Roboam chachajj Salomón reyin yoqapänwa, Salomonajj 40 maranakaw Israel marka apnaqäna (1 Rey. 11:42). Salomonajj 997 (antes de Cristo) maranwa jiwjjäna. Uka qhepatjja, Roboamajj Jerusalén markat aynach toqenkiri Siquem markaruw reyit uttʼayatäñatak saräna (2 Crón. 10:1). ¿Reyit apnaqañ ajjsarpachänti? Salomonajj wali yatiñani reyïnwa. Ukampis Roboam reyejj jan walinak askichañatak qhawqha yatiñanïnsa ukaw niya yatisiñampïskäna.

Uka tiempon kunayman jan walinakaw Israel markan utjäna. Tiempompisti, markan khitatanakapaw Roboam reyimpi parlir jutapjjäna, akham sapjjänwa: “Awkimajj nanakatakejj wali qhorünwa; jichhasti jumajj kuntejj awkimajj jaytawayapkitu uka wali chʼama tukuñampi serviñäki ukjja mä jukʼa apaqtʼapjjetaya, ukatsti nanakajj jumarojj servisipkämawa” sasa (2 Crón. 10:3, 4).

Uk istʼasajja reyejj inas jan kun lurirjamäkchïnti. Markan mayitapar istʼaspäna ukhajja, jupasa, familiapasa, reyir yanapir jilïrinakas janiw nayrjam taqe kunani jakasjjapjjaspänti, janirakiw markankirinakatsa sinti qollqe mayjjapjjañapäkänti. Ukampis markar jan istʼkaspänjja, jupa contraw jaqenakajj saytʼapjjaspäna. ¿Kunsa Roboam reyejj luräna? Nayraqatajj Salomón awkipar yanaptʼapjjerïkäna uka jilïr chachanakaruw jisktʼasïna. Qhepatsti, jupa mitäpkäna uka waynanakaruw jisktʼarakïna. Uka waynanakar istʼasajja, reyejj markankirinakar akham sänwa: “Awkejjatejj qhorüchïna ukajja, nayajj jukʼamp qhorüyäwa; jupatejj churapjjchïyätam chʼama tukuñampi serviña ukajja, nayasti jukʼamp chʼama tukuñampi serviñwa churapjjäma; jupatejj lasompi asotʼipjjchïyätam ukajja, nayasti hierro puntan chicotempiw asotʼipjjäma” sasa (2 Crón. 10:6-14).

¿Kunsa jiwasajj ukat yateqsna? Suma amtanakar puriñatakejja, Diosar serviñan experiencianïpki ukanakaruw istʼañasa. Jupanakajja,  kuna jan walinakansa uñjassna uk amuyasaw ewjjtʼapjjestaspa (Job 12:12).

Jaqenakajj jupa contra saytʼapjjäna ukhajja, Roboam reyejj ejercitoparuw tantachthapïna. Ukampis Jehová Diosajj Semaías profeta toqew akham säna: “Nayaw sapjjsma jan nuwasipjjamti israelita jilanakapampi. Taqenisa utanakaparkama kuttʼjjapjjpan, nayajj ukhamwa waktʼayta uka layku” sasa (1 Rey. 12:21-24). *

Roboam reyitakejja, Jehová Diosar istʼañajj chʼamäpachänwa. Ukampis ¿kunsa jaqenakajj jupat amuyapjjpachäni? Reyejj ‘hierro puntan chicotempiw asotʼipjjäma’ sasaw jupanakar säna, ukampis jupa contra saytʼasirinakarojj janiw kunsa lurjjänti (2 Crónicas 13:7 uñjjattʼarakïta). Cheqas reyisa ejercitopasa Diosan “arunakap istʼasinjja, kuttʼawayjjapjjänwa, kunjämtï Tatitojj siskäna ukhamaru phoqhasina”.

¿Kunsa jiwasajj ukat yateqsna? Phenqʼachatas uñjaskchiñänejja, Diosar istʼañasapuniwa. Ukham lurañäni ukhajja, Jupampejj sumwa apasiñäni, bendisirakistaniwa (Deut. 28:2).

¿Jehová Diosajj ukham luratapat Roboam reyir bendisïnti? Jïsa, Judá tribumpiru Benjamín tribumpirojj apnaqaskakïnwa, machaq markanak lurañsa, uka markanakar ‘wal wakichañsa’ amtarakïnwa (2 Crón. 11:5-12). Ukat sipansa Jehová Diosan leyinakap istʼañatakiw mä qhawqha tiempojj chʼamachasïna. Maysa toqetjja, Jeroboam reyin apnaqat 10 tribunakajj kʼari diosanakarus servipkchïnjja, waljaniw jupanakat cheqpach Diosar serviñatak Jerusalén markar sarapjjäna, ukhamatwa “Judá ukankir reinor chʼamañchapjjäna” (2 Crón. 11:16, 17). Ukhamasti Roboam reyin Diosar istʼatapajj jukʼampiw reinopar chʼamañchäna.

