1-3. 1) ¿Kunjamsa Biblian cheqa yatichäwinakapar uñjañasa? Uk mä uñachtʼäwimp qhanañchtʼam. (Aka paginankir fotonak uñjjattʼäta). 2) ¿Kuna jisktʼanakarus aka yatichäwin qhanañchaskañäni?

JICHHÜRUNAKANJJA jaqenakajj mä kun alasisajj kuttʼayañwa yatipjje. Yaqhep markanakanjja, sapa patakat llätunkaniw ukham lurapjje. Internet toqnam alasirinakasti, patakat kimsa tunkaniw ukham lurapjjaraki. ¿Kunatsa ukham lurapjje? Inas uka alatajj jan suma luratäkchiti, jan ukajj jan jupanakar gustkchiti, ukatwa kuttʼayapjje jan ukajj qollq mayisjjapjje.

² Jiwasanakajj janipuniw “kunatejj cheqäki” ukampejj ukham lurañ munktanti. Bibliat yateqjjasajja, janiw aljañsa ni apanukuñsa munktanti (1 Tim. 2:4; Proverbios 23:23 liytʼañataki). Kunjamatï pasïr yatichäwin yatjjatawayktanjja, taqeniw kunatï cheqäki uk yateqañatakejj tiempo apstʼasiwaytanjja, yaqhepasti walja qollqe ganañwa jaytaraktanjja, yaqhepanakarusti familiarapajj janiw nayrjam uñj-jjapjjeti. Waljanejj jan wali costumbrenaka, jan wali amuyunaka, jan wali sarnaqäwinakwa jaytapjjaraki. Inas jiwasajj ukham jaytarakstan, ukampis ukanakajj kuna bendicionanaktï katoqktan ukanakat sipan janiw kunäkisa.

 ³ Diosan Reinopat yatichäwinakajj qhawqha valoranisa uk amuytʼayañatakejja, Jesusajj suma perlanak thaqeri mä comerciante jaqetwa parläna. Uka jaqejj “wali valorani mä perla katjasinjja, jankʼakiw taqe utjirinakap aljir saräna, ukatsti uka perla alasïna” (Mat. 13:45, 46). Diosan Reinopat kunatï cheqäki ukanak yateqasasa Biblian yatichäwinakap yateqasasa, ukhamarakiw ukanakar wali valoranit uñjasajj kunayman jaytawaytanjja. Ukham wali valoranit uñjaskakiñäni ukhajj janipuniw aljkañäniti. Ukampis yaqhepajj janiw valoranit uñj-jjapjjeti, ukatwa alj-jjapjje. Jiwasajj janipuniw uk lurañasäkiti. Jan ukasti kunjamtï Bibliajj ewjjtʼkistojja, ‘cheqa yatichäwinakarjam sarnaqasipkakiñasawa’ (3 Juan 2-4 liytʼañataki). Ukatakejj ukaw jakäwisan nayrankañapa, ukarjamaw sarnaqañasaraki. Aka yatichäwinjja, aka jisktʼanakaruw qhanañchaskañäni: ¿Kunatsa ukat kunjamsa yaqhepanakajj kunatï cheqäki uk aljapjje? ¿Kunatï cheqäki uk jan aljañatak kunas yanaptʼistaspa? ¿Kunanaksa kunatï cheqäki ukarjam sarnaqaskakiñatakejj lurañasa?

4. Nayrïr patak maranakanjja, ¿kunatsa yaqhepajj kunatï cheqäki uk aljapjjäna?

⁴ Nayrïr patak maranakanjja, yaqhepajj Jesusan yatichäwinakap qalltan iyawsapkchïnsa, qhepat janiw uka yatichäwinakarjam sarnaqjjapjjänti. Mä kutejja, Jesusajj jupar arkapkäna uka jaqenakar manqʼayañatakiw mä milagro luräna. Qhepatjja, uka jaqenakajj Jesusamp chikaw qota khurkatar sarapjjäna. Ukanjja, Jesusajj jupanakar akham sänwa: “Cheqpachapuniw sapjjsma, janitï jaqen Yoqapan jañchipat manqʼapkäta, ni wilapsa umapkäta ukhajja, janiw wiñay jakañ katoqapkätati” sasa. Uka arunakajj kamsañsa muni uk jisktʼañat sipansa, jupanakajj akham sapjjänwa: “Arunakapajj janiw iyawsañjamäkiti, ¿khitirak ukanak istʼanisti?” sasa. “Ukanak istʼasasti kunanaktï jaytapkäna ukanakaruw discipulonakapat waljanejj kuttʼjjapjjäna, janiw jupar arkjjapjjänti” (Juan 6:53-66).

