1. ¿Kunatakis cancionanakajj yanaptʼistu?

CANCIONANAK qellqer wali uñtʼat mä chachajj akham sänwa: “Arunakajj lupʼiyistuwa, musicasti chuymaruw purtʼistu. Ukampis cancionanakajj piensktan ukanakwa chuymar purtʼayistu” sasa. Cantañ librosan utjki uka cancionanakajj Jehová Diosaruw jachʼañchi, Jupar munasitasas qhanarakiwa, jukʼampiw Jupar jakʼacharakistu. Sapaki jan ukajj jilat kullakanakamp chika Jehová Diosar cancionanakampi jachʼañchañajj wali wakiskiripuniwa.

2, 3. 1) ¿Kunatsa yaqhepanakajj congregacionan jachʼat cantañ jan munapkaspa? 2) ¿Kuna jisktʼanakarus aka yatichäwin qhanañchaskañäni?

² ¿Congregacionan jachʼat cantañajj gustistuti, jan ukajj ajjsarayastancha? Yaqhep markanakanjja, chachanakajj jaqe nayraqatan cantañ phenqʼasipjjewa. Congregación taypin ukham ajjsarayassna ukhajj janiw walïkaspati, congregacionaruw jan waltʼayaspa, yamas jilïr irpirinakatï jan ganasani cantapjjaspa, jan ukajj yaqhanak lurasipkaspa ukajj janiw walïkaspati (Sal. 30:12).

³ Cantasajj Jehová Diosaruw jachʼañchtanjja. Ukhamajj tantachäwin cantaski ukhajj ukankañasapuniwa, janirakiw sarnaqañasäkiti. Ukhamajj akham jisktʼasiñasawa: “¿Tantachäwinakan cantañajj nayatak kunjamasa? ¿Kunas jan ajjsarasa kusisit  cantañatak yanaptʼitaspa? ¿Kunjamsa taqe chuyma cantiristjja?” sasa.

4, 5. ¿Kunatsa cantañajj nayra Israel markan wali wakiskirïnwa sasajj sissna?

⁴ Jehová Diosan servirinakapajj nayra tiempotpachwa musicampi Diosar jachʼañchapjje. Israelitanakajj Jehová Diosar jan jitheqtas servipkäna ukhajja, Diosar cantasaw jachʼañchapjjerïna. Amuytʼañataki, templon kunjamsa adorasini ukanak David reyejj waktʼaykäna ukhajja, 4.000 levita chachanakaruw Diosar musicanakampi jachʼañchapjjañapatak uttʼayäna. Jupanakatjja 288 chachanakaw cantañ sum yatipjjäna (1 Cró. 23:5; 25:7).

⁵ Jerusalenankir templo Diosar katuyapjjäna ukhajj musicasa cantañas wali wakiskirïnwa. Bibliajj akham siwa: “Taqenisa jupanakajj mayar tukutakiwa trompetanaka tocapjjäna, ukhamarak mayakiw Tatitur qʼochupjjäna, yuspagarapjjarakïna, trompetanaka tocasa, platillonaka tocasa, ukhamarak tocañ yaqha instrumentonakampiraki qʼochupjjäna” sasa. Ukatsti ‘Tatitun jachʼa kankañapaw templor phoqtʼäna’. Taqe ukanakajj Jehová Diosar jukʼamp confiyañatakiw israelitanakar yanaptʼpachäna (2 Cró. 5:13, 14; 7:6).

6. Nehemiasajj Jerusalenan gobernadoräkäna ukhajj ¿kunatakis musicanak tocapjjäna, cantapjjarakïna?

⁶ Diosar jan jitheqtas serviri israelitanakajj Jerusalén markan perqanakap wasitat saytʼayapkäna ukhajja, Nehemiasajj levita chachanakwa cantapjjañapataki musicanak tocapjjañapatak wakichtʼäna. Murallanak lurañ tukuyasjjäna ukhajja, musicanak istʼasajj jukʼampiw israelitanakajj kusisipjjäna. Pä jachʼa grupwa cantapjjañapatak waktʼayapjjäna. Jupanakajj perqa patnämaw sarapjjäna, mä grupojj kupi toqeru, maynisti chʼeqa toqeruraki. Ukatjja, templo jakʼanwa jikisipjjäna. Cantapjjatapajj wali jayatpachwa istʼasïna (Neh. 12:27, 28, 31, 38, 40, 43). Ukham taqe chuyma cantapjjatapajj Jehová Diosar wal kusisiyäna.

