1, 2. 1) ¿Kuna premio katoqañsa Jehová Diosan servirinakapajj suyasktanjja? 2) ¿Kuna premiotï utjki uk jan armañatakejj kunas yanaptʼistani? (Aka paginankir dibujo uñjjattʼäta).

AJLLIT cristianonakajj apóstol Pabljamarakiw “alajjpachar sarañatak jawski uka premio katoqañ” suyasipki (Fili. 3:14). Jesusamp chika Reinopan apnaqañsa, jaqenakar perfectöpjjañapatak yanaptʼañsa wal munapjjaraki (Apo. 20:6). ¡Ukajj mä suma suytʼäwipuniwa! Yaqha ovejanakjam uñtʼatäpktan uka cristianonakajja, aka oraqen wiñay jakasiñwa suyaskaraktanjja, ukajj wal kusisiyistu (2 Ped. 3:13).

² Apóstol Pablojj jupjam ajllit jilat kullakanakar premio katoqapjjañapataki, Diosat jan jitheqtapjjañapatak yanaptʼañwa munäna, ukatwa akham säna: “Kunanakatï alajjpachan utjki ukanakat lupʼisipkakim” sasa (Col. 3:2). Alajjpachar sarañatak jawsatäpki ukjja, janiw jupanakajj armapjjañapäkänti (Col. 1:4, 5). Alajjpachar sarañsa, jan ukajj aka oraqen wiñay jakasiñsa suyaskstanjja, kuna bendicionanaktï katoqkañäni ukanakat lupʼiñasawa, ukaw kuna premiotï utji uk jan armañatak yanaptʼistani (1 Cor. 9:24).

3. ¿Kunanakatsa apóstol Pablojj cristianonakar ewjjtʼäna?

 ³ Kunanakas premio katoqañat ajllitanakar jarkʼaspa ukanakat amuyasipjjañapatakiw Pablojj ewjjtʼäna. Colosas markankir cristianonakarojja, falso cristianonakat amuyasipjjañapatakiw qellqäna, jupanakajj janiw Cristor confiyapkänti, Leyirjam sarnaqasakiw Diosampi katoqatäñ suyapjjäna (Col. 2:16-18). Ukatsti, qʼañu jucha lurañanakat amuyasiñata, jilat kullakanakampi jan waltʼayasiñanak askichañata, familian jan waltʼäwinak utjki ukanak askichañatwa parlarakïna. Ukham jan walinakajj jichhürunakan utjaskakiwa, ukatwa apóstol Pablon ewjjtʼanakapajj wakiskirikïski. Ukhamasti, Colosenses libron kuna suma ewjjtʼanakas utji uk mä qhawqha uñjañäni.

4. ¿Kunatsa qʼañu jucha lurañ munañajj premio katoqañat jarkʼistaspa?

⁴ Ajllitanakajj kuna suma suytʼäwinïpjjesa uk amtayasajja, apóstol Pablojj akham sarakïnwa: “Ukhamajj aka oraqenkir cuerponakamatjja akanak chhaqtayapjjam: qʼañu jucha luraña, ajjtaskañanak luraña, warmi jan ukajj chacha añcha munañampi atipayasiña, jan walinak lurañ munaña, maynitakik taqe kuns munaña” sasa (Col. 3:5). Warmi jan ukajj chacha añcha munañajja, Jehová Diosampi sum apasitassa, jutïritak suytʼäwissa aptʼasiyistaspawa. Mä jilatat amuytʼañäni, jupajj qʼañu jucha lurañaruw purtʼasïna, congregacionar kuttʼanjjasajj akham sänwa: ‘Qʼañu jucha lurañ munañampiw apayasta, qhepatakwa jan walïtap amuyasta’ sasa.

5. ¿Kunsa juchar jan purtʼasiñatakejj lurañasa?

