KUNJAMTÏ pasïr yatichäwinakan uñjaniwayktanjja, jan waltʼäwinakankkasajj janis jakañajj wakisjjaspa ukhamwa amuyjjsna. Inas jan walin uñjasisajj ‘janiw jakañajj wakisjjeti’, jan ukajj ‘janiw khitis nayat llakisjjeti’ sasin amuysta. Ukampis Diosajj jumat wal llakisi, tʼaqesitam uñjasas wal tʼaqesiraki. Jupatakejj wali valoranïtawa.

Salmo 86 qellqerejj qhawqsa Diosar confiyasïna uka toqet akham sänwa: “Llakisiñajjan jumar artʼasinsma, juman istʼasirïtam laykuw mayisinsma” sasa (Salmo 86:7). Inas jumajj akham jisktʼassta: “¿Wali llakitäktan ukhajj kunjamsa Diosajj istʼistu?” sasa.

Diosajj inas uka ratpacha taqe problemanakas jan askichkchiniti, ukampis jan aynachtʼañatakiw sumankañap churistani. Bibliajj akham siwa: “Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam, taqe chuym ruwtʼasisa yuspärasisa jupar oración lurapjjam. Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa. Uka sumankañaw chuymanakamsa amuyunakamsa [...] jarkʼaqapjjätam” sasa (Filipenses 4:6, 7). Bibliankir aka textonak uñjjattʼam, ukhamatwa qhawqsa Diosajj jumat llakisi uk amuyäta.

Janiw ni mä gorrión jamachʼitsa “Diosajj armaskiti. [...] Jumanakajj walja gorrión jamachʼinakat sipansa jukʼamp valoranïpjjtawa” (Lucas 12:6, 7).

AK AMUYTʼAM: Diosatakejj mä jiskʼa gorrión jamachʼikis wali valoraniwa. Yamas jaqenakarojja, Diosajj uka jamachʼinakat sipansa, jukʼamp valoranitwa uñjistu. Aka oraqen taqe luratanakapat sipansa wali sumwa lurawayistu. Jupar uñtasita luratarakïtanwa, ukhamajj kunjam Diosäkitï ukham chuymanirakïsnawa (Génesis 1:26, 27).

“[Jehová Dios] Tatay, jumaw chuymajj uñantista, nayar uñtʼarakista: [...] lupʼitanakajjarojj jayatpach amuytajja. Diosay, uñakipitaya, [...] lupʼitanakajj uñtʼarakim” (Salmo 139:1, 2, 23).

AK AMUYTʼAM: Diosajj jumar sumwa uñtʼtamjja. Kunas wal llakisiytam kunjamäsktasa taqe ukanakwa Jupajj yati. Inas yaqhanakajj qhawqsa tʼaqesiskta uk jan amuyapkstamti, ukampis Diosajj jumat wal llakisi, yanaptʼañwa munaraktamjja. Ukhamajja jakaskakiñamajj wali wakiskiriwa.

“[Jehová Dios] Tatay, mayisitajjarojj istʼakimaya, ¡arnaqasitajjajj jakʼamkam purinikpanaya! [...] Naya toqeruy jinchum alkatanim; artʼasinsma ukapachajj istʼakitaya”. Jehová Diosajj ‘apanukut jaqen mayisitap istʼaniwa, achiktʼasitanakaparus jaysaniwa’ (Salmo 102:1, 2, 17).

AK AMUYTʼAM: Diosajj nayratpachas jaqenakan jachanakap apthapkaspa ukhamawa (Salmo 56:8). Juman jachanakamas uka taypinkarakiwa. Diosajj niyakejjay wali valoranit uñjstamjja, kuna jan walinakantï uñjaskayäta, qhawqsa jachayäta taqe ukanakwa amti.

“Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma, atipjiri amparajjampirakiw uywaskäma. Naya, juman Tatitu Diosamaw, jumarojj amparat wayjjarsma, irparaksma; nayaw saraksma: ‘Jan ajjsaramti, nayaw yanapaskäma’” (Isaías 41:10, 13).

AK AMUYTʼAM: Diosajj yanaptʼañwa muntamjja. Aynachtʼkäta ukhajj Jupaw yanaptʼätam.

“Diosajj akapachar wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” (Juan 3:16).

AK AMUYTʼAM: Diosajj wal munastamjja, ukatwa munat Yoqaparu, mä arunjja, Jesusar juma layku jiwañapataki churawayi. Jesusan jiwatap laykojja, mä amtampiw wiñayataki kusisita jakasisma. *