Apóstol Pablojj kunjamapunïnsa ukjja, janiw khitis siskaspati. Bibliat apstʼat qellqatanakasan dibujat uñstki ukajja, dibujañ sum yatipki ukanakan dibujatakiwa, arqueología toqet yatjjatirinakas janiw kunsa katupkarakiti.

Ukampis Pablojj kunjam uñnaqanïnsa ukajj mä jukʼa yatisiwa. Amuytʼañataki, Yatiyañataki 1 de marzo, 1902 revistarjamajja, apóstol Pablojj kunjam uñnaqanïnsa, uka toqet Hechos de Pablo y Tecla qellqatanwa qhanañchasi, ukajj 150 maranakanwa lurasïna. Amuyatajja, ukaw taqet sipan sum qhanañchi. Uka qellqatarjamajja, “Pablojj jiskʼa tansa, pʼeqe qʼara, lonqho, kayunakapas mä jukʼa wejjru, cejanakapas niya jikthaptata, jachʼa nasani ukhamänwa”.

The Oxford Dictionary of the Christian Church (1997 maran lurata) sat diccionariojj uka nayra qellqatat akham siwa: “Hechos de Pablo y Tecla qellqatajj apóstol Pablojj kunjamänsa uka toqet kuntï qhanañchi ukajj inas cheqächi” sasa. Uka qellqatajj nayrïr patak maranakan wali apnaqatänwa. 80 nayra qellqatanakaw griego arut amparamp qellqaqata utji, yaqha arunakansa utjarakiwa. Ukhamajja, Bibliat apstʼat qellqatanakasan apóstol Pablojj dibujata uñstki ukajj ukanakarjam amuytʼas luratawa.

Ukampis Pablojj kunjamänsa ukat sipan jukʼamp wakiskirinakaw utji. Diosan arunakap Pablojj yatiyaskäna ukhajja, yaqhepajj jupat akham sapjjänwa: “Akankki ukhajj janiw yäqañjamäkiti, parlatapas janirakiw khusäkiti” sasa (2 Cor. 10:10). Ukampis Jesusan mä milagro toqe yanaptʼataw jupan arkirip tukjjäna, uk amtañasapuniwa. Qhepatjja Jesusajj jupat akham sänwa: “Nayatakejj mä ajllit vasowa, ukhamat yaqha markanakaru [...] sutij apañapataki” sasa (Hech. 9:3-5, 15; 22:6-8). Pablojj Bibliankir mä qhawqha libronak Diosan amuytʼayat qellqkäna ukajj kunjamsa yanaptʼistu ukanakat lupʼiñasawa.

Criston janïr arkiripäkasajja, janiw kunanaktï lurkäna ukanakat jachʼa jachʼa tukurïkänti, ni kunjam uñnaqan jaqënsa uka toqetsa parlirïkänti (Hech. 26:4, 5; Filip. 3:4-6). Antisas akham sänwa: “Nayajj apostolonak taypitjja jukʼamp jiskʼätwa, janirakiw apóstol satäñatakis walïkti” sasa (1 Cor. 15:9). Uka qhepatjja, akham sarakïnwa: “Kawkïritejj taqpach santo jilatanakat jiskʼäki ukat sipansa nayajj jukʼamp jiskʼätwa. Ukhamäkipansa Diosajj wal nayat khuyapayasitu, ukhamat Criston jan jaktʼkañ bendicionanakapat parlir suma yatiyäwinakjja yaqha markanakar yatiyañajataki” sasa (Efes. 3:8). Cheqas Pablojj kunjam uñnaqanïnsa ukanak yatjjatañat sipansa, uka arunakapaw jukʼamp wakiskirejja.