1, 2. 1) ¿Kunsa Jesusajj apostolonakapampi qhep qhepa kuti oraskasajj mayïna? 2) ¿Kunatsa Jesusajj mayachtʼatäñ toqet llakispachäna?

JESUSAJJ qhep qhepa kuti apostolonakapamp manqʼkäna ukhajja, kunjamsa mayachtʼatäpjjaspa uka toqetwa llakisïna. Awkiparu jupanakampi mayiskasajja, jupajj kunjamatï Awkipampi mayakïkäna ukhamarak discipulonakapajj mayakïpjjaspa ukwa mayïna (Juan 17:20, 21 liytʼañataki). Mayachtʼatäpjjatapajja, Jesusajj cheqapuni Diosan khitanitätapwa uñachtʼayaspäna. Maynit maynikam munasipjjatapasa, cheqapuni Criston arkiripäpjjatapwa uñachtʼayarakispäna, mayachtʼatäñatakis yanaptʼarakispänwa (Juan 13:34, 35).

² Uka arumajja, Jesusajj arkirinakapar jan mayachtʼatäpjjatap uñjasaw mayachtʼatäñ toqet jukʼamp qhanañchäna. Jupanakajj janiw uka arumakejj ‘khitis jupanak taypin jilïrïna’ uka toqet chʼajjwarapkänti (Luc. 22:24-27; Mar. 9:33, 34). Yaqha urusti, Santiagompi Juanampejj “jumamp chikay Reinoman qontʼayapjjeta” sasaw Jesusar sapjjarakïna (Mar. 10:35-40).

3. 1) ¿Kunanakas Jesusan arkirinakaparojj tʼaqanoqtaypachäna? 2) ¿Kuna jisktʼanakarus aka yatichäwin qhanañchaskañäni?

 ³ Jesusan discipulonakaparojja, janiw jilïrïñ munañakejj tʼaqanoqtaykänti, jan ukasti uka tiempon jakir jaqenakajj jupanakkam uñisisiri, yaqhachasiri ukhamäpjjänwa. Ukatwa discipulonakajj jan jupanakjamäñatak chʼamachasipjjañapäna. Aka yatichäwinjja aka jisktʼanakaruw qhanañchaskañäni: ¿Kunsa Jesusajj jan khitirus yaqhachañatak luräna? ¿Kunjamsa Jesusajj arkirinakaparojj taqenir mä igualaki uñjapjjañapatakisa mayachtʼatäpjjañapatakis yatichäna? ¿Kunjamsa Jesusan yatichäwinakapajj mayachtʼatäñatak yanaptʼistu?

4. Jesusarojj kunjamsa jiskʼachapjjerïna uk qhanañchtʼma.

⁴ Jesusarus yaqhachapjjarakirïnwa. Felipejj Mesiasaruw jikjjatapjjta sasin Natanaelar säna ukhajja, jupajj akham sänwa: “¿Nazaret markat mä suma jaqejj mistuspati?” sasa (Juan 1:46). Amuyatajja, Natanael chachajj kuntï Miqueas 5:2 textojj siski uka profeciat yatpachänwa. Nazaretajj jan yäqañjam markätap uñjasaw Mesiasajj janiw ukat mistkaspati sasin amuypachäna. Judionakan religionap pʼeqtʼirinakasa, ukhamarakiw Jesusarojj Galilea cheqankirïtapat jiskʼachapjjäna (Juan 7:52). Judionakat waljanejja, galileankirinakarojj janiw yäqapjjerïkänti. Yaqhep judionakajja, samaritano sasaw Jesusarojj jiskʼachapjjarakirïna (Juan 8:48). Samaritanonakajja, janiw judionakjam costumbrenïpkänti, religionapas mayjarakïnwa. Jupanakarojj judionakasa Galilea cheqankirinakas jiskʼachapjjerïnwa, janiw parlañsa munapjjerïkänti (Juan 4:9).

5. ¿Kunjamsa Jesusan discipulonakapar yaqhachapjjerïna?

