1, 2. 1) ¿Kun lurañapatakis Jehová Diosajj Salomonar ajllïna? 2) ¿Kunas David reyir llakisiyäna?

JERUSALENANKIR templojj kunjamsa lurasiñapäna uk uñjañapatakiw Jehová Diosajj Salomonar ajllïna. Uka templojj “taqe akapachankirit sipansa” suma luratañapänwa, wali aytataraki. Yamas ‘Jehová Diosan templopäñapänwa’ (1 Cró. 22:1, 5, 9-11).

² Diosaw Salomonar yanaptʼani sasaw David reyejj confiyäna, ukampis Salomonajj waynaskänwa, templo lurañatakejj janiw experiencianïkänti, ukaw llakisiyäna. ¿Salomonajj jan ajjsarasati ‘nayaw lurä’ sispachäna? ¿Waynäskatap laykusa templo lurañatak jan experiencianïtap laykus janiw sispachänti? Templo lurañatakejja, Salomonajj jan ajjsarirïñapänwa, jankʼakiw lurañ qalltañaparakïna.

3. ¿Kunsa Salomonajj awkipan jan ajjsarirïtapat yateqäna?

³ Salomonajj awkipatwa jan ajjsarirïñ yateqpachäna. Davidajj waynäskäna ukhajja, jan ajjsarasaw awkipan ovejanakap jarkʼaqañ laykojj ajjsarkañ animalanakar jiwayäna (1 Sam. 17:34, 35). Goliat sat jachʼa soldadorusa, jan ajjsartʼasaw Jehová Diosan yanaptʼapampejj mä qalampiki jiwayäna (1 Sam. 17:45, 49, 50).

4. ¿Kunatsa Salomonajj jan ajjsarirïñapäna?

 ⁴ Cheqas Davidaw yoqaparojj jan ajjsarañapatakisa templo lurañapatakis chamañchäna (1 Crónicas 28:20 liytʼañataki). Salomonatï ajjsarayasispäna ukhajja, janiw templo lurañ qalltkaspänti, ukajj templo jan sum lurañat sipansa jukʼamp jan walïspänwa.

5. ¿Kunatsa jan ajjsarirïñasajj wakisi?

⁵ Jehová Diosajj kuna lurañanaktï churkistu uk phoqañatakejja, ukhamarakiw jan ajjsarirïñatakejj Jupan yanaptʼap muntanjja. Ukhamajja, kunjamsa Diosan nayra servirinakapajj jan ajjsarirïpjjatap uñachtʼayapjjäna ukanakat jichhajj yatjjatañäni. Ukanakat yatjjatkasajja, kuna lurañatï utjkistu ukanak kunjamsa jan ajjsaras phoqsna ukwa amuyañasa.

6. ¿Kunas José waynan jan ajjsarirïtapat wal musparaytamjja?

⁶ José waynat amtañäni, Potifaran warmipajj jupampi ikintasiñ munäna ukhajja, jan ajjsartʼasaw janiw säna. Ukham sasajj kuna jan walinakansa uñjasispäna uk sum yatïna, ukhamäkchïnsa, ukaratpachaw jan pächasisa janiw säna (Gén. 39:10, 12).

7. Rahab warmejj kunjamsa jan ajjsarirïtap uñachtʼayäna, uk qhanañchtʼma (Página 28 ukankir foto uñjjattʼäta).

⁷ Jericó markan jakaskäna uka Rahab warmitwa jan ajjsarirïñ yateqasiraksna. Pä israelitanakajj Jericó marka uñaqer sarapkäna ukhajja, utaparuw puripjjäna. Ajjsarirïspänjja, janiw yanaptʼkaspänti. Ukampis Jehová Diosar confiyatap laykuw uka chachanakar imantäna, escapapjjañapatakis yanaptʼarakïnwa (Jos. 2:4, 5, 9, 12-16). Jehová Diosajj cheqpach Diosawa, Jupaw aka oraqe israelitanakar churani sasaw confiyäna. Ukatwa Jericó markan reyiparusa, yanapirinakaparus jan ajjsarkänti. Ukhamatwa jupasa familiapas salvasipjjäna (Jos. 6:22, 23).

