1. ¿Kunatsa bautisatäñajj wakisipuni? (Aka paginankir foto uñjjattʼäta).

BIBLIAT yateqerinakajj sapa maraw waranq waranqani bautisasipjje. Jupanakat waljanejj wayn tawaqonakäpjjewa, yaqhepajj wawanakäpjjarakiwa. Jupanakajj inas cristiano awk taykani jilsuwayapjjchi. ¿Jumajj bautisasjjtati? Ukhamächejja, walik bautisastajja. Salvatäñatakejja, mä cristianojj bautisatäñapaw wakisi (Mat. 28:19, 20; 1 Ped. 3:21).

2. ¿Kunatsa bautisasiñ jan ajjsarañamäki?

² Bautisasisajj walja bendicionanakwa katoqäta, ukhamäkchisa ukarjam sarnaqañamaw wakisirakini. ¿Kunatsa ukham sistanjja? Bautisaskta uka urojj akham sasaw jisktʼapjjayätamjja: “Jesusajj jakäwip sacrificiot loqtasiwayki ukar confiyasajja, ¿juchanakamat arrepentistati ukat Jehová Diosan munañap lurañataki Juparu jakäwim katuyasjjtati?” sasa, jumajj “jïsa” sasaw uka jisktʼar jaysarakiyätajja. Ukhamasti bautisasitamajj Jehová Diosar katuyasitamwa uñachtʼayi, mä arunjja, taqe kunat sipansa Diosar munasiña, munañap nayrar uchañwa  arsuwaytajja. ¿Ukham luratamat arrepentisiñamäspati? Janiwa. Jehová Diosan amparapar katuyasiñajj wali wakiskiriwa. Cheqas janiw ukat sipan yaqha suma luräwejj utjkiti. Jehová Diosar jan sirvkasmajja, Supayan amparapankasmawa. Jupajj janiw salvasiñam munkiti, jan ukasti Diosan Reinop contra saytʼasiñama, wiñay jakañ aptʼasiñamwa wal muni.

3. ¿Kuna bendicionanaksa Diosar jakañ vidam katuyasisajj katoqawayta?

³ Jehová Diosar jakañ vidam katuyasisa bautisasitamat kuna bendicionanaksa katoqawayta ukanak amuytʼañamawa. Jupar katuyatäjjasajj taqe chuymaw akham sasma: “[Jehová] Tatitojj nayampïskiwa: janiw ajjsarayaskäti; ¿kamacharakitan jaqesti?” sasa (Sal. 118:6). Cheqas Jehová Dios toqet saytʼasiña, jupampi suma uñjatäñaw taqe kunat sipansa wali wakiskirejja.

4, 5. 1) ¿Kunatsa bautisatanakajj Diosar serviñatak sapa mayni chʼamachasipjjañapa? 2) ¿Kunansa taqe cristianonakajj uñjastanjja?

⁴ Jumatï bautisatäjjstajja, janiw awk taykaman Jehová Diosampi sum apasipjjatap laykukejj Diosamp sum apaskasmati. Awk taykaman utapansa jakaskstajja, juma pachpaw salvatäñatakejj chʼamachasiñama. ¿Kunatsa uk amtañajj wali wakiskirejja? Kuna jan walinakansa jutïrin uñjasisma ukajj janiw yatiskiti. Inas wawäkas bautisasta, ukampis jichhajj waynäjjasa, jan ukajj tawaqöjjasajj janiw wawäkayäta ukham amuyjjtati, janirakiw pachpa yantʼanakansa uñjasjjtati. Mä tawaqojj akham siwa: “Wawäkasajja escuelan uruyasipki ukan torta jan manqʼasajj janiw Jehová Diosan Testigopätamat arrepentisktati. Ukampis tawaqöjjasajj janiw pachpa amuyañjamäjjeti, mä waynampi ikintasiñsa munañjamawa. Uka jan walir jan purtʼasiñatakejja, Diosan leyinakapar istʼañaw wali wakiskirejja, uk amtañamapuniwa” sasa.

⁵ Janiw wayn tawaqonakakejj yantʼanakan uñjasipkiti. Jilïr jaqëjjas bautisasipki ukanakas ukhamarakiw yantʼanakan uñjasipjje. Inas matrimoniopana, usutäsasa, jan ukajj trabajopan jan walinakan uñjasipjjchi. Wayn tawaqonakasa, jilïrinakasa, taqeniw Jehová Diosar jan jitheqtañatakejj yantʼata uñjastanjja (Sant. 1:12-14).

6. 1) Jan kun katoqañ laykuki, Jehová Diosar jakañ vidam katuyasitamajj ¿kamsañsa muni? 2) ¿Kunsa Filipenses 4:11-13 qellqatat yateqasma?