5, 6. 1) Jichhürunakanjja, ¿kunatsa yaqhepajj cheqa yatichäwinakarjam jan sarnaqjjapjje? 2) ¿Kunjamsa yaqhepajj kunatï cheqäki ukat jukʼat jukʼat jitheqtjjapjje?

⁵ Jichhürunakanjja, ukhamarakiw yaqhepajj cheqa yatichäwinakarjam jan sarnaqjjapjjeti. Biblian mä texto jukʼamp qhanañchasitapata, jan ukajj mä uñtʼat jilatan kun luratap uñjasaw lanktʼapjje, jan ukajj mä kun satapatwa lanktʼapjje. Yaqhepasti, Bibliampi cheqañchatäsa, jan ukajj mä jilatampi jan ukajj kullakampi jan waltʼayasisaw jitheqtapjjaraki. Yaqhepajj inas Diosan markap contra saytʼiri (apóstatas), jan ukajj Biblian yatichäwinakap conträpki ukanakampi mayachasjjapjjchi. Kunatjjay ukham lurapjjchi, yaqhepajj Diosata, congregacionat jitheqtañwa amtapjje (Heb. 3:12-14). Jupanakajj apóstol Pedrot yateqasisaw Jesusar confiyasipkakiñapäna. Jesusajj “¿janit jumanakajj sarjjañ munapkarakta?” sasin apostolonakapar jisktʼäna ukhajja, Pedrojj akham sänwa: “Tata, ¿khitin ukarurak sarapjjästi? Jumaw wiñay jakañar apiri arunakanïtajja” sasa (Juan 6:67-69).

⁶ Yaqhepasti kunatï cheqäki ukat jukʼat jukʼatwa jitheqtjjapjjaraki, inas jan amuyasisa jitheqtapjjchi. Bibliajja, kunjamtï mä barcojj qota thiyat jukʼat jukʼat jitheqawaykejj ukamp sasiwa sasaw qhanañchi (Heb. 2:1). Cheqas jupanakajj janiw kunatï cheqäki uk jaytañ pensapkpachänti, ukampis Jehová Diosampi jukʼat jukʼat jan sum apasjjasaw markapat jitheqtjjapjje. Jiwasanakajj ¿kunsa ukhamar jan purtʼasiñatakejj lursna?

7. Kunatï cheqäki ukat janipun jitheqtañatakejj ¿kunas yanaptʼistaspa?

⁷ Kunatï cheqäki ukarjam sarnaqañatakejja, Diosan taqe yatichäwinakaparuw iyawsañasa, ukarjamaw lurañasaraki, ukarakiw jakäwisan nayrankañapa. Taqe kunansa Biblian yatichäwinakaparjamaw sarnaqañasa. Mä kutejja, David reyejj Jehová Diosar akham sänwa: ‘Kunatï cheqäki ukarjamaw sarnaqä’ sasa (Sal. 86:11, NM). Jiwasajj ukhamarakiw Diosan cheqa yatichäwinakaparjam sarnaqaskakiñ amtañasa. Jan ukhamäkaspajja, kunanaktï Diosan arunakap yateqañatakejj aptʼawayktan ukanakat lupʼiñwa qalltjjsna, wasitampi jikjjatañsa munjjaraksnawa. Ukampis janipun uk lurañäniti. Jiwasajja, Diosan kawkïr yatichäwinakaparus istʼañäni, kawkïrirus janiraki uk janiw ajllksnati, ukampis ukanakarjam sarnaqañatakejja, uka yatichäwinak iyawsañasawa sum amuyañasarakiwa (Juan 16:13). Pasïr yatichäwinjja, kunatï cheqäki uk yateqañatakisa ukarjam sarnaqañatakis kunanaksa jaytawaytan ukwa yatjjatawaytanjja. Jichhajja, jan ukanakar kuttʼañatakejj kunsa lursna uka toqetwa yatjjatarakiñäni (Mat. 6:19).