7. Cantonakampi Jehová Diosar adorañajj kunja wakiskirisa uk ¿kunjamsa Jesusajj yatichäna?

⁷ Jesusajj aka oraqenkaskäna ukhajja, ukhamarakiw Jehová Diosarojj musicanakampi adorasirïna. Jesusajj Santa Cena uttʼayasajja, discipulonakapamp chikaw uka arumajj cantonakampi Diosar jachʼañchäna (Mateo 26:30 liytʼañataki).

8. ¿Kunsa nayrïr patak maranakan jakir cristianonakat yateqassna?

⁸ Nayrïr patak maranakanjja, cristianonakajj Jehová Diosar adorkasajj cantapjjapunirïnwa, ukajj wali yateqaskayawa. Jupanakajj janiw templon tantachasipjjerïkänti utanakanwa tantachasipjjerïna, ukhamäkchïnsa wali kusisitaw taqe chuyma cantapjjerïna. Diosan amuytʼayatajja, apóstol Pablojj cristiano masinakapar akham sänwa: “Jumanakajj maynit maynikam yatichasisipkakim, chʼamañchtʼasisipkakim, salmonakampi, Diosar jachʼañchäwinakampi, yuspärañ cantonakampi, adorañ cantonakampi. Jehová Diosatakis chuymatpach cantapjjam” sasa (Col. 3:16). Cheqas ukhamwa cantañ librosan utjki uka cancionanakampejj Jehová Diosar taqe chuyma cantañasa. Uka cancionanakjja, “suma phoqeri amuyasir escla[vow]” apayanistu (Mat. 24:45).

9. 1) ¿Kunatsa yaqhepanakajj congregacionansa, jachʼa tantachäwinakansa jachʼat cantañ ajjsarayasipjje? 2) ¿Kunjamsa Jehová Diosar taqe chuyma cantsna, khitinakas yateqaskay cantapjjañapa? (Página 3 ukankir foto uñjjattʼäta).

⁹ Inas markasana jan ukajj familiasan cantañar jan yatitäkstanti, ukatwa awisajj cantañ  ajjsarayassna. Jan ukajj radiona, televisionan wali sum cantapki ukanakjam jan cantirjamäsaw phenqʼassna, jan ukajj ajjsarayassna. Ukampis janiw ajjsarayasiñasäkiti, Jehová Diosarojj taqe chuyma cantasaw jachʼañchañasa. ¿Kunas yanaptʼistaspa? Cantañ librosjja altoruw apjjaruñasa, pʼeqessa altañasarakiwa, ukatsti taqe chuymaw cantañasa (Esd. 3:11; Salmo 147:1 liytʼañataki). Jichhürunakanjja, walja Tantachasiñ Utanakanwa pantallanakajj utj-jje, ukanwa letranakajj cantañatak uñsti. Ukajj jukʼamp jachʼata kusisita cantañatakiw yanaptʼistaspa. Maysa toqetjja, jilïr irpirinakataki escuelajj utjki ukanjja, ukhamarakiw Jehová Diosar cantasa jachʼañchapjje. Cheqas ukajja, tantachäwinakan yateqaskaya, jachʼata cantapjjañapatakiw jilïr irpirinakarojj chʼamañchi.

10. ¿Kunsa jachʼat cantañ ajjsarayastan ukhajj amtañasa?

¹⁰ Yaqhep jilat kullakanakajja, janiw cantatap istʼasiñap munapkiti, jan ukajj ‘arujajj janiw sumäkiti’ sasaw ajjsarayasipjje. Ukampis ak amuytʼañäni, kunapachatï parlktan ukhajja, “taqeniw walja kuti pantjastanjja”, ukhamäkchisa parlaskaktanwa (Sant. 3:2). Cantañampejj ukhamarakïñapawa, arusajj janis sumäkaspa ukham amuykasasa, taqe chuymaw jachʼat Jehová Diosar cantaskakiñasa.