⁵ Juchar jan purtʼasiñatakejja, kunanakatï juchar puriykistaspa ukanakat amuyasiñasawa, sum sarnaqañ toqet Jehová Diosajj ewjjtʼkistu ukanakarus istʼañasarakiwa. Sañäni, casarasiñatak uñtʼasisipki ukanakajja, qalltatpachwa kunanaksa jan lurapjjañapäki ukanakat sum parltʼasipjjañapa. Qhomantasisipkaspati, jampʼattʼasisipkaspati, panipakejj sarnaqasipkaspati janicha ukanakatsa qhan parltʼasipjjañaparaki (Pro. 22:3). Cristianonakajj ukhamarakiw negociotak jayanak viajisasa, jan ukajj mä chachampi jan ukajj warmimpi trabajisajj qʼañu jucha lurañanakar purtʼassna (Pro. 2:10-12, 16). Ukhamanakan trabajiñasächejja, Jehová Diosan Testigopätas qalltatpachwa yatiyañasa, cristianjamaw sum sarnaqañasa, janirakiw jupampïñsa munksna ukham khitirus parlañasäkiti. Jiwasatï llakitästan jan ukajj saparstʼatäksnas ukham amuyastanjja, jukʼampiw ukanakat amuyasiñasa. Inas chuymachtʼatäñ wal munasajj khitirus iyawsjjaksna. Ukham jan walinakan uñjasisajja, jankʼakiw Jehová Diosaru, jilat kullakanakaru yanaptʼa mayisiñasa, ukhamatwa juchar jan purtʼaskañäniti, ni premio katoqañsa aptʼaskañäniti (Salmo 34:18; Proverbios 13:20 liytʼañataki).

6. ¿Kunanakatsa anatañanaka kusistʼañanak ajllkasajj amuyasiñasa?

⁶ Qʼañu jucha lurañ munañanakampi jan apayasiñatakejja, uka jan walinakar chʼamañchir anatañanaksa kusistʼañanaksa apanukuñasawa. Taqe ukanakajj kunanakatï Sodoma, Gomorra markanakan utjkäna uka pachparakiwa (Jud. 7). Uka anatañanaka kusistʼañanaka luririnakajja qʼañu jucha lurañanakajj walikïskaspasa, janis kuna jan walinsa uñjasiykistaspa ukhamwa amuyayapjje. Ukhamasti uka jan walinakat amuyasiñasapuniwa. Jiwasatï anatañanaksa kusistʼañanaksa jan sum ajllksnajja, premio katoqañwa aptʼassna (Pro. 4:23).

7. ¿Kuna jan walinakas congregacionan utjaspa?

⁷ Jehová Diosan markapankañajj mä suma bendicionawa. Tantachäwinakan Bibliat yatjjatañasa,  maynit maynikam munasiñampi yanaptʼasiñasa, kuna premiotï jiwasatak utjki uk jan armañatakiw yanaptʼistu. Ukampis awisajja, jan walsa lurapkistaspa ukham amuyañaw utjaspa, ukhamatwa congregacionan jachjayasiñajj utjaspa. Uka jan waltʼayasiñanak jan askichksnajja, chuyma ustʼataw sarnaqsna (1 Pedro 3:8, 9 liytʼañataki).

8, 9. 1) ¿Kunjam jaqëñas premio katoqañatak yanaptʼistaspa? 2) Mä jilatasa mä kullakas chuym ustʼayistani ukhajja, ¿kunas jupampi sum apasiñatak yanaptʼistaspa?

⁸ Chuyma ustʼata sarnaqañajj premio katoqañatwa jarkʼistaspa, ukar jan purtʼasiñatakejja, apóstol Pablojj akham sasaw ewjjtʼäna: “Jumanakajj Diosan ajllitanakapäpjjtawa, santöpjjtawa, jupan munatäpjjaraktawa, ukhamajj chuymatpach sinttʼasiñampi, suma chuymanïñampi, humilde chuymanïñampi, llampʼu chuymanïñampi, paciencia chuymanïñampi isthapisipjjam. Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim. Kunjamtï Jehová Diosajj taqe chuyma perdonapktamjja, ukhamarak jumanakajj perdonasipjjam. Ukampis taqe ukanakat sipansa munasiñamp isthapisipjjam, munasiñajj wali sum mayachthapi” sasa (Col. 3:12-14).

⁹ Cheqas munasirïña, suma chuymanïñaw maynit maynikam perdonasiñatak yanaptʼistani. Sañäni, mä jilatana jan ukajj mä kullakan parlatapatï, jan ukajj luratapatï chuym ustʼaychistojja, kunjamsa jiwasajj arumpisa luratasampisa maynir chuym ustʼayirïtan ukanak amtasiñasawa. Jilat kullakanakajj kunjamsa munasiñampi suma chuymampi perdonapjjestu ukanakat wal yuspärtanjja (Eclesiastés 7:21, 22 liytʼañataki). Jesusajj munasiñatwa Diosan servirinakaparojj mayachthapiwayi, ukat walpun yuspärtanjja (Col. 3:15). Taqeniw mä sapa Diosaruk munastanjja, mä pachpa yatiyäwik jaqenakar yatiytanjja, taqenirakiw jan walinakan uñjastanjja. Taqpach jilat kullakanakar munastan, suma chuymampi uñjtan, maynit maynikamas perdonastan ukhajja, congregacionan mayachtʼatätanwa, taqenirakiw premio katoqañatak chʼamachastanjja.

