1, 2. 1) ¿Kunsa marka apnaqerinakajj akat mä jukʼa tiempor yatiyapjjani? 2) ¿Kuna jisktʼanakarus qhanañchañasa?

MARKA apnaqerinakajj “suman jakasiñampi jan ajjsaras jakasiñampiw utj-jje” sasinsa yatiyapkaspa ukham sañäni. Jupanakajja, ‘jichhakamajj janipuniw jan ajjsaras jakasiñajj utjawaykiti’ sasin inas jachʼañchasipjjchini. Jupanakas taqe jan waltʼäwinak askichapkaspa ukham amuyañaswa munapjjani. Ukampis janiw kunatï uka qhepat paskani ukanak jarktʼañatakejj kamachañsa puedipkaniti. ¿Kunatsa jan puedipkani? Bibliajj akham siwa: “Mä akatjamat[wa] jupanakjjar tʼunjäwejj jutani, [...] uka tʼunjäwitjja jupanakajj janiw kunjamatsa escapapkaniti” sasa (1 Tes. 5:3).

² Niyakejjay ukhamächinejja, aka wakiskir jisktʼanakaruw qhanañchañasa: ¿Kunas ‘wali tʼaqesiñ tiempon’ pasani? ¿Jehová Diosajj uka tiempon kun lurañassa munani? Wali tʼaqesiñ tiempon Diosat jan jitheqtañatakejj ¿kunjamsa jichhajj wakichtʼassna? (Mat. 24:21).

3. Apocalipsis 17:5, 15-18 textonakarjamajja, ¿kunjamsa Diosajj ‘Jachʼa Babiloniar’ tʼunjani?

³ (Apocalipsis 17:5, 15-18 liytʼañataki). ‘Jachʼa Babiloniajj’ tʼunjataw uñjasini. Kunjamtï nayrïr parrafon saniwayktanjja, marka apnaqerinakajj janiw kunatï ukapachan paskani uk jarktʼañ puedipkaniti. ¿Kunatsa jan puedipkani? ‘Diosaw amuyupjja chuymanakapar uchani, ukhamat jupan amtap phoqapjjañapataki’. ¿Kunas Diosan uka amuyupajja? Taqe falso religionanakar tʼunjañawa. Jehová Diosajja, ‘llijkir  wila salvaje animalan’ ‘tunka wajjranakaparuw’ amuyup uchani. Tunka wajjranakajja, marka apnaqerinakat kawkïrinakatï uka salvaje animalar yanaptʼapki ukanakawa, salvaje animalasti Organización de las Naciones Unidas ukarakiwa (Apoc. 17:3, 11-13; 18:8). Wali tʼaqesiñ tiempojja, kunapachatï uka marka apnaqerinakajj falso religionanak contra saytʼapkani ukhaw qalltani. Ukajj mä akatjamatwa qalltani, wali ajjsarkañarakïniwa.

4. 1) ¿Kunatsa marka apnaqerinakajj Jachʼa Babilonia contra saytʼapjjpachäni? 2) ¿Kunsa falso religionanakar saririnakajj lurapjjpachäni?

⁴ Marka apnaqerinakajj kunatsa Jachʼa Babilonia contra saytʼapjjani uk janiw yatktanti. Inas akham sapjjchini: “Religionanakajj janiw sumankañ utjañapatak yanaptʼapkiti, politicarus sapa kutiw mitisipjje” sasa. Jan ukajja, ‘wali qamirïpjjewa (utjirinïpjjewa), walja utanakani, oraqenakani ukhamäpjjewa’ sasin sapjjchini (Apoc. 18:3, 7). Marka apnaqerinakajja, inas falso religionanakar sarir jaqenakarojj taqenir jan jiwarayapkchiniti. Amuyatajja, religionanakaruw tukjapjjpachäni. Religionanakajj tukjatäjjapjjani ukhajja, inas ukar saririnakajj uka religionanakat jitheqtjjapjjchini. ¿Kunatsa? Religión pʼeqtʼirinakajj kunjamsa arunakap jan phoqapki uk amuyasaw jitheqtapjjpachäni.

5. ¿Jehová Diosajj wali tʼaqesiñ tiempo toqet kunsa arsuwayi, ukat kunatsa?

