1. Efesios 6:10-13 qellqatarjamajja, ¿kunjamsa Jehová Diosajj jiwasat llakisitap uñachtʼayistu?

ENEMIGONAKASAR saykatañatak yanaptʼasaw Jehová Diosajj jiwasat llakisitap uñachtʼayistu. Taqe enemigonakasatjja, Supayampi demonionakampiw jukʼamp uñisipjjestu. Uka enemigonakasajj kunja jan walinakäpjjesa, kunjamsa jupanak contra saytʼassna uk qhanwa Diosajj yatichistu (Efesios 6:10-13 liytʼañataki). Jiwasatï Jupamp yanaptʼayasiñäni, taqe chuym confiyarakiñäni ukhajja, Supayar saykatañäniwa. Apóstol Pabljamarakiw akham sañäni: “Diosatejj jiwasampïchejja, ¿khitirak jiwas conträspasti?” sasa (Rom. 8:31).

2. ¿Kunsa aka yatichäwin yatjjataskañäni?

² Cheqpach cristianonakajja, janiw Supayatsa demonionakatsa jukʼamp yatiñar uchasktanti. Antisas Jehová Diosar sum uñtʼañataki, serviñatakiw chʼamachastanjja (Sal. 25:5). Ukampis Supayamp jan engañjayasiñatakejja, kunanaksa jupajj luri uk yatiñasawa (2 Cor. 2:11, nota). Aka yatichäwinjja, kunjamsa Supayasa demonionakas jaqenakar engañjapjje, kunjamsa jupanakar atipjsna ukwa yatjjataskañäni.

3, 4. 1) Espiritismo sasinjja, ¿kunanakatsa parlasktanjja? 2) ¿Qhawqha jaqenakarus Supayajj engañjaski?

³ Supayampi demonionakampejj espiritismo sasin uñtʼatäki uka toqew jaqenakar jukʼamp engañjapjje. Demonionakamp parlir jaqenakajja, “kuntï jaqenakajj jan yatipki,  jan lurapkarakispa ukwa nanakajj lurapjjerista” sasaw sapjje. Sañäni, yatirinakasa astrologonakasa, “kunas jutïrin pasani uk yatipjjeristwa” sasaw sapjje. Yaqhepasti, jiwatanakampis parlapkaspa ukhamwa lurapjje. Yaqhanakajj jaqenakaruw layqantañ yatipjjaraki. *

⁴ ¿Qhawqhanirus Supayajj uka trampapamp engañjpacha? Latinoamérica ukhamarak Caribe cheqankir 18 markanakan jisktʼaskäna ukarjamajja, sapa kimsanit mayniw magianak lurañarusa layqasiñarus creyïna. Niya ukhanirakiw “jiwatanakamp parlsnawa” sasin sapjjäna. África cheqankir 18 markanakan jisktʼaskäna uka jaqenakatsti, niya chikat jilaw layqasiñar creyipjjäna. Ukhamajj kawki markansa jakstanjja, Supayan trampanakapat wal amuyasiñasawa, jupajj ‘taqe aka oraqen jakirinakaruw engañjañ’ muni (Apoc. 12:9).

5. ¿Kunjamsa Diosajj layqasiñarusa yaqha ukhamanakarus uñji?

⁵ Jehová Diosajj ‘cheqa Diosawa’ (Sal. 31:5). Ukatwa taqe layqasiñanaksa, magianak lurañsa, yaqha ukhamanaksa uñisi. Israelitanakarojj akham sänwa: ‘Jan jumanakat kawkïris sacrificiot ninar nakhantayasa loqtapjjamti wawanakamaru, janiraki yatiri jaqes tukupjjamti, janiraki jutkan uka urunakat yatjjatañarusa uchasipjjamti, janiraki layqanakasa tukupjjamti. Janiraki kʼarimpi lunthatirinakarus jisktʼasipjjamti, ni yatir layqa jaqerusa, janiraki chʼamakaninakarusa, ni jiwatanakarus jisktʼasipjjamti. Tatitu Diosamarusti, kawkïri jaqenakatejj ukham lurapki ukanakajj ajjtasiyapjjewa’ sasa (Deut. 18:10-12). Moisesan Leyiparjam sarnaqañasajj janis wakisjjchejja, Diosajj kunjamsa layqasiñarusa yaqha ukhamanakarus uñji uk yattanwa (Mal. 3:6).