8. Kunatï cheqäki ukatjja, ¿kunjamsa jan amuyasis jitheqtsna? Uk mä experienciamp qhanañchtʼma.

⁸ Tiempo. Kunatï cheqäki ukat jan amuyasis jan jitheqtañatakejja, janiw tiempo ina chʼusar aptʼañasäkiti. Uka toqet jan amuyasksna ukhajj anatañanakaru, kunatï gustkistu ukanakaru, Internet jan ukajj televisión uñchʼukiñarukiw tiempo aptʼjjsna. Ukanakajj janis jan walïkchejja, Bibliat sapak yatjjatañata, predikir sarañata, jan ukajj yaqha ukham lurañanakatwa tiempo apaqestaspa. Amuytʼañatakejj Emma * sat kullakat parltʼañäni. Juparojja, wawaskäna ukhatpachaw caballot sarnaqañajj gustäna. Tiemponïkäna ukhajj caballot sarnaqapunirïnwa. Ukampis tiempompejja, ukak lurjjatapatjja janiw sum jikjjatasjjänti, ukatwa jaytjjañ amtäna. Cory Wells kullakan sarnaqäwipas yanaptʼarakïnwa, jupajja, caballo patjjan chʼama ejercicionak lurirïnwa. * Jichhajja, Emma kullakajj predicañatakisa yaqha ukhamanakatakis jukʼamp tiemponëjjewa. Diosar servir familiaranakapampi amigonakapampïñatakis jukʼamp tiemponëjjewa. Jupajj akham siwa: “Jehová Diosarojj jukʼampiw jakʼachasta, tiempsa janiw ina chʼusar aptʼasjjtti, ukajj wal kusisiyitu” sasa.

9. Yänaka jan ukajj cosasanak toqetjja, ¿kunatsa wal amuyasiñasa?

⁹ Yänaka jan ukajj cosasanaka. Kunatï cheqäki ukarjam sarnaqañ munaskakstan ukhajja, yänakasa jan ukajj cosasanakas janiw jakäwisan nayrankañapäkiti. Jehová Diosat yateqañ qalltkayätan ukhajj Jupar serviñaw jakäwisan nayrankjjäna, jan wali luräwinaksa jan pächasisaw jaytjjayätanjja. Ukampis tiempompejja, jaqenakar jichhak misturi aparatonak alasir uñjasa, jan ukajj jukʼamp utjirinïpjjatap uñjasajja, jupanakjam jakasiñsa aptʼasksna ukhamwa amuyjjsna. Kunatï jakañatak munaski ukampejj janiw kusisitäjjsnati, Diosar taqe chuyma serviñat sipansa cosasanak jikjjatañatakiw chʼamachasjjsna. Ukajj Demas sat mä chachatwa amtayistu. Jupajja, “akapachar wal munatap laykuw” apóstol Pablomp chika serviñ jaytjjäna (2 Tim. 4:10). Demas chachajj Diosar serviñat sipans akapacharut wal munpachäna, jan  ukajj janich Pablomp chika serviñatakejj chʼamachasiñ munjjpachäna uk janiw Bibliajj qhanañchkiti. Nayrajja, inas yänaka jan ukajj cosasanak wal jikjjatañ munirïchiyätan, ukampis jan amuyasksna ukhajj wasitampiw ukajj chuymasan utj-jjaspa. Diosar munañat sipansa ukanakaruw jukʼamp munasjjsna.

10. Kunatï cheqäki ukarjam sarnaqaskakiñatakejja, ¿khitinakarus janipun istʼañasäki?

¹⁰ Amigonaka, familiaranaka. Kunatï cheqäki ukarjam sarnaqaskakiñatakejja, janipuniw jan walinak lurañatak chʼamañchapkistu ukanakar istʼañasäkiti. Bibliat yatjjatañ qalltkayätan ukhajja, amigonakasasa familiaranakasas janiw sum uñj-jjapjjestänti. Yaqhepajj janiw Biblian yatichäwinakap conträpkiti, ukampis yaqhepajj janipuniw ni istʼañsa munapkiti (1 Ped. 4:4). Jupanakamp sum apasiñatakejj chʼamachastanwa, ukampis janipuniw sum apasiñ laykojj Jehová Diosan leyinakap pʼakintañasäkiti. Kunjamtï 1 Corintios 15:33 texton siskejja, Jehová Diosar jan munasipki ukanakampejj janiw amigoñasäkiti.

