Mä warmejj ususjje uka nayrïr horajja, wawatakejj wali wakiskiriwa. ¿Kunatsa? Kunja munasiñampis taykajj uka horan wawapar uñjani ukajja, wawan sum jilsuñapatakiw yanaptʼani. *

¿Kunatsa mä taykajj jichhak nasiri wawapar munasiñamp uñji? Jeannette Crenshaw profesorajj akham siwa: “Parto pasatatjja, taykan cuerpopanjja oxitocina sat hormonaw wal jiljjatti. Ukaw wawapar uñkattʼi, munartʼi, ñuñtʼayki ukhajj jukʼamp munasiñapatak yanaptʼi. Ukharakiw taykan cuerpopat yaqha hormonajj misturaki, ukaw taykajj wawapar jukʼamp munasiñapatakisa, wawas taykapar jakʼachasiñapatakis yanaptʼi” sasa (The Journal of Perinatal Education). ¿Kunatsa uk yatiñajj wali wakiskiri?

Taqe kun luriri Jehová * Diosaw mä taykampi wawapampejj wali munasiñampi uñjasipjjañapatak lurawayi. David reyejja, nasïwipatsa taykapajj jupar wali munasiñampi uñjatapatsa Diosar wal yuspäräna. “Diosaw nasiwijatpach wali munasiñap uñjitu” sasaw sarakïna, ukatwa ‘taykajan purakapatpach nayan Diosajätajja’ sasin mä oracionan Diosar säna (Salmo 22:9, 10).

AK AMUYTʼAM: Diosatï taykanakar wawanakapat llakisipjjañapataki, munasiñamp uñjapjjañapatak lurawaychejja, ¿janit Jupajj sapa mayni jiwasanakat llakisirakpacha? ¡Jiwasajj Diosan wawapätanwa! (Hechos 17:29).

Jesucristojj taqe kun luriri Diosarojj sum uñtʼäna, ukatwa akham säna: “¿Janit pä gorrión jamachʼinakajj jukʼa valorani mä sencill qollqer aljaskejja? Ukampis uka jamachʼinakatjja, janiw mayas alajjpachankir Awkiman jan uñjkatajj oraqer purkaniti. Pʼeqenakaman utjki uka ñikʼutanakas taqpach jakhutarakiwa. Ukhamasti jan ajjsarapjjamti, jumanakajj walja gorrión jamachʼinakat sipansa jukʼampi valoranïpjjtawa” sasa (Mateo 10:29-31).

Jukʼa jaqenakakiw jamachʼinakajj kunja sumäpjjesa uk uñjapjje, yamas oraqer purir jamachʼinakatjja janiw khitis llakiskiti. Ukampis Diosajja, sapa mayni jamachʼinakatwa llakisi. Ukhamäkchisa, walja jamachʼinakat sipansa, jaqew Diosatakejj jukʼamp valorani. Ukhamajj Diosajj jumat llakisiwa, janiw uka toqet pächasiñamäkiti.

 Bibliajj akham siwa:

• “Tatitusti sumwa uñjaski taqe akapachana kunanakatejj lurasiski ukanakjja, ukhamata chʼama churañataki khitinakatejj cheqpachana juparu iyawsasipki ukanakaru” (2 CRÓNICAS 16:9).

• “Tatitojj aski jaqenakaruw imaski, arnaqasitanakaparusti istʼarakiwa” (SALMO 34:15).

• ‘Khuyapayasiñam laykuw kusista. Jumaw llakinakaj amuyistajja, jakañajan jan waltʼäwinakapsa uñjaraktajja’ (SALMO 31:7).

Diosajj wal jiwasat llakisi, munasirakistuwa, ¿uk yatiñajj yanaptʼistaspati? Jïsa. Inglaterra markan jakasiri Hannah * sat warmejj akham siwa:

“‘Jehová Diosajj janiw munaskpachïtuti, Jupar jan taqe chuym confiyatajatwa oracionanakajsa jan istʼkpachïtuti’ sasaw amuyirïta. ‘Castigaskpachïtuwa jan ukajj jan kunatak serviritajatwa jan istʼkpachïtuti. Janirakiw nayatsa llakiskpachati’ sasaw sirïta”.

Hannah warmejj qhawqsa Jehová Diosajj jupat llakisi uk sum jichhajj amuyjje. ¿Kunas ukham amuyañapatak yanaptʼäna? Jupajj akham saskakiwa: “Jukʼat jukʼatwa Diosar confiyañ qalltayäta. Walja maranak nayrajja, kunjamsa Jesucristojj jiwas layku jiwäna uka toqetwa mä arstʼäwi istʼayäta, ukajj chuymajarupuniw purtʼitäna, qhawqsa Diosajj munasitäna ukwa amuyayäta. Diosajj oracionanakaj istʼatap uñjayäta ukhajja, nayar wal munasitap amuyasajj jachaqtʼasiyätwa. Bibliat yatjjatañasa, tantachäwinakar sarañasa, Jehová Diosar jukʼamp uñtʼañataki ukat qhawqsa jiwasar munasistu uk amuyañatakiw yanaptʼitäna. Jehová Diosajj walpun munasistu, yanaptʼistuwa, sapa mayniruw sum uñjañ munarakistu”.

¡Uka arunakajj wali chʼamañchtʼkiriwa! ¿Jumat kamsasirakispasa? ¿Kunjamsa chuymaman jikjjatasta uk Diosajj yatpachati? Akjjar jutki uka yatichäwinwa uka jisktʼar qhanañchasini.