8. ¿Kunjamsa Jesusan jan ajjsarirïtapajj apostolonakar yanaptʼäna?

⁸ Jesusan apostolonakapajj jan ajjsarirïpjjarakïnwa. Jesusajj kunjamsa jan ajjsarasa kuns luräna ukanak uñjasaw yateqasipjjäna (Mat. 8:28-32; Juan 2:13-17; 18:3-5). Mä kutejja religión pʼeqtʼiri saduceonakajj janiw Jesusat yatichapjjätati sasaw apostolonakar sapjjäna, uk satajj yatiyasipkakïnwa (Hech. 5:17, 18, 27-29).

9. 2 Timoteo 1:7 textorjamajja, ¿kunas jan ajjsarirïñatak yanaptʼistani?

⁹ José, Rahab, Jesús ukat apostolonakasa, kunatï cheqapäki uk lurañwa amtapjjäna. ¿Kunas jupanakar jan ajjsarirïñatak yanaptʼäna? Jupanak pachparuk confiyañat sipansa, Jehová Diosaruw confiyapjjäna ukaw yanaptʼäna. Ukhamajj jan ajjsarirïña wakiskani ukhajja, Jehová Diosaru confiyapjjañäni, janipun jiwas pachpar confiyasipjjañäniti (2 Timoteo 1:7 liytʼañataki). Kunjamsa familiansa congregacionansa jan ajjsarirïsna uk uñjañäni.

10. ¿Kunatsa wayn tawaqonakajj jan ajjsarirïpjjañapa?

¹⁰ Wayn tawaqonakajja, kunayman jan walinakanwa uñjasipjje, ukatwa Diosar jan jitheqtasa serviskakiñatakejj jan ajjsarirïpjjañapa. Jupanakarojj kuntï Salomonajj lurkäna ukaw yanaptʼaspa. Jupajj suma amtanakaruw purïna, templo lurañsa tukuyarakïnwa, ukhamatwa jan ajjsarirïtap uñachtʼayäna. Cheqas awk taykanakaw wawanakaparojj suma amtanakar puripjjañapatak yanaptʼapjjañapa. Ukampis awisajj wawanakaw wakiskir amtanakar puripjjañapa (Pro. 27:11). Sañäni, khitinakas amigopäni, kunanakampis kusistʼapjjani, kunjamsa sum sarnaqapjjani, kunapachas bautisasipjjani ukanakjja, jupanak pachpaw amtapjjañapa. Ukatakejj jan ajjsarirïpjjañapawa. Supayajj janiw uka amtanakar puripjjañap munkiti, Jehová Diosarusa leyinakaparus jiskʼachiwa.

11, 12. 1) ¿Kunjamsa Moisesajj jan ajjsarirïtap uñachtʼayäna? 2) ¿Kunjamsa wayn tawaqonakajj Moisesat yateqasipjjaspa?

¹¹ Wayn tawaqonakajj kunsa jutïrin lurapjjani ukwa amtapjjañapa. Yaqhep markanakanjja,  universidadar sarapjjañapataki, walja qollqe pagapki ukan trabajipjjañapatakiw wayn tawaqonakar chʼamañchapjje. Yaqhep markanakansti, qollqe jikjjatañajj chʼamawa. Ukatwa wayn tawaqonakajj familiapar yanaptʼañatakejj wal trabajiñ amtapjje. Jumatï ukhamanakan uñjasstajja, Moisesat amtañamawa. Jupajj faraonan phuchapampi uywata jilsusajj taqenin uñtʼatäña, wali qollqenïñwa amtaspäna. Jupar uywiri familiapasa, yatichirinakapasa, amuytʼayirinakapas ukhamäñapatakiw chʼamañchapjjpachäna. Ukampis janipuniw ukanakampi apayaskänti, janirakiw ajjsarirïkänsa, ukatwa Diosar serviñ amtäna. Egipto marka jaytasasa, wali qollqenïñ apanukusasa, Jehová Diosaruw confiyäna (Heb. 11:24-26). Ukham suma amtar puritapatjja, Jehová Diosajj bendisïnwa, jutïrinsa bendisiskakiniwa.

