Mariatakisa Raúl ukhamarak Arne chachatakisa yaqhanakatakisa, oracionajj mä suma regalowa. Oraskasajj Diosampis parlapkaspa ukhamwa amuyasipjje, orasisaw jupar yuspärapjje, yanaptʼaps thaqapjjaraki. Kuntï Bibliajj Diosar orasiñat siski ukhamwa jupanakajj amuyapjjaraki. Biblian akham siwa: “Jiwasanakajj janiw jupat pächasktanti, jiwasatï munañaparjam kunsa mayiñäni ukhajja, jupajj istʼistaniwa” sasa (1 Juan 5:14).

Ukampis walja jaqenakajja, kuntï Bibliajj oración toqet siski uk janiw creyipkiti. Steve chachajj akham siwa: “17 maranïkayäta ukhajja, kimsa amigonakajaw jiwawayapjje, maynejj autompi accidentasisaw jiwawayi, paninisti lamar qotan jiwawayapjjaraki” sasa. Ukhaman uñjasisajj ¿Steve chachajj kamachänsa? Jupajj akham saskakiwa: “‘Kunatsa uka  jan walejj pasawayi’ sasinsa Diosar oraskchiyätjja, jupajj janiw contestankitänti. Ukatwa Diosar inamayaki orasiskataj amuyjjayäta” sasa. Waljaniw jupjam amuyasajj ‘Diosar mayisiñajj inamayakiwa’ sasin amuyjjapjjaraki.

Yaqhepanakajj orasiñat parlasajj akham sapjjarakiwa: “Diosajj taqe kunwa yati, kuna jan walinakansa uñjastan, kunanaksa necesittan ukanaks yatirakiwa, ukhamajj jupar yatiyañajj janiw wakisjjeti, inamayakiwa” sasa.

Yaqhepasti jan walinakwa nayrajj lurapjjäna, ukatwa ‘Diosajj janiw oracionanakaj istʼkaniti’ sasin amuyapjjaraki. Jenny warmejj akham siwa: “Nayrajj jan walinakwa lurtjja, ukanakat wal arrepentisirakta, ukampis janis kunatak sirvkirista ukhamaw amuyasta. Ukatwa oracionanakaj Diosamp istʼayasiñatakejj janis walïkirista ukham amuyasta” sasa.

¿Jumajj jupanakjamarakit oración toqet amuyta? Ukhamächi ukhajja, Bibliajj uka toqet sumwa qhanañchtʼiristam. Kuntï oración toqet Bibliajj siski uka arunakar confiyasmawa. * Bibliajj aka jisktʼanakar qhanañchañatakiw yanaptʼätam:

• ¿Diosajj cheqapunit oracionanak istʼi?

• ¿Kunatsa yaqhep oracionanak jan contestki?

• ¿Oracionanakas istʼañapatakejj kunjamsa orasiñasa?

• ¿Kunjamsa orasiñajj yanaptʼiristam?