1, 2. Génesis libronjja, ¿khitinakan jan waltʼayasitapatsa parli, ukat kunatsa ukanakajj Biblian qellqata?

BIBLIAN qellqatäki uka chachanakasa warminakasa jupanakat yaqhepajj jan waltʼayasipjjerïnwa, ¿uk amuytʼirïtati? Génesis libron nayrïr jaljanakapanjja, jupanakat mä qawqhanitwa parli. Sañäni: Caín chachajj Abel jilaparuw jiwayäna (Gén. 4:3-8); Lamec chachasti mä waynan nuwjatajj uka waynaruw jiwayäna (Gén. 4:23); Abraham (Abram) chachan uwij awatirinakapajj Lot sobrinopan awatirinakapampiw jan waltʼayasipjjäna (Gén. 13:5-7); Agar warmisti, Sara (Sarai) warmiruw jiskʼachäna, Sarasti Abraham chachapatakiw colerasirakïna (Gén. 16:3-6); Ismaelajj taqenimpiw jan waltʼayasïna, taqenirakiw jupa conträpjjäna (Gén. 16:12).

² Kunatsa mayninakamp sum apasiñatak chʼamachasiñasa uk amuyañasatakiw taqe ukanakajj Biblian qellqasiwayi. Ukatsti, kunjamsa mayninakamp sumankthapsna uksa amuytʼayarakistuwa. Jupanakajj jiwasjam pantjasirïpjjänwa, ukhamasti sarnaqäwinakapat liytʼañajja, kunjamsa mayninakamp suma apasiñatakejj chʼamachasipjjäna uk amuytʼañatakiw yanaptʼistu. Mayninakamp sum apasipjjatap yatisajja, jiwasajj mayninakamp sum apasiraksnawa. Cheqansa, jupanakjam jikjjatasisajj kunsa lurañasa, kunsa jan lurañasäkaraki ukwa yateqsna (Rom. 15:4).

3. ¿Kunsa aka yatichäwin yatjjatañäni?

 ³ Jehová Diosan servirinakapajj kunatsa ukat kunjamsa jan waltʼäwinak askichañasa ukwa aka yatichäwin yatjjatañäni. Ukatjja jan waltʼäwinak askichañatakisa, mayninakampi ukhamarak Jehová Diosamp sum apasiñatakisa, Biblian kawkïr ewjjtʼanakapas yanaptʼistaspa uksa yatjjatarakiñäniwa.

4. ¿Kunjam amuyunïpjjes akapachankir jaqenakajja, ukat kunjamansa akapachajj uñjasi?

⁴ Supayan utjatapatwa jan waltʼayasiñanakasa, chʼajjwañanakas utji. Sapa mayniw kunatï walïki, jan walïkaraki uk amtaspa sasaw Supayajj Edén jardinan säna (Gén. 3:1-5). Ukham amuyatapatwa jan walinakajj utji. Jaqenakajj munañaparjamakiw sarnaqapjje, jachʼa jachʼaw tukupjje, jupanakatakikiw taqe kuns munapjje, mayninakat sipans jukʼampïñ munapjjaraki. Ukham sarnaqasaw Supayan amuyatapajj walikïkaspas ukham uñachtʼayapjje. Supayajja, mayninakat llakisiñat sipansa, askipak thaqherinakaw amuytʼasirïpjjatap uñachtʼayapjje sasaw amuyi. Ukhamatwa chʼajjwañanakasa, jan waltʼayasiñanakas utji. Ukatwa Bibliajj akham qhanañchi: “Khititejj mäki kunatsa coleraski ukajja, nuwasiñanakwa utjayi, waljanakan pantjasiraki” sasa (Pro. 29:22).

5. ¿Kunsa Jesusajj jan waltʼäwinak askichañatak ewjjtʼäna?

