Mä domingo jaypʼojja, Curazao markan jakasir Kenneth jilatampi Filomena warmipampejj Bibliat yatichapkäna uka chacha warmir visittʼiriw sarapjjäna.

Kenneth jilatajj siwa: “Puripkta ukhajj uta punkojj llawintatänwa, autopas janiw ukankkänti, ukatwa celularat warmiparojj jawsayäta” sasa.

Chachajajj trabajiskiwa sasaw uka warmejj säna. Kenneth jilatampi Filomena kullakampi uta punkunkasipkatap yatisajj utaruw mantayäna.

Warmir uñkatasajj jachaskatap amuyapjjäna. Kenneth jilatajj Bibliat yateqañataki oración lurañ tukuyjjäna uka qhepatjja, uka warmejj walpun jachaqtʼasïna. Ukatwa kunatsa jachäna uk jupanakajj jisktʼapjjäna.

Warmisti jiwayasiñ amtaskayäta sasaw jupanakar säna, ukatwa mä nota chachaparojj qellqaskäna. Ukampis Kenneth jilatan telefonot jawsatapaw uk jan lurañapatak jarktʼäna. Uka warmisti llakimp wali aynachtʼatänwa, ukatwa chuymachtʼir textonak Bibliat jupamp liytʼapjjäna. Uka arunakaw jan jiwayasiñapatak yanaptʼäna.

Kenneth jilatajj akham siwa: “Jehová Diosar walpun yuspärapjjta, inas angelapampi jan ukajj espíritu santon yanaptʼapampi uka warmir jawsañatak yanaptʼapjjchitu” sasa. *

Jehová Diosaw uka warmir yanaptʼañatak angelapampi yanaptʼapjjetu, jan ukajj espíritu santopampiw yanaptʼapjjetu sasaw Kenneth jilatampi Filomena warmipampejj sapjjäna. Ukham amuyapjjatapajj ¿walikïskänti? Jan ukajja, ¿Kenneth jilatajj aleq ukhamatakcha celularat uka warmir jawspachäna?

Angelanakat yanaptʼaskäna janicha uk janiw yatktanti, ukampis Jehová Diosajja jupat yateqañ munapki uka jaqenakarojj angelanakapampiw yanaptʼi. Amuytʼañataki, nayra tiemponjja Jehová Diosajj Etiopía markankir mä jilïr oficialaruw Bibliat yatjjatañapatak yanaptʼäna, ukatakisti mä ángel toqew Felipe sat mä cristianor khitäna sasaw Bibliajj qhanañchi (Hechos 8:26-31).

Walja religionanakanjja, angelanakajj utjiwa sasaw yatichapjje. Suma angelanakajj kuntï Diosajj munki uk lurapjje, yaqhep angelanakajj jaqenakaruw jan walinakat jarkʼaqapjje sasaw yatichapjjaraki. Yaqhep jaqenakasti angelanakajj yanaptʼapjjestuwa sasaw amuyapjjaraki. Maysa toqetjja, yaqhep jaqenakajj janiw angelanakan utjatap creyipkarakiti.

¿Angelanakajj utjpachati? ¿Kamsis Bibliajj angelanakatjja? ¿Khitin luratäpjjesa? ¿Jakäwisan yanaptʼapjjestaspati? Uka toqenakat jichhajj yatjjatañäni.