⁶ Janiw kun katoqañ laykukejj Jehová Diosar jakañ vidam katuyasis bautisasktati, uk amtañaw jan jitheqtas serviskakiñatak yanaptʼätam. Taqe kunjjar Munañani Jehová Diosarus akham siskasma ukhamawa: ‘Awk taykajasa, amigonakajas Jumat jitheqtapkchinejja, nayajj kunas kunäskpan Jumarukipuniw servïma’ sasa (Sal. 27:10). Ukarjam phoqañatakejja Jehová Diosaruw yanaptʼa mayisiñama (Filipenses 4:11-13 liytʼañataki).

7. “Salvasiñatakejj ajjsartʼasa khatattʼasa” chʼamachasiñajj ¿kamsañsa muni?

⁷ Jehová Diosajj amigopäsma ukwa muni. Diosan amigopäskakiñatakisa, salvatäñatakisa, wal chʼamachasiñamawa. Filipenses 2:12 textojj akham siwa: “Salvasiñatakejj ajjsartʼasa khatattʼasa jukʼamp chʼamachasisipkakim” sasa. Uka textorjamajja, Diosan amigopäñatakisa, jan walinakan uñjaskasas Diosat janipun jitheqtañatakisa, kunsa luräta uk sum amuytʼasiñamawa. Janiw juma pachparuk confiyasiñamäkiti. Amtasipunim, walja maranak Diosar serviri cristianonakas jitheqtawayapjjewa. Ukhamajj ¿kunas salvasiñataki yanaptʼiristamjja?

8. 1) ¿Bibliat sapaki yatjjatkasajj kunanaksa lurañama? 2) ¿Kunatsa ukham yatjjatañajj wali wakiskirejja?

⁸ Jehová Diosan amigopäñatakejja, jupar istʼañasawa, jupampi parlasiñasarakiwa. Diosajj kamsistusa ukjja, Bibliat sapaki yatjjatasaw istʼsna. Ukatakejj Biblia, Bibliat apstʼat qellqatanaka liyiñasawa, ukatsti liyktan ukanakat lupʼiñasarakiwa. Ak amtañamawa: Bibliat yatjjatañajja, janiw escuelan examen sum churañatak pʼeqer yatsuñäki ukhamäkiti. Jan ukasti, Jehová Diosajj kunjamäkitï ukanak jukʼamp yatjjatañatak chʼamachasis yateqañawa. Ukham yatjjatasajja, Diosaruw jakʼachasïta, jupas jakʼachasirakïtamwa (Sant. 4:8).

9. ¿Kuna yanaptʼanakas Bibliat sum yatjjatañatak yanaptʼawaytamjja?

⁹ Jehová Diosan markapanjja, Bibliat yatjjatañatak walja yanaptʼanakaw utji. Kuna yanaptʼanakas Internetan jw.org cheqan utji ukanakat paya uñjañäni. “Enseñanzas Bíblicas > Jóvenes” siski ukanjja, “Actividades para estudiar la Biblia” sat mä yanaptʼaw utji. Ukajja, Biblian parlki uka sarnaqäwinakat sum yatjjatañatakiw yanaptʼätam. Uka pachpa lugaranjja, “¿Kunsa Bibliax chiqpachapuni yatichi?” librot sum yatjjatañatakiw “Guías de estudio” sat yanaptʼajj utjaraki, ukajj Diosar jukʼamp confiyañataki, kunarutï creykta ukanak sum qhanañchañatakiw yanaptʼätam. ¡Despertad! de abril, 2009 revistanjja, “Los jóvenes preguntan. ¿Cómo disfrutar la lectura de la Biblia?” sat mä yanaptʼaw utjaraki, ukajj Bibliat sum yatjjatañatakiw yanaptʼätam. Ukham sum yatjjatañasa lupʼiñasa wali wakiskiriwa, ukaw salvasiñatak yanaptʼätam (Salmo 119:105 liytʼañataki).

10. ¿Kunatsa bautisat mä cristianojj orasiñapapuni?

¹⁰ Kunjamtï uñjaniwayktanjja, Bibliat yatjjatasaw Jehová Diosar istʼtanjja. Ukampis Jupampi parlasiñ munstan ukhajja, orasiñasawa. Ukhamajj janiw Diosar mayisiñarojj mä costumbrekïkaspas ukham uñjañasäkiti, janirakiw kuns sum phoqasiñapatakiki mayisiñasäkiti. Oracionajj Taqe kun Luriri Diosampi parlasiñatakiwa. Jupajj istʼañwa muntamjja (Filipenses 4:6 liytʼañataki). Kunas llakisiyätam ukhajja, “Diosar llakinakam katuyam” sasin Biblian siski uka ewjjtʼat  amtasiñamawa (Sal. 55:22). ¿Uka ewjjtʼajj cheqapunit yanaptʼiristamjja? Walja jilat kullakanakaw ukham lurañajj yanaptʼasiwa sasin sapjjeristam. Jumarus ukhamarakiw yanaptʼiristam.

