Apóstol Pablojj 2 Corintios 12:2, 3 textonjja, mä jaqew “kimsïr alajjpachar aptatäna” sasaw säna. ¿Khititsa parlaskäna? Corintonkir cristianonakar carta qellqkäna ukanjja, apostoljam Diosar serviskatapwa qhanañchi (2 Cor. 11:5, 23). Ukatjja ‘kuna visionanaktï Tatitojj uñjaykäna, yatiykäna’ ukanakatwa qhanañcharakïna. Uka carta qellqkasajja, Pablojj janiw yaqha jilatanakat parlkänti. Ukhamajja, jupa pachpatwa parlaskäna ukwa qhan amuysna (2 Cor. 12:1, 5).

Ukhamasti “kimsïr alajjpachar” ukat ‘paraisor aptatäkäna’ uka jaqejja, apóstol Pablönwa (2 Cor. 12:2-4). ‘Kuna visionanaktï Tatitojj yatiykitu’ sasinjja, kunatï jutïrin paskani uk Diosajj jupar yatiyatap amuytʼayistu.

¿Pablojj uñjkäna uka ‘kimsïr alajjpachajj’ kunasa?

Biblianjja walja toqet parlañatakiw alajjpacha sasin apnaqe. Sañäni, cheqpach alajjpachat parlañataki (Gén. 11:4; 27:28; Mat. 6:26). Awisajj gobiernonakat parlañataki (Dan. 4:20-22). Ukatjja Jehová Diosajj Reinop toqe apnaqkani ukat parlañatakiw apnaqaraki (Apoc. 21:1).

‘Kimsïr alajjpacha’ sasinjja, ¿kuna toqetsa Pablojj parlaskpachäna? Awisajja, Bibliajj wakiskirïtap qhanstayañatakiw mä aru kimsa kuti qhanañchi (Is. 6:3; Apoc. 4:8). Ukhamajj Pablojja, ‘kimsïr alajjpacha’ sasin alajjpachankir wali chʼamani gobiernotwa parlaskpachäna, mä arunjja, Jesucristojj 144.000 ajllitanakampi apnaqkani uka Reinotwa parlaskpachäna. Apóstol Pedrojj ‘machaq alajjpachanak’ suyasktan sasinjja, uka Reinotwa parlaskarakïna (2 Ped. 3:13).

¿Pablojj parlkäna uka ‘paraisojj’ kunarakisa?

Paraíso arojj walja toqenakat parlañatakiw apnaqasi. 1) Niyakejjay Diosajj jaqenakan jakasipjjañapatak qalltan paraíso lurchïnjja, jutïrin aka oraqen utjkani uka Paraisotwa parlaskpacha sasaw amuysna. 2) Jehová Diosan servirinakapajj Paraisoptayat aka oraqen sumankañan jakasipkani ukarakïspawa. 3) Apocalipsis 2:7 texton ‘Diosan paraisopat’ parlki ukäspawa, mä arunjja, alajjpachan suma bendicionanak katoqapki ukäspawa (Yatiyañataki julio 15, 2015 revistan página 8, párrafo 8 uñjjattʼäta).

Kunatï jupar paskäna uk 2 Corintios 12:4 texton qellqkasajja, inas Pablojj uka kimsa toqenakat parlaskchïna.

Tukuyañataki:

‘Kimsïr alajjpacha’ sasin 2 Corintios 12:2 texton parlki ukajja, Jesucristojj Diosan Reinopan 144.000 ajllitanakampi apnaqkani uka gobiernotwa parlaskpacha, mä arunjja, ‘machaq alajjpachanakatwa’ parlaskpacha (2 Ped. 3:13).

Diosan Reinopjam yaqha gobiernojj janiw utjkiti ukatwa ‘kimsïr alajjpacha’ sasin uñtʼasiraki.

Pablojj mä visionan aptatäkäna uka paraisojj inas akanakächïna: 1) aka oraqen utjkani uka Paraíso, 2) ukan jakaskañäni ukhajj jichhürunakat sipan sumankañajj jukʼamp utjkani uka paraíso, 3) alajjpachan ‘Diosan paraisopa’. Ukanakajj machaq mundon phoqasini.

Ukhamasti machaq mundojja, “machaq alajjpachanakampi machaq oraqempi” suyasktan ukawa. Ukajja, alajjpachankir Diosan Reinopampi, aka oraqen mä suma Paraison Jehová Diosar servipkani uka jaqenakampiwa.