqasaw kusisitäsma. Ukanaktï wayn tawaqökasin jankʼaki amtäta ukhajja, jankʼakirakiw Jehová Diosan yanaptʼapsa, bendicionapsa katoqäta, kunjamsa jan walinakat jarkʼaqtam uksa amuyarakïtawa. Diosajj walja ewjjanakwa Biblia toqejj churistu, ukanakat amuytʼañamawa. Bibliajj “waynäkasina jumar irnoqer [jan ukajj lurir] Diosamat amtasim” siski uka arunakarus istʼañamarakiwa (Ecl. 12:1).

¹⁸ Waynäñas tawaqöñas tiemponikiwa, maranakas ratukiw pasi. Waljanejj chuymanëjjasakiw ‘kunatsa Diosar serviñ nayrajj jan amtkäyäta’ sasin sapjje. Ukampis Diosar jukʼamp serviñ amtir wayn tawaqonakajj janiw ukham arrepentisipkaniti. Mirjana kullakajj kuntï amtkäna ukat janiw arrepentiskiti. Tawaqetäkasajj suma anattʼirïnwa, ukatwa walja markanakat jutasin anatapkäna ukan anatañapatak invitapjjäna. Ukampis jupajj precursorat serviñwa ajllïna. Jichhakamajj 30 marats jilaw precursorat esposopampi servisipki. Jupajj akham siwa: “Taqen uñtʼatäñasa, munañanïñasa, walja qollqe ganañasa mä jukʼa tiempotakikiwa. Ukampis Diosar serviña, mayninakar Diosar uñtʼapjjañapatak yanaptʼañaw jukʼamp wakiskirejja” sasa.

19. Wayn tawaqonaka, Diosar jukʼamp serviñ amtapjjäta ukhajj ¿kuna bendicionanaksa katoqapjjäta?

¹⁹ Jehová Diosar jukʼamp serviñ amtawayapki uka wayn tawaqonakarojj ‘walik ukham lurtajja’ sasaw chʼamañchtʼañasa. Jupanakajj Diosar jukʼamp serviñatakiw jan walinakan uñjaskasas chʼamachasipjje, predikañaw jupanakat nayranki, akapachampi jan apayasiñatakisa wal chʼamachasipjjaraki. Wayn tawaqonaka, ukham chʼamachasipjjatamajj janiw inamayäkaniti, jilat kullakanakajj wal munasipjjtam yanaptʼañsa munapjjaraktamwa. Jumanakatï ‘taqe luräwinakam Jehová Diosan amparapar jaytapjjäta ukhajja, amtäwinakamajj phoqasiniwa’ kusisitaw jakasipjjarakïta.