⁵ Jesusajja, munañanakap maysar apanukusin sumankañ thaqhapjjañapatakiw arkirinakapar ewjjtʼäna. Wali Uñtʼat Arstʼäwipanjja, kunjamsa jan waltʼäwinak askichapjjaspa uka toqetwa Jesusajj arkirinakapar ewjjtʼäna. Llampʼu chuymanïpjjañapataki, sumankañ thaqhapjjañapataki, kunanakatï colerasiñar apkaspa uk apanukupjjañapataki, jan waltʼäwinak jankʼak askichapjjañapataki, uñisirinakapar munasipjjañapatakiw ewjjtʼäna (Mat. 5:5, 9, 22, 25, 44).

6, 7. 1) ¿Kunatsa jan waltʼäwinak jankʼak askichañasa? 2) ¿Kunsa Diosan servirinakapajj jisktʼasiñasa?

⁶ Mayninakamp sum apasiñatak jan chʼamachasksna ukajja, Jehová Diosar mayisitasasa, tantachäwinakar saratasasa, yatiyatasasa, mä arunjja Diosar yupaychatasajj inamayakïspawa (Mar. 11:25). Jiwasatï jaqe masisan pantjasitanakap jan perdonksna ukhajja, janiw Jehová Diosan amigopäksnati (Lucas 11:4; Efesios 4:32 liytʼañataki).

⁷ Mayninakan pantjasitanakap perdonañatakisa, jupanakamp sum apasiñatakisa chʼamachasisktanti janicha uk sum amuytʼañasawa. Ukatjja, akham jisktʼasiñasarakiwa: “¿Jilat kullakanakan pantjasitanakap perdonañajj nayatak chʼamakiti? Chuym ustʼayapkchitu ukasa ¿jupanakampi Diosar servisajj kusisitätti?” sasa. Jehová Diosajja, mayninakar perdonapjjaspa ukwa servirinakapat muni. Mayninakar perdonañatï jiwasatak chʼamakïchi ukhajja, Jehová Diosaruw uka toqet mayisiñasa. Jupajja, mayisitasar istʼistaniwa, mayktan uksa churarakistaniwa (1 Juan 5:14, 15).

8, 9. ¿Kunsa chuym ustʼayapjjestu ukhajj lurañasa?

⁸ Taqeniw pantjasirïtanjja. Ukhamasti mayninakajj arsutampisa, luratampisa chuym ustʼayapjjestaniwa (Ecl. 7:20; Mat. 18:7). Ukhaman uñjasisajja, ¿kunsa lursna? Mä kutejja, mä kullakajj pä jilataruw parltʼäna. Kunjamtï kullakajj parlkäna uk istʼasajja, jupanakat maynïrejj chuym wal ustʼayasïna. Kullakajj sarjjäna ukhajja, chuyma ustʼat jilatajj kullak contraw jan walinak parläna. Maynïri jilatajja, kunjamsa uka kullakajj jan walinakan uñjaskasajj Diosar 40 maranak serviwayi ukwa amtayäna. Ukatsti akham sarakïnwa: ‘Kullakajj janiw chuyma ustʼayañ amtampi ukham siskpachätamti’ sasa. Chuym ustʼayasir jilatajja, sum  amuytʼasajj akham sänwa: “Kuntï siskta ukajj cheqawa” sasa. Ukatsti kullakan ukham parlatapsa armjjarakïnwa.

⁹ ¿Kunsa ukat yateqsna? Mayninakajj kun lurasinsa chuym ustʼayapjjestani ukhajja, kunsa lurañäni uk sapa mayniw amtjjañasa. Ukampis munasirïtasat perdonañäniwa (Proverbios 10:12; 1 Pedro 4:8 liytʼañataki). Ukham luratasjja, Jehová Diosajj sum uñji (Pro. 19:11; Ecl. 7:9). Ukhamasti, maynejj jan munasiñampi, jan ukajj jan respetomp uñjkistu ukhajja, akham jisktʼasiñasawa: “¿Janis kunäkaspa ukham uñjiristti? ¿Jan wal luratapat lupʼiskakiñajäspati?” sasa.