¹² Ukhamarakiw wayn tawaqonakajj Jehová Diosar taqe chuyma serviñ amtapjje, Reinopsa nayrar uchapjje, ukhamatwa bendicionanak katoqapjje. Jupanakarojj Diosaw familiapar yanaptʼañatakejj kunanakatï wakiski ukanakampi yanaptʼani. Khä nayra maranakanjja, Timoteo waynajj Jehová Diosar serviñwa nayrar uchäna, jumajj ukhamarakiw lurasma * (Filipenses 2:19-22 liytʼañataki).

13. ¿Kunjamsa jan ajjsarirïñajj mä cristiana tawaqor yanaptʼäna?

¹³ Alabama (Estados Unidos) markan jakasiri mä tawaqetat parltʼañäni. Jupajj Diosar jukʼamp serviñ amtañatakejj jan ajjsartʼirïñapänwa. Jupajj akham siwa: “Jiskʼatpachaw wali ajjsarirïyäta. Tantachasiñ Utan jilat kullakanakampi parlañjja wal ajjsarirïta. Yamas jaqenakar yatiyañjja, walpun ajjsarirïta, janiw punkunak leqtʼañsa munirïkti” sasa. Ukampis uka kullakajj awk taykapana, jilat kullakanakan yanaptʼapampejj precursor regularat serviñwa qalltäna. Kullakajj akham saskakiwa: “Supayan apnaqata akapachajj universidadar sarañataki, taqen uñtʼatäñataki, walja qollqenïñataki, walja utjirinïñatakiw chʼamañchi. Ukampis niya taqeniw uk jan jikjjatapkiti. Antisas jukʼampiw llakisipjje, tʼaqesipjjaraki. Nayarojj Jehová Diosar serviñaw wal kusisiyitu” sasa.

14. ¿Kunanakansa awk taykanakajj jan ajjsarirïpjjañapa?

¹⁴ Cristiano awk taykanakajj jan ajjsarirïpjjañaparakiwa. Sañäni, inas jefepajj jukʼamp horanaka trabajiñapatak sapakuti maychispa. Ukampis uka horajj familiana Diosat yatjjatañataki amtatächi, yatiyir sarañapächi, jan ukajj tantachäwir sarañapächi ukhajja, ¿kunsa lurani? Janiw uka horajj trabajkiristti sañatakejj jan ajjsarirïñapawa. Ukham lurasajja, wawanakapatakejj suma yateqaskayäpjjaniwa. Maysa toqetjja, inas mä awkejj congregacionapankir yaqhep awk taykanakajj kuntï wawanakapar jan jarkʼapki uk wawanakapar jarkʼchispa. ¿Kunatsa uk jarkʼta? sasin jupanakajj jisktʼapjjani ukhajj ¿kamsanisa? Cheqas jupanakar respetompi qhanañchañatakejj jan ajjsarirïñapaw wakisini.

15. ¿Kunjamsa Salmo 37:25; Hebreos 13:5 textonakajj awk taykanakar yanaptʼaspa?

¹⁵ Awk taykanakajj wawanakaparu Jehová Diosar jukʼamp servipjjañapataki chʼamañchapjje, ukarjam phoqañsa yanaptʼapjje ukhajja, jan ajjsarirïtapwa uñachtʼayapjje. Inas yaqhep awk taykanakajj wawanakapan precursoräñapataki, kawkjantï yatiyirinakajj munaski ukar sarañapataki, Betelan serviñapataki, Tantachasiñ Utanaka jan ukajj yaqha ukham utanak lurañan yanaptʼañapatak chʼamañchañ ajjsarayasipjjchi. Chuymanëjjä ukhajj kunjamsa uñjitani sasin inas ajjsarayasipjjarakchi. Ukampis sum amuytʼasir awk taykanakajja, janiw ajjsarapkiti, Jehová Diosajj kuntï siski ukjja phoqaniwa sasaw confiyapjje (Salmo 37:25; Hebreos 13:5 liytʼañataki). Ukham lurasajja, wawanakaparojj  jan ajjsarirïña, Diosar confiyañwa yatichapjje (1 Sam. 1:27, 28; 2 Tim. 3:14, 15).