⁵ Judionakan religionap pʼeqtʼirinakajj ukhamarakiw Jesusan arkirinakaparojj jiskʼachapjjerïna. Fariseonakasti, “aka jaqenakajj maldisitawa” sasaw sapjjerïna (Juan 7:47-49). Rabinonakan escuelanakapan jan yatichatanakaru, costumbreparjam jan sarnaqerinakarojja, jan wali jaqenakata, janis liytʼasiñsa qellqtʼasiñsa yatipkaspa ukham uñjapjjerïna (Hech. 4:13, nota). Uka tiempon jakir jaqenakajj religionapatsa, yaqha kasta jañchinïtapatsa, aytat jaqëpjjatapatsa jachʼa jachʼaw tukupjjerïna, ukatwa Jesusarus discipulonakaparus yaqhachapjjerïna. Discipulonakas niya ukham amuyunïpjjarakïnwa, ukatwa mayachtʼatäñatakejj jan ukhamäñatak chʼamachasipjjañapäna.

6. Yaqhachasiñajj kunjamsa jan waltʼayistaspa uk mä qhawqha experiencianakampi qhanañchtʼma.

⁶ Jichhürunakanjja yaqhachasiñajj taqe cheqanwa utjaraki. Jiwasas yaqhachataw uñjassna, jan ukajj jiwasaw yaqhachssna. Australiankir mä precursora kullakajj akham siwa: “Campon jakasirinakarojj uñisipjjerïnwa jichhas uñisisipkakiwa, nayarus uñisipjjetänwa, ukatwa janqʼo jañchininakarojj jukʼamp uñisjjayäta” sasa. Canadá markanjja, francés, inglés arunakwa parlapjje, ukankir mä jilatajj akham siwa: “Francés aru parlirinakas taqenit sipan jilankkaspa ukham amuyasajja, inglés aru parlirinakarojj uñisiriyätwa” sasa.

7. ¿Kunsa Jesusajj jan yaqhachañatak luräna?

⁷ Jesusajj aka oraqenkkäna uka tiemponjamarakiw yaqhachasiñajj jaqen chuymapan utjaspa, cambiañajj wali chʼamäspawa. Ukampis ¿kunsa Jesusajj mayninakar jan yaqhachañatak luräna? Maya, jupajj taqeniruw mä igualak uñjäna. Pobrenakarusa, qamirinakarusa, fariseonakarusa, samaritanonakarus jan yaqhachasaw Diosan arunakap parlirïna, impuesto cobririnakarusa, juchachasir jaqenakarus ukhamarakiw yatiyirïna. Paya, mayninakar sum uñjapjjañapataki, jan yaqhachapjjañapatakiw discipulonakapar yatichirïna, sarnaqatapampis ukwa uñachtʼayäna.

8. Jesusan kuna yatichäwipas cristianonakar mayachtʼi uk qhanañchtʼma.

⁸ Cristianonakajj kunjamatsa mayachtʼatäsna uka toqetwa Jesusajj yatichäna, akham sänwa: “Jumanakajj taqenis jilapuräpjjtawa” sasa (Mateo 23:8, 9 liytʼañataki). Cheqas taqeniw Adanat jutirïtanjja ukatwa ‘jilapurätanjja’ (Hech. 17:26). Maysa toqetjja, kunjamtï Jesusajj siskänjja, arkirinakapajj Jehová Diosaruw alajjpachankir Awkiparjam uñjapjje ukatwa ‘jilapurjamäpjjaraki’ (Mat. 12:50). Diosan jachʼa familiap taypinkapjjarakiwa, maynit maynikamaw munasipjje, Diosarus confiyapjjarakiwa ukaw jupanakar mayachtʼi. Apostolonakajj ukatwa cristiano masinakaparojj “jilatanaka” sasin cartanakapan qellqapjjerïna (Rom. 1:13; 1 Juan 3:13). *

9, 10. 1) ¿Kunatsa judionakajj yaqha kasta jañchinïpjjatapat jan jachʼañchasipjjañapäkäna? 2) Yaqha kasta jañchininakar yaqhachañajj jan walïtapjja, ¿kunjamsa Jesusajj yatichäna? (Página 8 ukankir nayrïr dibujo uñjjattʼäta).