10. 1) Lucía kullakat jan walinak parlapkäna ukhajja, ¿kunjamsa jupajj qalltan jikjjatasïna? 2) ¿Biblian kawkïr ewjjtʼapas kullakar yanaptʼäna?

¹⁰ Maynejj arunakampi chuyma ustʼayistaspa ukhajja, janis kunäkaspa ukham amuyañajj chʼamakïspawa. Amuytʼañatakejj Lucía ^[1] sat mä precursorat parltʼañäni. Yaqhep jilat kullakanakajja, kunjamsa yatiyañatakisa, kun lurañatakis tiempo apstʼasïna uk uñjasajj jan wal parlapjjäna. Uk yatisasti kullakajj chuyma wal ustʼayasïna, ukatwa experienciani jilatanakamp parltʼäna. Lucía kullakajj siwa: “Kuntï mayninakajj parlapki uka toqet jan sinti llakisiñatakejja, Bibliarjam ewjjtʼapkitäna ukaw yanaptʼawayitu, ukatsti kunjamsa Jehová Diosajj uñjitu uk amuyañatakis yanaptʼawayituwa” sasa. Kullakarojja, Mateo 6:1-4 (liytʼañataki) qellqataw chʼamañchtʼawayaraki. Uka tʼaqanakajja, Jehová Diosatakjam sarnaqañapajj kunja askisa uk amuyañapatakiw kullakar yanaptʼäna. Kullakajj siwa: “Yatiyatajat jan walinaksa mayninakajj parlapkchejja, Jehová Diosan munañap lurañataki chʼamachasisajj kusisitaw jikjjatasta” sasa. Lucía kullakarojja, ukham amuyañaw mayninakan parlatanakapajj janis kunäkaspa ukham uñjañatak yanaptʼäna.

11, 12. 1) Mä jilatasa jan ukajj mä kullakasa jiwas conträtap amuystan ukhajja, ¿kunsa lurañasa? 2) Abrahamajj sobrinopamp jan waltʼäwi askichkäna ukatjja, ¿kunsa yateqsna? (3 janankir dibujo uñjjattʼam).

¹¹ “Taqeniw walja pantjasïwinak lurtan” (Sant. 3:2). Amuytʼañataki, mä jilataru jan ukajj kullakaru arunakamampi, jan ukajj luratanakamampi chuym ustʼayatam amuyasma ukhajja, ¿kunsa lurasma? Jesusajj sänwa: “Jumatejj altararu ofrenda apkasina amtassta jilamajj mä kunatsa juma conträtapjja, jumajj uka ofrendama altar nayraqatar jaytawayasinjja, jilamampi sumankthapiri saram, ukatsti kuttanim uka ofrendam altaran churañataki” sasa (Mat. 5:23, 24). Jesusan uka arunakaparjamajja, chuym ustʼaykistu uka jilatampi, jan ukajj kullakampiw parltʼañasa. Ukampis janiw jilatana jan ukajj kullakan juchap uñtʼayañatakejj parlañasäkiti, jan ukasti jupampi sumankthapiñ amtampiw parltʼañasa. Cheqansa, jilat kullakanakasampi sumankañaw taqe kunat sipans jukʼamp wakiskirejja.

¹² Abraham chachampi Lot sobrinopampejja, jukʼamp jan walinakaru janïr purtʼasisaw jan waltʼäwinakap askichapjjäna. Panpachaniw uwijanakanïpjjäna. Uwij awatirinakapajj jupanakkamaw chʼajjwapjjäna, inas awatipjjañapäkäna uka oraqjjat chʼajjwapjjchïna. Sumankañatakejja, Abrahamajj akham sasaw sobrinopar säna: ‘Kawki cheqarus sarjjañ munta uk ajllisim’ sasa (Gén. 13:1, 2, 5-9). Abrahamajj munañap thaqhañat sipansa sumankañwa thaqhäna. Ukajj jiwasatak wali yateqaskayawa. Abrahamajja, ¿ukham luratapat jan walinti uñjasïna? Janiwa. Sobrinopampi jan waltʼayasipkäna ukhat mä qawqha tiemporojja, Jehová Diosajj wal bendisïma sasaw Abrahamar säna (Gén. 13:14-17). Diosajja, jan waltʼäwinak sumat askichirinakarusa, Biblian  ewjjtʼanakaparjam sarnaqerinakarusa, janiw wiñayatak jan waltʼäwin uñjasiykaniti. ^[2]