16. 1) ¿Kunsa yaqhep awk taykanakajj wawanakapan Diosar jukʼamp servipjjañapatak lurapjje? 2) ¿Kunjamsa ukham lurapjjatapajj wawanakapar yanaptʼi?

¹⁶ Estados Unidos markankir mä chacha warmejja, kunjamsa wawanakapar Diosar jukʼamp servipjjañapatak yanaptʼapjjäna uk uñjañäni. Awkejj akham siwa: “Wawanakajajj janiraw parlañsa, sartañsa yatipkänti, ukhatpachaw precursorañasa, congregacionan yanaptʼañas kunja kusiskañasa ukanak parlapjjerïta. Jichhajj ukanak lurañwa amtasipki. Uk phoqañatakejja, Supayan apnaqat akapachan utjki ukanakampejj janiw apayasipkiti, Diosar serviñaw jupanakatakejj nayranki” sasa. Yaqha jilatajja, pä wawaniwa jupajj akham sarakiwa: “Walja awk taykanakajja, wawanakapajj universidadan yateqapjjañapataki, anatañanak yatsupjjañapataki (deportes), jan ukajj yaqha ukhamanak yateqapjjañapatakejj tiempsa, qollqsa, chʼamsa aptʼasipjjewa. Ukampis Jehová Diosampi sum apasiñatakejj kunanakas wawanakar yanaptʼaspa ukanakar chʼamañchañaw jukʼamp wakiskirejja. Nanakan wawanakajajj Diosar jukʼamp serviñwa amtapjje, uka amtanakapjja phoqasipkiwa, ukaw wal kusisiyapjjetu” sasa. Wawanakaparu Diosar jukʼamp servipjjañapataki chʼamañchapki, uk phoqapjjañapatakis yanaptʼapki uka awk taykanakajj Jehová Diosat walja bendicionanakwa katoqapjjani.

17. Congregacionanjja, kunanakansa jan ajjsarirïñasajj wakisi uk mä qhawqhanak qhanañchtʼma.

¹⁷ Congregacionanjja, ukhamarakiw jan ajjsarirïñasa. Sañäni, jilïr irpirinakajja, yaqhep jilat kullakanakajj jachʼa juchar purtʼasipki ukan yanaptʼañatakisa, akatjamat usuntapki ukanakar yanaptʼañatakis jan ajjsarirïpjjañapawa. Yaqhepajj carcelan Bibliat yatichañatakisa, jan ukajj tantachäwinak ukan sarayañatakis jan ajjsarirïpjjañaparakiwa. Soltera kullakanakajj kunaymanitwa Jehová Diosar jukʼampi servipjjaspa. Sañäni, precursoräpjjaspawa, kawkjantï yatiyirinakajj munaski ukaruw sarapjjaspa, Departamento Local de Diseño y Construcción ukanwa yanaptʼapjjaspa, Diosan Reinopat  Yatiyirinakataki Escuelarus sarapjjaspawa. Yaqhepajj Galaad Escuelarus sarapjjarakispawa.

18. ¿Kunjamsa chuymankipstat kullakanakajj jan ajjsarirïpjjaspa?