⁹ Kunatsa maynit maynikam jilapurjama uñjasiñasa uk qhanañchasajja, kunatsa humilde chuymanïñasa ukwa Jesusajj sarakïna (Mateo 23:11, 12 liytʼañataki). Kunjamtï uñjaniwayktanjja, jachʼa jachʼa tukuñaw apostolonakar tʼaqanoqtayäna. Uka tiemponjja, yaqha kasta jañchinïtap laykuw jachʼa jachʼa tukupjjarakirïna. Judionakat waljanejj Abrahanat jutirïpjjatap laykuw jachʼañchasipjjerïna. Ukampis Bautisir Juanajj akham sänwa: “Diosajj aka qalanakatjja Abrahanatak wawanak sartayaspawa” sasa (Luc. 3:8).

¹⁰ Jesusajj yaqha kasta jañchininakar yaqhachapkäna ukanakarojj cheqañchirïnwa. Mä kutejja, mä escribaw “¿khitipunis cheqpach jaqe masijajja?” sasin jisktʼäna. Jesusajj jaqe masipar khuyaptʼayir samaritano jaqet parlasaw uk qhanañchäna. Uka uñachtʼäwirjamajja, judío mä jaqeruw lunthatanakajj qʼal lluchʼsupjjäna, nuwjapjjarakïna. Uk uñjasasti, samaritano jaqew jupat khuyaptʼayasisajj yanaptʼäna. Ukampis judío masinakapajj janiw jupat khuyaptʼayasipkänti, maysnämwa muytapjjäna. Jesusajja, samaritano jaqet yateqasisajj “uka pachpa lurarakim” sasaw uka escriba jaqer säna (Luc. 10:25-37). Ukhamatwa Jesusajj kunjamsa mä samaritano jaqejj judionakar cheqpach munasiñ yatichaspa uk uñachtʼayäna.

11. 1) ¿Kunatsa Criston discipulonakapajj jan khitirus yaqhachapjjañapäkäna? 2) ¿Kunjamsa Jesusajj discipulonakapar uk amuyapjjañapatak yanaptʼäna?

¹¹ Jesusajj janïr alajjpachar sarkasajja, “taqe Judeana, Samariana ukhamaraki taqe aka oraqpachana” yatiyapjjam sasaw discipulonakapar säna (Hech. 1:8). Ukatakejj yaqhachasiñsa jachʼa jachʼa tukuñsa apanukupjjañapänwa. Jesusajj jan judiöpkäna ukanakat sum parlasaw taqe markankirinakar yatiyapjjañapatak wakichtʼäna. Mä kutejja, yaqha markankir ejerciton mä oficialapat parlkasajj “jupjam taqe chuym Diosar confiyir jaqejj janiw Israel markan utjkiti” sasaw säna (Mat. 8:5-10). Jesusajj Nazaret markankkasajja, jan judiöpkäna uka Sarepta markankir mä viuda warmitsa, Naamán sat sutini lepra usuni sirio jaqetsa Jehová Diosajj khuyaptʼayasïnwa sasaw yatichäna (Luc. 4:25-27). Maysa toqetsti, Jesusajj janiw mä samaritana warmirukejj yatiykänti, jan ukasti, Samaria markankir jaqenakajj Diosan arunakap istʼañ munapjjepanjja, pä uruw ukan qheparäna (Juan 4:21-24, 40).

12, 13. 1) Jesusajj mä samaritana warmir Diosan arunakap yatiyaskäna ukhajja, ¿apostolonakajj kamachapjjänsa? (Página 8 ukankir payïr dibujo uñjjattʼäta). 2) ¿Kunatsa Santiagompi Juanampejj Jesusan yatichäwip janiw sum amuyapkänti sasajj sissna?

¹² Mayninakar jan yaqhachañajj apostolonakatak  chʼamakïnwa. Sañäni, Jesusajj samaritana warmir Diosan arunakap yatiyäna ukhajj musparapjjänwa (Juan 4:9, 27). Judionakan religionap pʼeqtʼirinakajja, janiw warminakampejj taqen uñjkata parlapjjerïkänti. Yamas jan wali sarnaqer samaritana warminakampejj janipuniw parlapjjerïkänti. Jesusajj jaypachaw samaritana warmimpi parljjäna, ukhamaruw apostolonakapajj “manqʼasimaya” sasin sapjjäna. Ukampis jupatakejj manqʼañat sipansa Awkipan munañap lurañaw jukʼamp wakiskirïna, samaritana warmir yatiyañas ukham wakiskirirakïnwa (Juan 4:31-34).