⁵ Bibliajja, qhawqha tiemponsa Jachʼa Babiloniajj tʼunjatäni uk janiw qhanañchkiti. Ukampis janiw jaya tiempon tʼunjaskaniti (Apoc. 18:10, 21). Jehová Diosajja, wali tʼaqesiñ tiempo ‘jukʼaptayañwa’ arsuwayi, ukhamat ‘ajllitanakasa’ cheqa religionas jan tukjatäpjjañapataki (Mar. 13:19, 20). Ukhamajj wali tʼaqesiñ tiempojj qalltkani ukhata Armagedonajj qalltkani ukhakamajja, ¿kun lurañassa Jehová Diosajj munani?

6. ¿Kun lurañassa Jehová Diosajj muni?

⁶ Kunjamtï pasïr yatichäwin yatjjatawayktanjja, Jachʼa Babiloniat taqe kunan jitheqtjjsna ukwa Jehová Diosajj muni. Ukampis ¿ukakti lurañasa? Janiwa. Jehová Diosar  serviskakiñwa amtañasa. Kunjamsa uk lursna uk uñjañäni.

7. 1) ¿Kunjamsa Diosan arunakaparjampun sarnaqatas uñachtʼaysna? 2) Hebreos 10:24, 25 textorjamajja, ¿kunatsa tantachasiñajj jichhürunakan jukʼamp wakiskirejja?

⁷ Maya, Diosan arunakaparjamapuniw sarnaqañasa. Akapachankir jaqenakan jan wali qʼañu luratanakaparojja, janipuniw walïkaspas ukham uñjañasäkiti. Sañäni, chachapura jan ukajj warmipura casarasiñarusa, jupanakan qʼañu jucha luratanakaparusa, yaqha ukham qʼañu luratanakaparus jan walitwa uñjtanjja (Mat. 19:4, 5; Rom. 1:26, 27). Paya, jilat kullakanakasamp chikajj Diosar yupaychaskakiñasawa. Tantachasiñ Utanakansa, awisajj jilat kullakanakan utanakapansa, jamasatsa, mä arunjja, kawkjantï tantachasiñjamäki uka cheqanakan tantachasipuntanwa. Kunäkipansa, Jehová Diosar adorañatakejj janipuniw tantachasiñ jaytañasäkiti. Cheqas ‘Diosan urupan jakʼankjjatap yatisajj jukʼampiw uk lurañasa’ (Hebreos 10:24, 25 liytʼañataki).

8. ¿Kunsa wali tʼaqesiñ tiempon yatiypachañäni?

⁸ Wali tʼaqesiñ tiemponjja, inas jichhajj yatiyktan uka pachpa yatiyäwi jan yatiyjjchiñäniti. Jichhürunakanjja, Reino toqet suma yatiyäwinakwa yatiytanjja, jaqenakar Criston discipulopar tukupjjañapatak yanaptʼañatakis chʼamachasiraktanwa. Ukapachan inas juchañchäwi arunak yatiychiñäni, Bibliarjamajja, uka yatiyäwejj ‘jachʼa chhijchhinakar’ (granizonakar) uñtasitäniwa (Apoc. 16:21). Inas akham yatiychiñäni: “Supayan apnaqat akapachajj niyaw qʼal tukusini” sasa. Tiempompiw kunsa ukat kunjamsa yatiyañäni ukajj sum yatisini. ¿Kunjamtï aka patak jila maranakan yatiyawayktanjja ukhamti yatiyaskakpachañäni? Janiw yatktanti. Kunjamjjay yatiychiñäni, Diosan juchañchir arunakap jan ajjsarasaw yatiypachañäni (Ezeq. 2:3-5).

9. 1) Kuntï yatiykañäni uk istʼasajja, ¿kun lurañsa marka apnaqerinakajj munapjjpachïstani? 2) ¿Kuna toqetsa janipun pächasiñasäki?

⁹ Kuntï yatiykañäni uk istʼasajja, inas marka apnaqerinakajj amuktʼayañ munapjjchistani. Ukampis kunjamtï jichhürunakan ‘Jehová Diosaw predicañ yanaptʼistani’ sasin confiyktanjja, jutïrin ukham confiyañaw wakisirakini. Uka tiemponjja, Jehová Diosaw munañap lurañatakejj yanaptʼistani, janipuniw uka toqet pächasiñasäkiti (Miq. 3:8).