¹⁸ Cheqas taqeniw chuymankipstat kullakanakarojj wal munastanjja, jupanakajj jiwasamp chika congregacionan Diosar servipjjatapat wal yuspärtanjja. Yaqhepajj janiw kunjamtï nayrajj Diosar servipkäna ukham servirjamäjjapjjeti. Ukampis congregacionanjja, jan ajjsarirïpjjatap uñachtʼayasipkakispawa, yanaptʼasipkakispawa (Tito 2:3-5 liytʼañataki). Sañäni, jilïr irpirinakatï mä tawaq kullakaru kunjamsa sum isthaptʼasispa uka toqet parltʼañap mayipjjani ukhajja, parlañatakejj jan ajjsarirïpjjañapawa. Cheqas janiw toqjapkaniti, antisas munasiñapiw kunjamsa jan sum isthapisitapajj mayninakar jan waltʼayaspa uk amuytʼayapjjani (1 Tim. 2:9, 10). Ukham munasiñampi yanaptʼasajja, chuymankipstat kullakanakajj congregacionarojj wal yanaptʼapjjani.

19. 1) ¿Kunjamsa bautisat jilatanakajj jan ajjsarirïpjjaspa? 2) ¿Kunjamsa Filipenses 2:13; 4:13 textonakajj bautisat jilatanakar yanaptʼi?

¹⁹ Bautisat jilatanakajj ukhamarakiw jan ajjsarirïpjjañapa, congregacionansa yanaptʼapjjañapa. Jupanakajj congregacionan jukʼamp lurañanak katoqañatak jankʼakïpjje ukhajja, congregacionar wal yanaptʼapjje (1 Tim. 3:1). Ukampis yaqhep jilatanakajj jukʼamp lurañanak katoqañ pächasipjjewa. ¿Kunatsa? Inas nayrajj juchar purtʼasipjjchïna, ukatwa congregacionan yanapiripäñasa, jilïr irpirïñas janiw nayar waktʼkituti sasin amuyapjjaspa. Yaqhepajj inas janiw sum lurkiristti sasin amuyapjjarakchi. Jumatï ukhaman uñjasstajja, Jehová Diosaw jan ajjsarañatak yanaptʼiristamjja (Filipenses 2:13; 4:13 liytʼañataki). Moisesat amtañamawa, Diosajj kuntï siskäna uk phoqañatakejj janis wakichtʼatäkaspa ukhamwa amuyasïna (Éxo. 3:11). Ukampis Jehová Diosaw jan ajjsarañatakisa, kuntï lurañapäkäna uk phoqañatakis yanaptʼäna. Jumatï jan ajjsarirïñ munstajja, Diosaruw yanaptʼa mayiñama, sapüruw Biblia liyiñamaraki. Kunjamsa Diosan nayra servirinakapajj jan ajjsarirïpjjäna, ukanakatwa lupʼiñamaraki. Ukatjja, jilïr irpirinakaruw kunjamsa sum lurasma uk humilde chuymampi yanaptʼa mayirakisma, jan ukajj kuna lurañanakantï yanaptʼañajj wakiski ukanwa yanaptʼasma. Bautisat taqe jilatanaka, jan ajjsarirïpjjañamataki, congregacionan wal yanaptʼapjjañamatakiw chʼamañchtʼapjjsma.

20, 21. 1) ¿Kunsa Davidajj Salomonar amtayäna? 2) ¿Kunatsa jan pächasktanjja?

²⁰ Jehová Diosaw templo tukuyañkam yanaptʼaskätam sasaw Davidajj Salomonar amtayäna (1 Cró. 28:20). Salomonajj awkipan uka arunakapat lupʼisaw waynäkasasa, templo lurañatak jan experiencianïkasas templo lurañ amtpachäna. Jupajj jan ajjsartʼasaw templo lurañ qalltäna, Jehová Diosan yanaptʼapampejj paqallqo maranak chikatanitwa jachʼa templo tukuyäna.

²¹ Kunjamtï Jehová Diosajj Salomonar jan ajjsarirïñapatak yanaptʼkänjja, ukhamarakiw jan ajjsarirïñasatak yanaptʼistaspa, ukhamat familiansa, congregacionansa lurañanakas sum phoqañasataki (Isa. 41:10, 13). Jiwasatï Jehová Diosaru jan ajjsartʼasa serviñäni ukhajja, jichhasa, jutïrinsa bendisistaniwa, janiw ukat pächasktanti. Ukhamajja, ‘¡chʼamañchasim, lurañaru uskusirakim!’.