1. Akapachankir jaqenakan jan wali amuyunakapajj ¿kunjamsa jan waltʼayistaspa?

¿KUNATSA Diosan Arupan yateqktan ukarjam sarnaqañajj chʼamakïspa? ‘Qhepa urunakanwa’ jaktanjja, ukatwa Diosan Aruparjam sarnaqañataki humilde chuymanïñajj chʼamakïspa. Ukhamarusa, jupanak pachpa munasirinaka, qollqe añcha munirinaka, jachʼa jachʼa tukurinaka, munañapamp apnaqayasir jaqenak taypinwa jaktanjja (2 Tim. 3:1-3). Diosan servirinakapatakejja ukham chuyman jaqëñajj janipuniw walïkiti, ukampis awisajj uka jaqenakas jukʼamp sum jakasipkaspa ukhamwa amuyjjsna (Sal. 37:1; 73:3). Ukatwa akham jisktʼassna: ‘¿Nayat llakisiñat sipan yaqhanakat jukʼamp llakisiñajj cheqapunit wakispacha? ¿Humilde chuyman sarnaqä ukhajj jaqenakajj respetasipkakitaniti?’ sasa (Luc. 9:48). Akapachankir jaqenakjam jiwasatak llakisjjsna ukhajja, jilat kullakanakasampi sum apasiñsa Jehová Diosamp sum apasiñsa aptʼassnawa. Ukatwa Biblian qellqatäki uka suma sarnaqäwinakat yatjjatañasa jupanakat yateqasiñas yanaptʼistaspa.

2. ¿Kunjamsa Diosar jan jitheqtas servirinakat yatjjatañajj yanaptʼistaspa?

 ² Jiwasatï Jehová Diosar jan jitheqtas servirinakjam sarnaqañ munstan ukhajja, jupanakatwa yatjjatañasa. ¿Kunsa Jehová Diosan amigopäñatakejj lurapjjäna? ¿Kunjamatsa jupamp sum apasipjjäna? ¿Kawkitsa Diosan munañap lurañatakejj chʼam apsupjjäna? Jiwasatï taqe ukanak yatjjatañänejja, Jehová Diosarojj jukʼampiw confiyañäni.

3, 4. 1) ¿Kunanak toqes Jehová Diosajj yatichistu? 2) Diosar jukʼamp confiyañatakejj ¿kunatsa jan aleqak yatjjatañasäki?

³ Jehová Diosajj Bibliampi, Bibliat apstʼat qellqatanakampi, Internetan jw.org cheqampiw yatichistu. JW Broadcasting program toqesa, tantachäwinak toqesa, jachʼa tantachäwinak toqes yaticharakistuwa ewjjtʼarakistuwa. Ukampis Jehová Diosar jukʼamp confiyañatakejja, janiw aleqak yatjjatañasäkiti, jan ukasti jukʼampwa lurañasa. Mä kutejja, Jesusajj akham sänwa: “Nayan manqʼajajja, khitankitu ukan munañap lurañawa, kuna lurañtï jupajj churkitu uk tukuyañajarakiwa” sasa (Juan 4:34).

⁴ Jesusatakejja, Diosan munañap lurañajj manqʼäkaspas ukhamänwa. Kunapachatï mä suma manqʼa manqtʼastan ukhajja, wali kusisitätanwa. Diosan munañaparjam sarnaqtan ukhajj ukhamarakiw kusisitätanjja, Diosarus jukʼampiw jakʼachastanjja. Sañäni, yatiyirejja inas awisajj wali qarita aynachtʼata ukham sarstan, ukampis wali kusisita chʼamañchtʼata ukhamaw kuttʼanjjtanjja.

5. ¿Kunjamas yatiñan jaqësajj jikjjatastanjja?