11. ¿Kunatsa Jehová Diosarojj yuspärañamapuni?

¹¹ Jehová Diosarojj sapüruw mayisiñasa, janiw yanaptʼa munktan ukhak orasiñasäkiti. Biblian akham siwa: “Yuspärasirïpjjapunim” sasa (Col. 3:15). Awisajj kunayman llakinakan uñjasisajja, kuna bendicionanaktï Diosat katoqktan ukanak armtʼasnawa. ¿Kunanakatsa sapürojj Jehová Diosar yuspärasma? Mä kimsataksa yuspärasma ukajj walipunïspawa. Abigail sat mä tawaqojj 12 maranïkasaw bautisasïna, jupajj akham siwa: “Amuyatajja, janiw khitirus Jehová Diosarjam sapüru yuspärañajj wakiskiti. Kunanaktï Diosajj sapüru churkistu ukanakat yuspärañasapuniwa. Mä kutejj akham istʼta: ‘Kunanakattï jichhürojj yuspärktan ukanakak qharürojj utaman utjaspa ukhajja, ¿kunanakakis utaman utj-jjaspa?’ sasa, uka arunak amtañajj wal gustitu” sasa. *

12, 13. Jehová Diosajj kunjamsa yanaptʼawaytam ukanak ¿kunatsa amtañamapuni?

¹² David reyirojj Jehová Diosaw kunayman jan walinak aguantañatak yanaptʼäna. Ukatwa Davidajj akham säna: “Yantʼapjjam, uñjapjjarakim, Tatitun munasir kankañapa, jupar taqe chuymamp makhatirejj kusisiñan jaqewa” sasa (Sal. 34:8). Uka textojja, Jehová Diosajj kunja suma Diosasa uk juma pachpa uñjañamatakiw chʼamañchtamjja. Bibliat apstʼat qellqatanaksa, Biblsa liytʼäta, tantachäwinakarus sararakïta ukhajja, nayra tiempon kunjamsa Diosajj servirinakapar jupat jan jitheqtapjjañapatak yanaptʼäna, ukanakwa sum amuyäta. Cristianjam jiltasajja, Jehová Diosajj kunjamsa yanaptʼistu uk juma pachpa uñjañamaw wakisi. ¿Jehová Diosajj kunja munasirisa uk uñjawaytati?

¹³ Jehová Diosajj kunja munasirisa uk sapa mayniw uñjawaytanjja. Cheqas Dios pachpaw Jupar jakʼachasiñasatakisa, Yoqapar jakʼachasiñasatakis jawsawayistu. Ukatwa Jesusajj akham säna: “Janiw khiti jaqes nayan ukar jutkaspati, janitï nayar khitankitu uka alajjpachankir Awkejj irpankaspa ukhajja” sasa (Juan 6:44). ¿Nayarojj Jehová Diosaw markapar irpanirakitu sasmati? Inas mä waynasa, jan ukajj mä tawaqos akham sischispa: “Jehová Diosaw awk taykajarojj markapar irpi, nayasti jupanakarukiw arkta” sasa. Ukampis jumajj Diosar jakañ vidam katuyasisa, bautisasisajja, Diosan amigopätamwa uñachtʼaytajja. Jichhajj Dios pachpaw sum uñtʼtamjja. Bibliajj akham siwa: “Maynitejj Diosar munaschejja, jupajj Diosan uñtʼatawa” sasa (1 Cor. 8:3). Ukhamasti, Jehová Diosan markapankatamjja wali valoranit uñjaskakiñataki chʼamachasiñamawa.

14, 15. ¿Kunatsa Diosan arunakap yatiyañajj Diosar jukʼamp confiyañatak yanaptʼiristamjja?

¹⁴ Diosan arunakap yatiyañatakisa, escuelan yatiyañatakisa, kunjamsa Jehová Diosajj yanaptʼtam ukanwa wali munasirïtap uñjaraktajja. Yaqhep wayn tawaqonakajja, ‘yateqer masinakajar Diosat parlirista ukhajj kamsapjjanisa’ sasaw ajjsarayasipjje. Inas jumar ukham pasarakstam. Yamas waljanïpki ukan parlañajj jukʼamp chʼamäspawa. ¿Kunas jan ajjsarañatak yanaptʼiristam?