13. 1) Jachʼa tantachäwin mä departamento sarayiri jilatajja, ¿kunsa mä jilatan jan parlañ munatapat luräna? 2) ¿Kunsa uka experienciat yateqsna?

¹³ Jichha tiempon Diosar serviri mä jilatat parltʼañäni. Juparojja, mä jachʼa tantachäwin mä departamento sarayañapatakiw uttʼayapjjäna. Mä urojja, uka jilatajj yaqha jilataruw yanaptʼa mayiñatak telefonot jawsäna. Uka jilatasti janiw istʼañ munkänti telefonopsa jiwayasïnwa. Amuyatajja, nayrïr sarayiri jilatampiw chuym ustʼatäna. Jawskäna uka jilatajja, janis kunäkaspa ukhamsa uñjkchïnjja, mä hora pasatat wasitampiw jawsäna. Jupanakajj janiw uñtʼasipkänti, ukhamajj jan waltʼäwi askichañatakejj jikisipjjañapaw wakisïna. Ukatwa mä semana qhepat mä Tantachasiñ Utan jikisipjjäna. Ukansti, oración lurasajj mä horaw parlapjjäna. Ukatsti, kunatsa chuyma ustʼatäna uksa jilatar yatiyarakïnwa. Departamento sarayiri jilatasti, jupar sum istʼasajj Bibliatwa mä qawqha qellqatanak liytʼarapïna. Ukhamatwa jan waltʼäwi askichapjjäna, jilatas departamento sarayirirojj yanaptʼjjarakïnwa. Jichhajja, kunjamsa departamento sarayirejj pacienciampi ukhamarak munasiñamp jupar istʼäna uk amtapuniwa.

14, 15. 1) Mateo 18:15-17 qellqatan jikjjataski uka ewjjtʼanakajja, ¿kuna jan walinak askichañatakis yanaptʼistaspa? 2) Maynejj kuna jan wals luristani ukajja ¿kunanaksa askichañatakejj lurañasa, ukat kuna amtampis ukanak lurañasa?

¹⁴ Maynimp jan waltʼayasiña utjani ukhajja, jan khitir yatiyasaw jan waltʼayasktan ukampejj askichañasa. Ukampis awisajja, irpir chuymaninakar yatiyañaw wakisispa (Mateo 18:15-17 liytʼañataki). Jiwasar chuym ustʼayiritï Jesusan ewjjaparjamajj jan istʼañ munkistani, testigonak irpkañäni ukhas jan istʼkani, ni irpir chuymaninakarus istʼkaniti ukhajja, ¿kun lurañas  wakisispa? Jesusajj sänwa: “Jan Diosar iyawskis ukhamaru uñj-jjapjjam, jan ukajj impuesto cobrir uñisita [jaqerjama]” sasa. Jichhürunakanjja, ukajj tamat jaqsuñampi sasispawa. Maynirojja, janiw maynimp aleq jan waltʼayasitap laykukejj ukham lurasiñapäkänti, jan ukasti Jesusan arunakaparjamajj aka pä toqetwa phoqasiñapäna: 1) Maynejja jan waltʼayaski jupampikiw askichañapäna, ukampis 2) sinti jan walïtap laykojj juchapunëjjchi ukhajja, tamatwa jaqsusiñapäna. Uka juchanakajja, maynir jan waltʼayañatak amtampi kʼarintaña, maynin askipak thaqhasina maynir engañjaña (fraude) ukanakäspawa. Maynejj uka juchanak lurchi ukhakiw mä jan waltʼäwejj Jesusan ewjjtʼaparjam askichasiñapa. Uka juchanakajja, janiw wachoq jucha, chacha pura jan ukajj warmi pura sarnaqaña, Diosan markap contra saytʼaña, jan ukajj kʼari diosanakar yupaychaña uka juchanakjamäkiti. Ukanakasti irpir chuymaninakan uñjatäñapawa.