⁵ Kuntï Jehová Diosajj yatichkistu ukhamarjam sarnaqasajja, jukʼamp yatiñan jaqëtanwa (Sant. 3:13). Jukʼamp kusisitarakïtanwa. Bibliajj akham siwa: “Yatiñ kankañajj jikjjatiripatakejj jakañawa; ¡kusisiñaniwa uka yatiña katjjäsipki ukanakajja!” sasa (Prov. 3:13-18). Mä kutejja, Jesusajj akham sasaw discipulonakapar säna: “Jumanakatejj ukanak yatipjjsta, ukarjamarak lurapjjsta ukhajja, kusisipjjam” sasa (Juan 13:17). Kusisit jakaskakiñatakejja, Jesusajj yatichkäna ukarjamaw discipulonakajj sarnaqasipkakiñapäna. Cheqas ukhamwa lurapjjäna. Jesusat yateqasisapuniw sarnaqapjjäna, yatichäwinakaparjamaw jakapjjarakïna.

6. ¿Kunatsa Biblian yatichäwinakaparjam sarnaqaskakiñasa?

⁶ Jichhürunakanjja, ukhamarakiw Biblian yatichäwinakaparjam sarnaqaskakiñajj wali wakiskiri. Uka toqet amuytʼañatakejj auto askichir mä jaqet amuytʼañäni. Jupajj auto askichañ yatjjatawayiwa, herramientanakapas phoqatarakiwa. Ukampis auto askichas jan trabaj-jjani ukhajja, yatjjatatapasa herramientanakapas inamayakëjjaniwa. Inas walja maranak trabajitapat wali experiencianïchi, ukampis jupatï suma askichirïñ munaskakchi ukhajja, autonak askichaskakiñapawa. Bibliampejj ukhamarakiwa, yateqañ qalltkayätan ukhajja, ukarjam sarnaqañatakiw chʼamachasiyätanjja, ukham lurasajj sumwa jakasjjayätanjja. Ukampis ukham jakaskakiñatakejja, kuntï Jehová Diosajj yatichkistu ukarjam sarnaqaskakiñasawa.

7. Yatiñan jaqëñatakejja, ¿kunsa Biblian qellqatäki uka sarnaqäwinakat yateqasajj lurañasa?

⁷ Aka yatichäwinjja, kunapachas humilde chuymanïñajj chʼamäspa ukwa mä qhawqhanak yatjjataskañäni. Nayra tiemponjja, Diosar jan jitheqtas servirinakajj kunjamsa ukhamanakan uñjasisajj humilde chuymanisipkakïna uksa yatjjatarakiñäniwa. Jiwasatï Diosar taqe chuyma serviñ munstan ukhajja, janiw uka sarnaqäwinak aleqaki liyiñasäkiti, jan ukasti kunjamsa ukarjam jankʼaki sarnaqsna ukwa amuytʼañasa.

8, 9. Hechos 14:8-15 textojja, ¿kunjamsa apóstol Pablon humilde chuymanïtap qhanañchi? (Página 3 ukankir dibujo uñjjattʼäta).

⁸ Jehová Diosajja, “taqe kasta jaqenakan salvasipjjañapa ukhamarak kunatejj cheqäki uk sum uñtʼapjjañapwa muni” (1 Tim. 2:4). Ukhamajj ¿kunjamsa Diosar janïr uñtʼapki ukanakarojj uñjañasa? Diosat mä jukʼa yatirinakarojj sinagoganakansa apóstol Pablojj yatiykchïnjja, janiw judionakaruk yatiykänti, jan ukasti, yaqha diosanakar adoririnakarus yatiyarakïnwa. Ukatakejja, Pablojj humilde chuymanïñapänwa, ¿kunatsa ukham sistanjja?