10. Lucas 21:25-28 texton qellqatäki ukarjamajja, ¿kunatï wali tʼaqesiñ tiempon paskani uk uñjasajj kunsa jilaparte jaqenakajj lurapjjani?

¹⁰ (Lucas 21:25-28 liytʼañataki). Wali tʼaqesiñ tiemponjja, jaqenakajj kunanakarutï confiyapkäna ukanak tukusir uñjasajj wal sustjasipjjani. Ukham sinti jan wali tiemponakan jakasajj wali llakitaw jakapjjani, ‘jiwayataw uñjasiñäni’ sasaw ajjsarapjjarakini (Sof. 1:14, 15). Uka tiempon jakañajja, jaqenakatakisa Diosan servirinakapatakis wali chʼamäpachäniwa. Jan akapachankirïtas laykojj inas jan walinakan uñjaschiñäni, jan ukajj kunatï jakañatak wakiski ukanakas jan utjkchiniti.

11. 1) ¿Kunatsa taqenis jiwasar uñchʼukipjjestani? 2) ¿Kunatsa wali tʼaqesiñ tiemporojj jan ajjsarañasäki?

¹¹ Religionapajj kunjamsa tʼunjasiwayi uk uñjirinakajja, Jehová Diosan Testigonakapan Diosar servisipkakitap uñjasajj wal colerasipjjani. Ukatwa jaqenakajj jan walinak taqe cheqan parlapjjpachäni, Internetansa ukhamarakwa lurapjjpachäni. Marka apnaqerinakasa akapach apnaqer Supayasa, religionasak utj-jjatap laykojj wal uñisipjjestani. Jupanakajja, janiw aka oraqet taqpach religionanakar chhaqtayañ puedipkaniti. Ukhamajj taqeniw jiwasar uñchʼukipjjestani. Ukhaw marka apnaqerinakajj Magog markankir Gog  sasin uñtʼatäki ukar tukupjjani. * Mayachtʼasisajja, Jehová Diosan markapar jan waltʼayañatakiw taqe chʼamamp sartapjjani (Ezeq. 38:2, 14-16). Kunjamsa ukajj pasani uk janiw sum yatktanti, ukatwa ‘kunanakas paspachäni’ sasin llakissna. Ukampis janipun aka toqet pächasiñäniti: Jehová Diosaw kunsa wali tʼaqesiñ tiempo jakkir pasañatakejj lurañasa uk sistani, ukhamajj janiw uka tiempor ajjsarañasäkiti (Sal. 34:19). ‘Salvasiñasajj jakʼankjjatap’ yatisajja, cheqakiw saytʼasiñäni, pʼeqsa waytarakiñäniwa. *

12. “Suma phoqeri amuyasir esclavojja”, ¿kunjamsa jutïrin paskani ukatak nayratpach wakichtʼawayistu?

¹² “Suma phoqeri amuyasir esclavojja”, wali tʼaqesiñ tiempon Diosat jan jitheqtañatakejj nayratpachaw wakichtʼawayistu (Mat. 24:45). Kunaymanitwa uk lurawayi. 2016 marat 2018 marakam apaskäna uka kimsa uru jachʼa tantachäwinakat amtañäni. Uka tantachäwinakajja, Jehová Diosan jachʼa urup jakʼachasinkipan kunjam chuymanïñatakis jukʼamp chʼamachasiñasa ukatakiw yanaptʼawayistu. Uka toqet mä jukʼa parltʼañäni.

13. 1) ¿Kunas Jehová Diosat jan jitheqtañatakejj chʼam churistani? 2) ¿Kunatsa jichhajj Jehová Diosat jan jitheqtañatak jukʼamp chʼamachasiñasa?