10, 11. 1) ¿Kunatsa envidiasiñajj jan walïki? 2) Envidiasirïsna ukhajja janiw premio katoqjjsnati, ¿kunas ukar jan purtʼasiñatak yanaptʼistaspa?

¹⁰ Jiwasatï envidiasirïsnajja janiw premio katoqksnati. Envidiasirïñajj kunja jan walisa ukwa Biblian qhanañchi. Sañäni, Cainajj envidiasiñatwa Abel jilapar jiwayäna. Ukhamarakiw Coré, Datán, Abiram sat chachanakajj Moisesat envidiasisin jupa contra saytʼapjjäna. Saúl reyis Davidat envidiasisaw jiwayañ munarakïna. Ukatwa Biblian akham sispacha: “Kawkintejj envidiasiñanakasa jiskhisiñanakasa utjki ukanjja, jan waltʼäwinakampi kunayman jan wali luräwinakampiw utjani” sasa (Sant. 3:16).

¹¹ Jiwasatï munasirïñäni, suma chuymanïñänejja, janiw envidiaskañäniti. Diosan Arupanjja akham siwa: “Munasir jaqejj paciencianiwa, khuyapayasiriwa. Munasir jaqejj janiw envidiasirïkiti” sasa (1 Cor. 13:4). Envidiasiñajj chuymasan jan utjañapatakejja, kunjamtï Jehová Diosajj jaqenakar uñjki ukham uñjañatakiw chʼamachasiñasa. Amtapuniñäni, taqpach jilat kullakanakajj mä cuerpokïksnas ukhamätanwa, mä arunjja mä congregacionakïtanwa. Biblian akham siwa: “Cuerpon mä partepatejj jachʼañchatächejja, mayni partenakajj taqenirakiw jupampi chikajj kusisipjje” sasa (1 Cor. 12:16-18, 26). Ukhamtï jilat kullakanakar uñjañänejja, janiw envidiaskañäniti, jan ukasti jupanakamp chikaw bendición katoqapjjatapat kusisiñäni. Saúl reyin Jonatán yoqapat amtañäni, Jehová Diosajj jupar ajlliñat sipansa, Davidaruw reyïñapatak ajllïna, ukhamäkchïnsa Jonatanajj janiw coleraskänti. Antisas Davidarojj munasiñampi suma chuymampiw chuymachtʼäna, yanaptʼarakïna  (1 Sam. 23:16-18). ¿Jiwasajj Jonatanat yateqasiraksnati?

12. ¿Kuna ewjjtʼanakas familiasar premio katoqapjjañapatak yanaptʼaspa?

¹² Bibliajj yatichki ukarjam familian sarnaqañajja, kusisitäñataki, sum apasiñatakiw yanaptʼistu, premio katoqañatakis yanaptʼarakistaniwa. Apóstol Pablojj akham sasaw cristiano familianakar ewjjtʼäna: “Casarat warminaka, chachanakamarojj istʼapjjam, kunjamtejj Tatitun arkirinakapajj lurapjjañapäki ukhama. Casarat chachanaka, warminakamarojj munasisipkakim, jan jupanakatakejj colerasipjjamti. Wawanaka, awk taykamarojj taqe kunansa istʼapjjam, ukaw Tatiturojj wal kusisiyi. Awkinaka, jan wawanakamarojj colerasiyapjjamti, ukhamat jupanakajj jan llakisipjjañapataki” sasa (Col. 3:18-21). Uka arunakajja, wawanakarusa, casarat chachanakarusa warminakarus yanaptʼaskakistuwa.

13. ¿Kunjamsa mä kullakajj Diosar sirvjjañapatak esposopar yanaptʼaspa?

¹³ Mä kullakan jan Testigo esposopajj jan walsa jupar uñjkaspa ukham amuytʼañäni. ¿Kullakatï ukham luratapat colerasis esposopar toqespa ukajj yanaptʼaspati? Inas esposopajj jupar istʼchispa, ukampis ¿Jehová Diosar serviñ munaspati? Inas jan munkchispati. Antisas kullakatï esposopar familia pʼeqtʼirirjam respetompi  uñjanejja, familiapan sum apasiñatakiw yanaptʼani, Jehová Diosarus jachʼañcharakiniwa. Inas tiempompejj esposopajj Diosar serviñ munjjarakchispa. Ukhamäspajja, panpachaniw premio katoqapjjaspa (1 Pedro 3:1, 2 liytʼañataki).

