Mä suma amigojja, jan waltʼäwinakan uñjasktan ukhajj yanaptʼapunistuwa. Ukatwa yaqhepajj akham sapjje: “Diosajj janiw amigosäkiti. Amigosäspa ukhajj yanaptʼistaspawa” sasa. Ukampis Diosajj kunayman toqetwa jichhakam yanaptʼawayistu, kunatï tʼaqesiykistu ukanaksa, niyaw chhaqtayjjani. ¿Kunjamsa Diosajj uk lurani?

Khititï tʼaqesiñanak utjayki ukar tukjasaw Diosajj jan waltʼäwinak chhaqtayani. Khitis tʼaqesiñanak utjayi uka toqet parlkasajja, Bibliajj akham siwa: “Akapachajj Supayan amparapankiwa” sasa (1 Juan 5:19). Jesusajj Supayat parlkasajj akham sarakïnwa: ‘Akapachan apnaqeripawa’ sasa (Juan 12:31). Supayaw jaqenakarojj kunayman jan walinak lurayi, ukatwa tʼaqesiñanakajj utji. ¿Kunsa Diosajj Supayamp lurani?

Niyaw Jehová Diosajj Jesucristo Yoqapan yanaptʼapampejj ‘Diablor tʼunjani’ (Hebreos 2:14; 1 Juan 3:8). Bibliarjamajja, ‘Diablojj jukʼa tiemponikïtapjja yatisiwa’ (Apocalipsis 12:12). Jan wali jaqenakas tukjatäpjjarakiniwa (Salmo 37:9; Proverbios 2:22).

Tʼaqesiñanak chhaqtayasajja, Diosajj kuntï jaqenakatakisa oraqetakis amtkäna ukwa phoqani. ¿Jakañajj kunjamänisa?

Jan ajjsaras jakasiñasa, sumankañas wiñayatakïniwa. “Llampʼu chuymaninakasti oraq katoqapjjani, jilarkir sumankañampiw kusisipjjarakini” (Salmo 37:11).

Manqʼañanakajj jilarkiriw utjani. “Trigojj yapunakan jilarkir utjpan, qollu patanakansti jilantarakpan” (Salmo 72:16).

Utanakasajj sumäjjaniwa, trabajiñas kusiskañäniwa. ‘Jaqenakajj utanak utachasipjjani, ukanwa jakasipjjarakini, uvanak yapuchasipjjani, uka yaputwa manqʼasipjjarakini. Ajllitanakajasti kuntï amparapamp lurapkani ukwa manqʼasipjjani’ (Isaías 65:21, 22).

¿Ukham jakasiñ munasmati? Niyaw taqe uka arunak phoqasir uñjañäni.

Jichhürunakanjja, taqeniw usunttanjja, jiwaraktanjja. ¡Ukajj janiw wiñayatakïkaniti! Jesusan jiwas layku jiwatapatjja, niyaw Jehová Diosajj yanaptʼistani, “ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” (Juan 3:16). Ukhamajj ¿kunjamas jakasjjañäni?

Janiw usunakas utj-jjaniti. ‘Janiw khitis sisjjaniti: “Usutätwa” sasajja. Diosajj jaqenakan juchanakapjja perdonaniwa’ (Isaías 33:24).

Janiw jiwañajj utj-jjaniti. “Tatitojj wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa” (Isaías 25:8).

Jaqenakajj wiñayatakiw jakasjjañäni. “Kuntï Diosajj Cristo Jesús Tatitus taypi ukhamak churki ukajja wiñay jakañawa” (Romanos 6:23).

Jiwatanakajj jaktanipjjaniwa. “Cheqapar sarnaqer jaqenakasa jan cheqapar sarnaqer jaqenakas jaktanipjjaniwa” (Hechos 24:15). Jesusajj jaqenak layku jiwawayki ukajja, jiwatanakarojj yanaptʼarakiniwa.

¿Kunjamsa Diosajj taqe ukanak phoqani?

Diosajj kuntï jaqenakatakisa aka oraqetakis amtkäna ukjja, Jesucriston apnaqata alajjpachankir mä gobierno taypiw phoqani (Salmo 110:1, 2). Jesusajj uka gobierno, mä arunjja, uka Reino jutañapatakiw arkirinakapar akham mayisiñ yatichäna: “Alajjpachankir nanakan Awkija, [...] Reinomajj jutpan” sasa (Mateo 6:9, 10).

Diosan Reinopaw aka oraq apnaqjjani, uka Reino taypiw Diosajj kunatï tʼaqesiykistu ukanak qʼal chhaqtayjjani. ¡Uka gobiernojj taqe gobiernonakat sipansa jukʼamp sumäniwa! Ukatwa Jesusajj aka oraqenkkäna ukhajja, “Reinon suma yatiyäwinakap” yatiyañatak wal chʼamachasïna, ukham lurapjjañapatakiw arkirinakaparus mayïna (Mateo 4:23; 24:14).

Jehová Diosajj jiwasar wal munasitapatwa taqe ukanak lurañ arsuwayi. Uk yatisajja, ¿janit Diosar jukʼamp uñtʼañataki, ukhamarak Jupan amigopäñatak chʼamachasiñ munkasma? Diosar jukʼamp uñtʼañajj ¿kunjamsa yanaptʼiristamjja? Jutïr yatichäwinwa uk uñjaskañäni.