Kunapachatï maynir jukʼamp uñtʼktan ukhajja, kunjam jaqesa uk jukʼamp sumwa yattanjja, jukʼampirakiw jupar jakʼachastanjja. Diosampejj niya ukhamarakiwa, Jupar jukʼamp uñtʼktan ukhajja, kunjam Diosasa uk jukʼamp sumwa yattanjja, jukʼampirakiw Jupar jakʼachastanjja. Diosajj chʼamani, yatiñani, cheqaparjam uñjiri, munasiri ukhamawa, ukanakaw Jupanjja jukʼamp qhansti.

“Tata, jumaw jachʼa chʼamamampi alajjpachsa, akapachsa lurtajja” (JEREMÍAS 32:17).

Diosajj qhawqha chʼamanisa ukjja, luratanakapanwa uñachtʼayistu. Aka toqet amuytʼañäni, mä suma lupi urunjja, wali sumwa juntʼurtʼastanjja, ¿kun utjipansa ukham juntʼurtʼastanjja? Inti utjipanwa ukham wali sum juntʼurtʼastanjja. ¿Intejj qhawqha chʼamanïpachasa? Chika taypipajj sinti paripuniwa jan ukajj sinti qhatirapuniwa (15.000.000 °C). Mä chʼipjjtanjja, walja millón bomba atomicanakas phallkaspa ukhamawa.

Ukampis Intejja, walja warawaranakajj alajjpachan utjki ukanakat sipansa jiskʼakiwa. Cientificonakajj yatjjatawayapki ukarjamajja, UY Scuti sat warawarajj wali jachʼawa, uka warawarar Inti lanti uchsna ukhajja, aka oraqjja chhaqtayaspawa, Júpiter sat planetkamaw purirakispa. Uk yatiñajja, kunatsa Jeremiasajj ‘jachʼa chʼamapampiw Jehová Diosajj alajjpachsa akapachsa lurawayi’ sasin siskäna uk amuyañatakiw yanaptʼistu.

 ¿Diosan chʼamapajj kunjamsa yanaptʼistu? Kunanaktï Diosajj lurawayki ukanak utjatapatwa jakañajj utjaraki. Sañäni: kunayman manqʼañanakasa Intis jan utjkaspa ukhajja, janiw jakañajj utjkaspati. Diosajj sapa mayniruw chʼamapamp yanaptʼarakistu. Nayrïr patak maranakanjja, Diosajj usutanakar qollañapatakiw Jesusar chʼam churäna. Bibliajj akham siwa: “Juykhunakajj uñjapjjewa, cojonakas sarnaqapjjewa, lepra usuninakas qʼomachatäpjjewa, oqaranakas istʼapjjewa, jiwatanakas jaktayatäpjjewa” sasa (Mateo 11:5). Diosajj jichhürunakan yanaptʼarakistuwa. ¿Kunjamsa yanaptʼistu? Bibliajj akham siwa: ‘Diosaw qaritarojj chʼam churi’, “taqe khitinakatejj Tatitur iyawsapki ukanakasti machaq chʼamanakanïpjjaniwa” sasa (Isaías 40:29, 31). Diosajj jan waltʼäwinakar saykatañatakisa, ukanak aguantañatakisa, ‘jaqen chʼamapat jilankki uka chʼamwa churarakistu’ (2 Corintios 4:7). Cheqas wali munasiñampiw Diosajj chʼamapamp yanaptʼistu, uk yatisajj jukʼampiw Jupar jakʼachastanjja.

‘¡Jehová Dios, luräwinakamajj waljapuniwa! Yatiñampiw taqe kuns lurtajja, oraqejj luratanakaman phoqantatawa’ (SALMO 104:24).

Diosan luratanakapat jukʼamp yatjjatktan ukhajja, Jupajj qhawqha yatiñanisa ukwa amuyaraktanjja. Biomimética toqet yatjjattʼat cientificonakajja, Diosan luratanakapat yatjjatasajj ukarjamaw kunayman cosasanak lurañ yantʼapjje. Uka cientificonakajja, isitak mä cierre lurañatakisa, mä avión lurañatakisa, Jehová Diosan luratanakapatwa nayraqat sum yatjjatapjje.

