Ukhamächi ukhajja, yaqha warmimp casarasisaw mä chachan nayra matrimoniopajj tukusjje. Qhepa matrimoniopajj walikïskiwa sasaw congregacionankirinakajj amuyapjjañapa. Kunatsa ukham sistan uk amuytʼañatakejja, divorciasiñatsa mayamp casarasiñatsa Jesusajj kamsänsa uk yatjjatañäni.

Kuna razón utjipanaksa Bibliarjamajj maynejj divorciasispa uka toqetjja, Jesusajj Mateo 19:9 textonwa qhanañchäna, ukan akham siwa: “Khititejj jan qʼañu jucha utjkipan warmipat divorciaski, ukatsti yaqhampi casaraski ukajja, adulterio juchwa luri” sasa. Jesusan uka arunakapat akanakwa yateqsna: 1) Bibliarjamajja qʼañu jucha utjipanakwa maynejj divorciasispa, 2) mä chachatejj jan Bibliarjam divorciaskchi, yaqha warmimp casarasirakchi ukhajja, adulterio jucha luraski. a

¿Jesusan arunakapajj kamsañsa munaskäna? Mä casado chachatï qʼañu jucha lurchi, divorciasirakchi ukhajja, ¿Bibliarjamajj mayamp casarasiñatakejj librëjjeti? Janiw ukhamapunïkaspati. Chachasa jan ukajj warmis adulterio jucha lurchi ukhajja, jan juchanïki ukaw perdonaniti jan ukajj janich perdonkani uk amtjjañapa. Jan perdonkani, leyinakarjam divorciasirakini ukhajja, divorcio tramitenak tukuyjjasajj wasitat casarasiñatakejj panpachaniw librëjjapjje.

Maysa toqetjja, jan juchanïki ukajj janiw divorciasiñ munkaspati, esposopar perdonañsa munarakispawa. Ukampis adulterio jucha luriritejj perdonämaw satpachas divorciasiñ munapunchi, jupa sapaki leyinakarjam divorciasirakchi ukhajja, ¿kunas lurasispa? Niyakejjay warmejj perdonañ munchejja, janirak divorciasiñ munkchitejja, chachajj Bibliarjam mayamp casarasiñatakejj janiw librëkiti. Chachatejj Bibliarjam janipun lurañ munkchi, casarasiñatak Bibliarjam jan librëkasas yaqhamp casaraschi ukhajja, mayampiw adulterio jucha lurjje. Ukhamächi ukhajja, congregacionankir ancianonakajj uka jucha uñjañatakejj yaqha comité judicial uttʼayapjjañapa (1 Cor. 5:1, 2; 6:9, 10).

Mä chachatejj casarasiñatak Bibliarjam jan librëkasas mayamp casaraschi ukhajja, ¿kunjamsa nayra matrimonioparusa jichha matrimonioparus congregacionankirinakajj uñjapjje? ¿Bibliarjamajj nayra matrimoniopajj janit tukuyki? ¿Jan juchanïki ukajj nayra esposopar perdonañsa jan ukajj jan perdonañsa amtaspati? ¿Machaq matrimoniorojj adulterio jucha luririnakarjamat uñjasiñapa?

Jichhakamajja machaq matrimoniorojj adulterio jucha luririnakarjamaw congregacionankirinakajj uñjapjjäna. ¿Kunatsa? Kuna laykutejj jan juchanïki ukajj jakaskiwa, janirakiw yaqhamp casaraskiti, ni qʼañu juchsa lurkiti. Jesusajj divorciasiñampita mayamp casarasiñampit parlkäna ukhajja, janiw jan juchanïki ukat aytkänti, jan ukasti mä chachatejj jan Bibliarjam divorciasini, yaqhamp casarasirakini ukhajja, adulterio jucha luri sasaw jupajj qhanañchäna. Ukhamajj adulterio  jucha lurañamp saski uka divorciompi uka machaq matrimoniompiw nayra matrimoniorojj tukusiyjje.

Kunapachatï maynejj divorciasisina, yaqhamp casarasisin matrimoniop tukuyjje ukhajja, jan juchanïki ukajj janiw perdonañsa, jan perdonañsa amtjjaspati. Ukhamajj jan juchanïki ukajj janiw ukat llakisjjañapäkiti. Jupatï jakaskchi, janirak yaqhamp casaraskchi, ni qʼañu juchsa lurkarakchi ukhajja, janiw ukarjamajj congregacionankirinakajj machaq matrimoniorojj uñjapjjañapäkiti. b

Qalltan parltʼaniwayktan ukarjamajja, esposow adulterio jucha luri, ukatwa divorciojj utjawayi. Ukampis jupatï adulterio jucha jan lurasin divorciasispa, mayamp casarasispa ukhajj ¿kunas pasaspa? Jupatï janïr divorciaskasin qʼañu jucha jan lurkchi, jan ukasti divorciasjje uka qhepat qʼañu jucha lurchi, ukat esposapan perdonämaw satpachas mayamp casaraschi ukhajj ¿kunas pasaspa? Niyakejjay divorciosa, machaq matrimonios adulterio jucha lurañamp saschejja, nayra matrimoniojj ukjaruw tukusjje, machaq matrimoniojj leyirjamajj walikïskiwa. La Atalaya 15 de febrero, 1980 revistanjja, página 30 ukan akham sasaw qhanañchäna: “Mayamp casarasir jaqejja, janiw uka matrimoniop aleq ukhamatak tukuykaspati, nayra esposapampis kuttʼkarakispati. Kuna laykutejj nayra matrimoniopajj divorciompi, adulterio juchampi, mayamp casarasiñampiw tukusjje” sasa.

Aka yatichäwin aka toqet sum qhanañchtʼasitapatjja, matrimoniojj janis sagradöjjaspa, adulterio jucha lurañajj janis jachʼa juchäjjaspa ukham janiw amuyañasäkiti. Mä chachatï Bibliajj siski ukar jan istʼas esposapat divorciaschi, casarasiñatak jan librësin yaqhamp casarasirakchi ukhajja, ancianonakajj mä comité judicial uttʼayapjjañapa, kuna laykutejj adulterio jucha luri. (Uka chachan esposapatï cristianächi ukhajja, yaqha comité judicial uttʼayapjjañaparaki, kuna laykutejj adulterio juchwa luraraki). Machaq matrimoniorojj janis adulterio jucha luririnakarjam uñjkchiñänejja, chachajj walja maranakajj janiw congregacionan privilegionak katoqkaspati. Ukanak mayamp katoqjjañapatakejja, kuntï lurawayki uk jaqenakan armapjjañap suytʼañaw wakisispa. Maysa toqetjja, janïr privilegionak churkasajja, traicionawayki uka nayra esposapasa, jaytawayki uka wawanakapas kunjamäsipkisa ukanak amuytʼañaw wakisirakispa (Mal. 2:14-16).

Divorciasisasa, jan Bibliarjam mayamp casarasisas kuna jan walinakansa maynejj uñjasispa uk amuytʼasajja, Jehová Diosat yateqasisaw matrimonior wali sagradot uñjañasa (Ecl. 5:4, 5; Heb. 13:4).