1. Jehová Diosan Testigonakapajj ¿kunatsa kusisit markäpjje? (Aka paginankir foto uñjjattʼäta).

JEHOVÁ DIOSAN servirinakapajj kusisita markäpjjewa. Jachʼa tantachäwinakansa, mä kun lurañatak tantachtʼasisas kusisitaw parltʼasipjje. ¿Kunatsa ukhamäpjje? Jupanakajj “kusisiri Diosa[ruw]” uñtʼapjje, servipjjaraki, Jupat yateqasiñatakiw chʼamachasipjje, ukatwa kusisitäpjje (1 Tim. 1:11; Sal. 16:11). Jehová Diosajj kusisiñ churir Diosawa, ukatwa kusisitäñas muni, kunatsa kusisitäñasa uksa sarakistuwa (Deut. 12:7; Ecl. 3:12, 13).

2, 3. 1) ¿Kusisitäña siski uka arojj kamsañsa muni? 2) ¿Kunanak utjipansa jan kusisitäksna?

² ¿Sapa mayni jiwasanakajj kusisitäpjjtanti? ¿Jukʼamp kusisitäñatakejj kuns lursna? Kusisitäña siski uka arojj sum jikjjatasiña, kunatï utjkistu ukamp kusisitakïña, jan ukajj wali kʼuchikïña sañwa muni. Cheqpach kusisita jakasiñatakejj Jehová Diosan amigopäñasawa sasaw Bibliajj qhanañchi. Ukampis aka jan wali pachanjja, kusisita jakasiñajj chʼamakïspawa. ¿Kunatsa chʼamakïspa?

³ Kunayman jan waltʼäwinakan uñjasisajj janiw kusisit jakasksnati. Sañäni, divorciasitasata, jan trabajonitasata, familiasat maynejj congregacionat jaqsuta uñjasitapata, jan ukajj jiwatapatwa  jan kusisit jakasksnati. Ukatjja, familiasan inas jan waltʼäwinakajj utjchispa, trabajir masinakasa, jan ukajj escuelankir masinakasaw jiskʼachapjjestaspa, jan waltʼayañatak arknaqataw uñjassna, jan ukajj carcelan uñjasisaw llakita jikjjatassna. Inas usuntsna, jan ukajj jan qollañjam usuni, llaki usuni uñjassna, ukanak utjipanwa jan kusisitäksnati. Ukampis “kusisiri wali chʼamani”, mä arunjja Jesucristojj chuymachtʼañwa munistu, taqenis kusisitäsna ukwa munaraki (1 Tim. 6:15; Mat. 11:28-30). Ukatwa Jesusajj mä qollun yatichkäna ukhajja, Supayan apnaqata akapachan jakkasas kunanakas kusisit jakasiñatak yanaptʼistaspa uk waljanak qhanañchäna.

4, 5. ¿Kunsa kusisiñ jikjjatañatakisa kusisitäskakiñatakis lurañasa?

⁴ Kusisitäñatakejj kunas jukʼamp wakiskiri uk Jesusajj akham sasaw qhanañchäna: “Kusisiñanïpjjew Diosat yatjjatañajj kunja wakiskirisa uk amuyasirinakajja alajjpachankir Reinojj jupanakankiwa” sasa (Mat. 5:3). ¿Kunjamsa ukajj wali wakiskirïtap uñachtʼaysna? Bibliat yatjjatasa, kuntï yateqktan ukarjam sarnaqasa, Diosar serviñ nayrar uchasaw uk uñachtʼaysna. Ukhamtï lurañänejja kusisitaw jakasiñäni, kunanaktï Diosajj jutïritak arsuwayki ukarus jukʼampirakiw confiyañäni. Ukampis kuntï Diosan Aruparjam “kusisit suytʼasktan” ukaw jan waltʼäwinak aguantañatakejj chʼam churistani (Tito 2:13).