⁹ Pablojj misionerot nayrïr kuti viajkäna ukhajja, Licaonia toqenkirinakajj Zeus, Hermes diosanakaw jaqenakar tukupjje sasaw Pablompiru Bernabeampirojj jachʼañchapjjäna. Uk uñjasajja, ¿wali uñtʼata, aytat jaqëñti munapjjäna? ¿Tʼaqesitasat ukham jachʼañchatäñajj walikïskiwa sapjjänti? ¿Ukajj Diosan arunakap yatiyañatakiw yanaptʼani sasat amuyapjjäna? Janiwa. Ukham lurañat sipansa jankʼakiw isinakap chʼiyanoqasipjjäna, jaqenak taypir mantasajj wali jachʼatwa akham sas arnaqasipjjäna: “Tatanaka, ¿kunatsa akanak lurasipkta? Nanakajj jumanakjam tʼaqesir jaqekïpjjaraktwa” sasa (Hech. 14:8-15).

10. ¿Kunatsa Pablompi Bernabeampejj Licaonia toqenkirinakat sipan jilankapkaspas ukham jan amuyasipkäna?

¹⁰ Pablompi Bernabeampejja, nanakajj jumanakjam pantjasir jaqekïpjjaraktwa sasaw sapjjäna. Ukampejj Licaonia toqenkir jaqenakjamas Diosar adorapkaspa ukham janiw sañ munapkänti, jan ukasti jupanakajj Diosan munañap lurañataki jawsat misioneropjjänwa (Hech. 13:2). Ukhamarusa Diosan espíritu santopampi ajllitäpjjänwa, alajjpachar sarañwa suytʼasipkarakïna. Ukhamäkchïnsa, janiw jupanakat sipan jilankapkaspas ukham amuyasipkänti, jan ukasti, ‘aka jaqenakatï Diosar istʼapjjani ukhajj alajjpachar sarañatak ajllitäpjjarakispawa’ sasaw amuyapjjäna.

11. Diosan arunakap yatiyañanjja, ¿kunjamsa Pabljam humilde chuymanïtas uñachtʼaysna?

¹¹ ¿Kunsa Pablon humilde chuymanïtapat yateqsna? Nayraqatajj kunanaktï Jehová Diosan yanaptʼapampejj lurktan ukanakat janipuniw jachʼañchayasiñasäkiti. Akham jisktʼasiñasawa: “¿Kunjamsa Diosan arunakap yatiykta uka jaqenakar uñjtjja? ¿Jaqenakajj markajan yaqhanakar jiskʼachapki ukhamarakit nayajj jiskʼachtjja?” sasa. Jehová Diosan Testigonakapajja, Diosan arunakap istʼirinakar thaqaskaktanwa. Ukatakejja, yaqhepajj jiskʼachatäpki uka jaqenakan arup parlañwa yateqapjje, kunjamtï jakasipki ukham jakañsa yateqapjjarakiwa. Ukham lurir jilat kullakanakajj jachʼa jachʼa tukuñat sipansa, kunjamsa uka jaqenakajj jakasipjje uk amuyañatakiw chʼamachasipjje, ukhamat Diosan arunakapampi chuymanakapar purtʼañataki.

12. ¿Kunjamsa Epafras jilatajj mayninakat llakisitap uñachtʼayäna?

¹² ¿Kunjamsa humilde chuyman jaqëtas uñachtʼayaraksna? Jilat kullakanakasatak Diosar mayisaw uñachtʼaysna (2 Ped. 1:1). Ukwa Epafras sat mä cristianojj luräna. Biblianjja, kimsa kutikiw jupat parli, ukajj Pablon qellqatanakapanwa uñsti. Pablojja, Roma markan pachpa utapan jistʼantatäkäna ukhaw Colosas markankir cristianonakarojj Epafras chachat akham sas qellqäna: “Jupajj walpun jumanakatakejj oración lurarapipjjtamjja” sasa (Col. 4:12). Epafras jilatajj sumwa jilat kullakanakar uñtʼäna, wal jupanakat llakisirakïna. Uka jilatajj Pablomp chikas carcelankkchïnjja, yanaptʼa munirinakarojj  yanaptʼapunirïnwa (Filem. 23). Ukhamatwa mayninakar cheqpach munasitap uñachtʼayäna. Jilat kullakanakasatak Diosat maytan ukhajja, wal jupanakar yanaptʼtanjja, yamas sutinakap aytas maytan ukhajj jukʼampiw yanaptʼtanjja (2 Cor. 1:11; Sant. 5:16).

