1, 2. ¿Kunjamsa walja jaqenakajj trabajop uñjapjje?

KUNANSA trabaji ukarjamaw maynejj wali wakiskiriti janicha uk amuyasi. Yaqhep markanakanjja, jaqenakajj maynir uñtʼasin akham jisktʼañ yatipjje: “¿Kunansa trabajta?” sasa.

² Diosan servirinakapat yaqhepajj kunsa lurapjjerïna ukwa Bibliajj qhanañchi. Amuytʼañataki, ‘Mateojj impuesto cobrirïnwa’, Simonajj ‘lipʼichinak qoñaptayirïnwa’, ‘Lucasasti qollirïnwa’ (Mat. 10:3; Hech. 10:6, NM; Col. 4:14). Maysa toqetjja, Jehová Diosan servirinakapat yaqhepajj kuna luräwinïpjjänsa ukwa Bibliajj qhanañcharaki. Amtañäni, David chachajj reyïnwa, Eliasajj profetänwa, Pablosti apostolorakïnwa. Uka chachanakajja, Jehová Diosat luräwinak katoqasajj sum phoqañatakiw chʼamachasipjjäna. Jiwasajja, jupanakjamarakiw Jehová Diosat mä luräwi katoqasajj sum phoqañataki chʼamachasiñasa.

3. ¿Kunatsa jilïr jilatanakajj waynanakar yanaptʼapjjañapa? (Aka janankir foto uñjjattʼam).

³ Jehová Diosar servisasa, Jupat luräwinak katoqasas wal  kusistanjja. Uka luräwinakjja kawkhakamatï puedkañäni ukhakamaw phoqañ muntanjja. Ukampis jilïrëjjasajj janiw kunjamtï waynäkasin lurirïkayätan ukham lurirjamäjjtanti (Ecl. 1:4). Ukanakaw kunanaktï Diosan markapan phoqañasäki ukanak jan phoqaykistaspati. Ukhamäkchisa, Diosan suma yatiyäwinakapajj taqe cheqanwa yatiyasiski. Ukatakejj Diosan markapajj Internet toqe, jichhak uñstir aparatonak toqew yanaptʼasi. Ukampis jilïrinakatakejja, ukanak apnaqañajj chʼamakïspawa (Luc. 5:39). Janiw ukakïkiti, chuymankipstasin qaritaw jikjjatasjjapjjaraki (Pro. 20:29, NM). Ukatwa jilïr jilatanakajj waynanakar yanaptʼapjjañapa, ukhamat taman jukʼamp luräwinak katoqapjjañapataki (Salmo 71:18 liytʼañataki).

4. ¿Kunatsa yaqhepatakejj waynanakar jukʼamp luräwinak churañajj chʼamakïspa? (“¿Kunatsa mayninakar yanaptʼañajj chʼamakïspa?” siski uka recuadro uñjjattʼäta).

⁴ Taman walja luräwinakanïpki ukanakatakejja, wayna jilatanakar jukʼamp luräwinak churañajj chʼamakïspawa. Inas luräwinakap jaytasajj llakisipjjchispa, ukhamarus uk jaytañajj jupanakatak chʼamakïspawa. Ukatjja, waynanakajj janiw sum lurapkaspati sasaw llakisipjjaspa. Mayninakar yanaptʼañatakejj janis tiempojj utjkaspa ukhamwa amuyapjjarakispa. Maysa toqetjja, waynanakajj mä luräwi katoqañatak suykasajj paciencianïpjjañapawa.

5. ¿Kuna jisktʼanakarus aka yatichäwin qhanañchaskañäni?

⁵ ¿Kunatsa jilïrinakajj waynanakar jukʼamp luräwinak katoqapjjañapatak yanaptʼapjjañapa? ¿Kunjamsa yanaptʼapjjaspa? (2 Tim. 2:2). Wayna jilatanakajj jilïrinakamp trabajisinsa, jupanakat yateqkasinsa, ¿kunjam chuymanïpjjañapasa? Nayraqatjja, kunjamsa David reyejj templo lurañapatakejj yoqapar yanaptʼäna uk yatjjatañäni.

6. ¿Kunsa Davidajj lurañ munäna, ukat Diosajj kamsänsa?