Cuerposajj wali suma lurtʼatawa, ukajja Diosan wali yatiñanïtapwa uñachtʼayaraki. Kunjamsa mä wawajj taykapan purakapan jilti uka toqet parltʼañäni. Qalltanjja, uka wawajj mä jiskʼa celulakiwa. Uka celulanjja, wawajj kunjamänisa ukajj qellqantatäkaspas ukhamawa. Uka celulajj walja celulanakaruw jaljti. Ukanakajj niya pachpakjamäpkchïsa, jukʼat jukʼatwa células sanguíneas, células nerviosas, células óseas, ukat yaqha kasta celulanakar tukupjje. Qhepatjja, taqe kunatï wawan cuerpopan utjkani ukanakajj sumwa funcionjje. Llätunka phajjsinakanakwa uka jiskʼa celulajj walja millón celulanakani mä jiskʼa wawar tukjje. Uk yatisajja, walja jaqenakaw salmonak qellqerjamajj akham sapjje: ‘Jumaruw yuspärsma, musparkañpun nayarojj luristajja’ sasa (Salmo 139:14, NM).

¿Diosan yatiñapajj kunjamsa yanaptʼistu? Lurawaykistu uka Diosajja, kunanakas kusisiyistaspa ukanak sum yati. Niyakejjay wali yatiñani Diosächejja, wali suma ewjjtʼanakwa Biblia toqejj churistu. Uka ewjjtʼanakat mayajj akawa: ‘Jumanakajj maynit maynikam taqe chuyma perdonasisipkakim’ (Colosenses 3:13). ¿Uka ewjjtʼajj yanaptʼistaspati? ¡Jïsa! Yatjjatasiwayki ukarjamajja, mayninakar perdonañajj sum iktʼañatakiw yanaptʼistaspa, presión alta ukas minustʼaspawa. Jan sint llakisiñataki, ukhamarak jan usuntañatakiw yanaptʼarakistaspa. Diosajj wali yatiñani mä suma amigökaspas ukhamawa, Jupajj jiwasat wal llakisi, ukatwa suma ewjjtʼanak churapunistu (2 Timoteo 3:16, 17). ¿Janit ukham amigonïñ munkasma?

“Taqe chʼamani Diosajja [...] cheqapawa” (JOB 37:23).

Diosajj kunatï walïki ukpunwa luri. Cheqansa, Taqe Chʼamani Diosajj janipuniw kuna jan walsa lurkaspati (Job 34:10). Jupajj cheqaparjamaw jaqenakar uñji, ukatwa salmonak qellqerejj akham säna: “Markanakarusti cheqaparuw uñjani” sasa (Salmo 9:8b). Niyakejjay Diosajj jaqen chuymap yatchejja, janiw maynin uñnaqap uñjasakejj juchañchkaspati, jan ukasti, kunatï cheqäki uk yatisajj cheqaparjamaw jaqenakar uñji (1 Samuel 16:7). Maysa toqetjja, Diosajj kuna jan walinakatï aka oraqen lurasiski ukanak sum uñjaski, ukatwa ‘jan wali sarnaqer jaqenakajj tukjatäpjjaniwa’ sasin arsuwayi (Proverbios 2:22).

Ukajj janiw Diosajj jan sinttʼasiri mä juezäkaspasa, jaqenakarojj castigañaksa munkaspa ukham sañ munkiti. Wakischi ukhajja, Jehová Diosajj khuyaptʼayasiñampiw jaqenakar uñji. Bibliarjamajja, Diosajj taqe chuyma arrepentisiri jan wali jaqenakarojja, ‘munasiñampi, khuyaptʼayasiñampiw’ uñji. Ukhamatwa Diosajj cheqaparjam uñjirïtap uñachtʼayistu (Salmo 103:8; 2 Pedro 3:9).

¿Diosan cheqaparjam uñjirïtapajj kunjamsa yanaptʼistu? Apóstol Pedrojj akham sänwa: “Diosajj janiw khitirus yaqhachkiti. Jan ukasti khitinakatï taqe markanakan jupar ajjsartʼapki, kunatï cheqapäki ukarjam lurapki ukanakajja, jupan katoqatäpjjewa” sasa (Hechos 10:34, 35). Niyakejjay Diosajj jan yaqhachir Diosächejja, taqeniw Jupamp cheqaparjam uñjatäsna. Yaqha markankirinakasa, wali yatjjattʼat jaqenakasa, jukʼa yatjjattʼat jaqenakasa, qollqeninakasa, pobrenakasa, Diosar jakʼachasipjjaspawa ukat adorapjjarakispawa.