11. ¿Kunas Jehová Dios nayraqatan sum sarnaqañatak yanaptʼistani?

¹¹ Jan wali amuyunaka, jan wali lurañanaka. Kunatï cheqäki ukarjam sarnaqerinakajj qollanäpjjañapawa jan ukajj santöpjjañapawa (Is. 35:8; 1 Pedro 1:14-16 liytʼañataki). Bibliat yateqasajja, kuntï nayrajj lurkayätan uk taqeniw jaytawaytanjja. Yaqhepajj yamas jukʼamp cambionakwa jakäwipan lurawayapjje. Ukhamajj ukanak jaytjjasajja, janipuniw akapachankir qʼañu luräwinakapar kuttʼañasäkiti. ¿Kunas ukatak yanaptʼistaspa? Santöñasatakejj kuntï Diosajj jiwas layku churawayki uka toqetwa lupʼiñasa, Jupajj wali munat yoqapan jakäwipwa jiwas layku churawayi (1 Ped. 1:18, 19). Jehová Dios nayraqatan suma jaqet uñjatäñatakejja, Jesucriston jiwas layku jiwatapajj qhawqha valoranisa uk janipuniw armañasäkiti.

12, 13. 1) Cumpleañonakarusa yaqha ukham fiestanakarus Jehová Diosjam uñjañajj ¿kunatsa wali wakiskiri? 2) ¿Kuna toqetsa jichhajj yatjjataskañäni?

¹² Jan Bibliarjamäki uka costumbrenaka. Inas familiaranakasasa, yateqer masinakasasa jan ukajj jiwasamp chik trabajirinakas cumpleañonak amtañataki, jan ukajj yaqha ukham fiestanakar invitapjjchistaspa. Niyakejjay Jehová Diosajj ukanak uñischejja, ¿kunas ukar jan sarañatak yanaptʼistaspa? Jehová Diosajj kunatsa uka fiestanakar uñisi uk sum amuyañaw yanaptʼistaspa. Bibliat apstʼat qellqatanakasas uka toqet kamsisa ukanak wasitampi liytʼañas yanaptʼarakistaspawa. Uka fiestanakar kunatsa jan sarktan ukanak amttan ukhajja, kunatï Diosatak walïki ukarjam sarnaqaskataswa amuytanjja (Efes. 5:10). Jehová Diosar confiyañasa Arupar confiyañasa, ‘jaqenakajj kamsapjjanisa’ sasin jan ajjsarayasiñatakiw yanaptʼistani (Prov. 29:25).

¹³ Kunatï cheqäki ukarjamajj wiñayaw sarnaqañäni. Ukampis ¿kunas ukarjam sarnaqaskakiñatakejj yanaptʼistaspa? Uk jichhajj kimsa toqet uñjañäni.

14. 1) Bibliat jukʼamp yatjjatañajja, ¿kunjamsa kunatï cheqäki uk janipun aljañatak yanaptʼistani? 2) ¿Kunatsa yatiñ kankañasa, cheqañchäwisa, amuytʼasirïñas wali wakiskiri?

¹⁴ Maya, Bibliat jan jaytas yatjjatañatakisa, yatjjatktan uka toqet lupʼiñatakis tiempo apstʼasiskakiñasawa. Jukʼamp yatjjatañäni ukhajja, jukʼampiw cheqa yatichäwinakar munasiñäni, janipuniw aljañsa munkañäniti. Ukampis janiw aleqak yatjjatañasäkiti. Proverbios 23:23 textojj akham siwa: “Alasim  cheqa kankaña, ukhamarak yatiñ kankañsa, ukatsti yatichäwimpi, amuytʼañampjja jan aljamti” sasa. ‘Yatiñ kankañ’ alaña siski ukajj kuntï yateqktan ukarjam sarnaqaña sañwa muni. Kunapachatï amuytʼasirïñ yateqtan ukhajja, kuntï yateqktan ukajj kunjamsa jakäwisan yanaptʼistaspa ukwa amuytanjja. Awisajja, Biblian yatichäwinakapajj kuna jan wali luräwinaksa jaytañasa ukwa amuytʼayistu, ukhamatwa cheqañchistu, jan ukajj yatichistu. Bibliajj cheqañchistu ukhajja, jankʼakiw ukarjam sarnaqañatak chʼamachasiñasa. Uka cheqañchäwejj jan ukajj yatichäwejj qollqet sipans jukʼamp valoraniwa sasaw Bibliajj yatichi (Prov. 8:10).