⁶ Davidajja walja maranakaw jiwayatäñataki arknaqata uñjasïna. Ukhamajj janiw mä cheqanak  jakaskänti. Ukampis reyëjjäna ukhajja, mä suma utanwa jakasjjäna. Ukatwa Natán profetar akham säna: “Uñjam, nayajj cedro maderata lurat palacionktwa, ukampis Tatitun sumankäwi arcapajja mä carpa manqhenkakiwa” sasa. Uka arunakampejja, Davidajj Jehová Diosatak templo lurañ munatapwa uñachtʼayäna, ukatwa profetajj jupar akham säna: “Ukhamajj luramay mäki kuntï amttajja uka, Diosaw jumarojj yanapätam” sasa. Ukampis Jehová Diosajj janiw jupan lurañap munkänti, ukatwa Natán profeta toqejj Davidar akham säna: “Janiw jumajj nayataki mä templo luraykasmati, nayan ukan jakañajjataki” sasa. ‘Janiw jaytkämati’ sasinsa Jehová Diosajj siskchïnjja, Davidan wawanakapat mayniw templo lurañapäna. Uk yatisajj ¿kunsa Davidajj lurpachäna? (1 Cró. 17:1-4, 8, 11, 12; 29:1).

7. Natán profeta toqe Diosan arunakap istʼasajja, ¿kunsa Davidajj luräna?

⁷ Davidajj Jehová Diosatak templo lurañ wal munäna, ukatwa Natán profetar istʼasajj aynachtʼpachäna. Ukhamäkchïna ukasa, templo lurañatakejj kunanakatï munaskäna ukanakampiw Salomonar yanaptʼäna. Sañäni, Davidajj trabajirinakaruw wakichtʼäna, templon lurasiñapatak hierro, cobre, qollqe, qori, madera utjañapatakis yanaptʼarakïnwa. Uka templo lurasitapat khitis jachʼañchatäni uka toqet janiw llakiskänti. Kunjamtï yatktanjja, uka templojj qhepat Salomonan templopa sasin uñtʼatänwa. Amtañäni, Davidajj akham sasaw Salomonar chʼamañchtʼäna: “Jichhasti nayan wawajja, Tatituy jumampïpan Tatit Diosamataki mä templo lurayañamataki, kunjämtï jupajj juman lurayañamataki arski ukhamaru” sasa (1 Cró. 22:11, 14-16).

8. Salomonajj templo lurañatakejj janiw wakichtʼatäkiti sasinjja, ¿kunatsa Davidajj amuyäna, ukat kunsa luräna?

⁸ (1 Crónicas 22:5 liytʼañataki). Davidajj inas akham amuychïna: ‘Salomonajj templo lurañatakejj janiw suma wakichtʼatäkiti’ sasa. Uka templojja, ‘wali jachʼäñapänwa, wali aytatarakïñapänwa’, Salomonasti ‘wawa waynakïskänwa’. Ukhamäkchïnsa, Jehová Diosaw Salomonarojj templo lurañan yanaptʼani sasaw Davidajj confiyäna. Davidajj templo lurañatakejj kunanakan yanaptʼañatï wakiskäna ukanakampiw yanaptʼäna.

9. Waynanakaru jukʼamp luräwinak churasajja, ¿kunatsa jilïr jilatanakajj kusisipjje? Uk mä uñachtʼäwimp qhanañchtʼam.

⁹ Jilïr jilatanakajja, waynanakaru jukʼamp luräwinak churañ wakisitap amuyasajja, janiw aynachtʼapjjañapäkiti. Ak amtapuniñäni, Jehová Diosan markapan yanaptʼañasa, wayna jilatanakaru jukʼamp luräwinaka katoqapjjañapataki yanaptʼañasa wali wakiskiriwa. Uk amuytʼañatakejja mä wawampita mä awkimpit parltʼañäni. Qalltanjja, wawajja kunjamsa awkipajj auto apnaqe ukwa uñji. Marat maratjamasti, kunjamsa autojj apnaqasiñapa ukwa awkejj wawapar yatichi. Tiempompejj auto apnaqañatakiw wawajj licencia apsusjje,  autsa apnaqjjarakiwa. Ukhamäkchisa awkejj yanaptʼaskakiwa, autsa panpachaniw apnaqapjje. Ukampis awkejj jilïrëjje ukhajja, wawapaw auto jilpach apnaqjje. Uk uñjasinjja, ¿awkejj chuym ustʼayasiti? Janiwa, wawapajj kunjamsa autot taqe cheqaru jupar api uk uñjasajj wal kusisi. Jilïr jilatanakajja wayna jilatanakar wakichtʼasajj ukhamarakiw kusisipjje. Cheqas jupanakaw Diosan markapan jukʼamp luräwinak katoqapjjaspa.

10. ¿Moisesajj jachʼañchayasiñti munpachäna?