¹³ Jehová Diosat jan jitheqtaña. 2016 maran apaskäna uka kimsa uru jachʼa tantachäwejja, “Jehová Diosat janipun jitheqtañäniti” sat pʼeqeñchäwinïnwa. Ukanjja, Jehová Diosampi sum apasiñaw Jupat jan jitheqtañatak yanaptʼistani sasaw yateqawaytanjja. Diosar jakʼachasiñatakejj Juparuw mayisiñasa, Arupatsa yatjjatañasarakiwa sasaw amtayawayistu. Ukaw jachʼa jan waltʼäwinakar saykatañatak chʼam churistani. Akapachan tukusiñap jakʼachasinkipanjja, Jehová Diosata ukhamarak Reinopat jan jitheqtañatakejj jukʼampi chʼamachasiñasaw wakisini. Inas jaqenakajj jiwasat sawkasisipkakchini (2 Ped. 3:3, 4). ¿Kunatsa ukham lurapjjpachäni? Janiw akapachar mitisktanti ukatwa ukham lurapjjpachäni. Ukhamajj jichhaw Jehová Diosat jan jitheqtañatakejj jukʼamp chʼamachasiñasa, ukhamat wali tʼaqesiñ tiempon Jupat jan jitheqtañataki.

14. 1) Wali tʼaqesiñ tiemponjja, ¿khitinakas Diosan arunakap yatiyañan pʼeqtʼapjjani? 2) ¿Kunatsa uka tiempon Diosat jan jitheqtañajj wali wakiskirïni?

¹⁴ Wali tʼaqesiñ tiemponjja, khitinakatï jichhürunakan Diosan arunakap yatiyañan pʼeqtʼasipki ukanakajj janiw pʼeqtʼjjapjjaniti. Uka tiemponjja, aka oraqenkasipki uka ajllit cristianonakajj taqeniw Armagedonan nuwasiñatak alajjpachar sarjjapjjani (Mat. 24:31; Apoc. 2:26, 27). Ukhamajj Oraqpachan Jilïr Irpirinakajja, janiw jiwasampëjjapjjaniti. Ukhamäkchinisa, walja jaqenakar (gran muchedumbre) pʼeqtʼirinakajj utjaskakiniwa. Yaqha ovejanak taypin utjki uka wakichtʼat jilatanakaw pʼeqtʼapjjani. Jehová Diosat jan jitheqtatas uñachtʼayañatakejja, uka jilatanakaruw yanaptʼañasa, Diosat katoqasin churapkistani uka ewjjtʼanakarus istʼañasarakiwa. Ukhamatakwa salvasiñäni.

15. 1) ¿Kunas jukʼamp aguantañatakejj yanaptʼistani? 2) ¿Kunatakis jichhürunakan aguantañajj wakichtʼistu?

¹⁵ Aguantaña. 2017 maran apaskäna uka kimsa uru jachʼa tantachäwejja, “Janipun qarjtamti” sat pʼeqeñchäwinïnwa. Uka jachʼa  tantachäwejja, jan walinak jukʼamp aguantañatakiw yanaptʼawayistu. Ukan akwa yateqawaytanjja: janiw taqe kunas walikïski ukhakejj aguantañasäkiti, jan ukasti, Jehová Diosar confiyañaw jukʼamp aguantañatak yanaptʼistani (Rom. 12:12). Jesusan aka arunakap janipun armañäniti, jupajj akham sänwa: “Khititejj tukuykam aguantkani ukaw salvatäni” sasa (Mat. 24:13). Uka arunakajja, jan walinakan uñjaskasas Jehová Diosat janipun jitheqtaña sañwa muni. Jichhürunakan aguantañajj wali tʼaqesiñ tiempon aguantañatakiw wakichtʼistu.

16. 1) ¿Kunas jan ajjsarirïñatak yanaptʼistu? 2) ¿Kunsa Jehová Diosar jukʼamp confiyañatak lursna?