⁵ Kusisiña jikjjatañataki ukat kusisitäskakiñatakejja, Jehová Diosampi sum apasiñaw wakisiraki. Apóstol Pablojj akham sasaw qellqäna: “Tatitur servipjjatam laykojj kusisipjjapunim. Mayamp sapjjäma: ¡kusisipjjam!” sasa (Filip. 4:4). Diosampi sum apasiñatakejja, Bibliat yatjjatasin ukarjam sarnaqañasawa. Bibliajj akham siwa: “Kusisiñaniwa khititejj yatiña kankañ jikjjatki ukajja, ukhamarak chʼikhi kankaña katoqki ukasa” sasa. Ukatsti akham sarakiwa: “Yatiñ kankañajj jikjjatiripatakejj jakañawa; ¡kusisiñaniwa uka yatiña katjjäsipki ukanakajja!” sasa (Prov. 3:13, 18).

6. ¿Kusisita jakasiskakiñatakejj kunsa lurañasa?

⁶ Ukhamajj kusisita jakasiskakiñatakejja, kuntï Bibliat yateqktan ukarjamaw sarnaqaskakiñasa. Uk lurañajj kunja wakiskirisa ukjja, Jesusajj akham sänwa: “Jumanakatejj ukanak yatipjjsta, ukarjamarak lurapjjsta ukhajja, kusisipjjam” sasa (Juan 13:17; Santiago 1:25 liytʼañataki). Cheqas ukaw Diosat yatjjatañajj kunja wakiskirisa uk amuyasiñatak yanaptʼistu, wiñay kusisitäñatakis yanaptʼarakistu. Ukampis kunayman jan waltʼäwinak utjipanjja, ¿kunjamatsa kusisita jakassna? Jesusajj mä qollun yatichkäna ukhajj kunanakampsa sarakïna uk yatjjataskakiñäni.

7. ¿Kunatsa ‘wali llakitanakajj’ kusisitäpjje?

⁷ “Kusisiñanïpjjew wali llakitanakajja, jupanakaw chuymachatäpjjani” (Mat. 5:4). ¿Kunjamarak ‘wali llakitanakasti’ kusisitäpjjaspa? sasin inas yaqhepajj jisktʼasipjjchispa. Ukampis Jesusajj janiw taqe kunat llakisipki ukanakat parlkänti. Jan wali jaqenakasa, aka ‘qhepa urunakan chʼama tukuña jan wali tiemponak utjipanjja’ llakisipjjarakiwa (2 Tim. 3:1). Ukampis jupanakatakwa llakisipjje, janiw Diosar serviñat llakisipkiti, ukatwa jan kusisitäpkiti. Antisas Jesusajja, Diosat yatjjatañajj kunja wakiskirisa uk amuyasirinakatwa parlaskäna. Jupanakajja kunjamsa jaqenakajj Diosat jitheqtatäpjje ukanak uñjasaw wal llakisipjje. Pantjasirïpjjatapsa amuyasipjjewa, jan waltʼäwinakajj jucha layku utjatapsa yatipjjarakiwa. Diosajj uka kasta jaqenakaruw Biblia toqe chuymachtʼi, kusisit jakasipjjañapatakis yanaptʼi, jutïrin wiñay  jakasipjjañapatakis yanaptʼarakiwa (Ezequiel 5:11; 9:4 liytʼañataki).

8. ¿Kunjamsa llampʼu chuymanïñajj kusisitäñataki yanaptʼistaspa? Uk qhanañchtʼma.

⁸ “Kusisiñanïpjjew llampʼu chuymaninakajja, jupanakaw oraq katoqapjjani” (Mat. 5:5). ¿Kunjamsa llampʼu chuymanïñajj kusisitäñataki yanaptʼistaspa? Yaqhepanakajja, nayrajj qhoru chuymani, mayninakamp jan waltʼayasiri, nuwasiri ukhamäpjjänwa. Ukampis Diosar uñtʼjjasajj janiw ukhamäjjapjjeti, ‘machaq jaqëñampiw isthapisjjapjje’. Jichhajja, ‘sinttʼasiri, suma chuymani, humilde, llampʼu chuymani, pacienciani’ ukhamäjjapjjewa (Col. 3:9-12). Ukham jaqëpjjatap laykojj taqenimpiw sum apasipjje, kusisitäpjjarakiwa. Jupanakaw “oraq katoqapjjani” sasaw Bibliajj qhanañchi (Sal. 37:8-10, 29).

9. 1) ‘Llampʼu chuymaninakaw’ oraq katoqapjjani sasajj ¿kamsañsa Jesusajj munäna? 2) Cheqapar sarnaqañat awtjatanakasa pharjatanakas ¿kunatsa kusisitäpjjaspa?