6. 1) ¿Kunjamsa Supayajj espiritismo toqejj jaqenakar jan walinak luri? 2) Eclesiastés 9:5 qellqatarjamajja, ¿jiwatanakajj kunjamäsipkisa?

⁶ Supayajj espiritismo toqew jaqenakar kunayman jan walinak luri. Sañäni, uka toqew “jiwatanakajj yaqha cheqanwa jakasipkaki” siski uka yatichäwsa, yaqha ukham kʼarinaksa yatichi (Eclesiastés 9:5 liytʼañataki). Uka toqerakiw jaqenakarojj Diosat jitheqtayi, ajjsarayaraki. Ukatwa Diosajj “ukanak jan lurapjjamti” sasin sistu. Ukanak luririnakajj Jehová Diosar confiyañat sipansa demonionakar confiyapjjaspa ukwa Supayajj muni.

7. ¿Kunsa Jehová Diosajj yatichistu?

⁷ Kunjamtï yateqawayktanjja, Supayampi demonionakampejj kuna jan walinaksa lurapjje uk qhanwa Jehová Diosajj yatichistu, ukhamat jupanakamp jan engañjayasiñataki. Jupanak contra saytʼasiñatakejj kunanaksa lursna uk jichhajj uñjañäni.

8. 1) Taqe kunat sipansa, ¿kunas demonionakamp jan engañjayasiñatak yanaptʼistani? 2) Supayajj jiwañat yatichki ukajj kʼariwa, ¿kunjamsa Salmo 146:4 qellqatajj uk uñachtʼayi?

⁸ Diosan Arup liyipjjañäni lupʼipjjarakiñäni. Ukaw taqe kunat sipansa demonionakamp jan engañjayasiñatak yanaptʼistani. Diosan Arupajj mä ari espadamp sasiwa, ukaw Supayan kʼari yatichäwinakapar saykatañatak yanaptʼistani (Efes. 6:17). Sañäni, jiwatanakajj janiw jakirinakamp parlapkaspati  sasin qhanwa Bibliajj yatichistu (Salmo 146:4 liytʼañataki). Jutïrin kunas pasani uksa Jehová Diosakiw yatispa sasaw yaticharakistu (Is. 45:21; 46:10). Jiwasatï Diosan Arupa sapür liyiñäni, lupʼirakiñäni ukhajja, Supayan kʼari yatichäwinakapampi jan engañjayasiñatakisa, uka yatichäwinakar uñisiñatakis wakichtʼatäñäniwa.

9. ¿Kunanak lurañas Supayampi demonionakampi mitisiñar apistaspa?

⁹ Kunanakatï demonionakamp mitisiñar apkistaspa ukanak janipun lurapjjañäniti. Cheqpach cristianonakajj janipuniw chʼamakaninakan ukar sarktanti, ni jiwatanakampis parlktanti. Kunjamtï pasïr yatichäwin yatjjatawayktanjja, “jiwatanakajj jakasipkakiwa” sasin lurapki uka costumbrenak janiw lurktanti. Janirakiw astrología toqesa ni yatirinakar sarasas kunas jutïrin pasani uk yatiñar uchasktanti (Is. 8:19, NM). Janipuniw ukanaksa ni yaqha ukhamanaksa lurañ munktanti. Ukanak lurañajj kunayman jan waliruw puriyistaspa, Supayampi demonionakampi mitisiñaruw aparakistaspa.

10, 11. 1) Diosar uñtʼjjasajja, ¿kunsa Éfeso markankirinakat yaqhepajj lurapjjäna? 2) 1 Corintios 10:21 textorjamajja, ¿kunatsa nayrïr cristianonakat yateqasiñasa, ukat kunsa jupanakat yateqasisajj lurañasa?