13. ¿Kunsa oración lurañ toqet Epafras jilatat yateqsna?

¹³ ¿Khitinakatakis sutinakap aytas oración lursna? Jichhürunakanjja, Epafras jilatjamarakiw waljanejj congregacionapankir jilat kullakanakataki, jan walinakan uñjasipki uka familianakatak Diosat mayipjje. Yaqhepasti, Internetan jw.org cheqan “Testigos de Jehová presos por sus creencias” siski ukan uñstki uka jilatanakatakiw mayipjjaraki (ukatakejja, PRENSA > ASUNTOS LEGALES ukaruw español arut mantasma). Khitinakantï mä familiarapajj jiwki uka jilat kullakanakatsa, guerranakana, oraq khatatinakana, yaqha ukhamanakan uñjasiwayapki, jan ukajj jan qollqen uñjasipki uka jilat kullakanakatsa janirakiw armasiñasäkiti. Cheqas walja jilat kullakanakatakiw Diosat maysna. Ukham lurasajj jiwas pachpatak llakisiñat sipansa mayninakat llakisitaswa uñachtʼaytanjja (Filip. 2:4). Jehová Diosajj uka oracionanak istʼiwa.

14. Taqenit sipansa Diosatwa mayninakar istʼañ yateqsna sasajj ¿kunatsa sissna?

¹⁴ Maysa toqetjja, ¿kunjamsa humilde chuyman jaqëtas uñachtʼayaraksna? Mayninakar istʼasaw uñachtʼaysna. Santiago 1:19 textojja, “sapa maynis istʼañatakejj jankʼakïñapawa” sasaw cristianonakar ewjjtʼistu. Ukjja, taqenit sipansa Jehová Diosatakwa yateqassna (Gén. 18:32; Jos. 10:14). Ukatakejj kuntï Éxodo 32:11-14 (liytʼañataki) texton siski uk amuytʼañäni. Moisesar istʼañapajj janis wakiskchïnjja, Jehová Diosajj istʼänwa. ¿Pantjasir uñjsna uka jaqerojj pacienciamp istʼsnati, arunakaparjamas luraraksnati? Cheqas Jupar taqe chuyma mayisirinakarojja, Jehová Diosajj pacienciampiw istʼi.

15. Mayninakar respeto uñachtʼayañatakejj ¿kunsa Jehová Diosat yateqassna?

¹⁵ Sapa mayniw akham jisktʼasiñasa: “Niyakejjay Jehová Diosajj Abrahán, Raquel, Moisés, Josué, Manoa, Elías, Ezequías jupanakan oracionanakapsa, yaqha jaqenakan oracionanakaps humilde chuymamp istʼchejja, ¿janit nayajj jaqe masijar istʼkarakiristjja? ¿Jupanakajj ewjjtʼapjjetani ukhajj janit istʼañasa ukarjam lurañas wakiskaspa, ukhamat respeto uñachtʼayañataki? ¿Familiajansa congregacionansa khitis sum istʼatäñ munpacha? ¿Kunsa jupanakar istʼañatakejj lurirista?” sasa (Gén. 30:6; Juec. 13:9; 1 Rey. 17:22; 2 Crón. 30:20).