⁹ ¿Kunjamansa llampʼu chuymaninakajj “oraq katoqapjjani”? Alajjpachar sarañataki ajllitäpki ukanakajja, waranqa maranak Cristomp chika reyinakjama, sacerdotenakjam apnaqasaw oraq katoqapjjani (Apoc. 20:6). Ukampis alajjpachar jan sarapkani uka waranq waranqa jaqenakajj aka oraqwa katoqapjjani, ukan wiñayatakiw sumankañana, kusisita jakasipjjani. Uka pä grupo jaqenakatjja Jesusajj akham sänwa: “Kusisiñanïpjjew cheqapar sarnaqañat awtjatanakasa pharjatanakasa” sasa (Mat. 5:6). Jupanakajj Paraisonwa kuntï suyapki uk phoqasir uñjapjjani (2 Ped. 3:13). Jehová Diosajj taqe jan walinak jan mayampitaki tukj-jjani ukhaw cheqpach kusisita jakasipjjani, janiw ina chʼusata tʼaqesiyatas uñjasjjapjjaniti (Sal. 37:17).

10. ¿Khuyaptʼayañajj kamsañsa muni?

¹⁰ “Kusisiñanïpjjew khuyapayasirinakajja, jupanakaw khuyaptʼayatäpjjani” (Mat. 5:7). Khuyaptʼayasirïñajj suma jaqëña, munasirïña mä arunjja, mayninakat sinttʼasiña sañwa munaspa. Ukampis Bibliarjamajja, janiw aleq sinttʼasiñakïkiti jan ukasti sinttʼasisin yanaptʼaña sañwa muni.

11. Jaqe masipar khuyaptʼayir samaritano jaqet Jesusajj parlkäna uka uñachtʼäwit ¿kunsa yateqsna?

¹¹ (Lucas 10:30-37 liytʼañataki). Jesusajj jaqe masipar khuyaptʼayir samaritano jaqet parlkäna ukaw kunjamsa mayninakar khuyaptʼaysna uk yatichistu. Uka samaritano chachajja, lunthatanakajj nuwjkäna uka chachat khuyaptʼayasisajj yanaptʼänwa. Uka uñachtʼäwit parlañ tukuyasajja, uka chachjamaw mayninakat khuyaptʼayasiñasa sasaw säna. Ukatwa akham jisktʼasiñasa: “¿Nayajj uka samaritano chachjamat luraraktjja? ¿Khuyaptʼayir chuyman jaqëtti? ¿Mayninakar tʼaqesir uñjasajj khuyaptʼaytti? ¿Kunsa mayninakar jukʼamp yanaptʼañatakejj lurirista? ¿Chuymankipstatäjjapjje jan ukajj viudäjjapjje ukanakar yanaptʼañatak chʼamachasstti? ¿Kawkïr wayn tawaqonakatï familiapat sapaki Diosar servisipki ukanakar yanaptʼañatak chʼamachasstti? ¿Wali llakitäpki ukanakar chuymachtʼañatakejj chʼamachasstti?” sasa (1 Tes. 5:14; Sant. 1:27).

12. ¿Kunatsa mayninakar khuyaptʼayasajj kusisitätanjja?

¹² ¿Kunatsa mayninakar khuyaptʼayasajj kusisitäsna? Cheqas “katoqañat sipansa churañanwa jukʼamp kusisiñajj utji”, ukatwa mayninakar khuyaptʼaytan ukhajj kusisitätanjja, Jehová Diosarus kusisiyaraktanwa (Hech. 20:35; Hebreos 13:16 liytʼañataki). Mayninakar khuyaptʼayiri jaqetjja, David reyejj akham sänwa: “[Jehová] Tatituw juparojj imaski, jupaw akapachan jakayani, kusisiñ churarakini” sasa (Sal. 41:1, 2). Jiwasatï mayninakar khuyaptʼayañäni ukhajja, Jehová  Diosajj jiwasat khuyaptʼayasirakiniwa, ukatsti wiñayaw kusisita jakasiñäni (Sant. 2:13).

13, 14. ¿Kunatsa qʼoma chuymaninakajj kusisitäpjje?