¹⁰ Kunanakatï demonionakamp mitisiñar apkistaspa ukanak apanukupjjañäni. Nayrïr patak maranakanjja, Éfeso markankirinakat yaqhepajj magianak luririnakäpjjänwa. Ukampis Diosar uñtʼjjasajja, uka lurañanak apanukjjapjjänwa. Bibliajj akham siwa: “Khitinakatï magianak lurirïpkäna ukanakatjja, waljaniw libronakap mayar apthapisajj taqe jaqenak nayraqatan phichantapjjäna” sasa (Hech. 19:19). Uka cristianonakajj jankʼakiw jan wali luräwinak apanukupjjäna. Magiat parlir libronakapajj wali jila alanïkchïnsa phichantapjjänwa, janiw regalapkänti ni aljapkänsa. Libronakapat  sipansa, Jehová Diosamp sum apasiñaw jupanakatakejj jukʼamp wakiskirïna.

¹¹ ¿Kunsa uka cristianonakat yateqassna? Jichhürunakanjja, jaqenakajj kunaymaninakwa suertenïñatakisa, jan walinakat jarkʼaqasiñatakis apnaqapjje. Jiwasantï ukanakajj utjchistojja, apanukjjañasawa (1 Corintios 10:21 liytʼañataki).

12. ¿Kunanaksa jisktʼasiñasa?

¹² Kusistʼañanak sum ajllipjjañäni. Akham jisktʼasiñasawa: “Liykta uka libronakasa, revistanakasa, Internetan kuntï liykta ukasa, ¿layqasiñanakata, magiata, yaqha ukhamanakatti parli? ¿Istʼkta uka musicanakasa, televisionan uñchʼukkta uka programanakasa, peliculanakasa, anatkta uka videonakas walikïskiti? Jan ukajj ¿vampironakata, jiwatanakata, yaqha ukhamanakatcha parli?” sasa. Cheqas janiw taqe peliculanakasa cuentonakas jan walïkapuniti. Ukampis kuntï Diosajj uñiski ukanakampejj janipuniw anatañsa ni kusistʼañsa munktanti. Jan ukasti, Dios nayraqatan qʼoma conciencianïñatakiw chʼamachastanjja (Hech. 24:16). *

13. ¿Kunsa jan lurañ munktanjja?

¹³ Demonionakat parlir cuentonak jan parlapjjañäniti. Ukatakejj Jesusatwa yateqasiñasa (1 Ped. 2:21). Alajjpachanjja, Jesusajj niya taqe kunwa Supayatsa demonionakatsa yatïna. Ukampis aka oraqenkkäna ukhajja, janiw jupanakat parlas sarnaqkänti, antisas Jehová Diosat yatichañatakiw chʼamachasïna. Jiwasajj ukhamarakiw kunanaksa demonionakajj lurapjje uk jan parlktanti. Jan  ukasti, ‘kunatï sumäki’, mä arunjja, Diosan cheqa yatichäwinakapatwa kusistanjja, ukwa parlaraktanjja (Sal. 45:1, NM).

14, 15. 1) ¿Kunatsa demonionakar jan ajjsarañasäki? 2) Jehová Diosajj servirinakapar jarkʼaqaskatapjja, ¿kunjamatsa yattanjja?

¹⁴ Demonionakar jan ajjsarapjjañäniti. Akapachanjja, taqeniw jan walinakan uñjassna. Mä akatjamatwa mä accidentensa, usuntatasa, jan ukajj jiwatas uñjassna. Ukhamanakan uñjasisajja, ¿“demonionakaw uk lurpachïtu” sasat amuyañasa? Bibliajj akham siwa: “Jan waltʼañajj taqeniruw puri” sasa (Ecl. 9:11). Jehová Diosajj demonionakat sipans jukʼamp chʼamaniwa. Amtañäni, Supayajj Job chachar jiwayañ munkäna ukhajja, Diosajj janiw permitkänti (Job 2:6). Moisesan urunakapansti, Egipto markankir jachʼa yatiri jaqenakat sipansa, jukʼamp chʼamanïtapwa Diosajj uñachtʼayäna (Éx. 8:18; 9:11). Walja maranak qhepatjja, Diosat chʼama katoqasajj aka oraqeruw Jesusajj Supayarusa demonionakarus jaqoqanïna. Niyarakiw jupanakarojj mikʼayar jaqontani, ukan janiw khitirus jan walinak lurjjapjjaniti (Apoc. 12:9; 20:2, 3).