11, 12. ¿Kunanakas jachʼat sum cantañatak yanaptʼistaspa?

¹¹ Kunjamsa cantañasa uk jan yatisaw awisajj ajjsarayasiraksna. Kunanakas jachʼat cantañatakejj yanaptʼistaspa uk mä qhawqha uñjañäni. *

¹² Jachʼata sum cantañatakejja, sum samsuñ yateqañaw yanaptʼistaspa. Kunjamtï electricidadajj luz qhantaykejja, ukhamarakiw  samanasajj jachʼata sum arsuñataki jan ukajj cantañatak yanaptʼistu. Kawkchʼa aruttï parlasktan ukchʼa arumpikis cantsna ukajj walipunïspawa, (ukatakejj “Control del volumen de aire” sat pʼeqeñchäwinïki uka cheqwa Benefíciese de la Escuela del Ministerio Teocrático libron páginas 181-184 uñjjattʼäta). Cantkasajj jachʼata, kusisita artʼasipjjam sasaw Bibliajj Jehová Diosan servirinakapar ewjjtʼistu (Sal. 33:1-3).

13. Kunas taqe chuyma jan ajjsaras cantañatak yanaptʼistaspa uk qhanañchtʼma.

¹³ Familjam Bibliat yatjjatkasa jan ukajj sapak yatjjatkasaw akham lursna: cantañ librosatwa kawkïr cancionatï gustkistu uk ajlliñasa, ukatjja jachʼata taqe chuymaw liytʼañasa; ukatsti, aire phoqantasisajj jan saytʼasaw mä cheq liytʼañasa; ukjjarusti, liytʼktan uka pachpa chʼamampiw uka cheqa cantañasa (Isa. 24:14). Ukham lurañäni ukhajja, arusajj jukʼamp chʼamampiw mistuni, ukajj wali wakiskiriwa. Janipuniw cantañ ajjsarañasäkiti ni phenqʼasiñasäkisa.

14. 1) ¿Kunatsa cantktan ukhajj lakas sum jistʼarañasa? (“ Kunjamsa sum cantsna” siski uka recuadro uñjjattʼäta). 2) Kunanakas jachʼata sum cantañatak yanaptʼistaspa uk qhanañchtʼma.

¹⁴ Arusajj jachʼat sum istʼasiñapatakejja, lakas sum jistʼarañasawa. Parlañatak jistʼarktan ukat sipans jukʼampwa cantañatakejj jistʼarañasa. Jiwasatï arusajj janis chʼamanïkaspa, wali juchʼusäkaspas ukham amuyasstanjja, Benefíciese de la Escuela del Ministerio Teocrático libron página 184 ukankir “Cómo superar problemas específicos” siski uka recuadronwa uka toqet yanaptʼanakajj utji.

15. 1) ¿Kunsa Stephen Lett jilatajj mä wakiskir tantachäwin yatiyäna? 2) ¿Kunatsa cantañ librosajj wasitampi uñakipasiñapajj wakisïna?

¹⁵ Estados Unidos markan jachʼa tantachäwejj maran mä kuti apaski ukaw 2016 maran apasïna, ukanjja Stephen Lett jilataw machaq cantañ libro utjatap yatiyäna, jupajj Oraqpachan Jilïr Irpirinakat maynïriwa. Uka cantañ librojja, Jehová Diosar taqe chuym cantapjjañäni  satawa. Jilatajja, kunatsa cantañ librojj wasitamp uñakiptʼasiwayi ukwa qhanañchtʼäna. Machaq Mundon Jakirinakataki Diosan Arunakapa Bibliajj 2013 maranwa inglés arun wasitat uñakiptʼasïna. Uka Bibliankir arunakarjamaw machaq cantañ librojj uñakipasiwayi sasaw jilatajj säna. Ukatwa yaqhep arunakajj apsutäjje, cambiatäjjaraki. Ukatjja, Diosan arunakap yatiyañ toqet parlir cancionanaka, Jesusajj juchat kutsuyawaykistu ukar yuspäratas uñachtʼayañatak cancionanakampiw yaptʼasiwayaraki. Niyakejjay Jehová Diosarojj cancionanakampi jachʼañchaschejja, Oraqpachan Jilïr Irpiri jilatanakajj machaq cantañ librojj suma lurtʼatäñapwa munapjjarakïna, ukatwa uñakipasiwayki uka Bibljam coloraraki lurasiwayi.