¹³ “Kusisiñanïpjjew qʼoma chuymaninakajja, jupanakaw Diosar uñjapjjani” sasaw Jesusajj säna (Mat. 5:8). Qʼoma chuymanïñatakejja, janiw jan wali amuyunakasa ni jan wali lurañ munañanakas chuymasan utjañapäkiti. Ukhamatakwa Jehová Diosajj jupar servitas askit uñjani (2 Corintios 4:2 liytʼañataki; 1 Tim. 1:5).

¹⁴ Qʼoma chuymaninakajj kusisitäpjjewa, kunattejj Diosan askit uñjatäpjjewa. Jupajj akham sänwa: “Khitinakatejj kayukam purir janqʼo isinakap tʼajjsusipki ukanakajj kusisitäpjjewa” sasa (Apoc. 22:14). Kayukam purir janqʼo isinakap tʼajjsusipjje siski uka arunakajj ¿kamsañsa muni? Alajjpachar sarañataki ajllitäpki ukanakarojja, Jehová Diosajj qʼoma chuymani jaqenakarjamaw uñji, jan jiwir cuerpwa churaraki, ukat wiñayaw alajjpachan kusisita jakapjjarakini, ukwa sañ muni. Ukampis aka oraqen wiñaya jakasiñ suyasipki uka walja jaqenakarojja, Diosajj cheqaparjam sarnaqapjjatapat amigoparjamaw katoqe, ukwa sañ munaraki. Bibliajj jupanakat akham siwa: “Kayukam purir isinakapsa tʼajjsusipjjarakiwa, Corderon wilapampiw uka isinakap janqʼoptayapjje” sasa (Apoc. 7:9, 13, 14).

15, 16. ¿Kunjamsa qʼoma chuymaninakajj ‘Diosar uñjapjje’?

¹⁵ ‘Jehová Diosarojj janiw khiti jaqes uñjkaspati ni uñjasas jakkaspati’ sasaw Bibliajj qhanañchi (Éx. 33:20). Ukhamajj ¿kunatsa Jesusajj qʼoma chuymaninakajj “Diosar uñjapjjani[wa]” sasajj sispachäna? “Uñjaña” siski uka arojj griego arunjja, niyas uñjksna ukham amuytʼaña, entiendiña, yatiña sañwa munaspa. Ukhamajj ‘Diosar uñjañajja’ jupajj kunjam Diosasa uk amuyaña, ukat ukham Diosätapat jupar munasiña sañwa muni (Efes. 1:18). Jesusajj Jehová Diosjam chuymanïnwa. Ukatwa akham säna: “Khititejj nayar uñjkitu ukajj Awkirojj uñjarakiwa” sasa (Juan 14:7-9).

¹⁶ ¿Kunjamatsa Jehová Diosar uñjaraksna? Kunjamsa Jupajj yanaptʼistu ukanak amuyasaw uñjaraksna (Job 42:5). Maysa toqetjja, Jupar jan jitheqtasa qʼoma sarnaqañataki chʼamachasipki ukanakatakejj kuna suma bendicionanaksa wakichaski ukanak amuytʼasaw uñjaraksna. Ukampis alajjpachar sarañataki ajllitäpki ukanakajj jiwasin jaktasajj cheqapuniw Jehová Diosar uñjapjjani (1 Juan 3:2).

17. Mayninakampi sum apasiñatak chʼamachasirinakajj ¿kunatsa kusisitäpjje?

¹⁷ Jesusajj akham sänwa: “Kusisiñanïpjjew mayninakampi sumankañ thaqerinakajja”  sasa (Mat. 5:9). Cheqas mayninakampi sumankañatak chʼamachasirinakajj kusisitäpjjewa. Discípulo Santiagojj akham sänwa: “Cheqapar sarnaqañ achojja, sumankañajj utjki uka tiempon phawatawa, ukajj sumankañ utjayirinakataki phawatarakiwa” sasa (Sant. 3:18). Jiwasatï congregacionana, jan ukajj familiasan maynimpi jan waltʼayasstan ukhajja, sumankthapiñatakejj Diosaruw yanaptʼa mayiñasa. Jupajja, suma chuymanïñataki, kusisitäñasatakejj espíritu santompiw yanaptʼistani. Jesusajja, kunatsa maynimpi sumankthapiñatak chʼamachasiñasajj wali wakiskiri uka toqet akham sänwa: “Jumatejj altarar mä ofrenda apkasina jilatamajj juma conträtap amtassta ukhajja, uka ofrendam altar nayraqatar jaytasin jilatamar thaqtir saram. Jupampi nayraqat sumankthapinim, kuttʼanisaw ofrendam loqtaskäta” sasa (Mat. 5:23, 24).