¹⁵ Jichhürunakan kunjamsa Jehová Diosajj servirinakapar jarkʼaqaski ukajj kunayman toqetwa uñjasi. Sañäni, aka oraqpachanwa Diosan arunakap yatiytanjja, yaticharaktanjja (Mat. 28:19, 20). Ukham lurasajja, Supayan jan wali luratanakapwa qhanstaytanjja. Jupatï lurirjamäspajja, predicañ jarktʼaspawa, ukampis janiw uk lurañ puedkiti. Ukhamajj janiw demonionakar ajjsarañasäkiti. Ak sum yattanjja, “[Jehová Diosajj] sumwa uñjaski taqe akapachana kunanakatejj lurasiski ukanakjja, ukhamata chʼama churañataki khitinakatejj cheqpachana juparu iyawsasipki ukanakaru” (2 Crón. 16:9). Jiwasatï Jehová Diosat janipun jitheqtkañänejja, demonionakajj janiw jan askichañjam jan walinak lurkistaniti.

16, 17. ¿Kunjamsa mä kullakajj demonionakar jan ajjsaras saykatäna?

¹⁶ Demonionak contra saytʼañatakejj jan ajjsarirïñasawa. Yanaptʼañ munir familiaranakasasa jan ukajj amigonakasas Diosatak  jan walïki uka costumbrenak lurayañ munapjjestani ukhajja, jukʼampiw jan ajjsarirïñatak chʼamachasiñasa. Jehová Diosajj jan ajjsaririnakar bendisiwa. Ghana markan jakasir Erica sat kullakat parltʼañäni. Jupajj 21 maranïkäna ukhaw Bibliat yatjjatañ qalltäna. Niyakejjay mä layqan wawapächïnjja, diosanakar loqtata aycha manqʼañapwa taqenis suyapjjäna, ukajj mä costumbrerjamaw lurasïna. Kullakajj “janiw uk lurkiristti” sasin säna ukhajja, “diosanakaruw coleraytajja, jupanakajj kunayman usunakampiw castigistani” sasaw familiaranakapajj sapjjäna.

¹⁷ Kullakarojj uka costumbrerjam lurañapatak obligañsa munapkchïnjja, kullakajj janipuniw lurkänti, ukatwa utat alisnukupjjäna. Jupajj jilat kullakanakan ukaruw sarjjäna, ukhamatwa Jehová Diosajj yaqha familiamp bendisïna, uka cristianonakajj pachpa jilanakapa kullakanakäpkaspas ukhamäpjjänwa (Mar. 10:29, 30). Familiaranakapajj utat alisnukupjjänwa, cosasanakapsa phichantapjjarakïnwa, ukampis kullakajj janipuniw Diosat jitheqtkänti, bautisasjjarakïnwa. Jichhajj precursor regularatwa serviski, janirakiw demonionakarus ajjsarkiti. Kullakajj familiaranakapat akham siwa: “Jehová Diosar jan kunar ajjsaras serviñajj wali kusiskañawa, jupanakajj ukhamarak servipjjaspa ukwa munta, ukatakiw Diosar sapür mayista” sasa.

18. Jehová Diosar confiyañäni ukhajja, ¿kuna bendicionanaksa katoqañäni?

¹⁸ Janiw taqenipunejj ukham jan walinakan uñjaskañäniti. Ukampis taqeniw demonionak contra saytʼasiñasa, Jehová Diosarus confiyañasaraki. Ukham lurañäni ukhajja, walja bendicionanakwa katoqañäni. Sañäni, janiw Supayan kʼari yatichäwinakapamp engañjayaskañäniti, ni demonionakar ajjsarañatsa Diosat jitheqtkañäniti, antisas jukʼampiw Jehová Diosar jakʼachasiñäni. Discípulo Santiagojj akham sänwa: “Diosar istʼapjjam; Diablo contrajj saytʼasipjjarakim, jupajj jumanakat jaltjjaniwa. Diosar jakʼachasipjjam, jupajj jumanakar jakʼachasirakiniwa” sasa (Sant. 4:7, 8).