15. ¿Kunjamsa kunatï cheqäki ukajj mä wakʼäkaspas ukham jarkʼaqestu?

¹⁵ Paya, kunatï cheqäki ukarjampun sarnaqañwa amtañasa. Bibliajja, “kunatï cheqäki ukampejj mä wakʼampjam wakʼantasipjjam” sasaw sistu (Efes. 6:14). Bibliajj qellqaskäna uka tiemponakanjja, soldadonakajj cinturonampiw guerrar sarañatakejj wakʼampjam wakʼantasipjjerïna. Ukampis chʼamampiw wakʼantasipjjañapäna, jan ukham lurapkaspäna ukhajj inamayakiw uskusipjjaspäna. Biblian cheqa yatichäwinakapajj uka cinturonamp sasiwa. Jiwasatï chʼamamp wakʼantasiñänejja, kʼari yatichäwinakat jarkʼaqestaniwa, suma amtanakar puriñatakis yanaptʼarakistaniwa. Yantʼanakan uñjaskañäni ukhajj kunatï walïki ukanak lurañatakiw chʼamachasiñäni. Mä soldadojja, janipuniw jan wakʼanejj guerrar sarkaspänti. Jiwasajj ukhamarakiw kunatï cheqäki ukampejj mä wakʼampjam sum wakʼantasiñasa, mä arunjja, ukarjamaw sarnaqañasa. Maysa toqetjja, soldadon cinturonapajj espada apañatakirakïnwa. Kunjamsa jiwasajj uk luraraksna uk jichhajj yatjjatarakiñäni.

16. Kunatï cheqäki uk yaqhanakar yatichañajja, ¿kunjamsa ukarjam sarnaqaskakiñatak yanaptʼistaspa?

¹⁶ Kimsa, kunatï cheqäki uk yaqhanakar yatichañatak chʼamachasipjjañäni. Kunjamtï mä soldadojj espadap sum katjjaruñapäkänjja, ukhamarakiw jiwasajj ‘Diosan arunakap’ sum katjjaruñasa (Efes. 6:17). Cheqas taqeniw jukʼamp suma yatichirïñatakisa ‘Diosan arunakap cheqaparjam apnaqañatakis’ chʼamachassna (2 Tim. 2:15). Jiwasatï jaqe masisar kunatï cheqäki uk alañapatakisa kʼari yatichäwinak apanukuñapatakis Bibliampi yanaptʼañäni ukhajja, kunatï cheqäki ukanak jukʼampiw yatjjatañäni jukʼampirakiw ukanakar munasiñäni. Ukaw ukarjam sarnaqaskakiñatak yanaptʼistani.

17. Kunatï cheqäki ukarojj ¿kunatsa jumajj wali valoranit uñjta?

¹⁷ Kunatï cheqäki ukajj alajjpachankir Awkisan mä suma regalopawa. Ukanak yatjjatasaw Jupampejj sum apastanjja, ukat sipan yaqhajj janiw utjkaspati. Kunanaktï Jehová Diosajj jichhakam yatichawaykistu ukajj qalltakiwa, ‘jutïrinsa wiñayaw yatichasipkakïma’ sasaw Jupajj sistu. Ukatwa uka cheqa yatichäwinakarojj wali valorani perljam uñjañasa. Ukhamajj ukanak jukʼamp alasipkakiñäni, janipun aljapjjañäniti. Ukhamatwa David chachjamajj arsutas phoqañäni, jupajj akham sänwa: ‘Kunatï cheqäki ukarjamaw sarnaqä’ sasa (Sal. 86:11, NM).