Reinopajj suma saytʼatäkäna ukhajja, Roboam reyejj janiw Jehová Diosan leyinakap istʼjjänti, antisas kʼari diosanakaruw adorjjäna. Inas mamapana (jupajj ammonita warmïnwa) amtayat ukham lurchïna (1 Rey. 14:21). Ukajj janis yatiskchejja, markpachaw jupjam lurapjjarakïna. Ukatwa Egiptonkir Sisac reyejj Judá tribunkir markanak katuntkäna ukhajja, Diosajj jan jarkʼkänti. Roboam reyejj inamayakiw uka markanakar wakichäna (1 Rey. 14:22-24; 2 Crón. 12:1-4).

Jerusalén markanwa Roboam reyejj apnaqäna, Sisac reyejj ukar purïna ukhajja, jukʼamp jan walinakaw utjäna. Ukhaw Semaya profetajj Roboam reyirusa markankir jilïrinakarus Diosan aka arunakap yatiyäna: “Jumanakaw nayarojj apanukupjjestajja, ukatwa nayajj Sisac reyin amparaparojj apanukupjjaraksma” sasa. ¿Kunsa Roboam reyejj uk istʼasajj luräna? Bibliajj akham siwa: “Israel markankir jilïrinaka[sa], ukhamarak reyisa jan wali luratanakapjja amuyasipjjänwa, ukatsti sapjjarakïnwa: ¡Tatitusti cheqapawa!” sasa. Ukatwa Jehová Diosajj juparusa Jerusalén markarus jarkʼaqäna (2 Crón. 12:5-7, 12).

Uka qhepatjja, Roboam reyejj aynach toqenkir tribunakjjar apnaqaskakïnwa. Jiwañap jakʼäjjäna ukhajja, walja regalonakwa taqe wawanakapar lakiräna, ukhamat Abiam yoqap contra jan saytʼapjjañapataki, jupaw Roboam lantejj apnaqañapäna (2 Crón. 11:21-23). Ukham lurasajja, Roboam reyejj yatiñanïtapwa uñachtʼayäna.

Awisajj Roboam reyejj suma reyïñatakis chʼamachaskchïnjja, janiw Diosampejj sum apaskänti. Bibliajj akham siwa: “Jupan luräwinakapasti jan walinakänwa” sasa. Uka reyejj janiw ‘taqe chuymamp Tatitur thaqkänti’ (2 Crón. 12:14).

Awisajj Diosar istʼänwa, Diosan markaparus yanaptʼarakïnwa. Ukampis Jehová Diosampi sum apasiñatakisa munañap lurañatakis janiw chʼamachaskänti. Ukatwa juchar purtʼasïna, kʼari diosanakarus adorarakïna. Ukhamajj inas akham jisktʼassna: ‘Roboam reyejj Diosan  cheqañchatäsajja, ¿taqe chuyma arrepentisisati jan ukajj mayninakar istʼasakich luräna?’ sasa (2 Crón. 11:3, 4; 12:6). Qhepatjja kunatï Diosatakejj jan walïkäna ukwa luräna. Ukampis David achachilapajj janiw ukhamäkänti, jucharus purtʼaskchïnjja, Jehová Diosarojj wal munasïna, cheqa yupaychäwitsa janiw jitheqtkänti, juchanakapatsa taqe chuymaw arrepentisïna (1 Rey. 14:8; Sal. 51:1, 17; 63:1).

Taqeniw Roboam reyit yateqassna. Familiasar yanaptʼañasa, mayninakar yanaptʼañas walikïskiwa. Ukampis Jehová Diosampi sum uñjatäñatakejja, kunjamtï Jupajj munki ukarjamaw serviñasa, Jupampis sumwa apasiñasaraki.

Ukatakejja, Jehová Diosaruw taqe chuyma munasiñasa. Kunjamtï nina jan jiwtʼañapatakejj lawanak apjjatktanjja, ukhamarakiw Diosar munasiskakiñatakejj Biblia liyiñasa, liyktan ukjjat lupʼiñasa, Diosarus mayisiñasaraki (Sal. 1:2; Rom. 12:12). Ukham lurañäni ukhajja, Diosarojj wal munasiñäni, taqe kuns munañaparjamaw lurarakiñäni. Ukaw juchar purtʼasiñäni ukhajj taqe chuyma arrepentisiñatak yanaptʼistani. Roboam reyit sipansa, janipuniw Jehová Diosat jitheqtkañäniti (Judas 20, 21).