¹⁰ Yaqhanakar mä luräwi katoqer uñjasajj janiw envidiasiñasäkiti. Moisesat amuytʼañäni, mä kutejj yaqhep israelitanakaw profetar tukupjjäna (Números 11:24-29 liytʼañataki). Josué chachajj janiw taqenin profetäpjjañap munkänti, ukatwa Moisés chachajj jupar akham säna: “¿Kunatsa jumajj naya sapan parlañajjaki muntajja? Tatitojj inas taqpach markaru ajayup churarakispa, ukatsti taqeniw profetanakäpjjaspajja” sasa. Moisesajj jachʼañchayasiñat sipansa, Jehová Diosaw taqenir yanaptʼaski sasaw amuyäna. Ukatjja taqe israelitanakajj mä luräwinïpjjaspa ukwa munarakïna. ¿Jiwasat kamsasirakispasa? ¿Mayninakajj Diosan markapan mä luräwi katoqapjje ukhajj kusisiraktanti?

11. Yaqhanakar jukʼamp luräwinak churañ toqetjja, ¿kamsis mä jilatajja?

¹¹ Jilïr jilatanakat waljaniw Jehová Diosar walja maranak servisipki, jupanakasti wayna jilatanakaruw taman luräwinak katoqapjjañapatak yanaptʼawayapjje. Peter jilatat amuytʼañäni. Jupajj 74 maranakaw Diosar sapürunjam serviski, uka maranakat 35 maranakaw Europa toqenkir mä sucursalan serviskaraki. Walja maranakaw Departamento de Servicio ukan pʼeqtʼirjam yanaptʼawayi. Qhepatjja, jupa lantejj Paul wayna jilataruw uka departamento pʼeqtʼañapatak uttʼayapjjäna, Peter jilataw uka jilatar yanaptʼäna. Uka jilataru jupan luräwip katoqer uñjasajja, ¿Peter jilatajj llakispachänti? Janiwa. Peter jilatajj siwa: “Jukʼamp luräwinak katoqañataki wakichtʼata jilatanak utjatap uñjasajj wal kusista, jupanakasti luräwinakap sum phoqapjje” sasa.

12. ¿Kunsa Rehoboam chachat yateqsna?

¹² Salomonan Rehoboam yoqapajj reyëjjäna ukhajja, kunsa lurañapa uk amuytʼañatakiw jilïri chachanakar jisktʼasïna. Ukhamsa jisktʼaskchïnjja, janiw ewjjtʼanakaparjam lurkänti. Jan ukasti, jupa mita waynanakan ewjjtʼanakaparukiw istʼäna, ukham lurasajj jan walinakanwa uñjasïna (2 Cró. 10:6-11, 19). ¿Kunsa ukat yateqsna? Jiwasat sipan jilïrïpki experiencianïpki ukanakaruw jisktʼasiñasa. Cheqansa, wayna jilatanakajj janiw kunjamtï jilïr jilatanakajj lurapkäna ukhampun lurapjjañapäkiti, ukampis jupanakan ewjjtʼanakap respetapjjañapawa, ewjjtʼanakapajj janis sumäkaspa ukham janiw amuyapjjañapäkiti.

13. ¿Kunjamsa waynanakajj jilïrinakamp yanaptʼayasipjjaspa?

¹³ Awisajja, wayna jilatanakaw experienciani jilïr jilatanakar pʼeqtʼapjje. Ukham lurasin jilïrinakatwa yateqapjjañapa. Peter jilatat parltʼaskakiñäni, Paul jilatajj Peter jilata lanti Betelan mä departamento pʼeqtʼjjäna ukhajja, ¿kunsa lurpachäna? Paul jilatajj siwa: “Mä departamento sum pʼeqtʼañatakisa, lurañanakamp sum phoqañatakisa Peter jilatarojj jisktʼasipuntwa. Ukham lurapjjañapatakiw mayninakar chʼamañchtʼarakta” sasa.

14. Pablompi Timoteomp Diosar servipkäna ukatjja, ¿kunsa yateqsna?

¹⁴ Timoteojj Pablot sipans sullkänwa, ukhamäkchïnsa walja maranakaw Diosarojj junto servipjjäna (Filipenses 2:20-22 liytʼañataki).  Mä kutejja, Pablojj Corintonkirinakar akham sänwa: “Ukatarakwa Timoteor khitanipjjsma. Jupajj Tatit toqenjja mä suma wawajjäkaspas ukhamawa. Jupaw amtayapjjätam kunjämtejj nayajj iyawsirjamajj Cristompi sarnaqkta ukjja, ukhamarak kunjämtejj taqe cheqansa [tamanakanjj] yatichkta uksa” sasa (1 Cor. 4:17). ¿Kunsa uka arunakat amuysna? Pablompi Timoteompejja, Diosarojj juntow servipjjäna, purapatsa yanaptʼasipjjarakïnwa. Pablojja kunanaktï Cristot yateqkäna uk Timoteor yatichañatakejj tiempo apstʼasirakïnwa, Timoteojj uk sum yateqäna. Pablojj Timoteor wal munasïna, Corintonkir jilat kullakanakarojj sum uñjani sasin taqe chuymaw confiyarakïna. Taman sarayapjjañapatak waynanakar yanaptʼkasajja, jilïr jilatanakajj Pablotwa yateqasipjjaspa.