Cheqapa thakip uñtʼañatakisa, ukarjam sarnaqasajj kusisit jakasiñatakisa, Diosajj mä conciencia churarakistu. Bibliarjamajja, concienciajj chuymasan qellqantata mä leyïkaspas ukhamawa, ukaw luratanakasajj walikïskiti janicha uk amuyasiñatak yanaptʼistu (Romanos 2:15). ¿Cheqapunit concienciasajj yanaptʼistaspa? ¡Jïsa!  Suma yatichat concienciajja, janiw jan walinak luraykistuti. Juchar purtʼaskañäni ukhasa, arrepentisiñataki ukhamarak jan walinak jaytañatakiw yanaptʼistani. Cheqansa, Diosajj cheqaparjam uñjiri Diosätap yatiñajj yanaptʼistuwa, jukʼampirakiw Jupar jakʼachasiyistu.

“Diosajj munasiñawa” (1 JUAN 4:8).

Diosajj chʼamanïtapatwa kuns luri, yatiñampiw luraraki, cheqaparjamaw uñjarakistu. Ukampis Bibliajja, “Diosajj munasiñawa” sasaw yatichi. Ukhamajj Jehová Diosajj munasiri Diosätapatwa taqe kuns luri.

Jehová Diosajj janiw khitina ni kunan yanaptʼapsa munkiti, ukampis wali munasiri Diosätap laykuw alajjpachan angelanak luräna, aka oraqensa jaqenak lurarakïna, ukhamat jupanakajj Diosan wali munasita jakasipjjañapataki. Diosajj jan kun katoqañ suyasaw jaqenakan jakasipjjañapataki mä suma oraqe wakichäna. Jichhakamas qhawqsa jaqenakar munasi uk uñachtʼayaskakiwa, ukatwa “Jupajj jan wali jaqetakisa suma jaqetakisa taqenitakiw intip jalsuyani, cheqapar sarnaqeritakisa jan cheqapar sarnaqeritakisa ukhamarakiw jallu puriyani” (Mateo 5:45).

“Jehová Diosajj wali munasir chuymaniwa, wali khuyaptʼayasirirakiwa” (Santiago 5:11). Jupar uñtʼañataki ukhamarak jakʼachasiñatak chʼamachasisipki ukanakarojja, wali munasiñampiw uñji, sumwa jupanakar uñtʼaraki. “Cheqpachansa jupajj janiw sapa mayni jiwasanakat jayankkiti” (Hechos 17:27).

¿Diosan munasiñapajj kunjamsa yanaptʼistu? Diosajj kunayman toqetwa munasiñap uñachtʼayistu. Sañäni, Inti jalanta uñjañasa, mä wawan lartʼasitapasa, familiasajj qhawqha munasiñampis uñjistu uk uñjañasa, chuymar purtʼkiripuniwa. Cheqas janiw ukanakajj jakañatak wakiskapuniti, ukampis kusisit jakasiñatakiw yanaptʼistu.

Diosan munasiñapatwa oracionan Jupar jakʼachasiraktanjja. Bibliajj akham siwa: “Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam, taqe chuym ruwtʼasisa yuspärasisa jupar oración lurapjjam” sasa. Jehová Dios awkisajj wal munasistu, taqe llakinakas Jupar yatiyañaswa munaraki. Jiwasatï ukham lurañäni ukhajja, Diosajj ‘sumankañapwa churistani, uka sumankañapasti jaqenakajj amuyki ukat sipansa jukʼampiwa’ (Filipenses 4:6, 7).

Aka yatichäwinjja, Diosajj chʼamani, yatiñani, cheqaparjam uñjiri, munasiri ukham Diosätapwa uñjawaytanjja. Jichhajja kunanaksa Diosajj juma layku lurawayi, kunanaksa lurarakini uk liytʼaskakiñatakiw chʼamañchtʼapjjsma.