¹³ Jesusajj kunsa ukampejj yatichañ munäna uk janiw Santiagompi Juanampejj amuyapkänti. Samariankasipkäna ukhajja, discipulonakajj alojasiñatak mä uta thaqeriw mä jiskʼa markar mantapjjäna. Samaritanonakan jan alojañ munapjjepanjja, Santiagompi Juanampejj akham sapjjänwa: “Tata, munsta ukhajja, alajjpachat nina saraqaniñapatakiw mayipjjerista, ukhamat uka jaqenakar qʼal jiwarayañapataki” sasa. Ukampis Jesusajj jupanakar toqenoqänwa (Luc. 9:51-56). Santiagompi Juanampejj Galilea markapan uk pasaspäna ukhajja, ¿ukhamti sapjjarakispäna? Samaritanonakar yaqhachañajj chuymapan utjaskakpachänwa ukatwa ukham sapjjpachäna. Uka qhepatjja, apóstol Juanajj samaritanonakar yatiyiriw saräna, jupanakasti sumwa istʼapjjäna, ukhamïpanjja kunjamsa jupanakatak wal colerasïna uk amtasajj phenqʼaspachänwa (Hech. 8:14, 25).

14. ¿Kunjamsa mä jan waltʼäwejj askichasïna?

¹⁴ Pentecostés 33 mara mä jukʼa pasatatjja, yaqhachasiñaw cristiano congregacionan utjäna. Manqʼañanak lakiskäna ukhajja, griego aru parlir viuda warminakarojj janiw churapkänti (Hech. 6:1). Inas yaqha aru parlirïtapat yaqhachapjjchïna. Ukhamïpansti, apostolonakajj jankʼakiw suma sarnaqerit uñtʼata chachanakar ajllipjjäna, ukhamat manqʼa lakirapjjañapataki. Uka chachanakajj griego sutinïpjjänwa. Yaqhachat viuda warminakajj jupanakar confiyapjjpachänwa.

15. ¿Kunjamsa apóstol Pedrojj jan yaqhachañ yateqäna? (Página 8 ukankir kimsïr dibujo uñjjattʼäta).

¹⁵ Khä 36 maranjja, Diosan arunakapajj niya taqe markanakanwa yatiyasjjäna. Uka tiemponjja, apóstol Pedrojj judionakampikiw parlirïna. Ukampis janipuniw cristianonakajj khitirus yaqhachapjjañapäkiti sasin Diosajj amuytʼayäna ukhajja, Pedrojj Cornelio sat romano soldadoruw Diosan arunakap yatiyäna (Hechos 10:28, 34, 35 liytʼañataki). Uka qhepatsti, jan judiöpkäna uka cristianonakampejj parljjänwa, manqʼjjarakïnwa. Ukampis mä qhawqha maranakatjja, Antioquía markanjja, jan judiöpkäna ukanakat mä qhawqhanimpejj janiw manqʼañ munjjänti (Gál. 2:11-14). Uk uñjasajja, apóstol Pablojj Pedror cheqañchänwa. Jupasti taqe chuymaw ukar istʼäna. ¿Kunjamatsa uk yattanjja? Pedrojj Asia Menor toqenkir judionakampiru jan judiöpkäna uka cristianonakampir nayrïr cartap qellqkäna ukhajja, “taqpach creyente masinakamar munasipjjam” sasaw säna (1 Ped. 1:1; 2:17).

16. Nayrïr patak maranakan jakiri cristianonakajj ¿kunjam jaqenakat uñtʼatäpjjänsa?

¹⁶ Apostolonakajj Jesusatwa ‘taqe kasta jaqenakar’ munasiñ yateqapjjäna (Juan 12:32; 1 Tim. 4:10). Cambiañajj jupanakatak chʼamäkchïnsa, tiempompejj cambiapjjänwa. Nayrïr patak maranakan jakiri cristianonakajj maynit maynikam munasirit uñtʼatäpjjänwa. Khä 200 maranakanjja, libronak qellqeri Tertuliano chachajj jupanakat jaqenakajj kamsapjjänsa uk akham sänwa: “Maynit maynikamaw munasipjje. Jupanak layku jiwañas wakischi ukhajj jiwapjjaspawa” sasa. Uka cristianonakajja, ‘Diosajj churkistu uka machaq jaqëñamp isthapisisajj’, kunjamtï Diosajj jaqenakar uñjki ukham uñjañwa yateqapjjäna, mä arunjja, mä igualakwa taqenirus uñjapjjäna (Col. 3:10, 11).