15. ¿Kunjamsa Pablon ewjjtʼanakapajj cambionak utjipan jan aynachtʼañatak yanaptʼistu?

¹⁵ Jichhürunakanjja, Diosan markapan walja cambionakaw utji. Jehová Diosan aka oraqenkir markapajj waliw jiljjattaski. Ukhamätap laykojj jukʼamp cambionakaw utji. Ukanakat yaqhepajj inas vidas mayjtʼaychispa, ukhamanakan uñjasis nayrar sartañajj chʼamakïspawa. Ukatakejj altʼat chuymanïñaw yanaptʼistani, ukatsti jiwasan askisat lupʼiñat sipansa kunanakatï Diosan Reinopa layku lurañasäki uk lurañaw yanaptʼarakistani. Ukhamtï lurañänejja, Diosan markapan mayachtʼatäñäniwa. Pablojj Romankir cristianonakar akham qellqäna: “Taqeniru[w] sapjjsma: jan maynis jupa kipkatjja lupʼpati kuntejj lupʼiñäki ukat jukʼampjja” sasa. Ukat saskakïnwa: ‘Jaqen jañchipan walja partenakaw utji, ukampis taqe ukanakajj janiw mä kasta luräwinikïkiti, ukhamarakiw jiwasanakajj taman wali wakiskirïtanjja’ sasa (Rom. 12:3-5).

16. Jehová Diosan markapan mayachtʼatäñatakisa, sumankañ utjañapatakisa, ¿kunsa sapa maynejj lurañasa?

¹⁶ Jehová Diosan taqe servirinakapaw Diosan Reinopar yanaptʼañasa, kun lurañatï wakiskani uksa lurañasaraki. Jilïr jilatanakajj waynanakaruw yanaptʼapjjañapa. Wayna jilatanakasti, taman luräwinak altʼat chuymampi ukhamarak respetompiw katoqasipjjañapa. Maysa toqetjja, kunayman cambionakan uñjaskasasa jilatanakajj esposanakapan yanaptʼapwa munapjjaraki. Kullakanakajj Priscila kullakatwa yateqasipjjañapa, jupajj Áquila esposoparojj wal yanaptʼäna (Hech. 18:2).

17. ¿Kun lurapjjañapatakis Jesusajj arkirinakapar wakichtʼäna?

¹⁷ Yaqhanakar yanaptʼañjja, Jesusatwa yateqassna. Jesusajj kuna luräwtï aka Oraqen qalltawaykäna uk arkirinakapajj lurasipkakiñapänwa, uk jupajj sum yatïna. Arkirinakapajj pantjasirïpkchïnsa, jupanakaw suma yatiyäwinak taqe cheqan yatiyapjjani sasaw Jesusajj confiyäna (Juan 14:12). Jupajj sumwa arkirinakapar wakichtʼäna, ukatsti ukarjamaw sarapkäna uka markanakan yatiyapjjäna (Col. 1:23).

18. ¿Kunsa jichhürunakan lurasktanjja, ukat kuna luräwsa jutïrin katoqañäni?

¹⁸ Jesusajj jiwatat jaktjjäna uka qhepatjja, jukʼamp luräwinakwa Awkipat katoqäna. “Taqe munañaninakjjaru [...], marka apnaqerinakjjaru, autoridadanakjjaru” chʼamanïnwa (Efe. 1:19-21). Armagedón jachʼa chʼajjwäwi nayras jiwkchiñänejja, Paraison jaktanisin yaqha luräwinak katoqaskakiñäniwa. Ukampis jichhürunakanjja, Diosan Reinopat suma yatiyäwinakwa jaqenakar yatiyasktanjja, Jesusan arkiripar tukupjjañapatakis yanaptʼaskaraktanwa. Ukhamasti, waynanakasa, jilïrinakasa, taqeniw ‘Tatitun luräwipan’ jukʼamp yanaptʼañasa (1 Cor. 15:58).