16. Simeí chachajj Davidar jiskʼachäna ukhajja, ¿kunsa Davidajj luräna?

¹⁶ Humilde chuymanïñajja, mayninakajj jiskʼachapjjestaspa ukhaw coleramp jan atipayasiñatak yanaptʼarakistaspa (Efes. 4:2). Ukatakejj kunatï 2 Samuel 16:5-13 (liytʼañataki) texton qellqatäki uk amuytʼapjjañäni. Uka textorjamajja, Davidampi servirinakapampejj Simeí chachan jiskʼachata, jan waltʼayata ukhamaw uñjasipjjäna. Davidajj uka chachar ukhamat ukhamwa kuttʼayaspäna, ukampis janiw uk lurkänti. ¿Kunas Davidarojj ukatak yanaptʼpachäna? Uk yatiñatakejj Salmo 3 qellqatwa liytʼañasa.

17. 1) ¿Kunas Davidarojj jan jankʼak colerasiñatak yanaptʼpachäna? 2) ¿Kunsa David chachat yateqassna?

¹⁷ Kunjamatï Salmo 3 qellqatan pʼeqeñchäwipajj siskejja, “kunapachatejj Absalón yoqapat jaltjjäna ukapa[chaw]” Davidajj uka arunak qellqäna. Salmo 3:1, 2 qellqatampi 2 Samuel capítulo 16 textompejj niya kikpakiwa.  Ukatsti, Salmo 3:4 qellqatanjja, Davidajj akham sasaw Jehová Diosar taqe chuyma confiyatap uñachtʼayäna: “Jachʼat artʼasisaw [Jehová] Tatitut mayista, jupasti qollan qollupatpach istʼitu” sasa. Jiwasajj ukhamarakiw yaqhanakajj jan wal lurapjjestani ukhajj Diosat yanaptʼa mayissna. Jehová Diosasti, espíritu santopwa aguantañatakejj churistani. Ukhamajj colerampi jan atipayasiñasa, ina chʼusat jan walinak lurapkistu ukanakar perdonañas ¿kunapachas wakisispa? ¿‘Jehová Diosajj tʼaqesitaj uñjaskiwa, yanaptʼitaniwa’ sasinti confiytanjja?

18. Kunatï cheqäki ukarjam sarnaqaskakiñajj ¿kunjamsa yanaptʼistani?

¹⁸ Kunatï cheqapäki ukarjam sarnaqañäni ukhajja, walja bendicionanakwa katoqañäni. Proverbios 4:7 textojj akham siwa: “Taqe kunat sipansa nayraqatajj yatiñ jikjjatam” sasa. Yatiñanïñatakejja walja yatichäwinaksa maynejj yatjjatañapäkchejja, ukarjam sarnaqani ukhakiw yatiñaniwa sissnajja, janiw qhawqha yatjjatatasa ukarjamajj yatiñaniwa sisksnati. Bibliajja, kʼisimiranakas “yatiñanïpjjewa” sasaw qhanañchi. Jupanakajja, manqʼañanak utjki ukapachan walja manqʼañanak imkatasaw yatiñanïpjjatap uñachtʼayapjje (Prov. 30:24, 25). Cristorojj kunatï Awkipar kusisiyki ukarjampun kuns luratapatjja, ‘Diosan yatiñapa’ sasaw sutiñchasiraki (1 Cor. 1:24; Juan 8:29). Kuntï maynejj lurañapäki uk yatiñampi ukarjam lurañampejj janiw pachpäkiti, Diosajj uk sum yati. Jupajja, khitinakatï humilde chuyman jaqëpki, jan walinak luratas pacienciampi aguantapki, kunatï cheqapäki ukarjamas sarnaqapjjaraki ukanakarojj bendisiwa (Mateo 7:21-23 liytʼañataki). Ukhamajja, congregacionajj humilde chuymani jaqenakan Diosar serviñ lugaräñapataki yanaptʼapjjañäni. Kunatï cheqapäki ukarjam sarnaqañatakejj tiempompi pacienciampis munaskchejja, ukarjam lurasajj humilde chuyman jaqëtaswa uñachtʼayañäni, ukatjja jichhasa jutïrinsa kusisitaw wiñayatak jakasiñäni.