18, 19. ¿Kunatsa Diosan servirinakapajj jan waltʼayañataki arknaqatäkasas wali kusisitäpjje?

¹⁸ “Kusisiñanïpjjtawa naya layku jiskʼachata, jan waltʼayañatak arknaqata, kunayman jan wali arunakampi kʼarintata uñjasipjjsta ukanakajja”. ¿Kunatsa Jesusajj uk säna? Jupajj akham sänwa: “Ukhamarakiw nayrajj profetanakarus jan waltʼayañatak arknaqapjjäna. Jumanakajj kusisipjjam, wal kʼuchisipjjarakim, mä jachʼa bendicionaw jumanakatakejj alajjpachan utji” sasa (Mat. 5:11, 12). Kunapachatï apostolonakarojj jawqʼjapjjäna, janiw Jesusan sutipjjar jukʼamp parlapjjätati sasin sapjjäna ukhajja, jupanakajj “Sanedrinankir jaqenakan nayraqatapatjja wali kusisitaw sarjjapjjäna”. Cheqas janiw jawqʼjatäsajj kusisitäpkänti, jan ukasti, “Jesusan sutip layku phenqʼachat uñjasipjjatapat[wa] Diosajj wali sum jupanakar uñjäna” ukatwa wali kusisitäpjjäna (Hech. 5:41).

¹⁹ Jichhürunakanjja, ukhamarakiw Diosan servirinakapajj Jesusan sutip layku phenqʼachat uñjasisa, kunayman jan waltʼayat uñjasisas kusisita aguanttanjja (Santiago 1:2-4 liytʼañataki). Tʼaqesiñajj janiw jiwasar gustkarakistuti. Ukampis uka jan waltʼäwinakan Diosat jan jitheqtkañäni ukhajja, Jehová Diosaw jan ajjsartʼasa aguantañatakejj yanaptʼistani. Ukatakejj Henryk Dornik sat jilatampita jilapampit parltʼañäni. Agosto, 1944 maranjja, campo de concentración ukaruw jupanakar apayapjjäna. Uñisirinakapajj akham sapjjänwa: “Aka jaqenakarojj janipuniw kunampis iyawsayañjamäkiti. Tʼaqesisajj kusisitäpkaspas ukhamäpjjewa” sasa. Henryk jilatajj akham siwa: “Janiw tʼaqesisajj kusisitäkayätti; ukampis Jehová Diosat jan jitheqtañ munatajatwa jan ajjsarasa kusisita aguantayäta ukaw kusisiyitäna” sasa. Jupajj saskakiwa: “Jehová Diosar taqe chuyma mayisiñaw aguantañatakejj wal yanaptʼawayitu, ukham mayisisajj Jupan wali jakʼapankkiristsa ukhamwa amuyasiyäta. ¡Cheqas Jupaw taqe ukanakan yanaptʼawayitu!” sasa.

20. ¿Kunatsa ‘kusisiri Diosar’ serviñajj wali kusiskaña?

²⁰ “Kusisiri Diosan” wali askit uñjatätan ukhajja, wali kusisitätanwa. Jan waltʼayañataki arknaqata uñjasisasa, familiasampi Diosar serviñ jarkʼatäsasa, usutäsasa, jan ukajj chuymankipstat uñjasisasa kusisitätanwa (1 Tim. 1:11). ‘Jan kʼarisir Diosaruw’ confiytanjja, ukatwa wali kusisitarakïtanjja, Jupajj kuntï arsuwayki ukjja phoqaniwa (Tito 1:2). Ukapachajj walja bendicionanakwa katoqañäni, janiw jichha tiempon tʼaqesktan ukanak amtjjañäniti. Kunanaktï Jehová Diosajj Paraison churkistani uk janiw jichhajj sum amuyksnati. Sumankañajj jilarkirïniwa, ukhaw cheqpachapun wali kusisita jakasiñäni (Sal. 37:11).