14. ¿Kunsa mä jilatajj luraspa esposap jan respetkchi ukajja?

¹⁴ Mä jilatan jan Testigo esposapajj janis respetompi uñjkaspa ukham amuytʼarakiñäni. ¿‘Nayaw familian pʼeqëtjja’ sasin toqesisajj respetayasispati? Janiwa. Jan ukasti, Jesusat yateqasis esposapar munasiñampi uñjañapwa Jehová Diosajj muni (Efe. 5:23). Jesusajj munasiñampi pacienciampiw congregacionar uñji (Luc. 9:46-48). Cristiano mä chachatï Jesusat yateqasis esposapar sum uñjanejja, inas esposapajj Diosar serviñ munjjchispa.

15. ¿Kunjamsa mä cristiano chachajj esposapar munasispa?

¹⁵ Jehová Diosajj akham sasaw chachanakar ewjjtʼi: “Warminakamarojj munasisipkakim, jan jupanakatakejj colerasipjjamti” sasa (Col. 3:19). Munasir mä cristianojj respetompiw esposapar uñji, kamsisa uksa sum istʼi, arunakapsa wakiskirit uñjaraki (1 Ped. 3:7). Janis kuntï esposapajj siski ukanak taqpun lurkchinejja, jupar istʼatapajj suma amtanakar puriñatakiw yanaptʼaspa (Pro. 15:22). Warmipar munasir chachajj janiw munkir jan munkir respetayaskiti, jan ukasti munasiñampi uñjatap laykuw esposapajj respeti. Mä chachatï esposaparusa wawanakaparus munasiñampi uñjani ukhajja, jupanakajj kusisitaw Diosar servipjjaspa, ukatsti premio katoqapjjarakispa.

16, 17. Wayn tawaqo, ¿kunas ewjjtʼanak suma chuymampi katoqasiñatak yanaptʼiristamjja?

¹⁶ Wayn tawaqo, inas awk taykamajj Jehová Diosan Testigopäpjjchi, taqe kunatsa jarkʼapkiristam ukham inas amuyasta. Ukham amuyasisajj Jehová Diosar serviñajajj wakisipuniti janicha sasin inas pächasjjchisma. Ukampis Jehová Diosan markapat jitheqtasma ukhajja, janiw khitis cristiano awk taykamjamasa ni congregacionankir amigonakamjamas cheqapun munasipkiristamti.

¹⁷ Awk taykanakan ewjjtʼanakapajj wali wakiskiriwa. Jupanakatï jan cheqañchapkiristamjja, ¿janis munasipkiristam ukham janit amuyaskasma? (Heb. 12:8). Kunjamsa cheqañchapjjtam ukajj inas jumatak jan walïkchiti. Ukak piensaskañat sipansa, kunatsa ukham ewjjtʼapjjtam uk amuyañatakiw chʼamachasiñama. Ukhamasti, colerampi jan atipayasiñataki paciencianïñataki chʼamachasiñamawa. Kunjamtï Biblian siskejja, amuytʼasir jaqejj wakiski ukakwa parli, altʼat chuymanirakiwa (Pro. 17:27). Ukhamajj amuytʼasir jaqëñamawa, janiw kunjamtï ewjjtʼapktam ukanakat jankʼaki colerasiñamäkiti, jan ukasti kunatsa ewjjtʼapjjtam ukanakat lupʼiñamawa (Pro. 1:8). Jehová Diosar taqe chuyma munasir awk taykanïtamajj wal yanaptʼätam. Jupanakajj wiñay jakañ premio katoqañamwa munapjje.

18. ¿Kunatsa premio katoqañatak chʼamachasiskakiñ amtta?

¹⁸ Taqeniw wiñay jakañ premio katoqañ suyasktanjja, yaqhepajj alajjpachan wiñay jakañ suyasipki, yaqhepasti aka oraqen mä suma Paraison jakasiñwa suyasktanjja. Uka suytʼäwisajj phoqasipuniniwa, Jehová Dios pachpaw ukham arsuwayi. Kunjamsa Paraison jakasiñäni uka toqetjja Diosajj akham sänwa: “Tatitun yatiñapajj taqe markpacha[ruw] phoqhantani” sasa (Isa. 11:9). Uka tiemponjja, taqeniw Jehová Diosan yatichatäñäni. Ukhamasti wiñay jakañ premio katoqañataki chʼamachasitasajj janiw inamayäkaniti. Ukhamajj uka premio katoqañatak chʼamachasiskakiñäni, jan kunas jarkʼistpanti.