17. ¿Kunjamatsa yaqhachasiñ chuymasatpach apssna? Uk experiencianakamp qhanañchtʼma.

 ¹⁷ Jichhürunakanjja, yaqhachasiñ apanukuñatakejj ukhamarakiw tiempojj munasispa. Francia markankir mä kullakajj akham siwa: “Jehová Diosaw mayninakar wajjtʼañsa, taqe kasta jaqenakar munasiñsa yatichitu. Mayninakar jan yaqhachañatakejj chʼamachasiskakiñajawa, ukampis janiw faciläkiti. Ukatwa Diosar sapa kuti mayista” sasa. España markan jakasir mä kullakajj ukhamanwa uñjasiraki, jupajj akham siwa: “Yaqha costumbreni jaqenakar jan uñisiñatakejj wal chʼamachasta. Ukjja, jilapartejj atipjtwa, ukampis chʼamachasiskakiñajawa. Jehová Diosan mayachtʼat markapankasajj wali kusisitätwa” sasa. Cheqas taqeniw chuymasan yaqhachasiñajj utjaskakiti janicha uk uñakiptʼasiñasa.

18, 19. 1) ¿Kunatsa taqenirus jan yaqhachasa sum uñjañasa? 2) ¿Kunjamanakatsa uk lursna?

¹⁸ Nayrajja, taqeniw Diosat wali jayankayätanjja (Efes. 2:12). Ukampis Diosaw munasiñapampi Juparu jawskatasistu (Os. 11:4; Juan 6:44). Cristorakiw wali sum katoqtʼistu, Diosan familiapankañasatakis punku jistʼararaki (Romanos 15:7 liytʼañataki). Niyakejjay Jesusajj juchararäkstan ukhas sum katoqchistojja, jiwasajj ukhamarakiw jan khitirus yaqhachañasäkiti.

¹⁹ Akapacha niya tukusiñampïskipanjja, tʼaqanoqtañasa, yaqhachasiñasa, uñisisiñas jukʼampiw jiljjattani (Gál. 5:19-21; 2 Tim. 3:13). Ukampis Diosan servirinakapajj ‘alajjpachat jutki uka yatiñwa’ thaqtanjja, ukaw jan khitir yaqhachañataki, taqenimp sum apasiñatak yanaptʼistu (Sant. 3:17, 18). Yaqha markankirinakampi amigösasa, costumbrenakap jan jiskʼachasasa, parlapki uka aru yateqasas wali kusisitätanwa. Ukham lurtan ukhajja, sumankañajj ‘mä jawirar uñtataw jiljjatti’ cheqapar sarnaqañasti, “jachʼa qotan mathapinakapar uñtataw” jilararaki (Is. 48:17, 18).

20. ¿Kunjamsa munasirïñajj yanaptʼistu?

²⁰ Párrafo 6 ukanjja, Australiankir mä kullakatwa parlaniwaytanjja. Jupajj Bibliat yatjjatañ qalltkäna ukhajja, jukʼat jukʼatwa yaqhachirïñsa, uñisirïñsa jaytjjäna. Munasiñarakiw kuna jan walinakatï chuymapana, amuyupan utjkäna ukanak apanukuñatak yanaptʼäna. Canadá markankir jilatajj akham siwa: “Jan sum yatisaw maynirojj yaqha kasta jañchinïtapat yaqhachtanjja, ukampis kawki markatäskañänisa taqenis mä igualakïtanwa” sasa. Uka jilatajj inglés aru parliri kullakampiw casarasïna. Cristianonakarojj munasiñaw mayachthapistu, jan yaqhachañatakis yanaptʼarakistuwa ukwa uka experiencianakat yateqtanjja (Col. 3:14).