¹⁶ Jan ajjsaraña. 2018 maran apaskäna uka kimsa uru jachʼa tantachäwejja, “¡Jan ajjsaramti!” sat pʼeqeñchäwinïnwa. Uka tantachäwinjja, janiw kunanaktï sum lurañ yatktan ukanakajj jan ajjsarir jaqer tukuykistuti, jan ukasti Jehová Diosar confiyañaw jan ajjsarirïñatak yanaptʼistu sasaw yateqawaytanjja. Ukhamajja, aguantañatakisa jan ajjsarañatakis Jehová Diosaruw confiyañasa. ¿Kunsa Jehová Diosar jukʼamp confiyañatak lursna? Sapüruw Biblia liyiñasa, nayra tiempon kunjamsa Diosajj servirinakapar salväna uka toqetsa lupʼiñasarakiwa (Sal. 68:20; 2 Ped. 2:9). Wali tʼaqesiñ tiemponjja, marka apnaqerinakajj Diosan markapar jan waltʼayañatakiw sartapjjani. Ukhajja, jan ajjsarirïñasa Jehová Diosar jukʼamp confiyañas wali wakiskirïniwa (Sal. 112:7, 8; Heb. 13:6). Jichhürunakan Diosar confiyañajja, Gog sasin uñtʼatäki ukajj Diosan markapar jan waltʼayañatak sartkani ukhaw jan ajjsarirïñatak yanaptʼistani. *

17. ¿Kunatsa Armagedonar jan ajjsarañasäki? (Nayrïr paginankir dibujo uñjjattʼäta).

¹⁷ Kunjamtï pasïr yatichäwin yateqawayktanjja, jiwasanakat jilapartejj qhepa urunakanwa jakasktanjja. Wali tʼaqesiñ tiempsa, jakkir pasañwa suyaskaraktanjja. Akapachajj Armagedonanwa qʼal tukusini. Ukampis niyakejjay Jehová Diosan jachʼa nuwasïwipächinejja, janiw ajjsarañasäkiti (Prov. 1:33; Ezeq.  38:18-20; Zac. 14:3). Kunapachatï Jehová Diosajj Armagedonan qalltañapataki mä señal churkani ukhaw Jesucristojj Diosan ejercitopar nuwasiñatak pʼeqtʼani. Jesusamp chikajja, jiwatat jaktir ajllit cristianonaka, waranq waranqa angelanakaw nuwasipjjani. Taqe jupanakajja, Supay contra, demonionak contra, aka oraqenkir ejercitonak contraw nuwasipjjani (Dan. 12:1; Apoc. 6:2; 17:14).

18. 1) ¿Kunsa Jehová Diosajj sistu? 2) Apocalipsis 7:9, 13-17 textonakajja, ¿kunjamsa jutïrin paskani ukar jan ajjsarañatak yanaptʼistu?

¹⁸ Jehová Diosajja, “jumar tukjañäkis uka armjja janiw khitis jichhakam lurkiti” sasaw sistu (Is. 54:17). Diosat jan jitheqtiri ‘walja jaqenakaw’ ‘wali tʼaqesiñ’ tiempo jakkir pasapjjani, Diosarus servisipkakiniwa (Apocalipsis 7:9, 13-17 liytʼañataki). Bibliajja, ‘Diosajj jutïrin jarkʼaqestaniwa’ sasin confiyañatakiw kunaymanit yanaptʼistu. Jehová Diosajj ‘jupat jan jitheqtirir jarkʼaqewa’ sasaw Bibliajj qhanañchi (Sal. 31:23, NM). Diosajj sutip jachʼañchkani ukhajja, khitinakatï Jupar munasktan, jachʼañchkaraktan ukanakatakejj wali kusiskañäniwa (Ezeq. 38:23).

19. ¿Kunjamas akat mä jukʼarojj jakasjjañäni?

¹⁹ Akapachajj Supayan jan apnaqatäjjani ukhajja, jaqenakajj Paraison kunjamäpjjanisa uka toqet 2 Timoteo 3:2-5 textojj kamsaspasa uk amuytʼañäni (“ ¿Jaqenakajj Paraison kunjamäpjjanisa?” sat recuadro uñjjattʼäta). George Gangas * jilatat parltʼañäni, jupajj Oraqpachan Jilïr Irpirinakat maynïrïnwa, jilatajj akham sänwa: “Jilapurjama jan ukajj kullakpurjam jakasiñ utj-jjani ukhajja, jakasiñajj aka oraqen wali sumäjjaniwa. Akat mä jukʼarojja, aka oraqen jakirinakajj wiñayaw jakjjapjjani. Jehová Diosjamaw jakapjjani. Taqenis wiñayatakiw jakjjañäni” sasa. Ukham jakasiñajj wali sumapunïniwa.