¹⁵ Nayraqatajja, kunatsa yatkta ukanakar  taqe chuyma creyta uk sum amuytʼasiñamawa. Kunarus creyta, kunatsa ukham creyta, kunjamsa ukanak sum qhanañchasma, ukanak sum amuytʼañatakejja, Internetan jw.org cheqanwa walja yanaptʼanakajj utji. ¿Ukanak thaqtañatak tiempo apstʼasismati? Jumatï kunatsa ukham creyta uk sum amuytʼasïta, qhanañchtʼañatakis sum wakichtʼasirakïta ukhajja, Jehová Diosat parlañ wal munäta (Jer. 20:8, 9).

16. ¿Kunas creykta ukanakat jan ajjsaras parlañatak yanaptʼiristamjja?

¹⁶ Inas sum wakichtʼasisasa Jehová Diosat parlañ ajjsaraskakchïta. 18 marani mä tawaqojja, 13 maraniw bautisasitayna, jupajj akham siwa: “Kunarutï taqe chuyma creykta, ukjja sum yatista, ukampis awisajj ukanakat parlañ ajjsartwa” sasa. ¿Kunas jan ajjsarañatak yanaptʼpachäna? Jan ajjsaras parlañatakiw chʼamachasïna. Jupajj akham saskakiwa: “Yateqer masinakajajj jan ajjsartʼasaw kunsa parlapjjaki. ¿Janit nayajj ukham parlañajäkarakispa? Ukatwa jupanakar kun parlkasas jan ajjsarasa akham sirïta: ‘Mä urojj Bibliatwa yatichaskayäta, ukatsti...’ sasa. Ukjjarojj kuntï jupanakar cuentaskayäta ukwa saskakirïta. Janis Bibliatpun jupanakar parlkstjja, yaqhepajj Bibliat kunsa yatichta sasaw jisktʼapjjetu. Ukham sapa kuti lurasajj janiw Diosat parlañ ajjsarjjtti. Kunatï cheqäki uk yatiyasajj wali kusisitätwa” sasa.

17. ¿Kunatsa creyktan ukanakat jan pächasis parlañasa?

¹⁷ Jumatï mayninakat llakisïta, respetarakïta ukhajja, ukhamarakwa jumar uñjapjjätam. 17 marani Olivia tawaqojj kunsa amuyäna uk uñjañäni, jupajj janïr tawaqetäkasaw bautisasïna, jupajj akham siwa: “Bibliat parlirista ukhajja, Bibliataksa parlañ munaskirista ukham amuyapjjaspa sasaw ajjsarayäta” sasa. Qhepatjja janiw ukham amuyjjänti, ajjsarañat sipansa, akham sasaw amuytʼäna: “Walja wayn tawaqonakajj janiw Jehová Diosan Testigonakapat kunsa yatipkiti. Jiwasarukiw uñtʼapjjestu. Kuntï lurkañäni ukarjamaw kunsa amuyapjjaspa. Jiwasatï creyktan ukanakat janipun parlkañäni, jan ukajj ajjsarayasis parlañänejja, inas Testigötasat phenqʼasksnasa ukham amuyapjjchispa. Yamas ajjsarasa, jan ukajj pächasis parlsna ukhajja, inas mayj amuyapjjchispa. Ukampis kunarutï creyktan ukanakat jan pächasisa, jan ajjsarasa parlatas uñjasajja, respetompiw uñjapjjestaspa” sasa.

18. ¿Kunanaksa salvasiñatakejj lurañama?

¹⁸ Kunjamtï uñjaniwayktanjja, juma pachpaw salvasiñatak chʼamachasiñama. Ukatakejja, Biblia liyiñamawa, liykta ukanakatsa lupʼiñamarakiwa, Diosarus orasiñamawa, kuna bendicionanaktï Diosat katoqkta ukanakatsa lupʼiñamarakiwa. Ukanak lurañajja, Jehová Diosajj cheqapuni amigomätap jan pächasiñatakiw yanaptʼätam. Ukajj kunarutï creykta ukanakat taqe chuyma parlañatakiw yanaptʼarakïtam (Salmo 73:28 liytʼañataki).

19. ¿Kunatsa salvasiñataki chʼamachasiñajj jan inamayäki?

¹⁹ Jesusajj akham sänwa: “Maynitejj nayar arkañ munchitojja, jupa pachpat armtʼaspan, tʼaqesiñ lawap apjjarusin jan qheparas arkitpan” sasa (Mat. 16:24). Ukhamasti, Jesusar arkañajj Jehová Diosar jakañ vidas katuyasisin bautisasiña sañwa munaraki. Ukham lurañajja, jichha tiempon walja bendicionanak katoqañataki, machaq oraqensa wiñay jakañ katoqañatakiw yanaptʼistani. Ukhamajj salvasiñataki chʼamachasiñatakejj walja razonanakaw utjistu.