16, 17. ¿Kunanakas machaq cantañ libron cambiasiwayi?

¹⁶ Machaq cantañ librosan cancionanak ratuk katjañatakejja, tem tema jalanoqtʼatawa. Sañäni, nayrïr 12 cancionanakajja, Jehová Diosatwa parli, ukjjankir kimsaqallqo cancionanakajj Jesusata, jupajj juchat kutsuyawaykistu uka toqetwa parlaraki, yaqhanakas ukarjam waktʼayatarakiwa. Qalltanjja, mä listaw tem tema jalanoqtʼat utjaraki, ukajj discurso arstʼir jilatanakan canción ajlltʼapjjañapatakiw yanaptʼi.

¹⁷ Taqe chuyma cantañasatakejja, yaqhep cancionanakan letrapajj qhana amuykaña lurtʼatawa, jan parlasjje uka arunakas apsutäjjarakiwa. Sañäni, “kamachi, qhapaqkankaña, churäwi, qollan ajayu” uka arunakajj janiw jichha tiempon parlasjjeti, ukatwa uka arunakajj apsutäjje. Ukatjja, “Jukʼamp iyawsäwi churapjjeta” siskäna uka pʼeqeñchäwejj “Jumar jukʼamp confiyañ yanaptʼapjjeta” sasin cambiatäjjewa, uka cancionan letranakapajj ukarjam luratäjjarakiwa. Ukhamarakiw yaqha cancionanakan pʼeqeñchäwipajj cambiasiwayi, sañäni, “Kuntï churkistani uk suyapjjañäni” siskäna ukajj “Walja bendicionanakaw Paraison utjani” sasin cambiatäjjewa. Uka cancionan letranakapajj suma amuytʼkañawa, jutïrin kuna bendicionanaktï katoqkañäni ukwa amtayarakistu.

18. ¿Kunatsa machaq cantañ librosan utjki uka cancionanak sum uñtʼañasa? (Qhanañchäwip uñjjattʼarakïta).

¹⁸ Jehová Diosar taqe chuym cantapjjañäni sat machaq cantañ libronjja, walja cancionanakajj Diosarus orasksna ukham arunakampi qellqatawa. Uka arunakaw Jehová Diosar taqe chuyma cantañatak yanaptʼistu. Yaqhep cancionanakasti, ‘wali suma luräwinak jukʼamp utjañapataki’, maynit maynikam munasiñasatakiw yanaptʼistani (Heb. 10:24). Ukhamajj musican tonadapsa letrapsa sum uñtʼañasawa. Ukatakejja, jw.org cheqan grabacionanakajj utjki ukanakwa istʼsna. Uka cancionanak utan yatsuñäni ukhajja, jan ajjsarasaw taqe chuyma cantañäni. *

19. ¿Kunjamsa Jehová Diosarojj taqenis adorapjjsna?

¹⁹ Cantasajj Jehová Diosaruw adorasktanjja, uk janipun armañäniti. Ukham lurasajj Jehová Diosar munasitasa yuspärataswa uñachtʼaytanjja (Isaías 12:5 liytʼañataki). Taqe chuyma kusisita canttan ukhajja, mayninakarus ukham lurapjjañapatakiw chʼamañcharaktanjja. Congregacionanjja, wayn tawaqonakasa, jilïrinakasa, jichhak jutirinakasa taqeniw Jehová Diosarojj taqe chuyma cantasa jachʼañchsna. Ukhamajj jan ajjsartʼasaw taqe chuyma cantañasa. “Tatitur qʼochupjjam” siski uka ewjjtʼar istʼasaw kusisita cantañasa (Sal. 96:1).