¹⁵ Jesusan ewjjtʼapajja, jilatasaru jan ukajj kullakasaru munasiñamp yanaptʼañatakiw yanaptʼistu (Mat. 18:12-14). Jupanakajj chuym ustʼayapjjestani ukajja, jan khitir yatiyasakiw panisaki parltʼañasa. Ukatakejja inas jupamp walja kuti parlañajj wakischini. Ukham lurasatï jan waltʼayasitas jan askichkañäni ukajja, paninimpi jan ukajj maynimpiw sarañasa, jupanakasti cheqapunit jucha luratajj utji janicha uk qhanstayañatakiw yanaptʼapjjestani. Jupanakan yanaptʼatäsajj jan waltʼayasitas askichjjañäni ukajja, ‘jilatasampejj sumankthapjjtanwa’. Ukampis jan wal lurkistu uka jilataru jan ukajj uka kullakaru yanaptʼañatakejja, walja kuti chʼamachaskasas jan istʼkchistu ukhakiw irpir chuymaninakar yatiyañasa.

16. 1) ¿Kunjamsa Jesusan ewjjtʼapajj jan waltʼäwinak askichañatak yanaptʼistaspa? 2) Jan waltʼäwinak Jesusan ewjjtʼaparjam askichasajja, ¿kunjamsa munasirïtas uñachtʼaytanjja?

¹⁶ Jan waltʼäwinakapjja, yaqhep jilat kullakanakajj jankʼakiw askichapjje. Janiw Mateo 18:15-17 qellqatan utjki uka kimsa ewjjtʼarjamajj tamat jaqsuyasiñkam puripkiti. Pantjasitapat amuyasisajja, jan wali luräwinak jaytanukjjapjjewa. Ukhamasti, chuyma ustʼayasirejja uk amuyasajj maynin pantjasitap perdonjjewa, janirakiw jukʼampis uka toqet parljjeti. Ukhamasti, mä jilatatï jan ukajj mä kullakatï jan wal luristani ukhajja, nayraqat jupampiw jan khitir yatiyas parltʼañasa, janiw jankʼakejj irpir chuymaninakar yatiyañasäkiti. Ukatsti, paninimpi jan ukajj maynimpiw jupamp parltʼañatakejj sarañasa. Ukampis maynin jan wali luratapajj qhanächi ukhakiw irpir chuymaninakarojj yatiyañasa.

17. ¿Kunatsa mayninakamp sum apasiñatak chʼamachasiñasa?

¹⁷ Akapachanjja kunjamats pantjasipuniñäniwa, mayninakarus chuym ustʼayarakiñäniwa. Discípulo Santiagojj akham sänwa: “Maynitejj arsutapanjja jan pantjaskchejja, ukajj cheqa jaqewa, taqe janchipsa frenompjamarakiw apnaqe” sasa (Sant. 3:2). Maynimp jan waltʼayasiñäni ukhajja, sumankthapiñatakiw chʼamachasiñasa (Sal. 34:14). Ukhamtï lurañäni ukhajja, taqenimpiw sum apasiñäni, tamansa mä wawakiw jakasiñäni (Sal. 133:1-3). Taqe kunat sipansa Jehová Diosampiw sum apasiñäni (Rom. 15:33). Ukhamasti, taqeniw jilat kullakanakasampisa Jehová Diosampis sum apassna, ukatakejja, jan waltʼäwinakasjja munasiñampiw askichañasa.