1. ¿Kunsa walja jilat kullakanakajj lurapjje, ukat kunatsa ukham lurapjje?

 JICHHÜRUNAKANJJA walja jilat kullakanakaw Diosar jukʼamp serviñatak wal chʼamachasipjje. Waljaniw solteröñ amtapjje. Yaqhep casadonakajj jan wawanïñwa amtapjje. Walja familianakajj kunanakatï wakiski ukampik jakañwa amtapjjaraki. Ukanak lurasajj kusisitaw jakasipjje, ‘kunatï jakañatak wakiski uksa Diosaw churistani, Jupajj janiw jaytanukkistaniti’ sasaw confiyapjje. ¿Kunatsa jiwasajj ukham confiyaraktanjja? Diosajj nayra servirinakaparojj sum cuidäna. Amuytʼañataki, ‘Diosar confiyapki ukanakan awkipäki’ uka Abrahán chacharojj bendisïnwa (Rom. 4:11).

2. 1) Hebreos 11:8-10, 16 textorjamajja, ¿kunatsa Abrahanajj Ur markat sarjjañ amtäna? 2) ¿Kunsa aka yatichäwin yatjjataskañäni?

² Abrahanajja, kunanakatï Ur markan sum jakasiñatak utjkäna ukanak taq jaytäna. ¿Kunatsa ukham luräna? “Abrahanajja kawkïr markatejj cheqpach cimientonïki uka markwa suyäna” (Hebreos 11:8-10, 16 liytʼañataki). ¿Kunas uka markajja? Uka marka utjañapkamajja, ¿kuna jan walinakansa Abrahanajj uñjasïna? ¿Kunjamsa jiwasajj Abrahanatsa, jichhürunakan jupat yateqasisin sarnaqapki ukanakatsa yateqassna? Uka jisktʼanakaruw aka yatichäwin qhanañchaskañäni.

3. ¿Abrahanajj suykäna uka markajj kunasa?

³ Abrahanajj suykäna uka markajj Diosan Reinopawa, Jesucristompi 144.000 ajllitanakampiw uka Reinonkapjje. Apóstol Pablojja, uka Reinojj ‘jakkir Diosan markapawa, mä arunjja  alajjpachankir Jerusalenawa’ sasaw säna (Heb. 12:22; Apoc. 5:8-10; 14:1). Jesusasti uka Reinon jutañapatakiw arkirinakapar mayisiñ yatichäna, ukhamat Diosan munañapajj alajjpachansa aka oraqensa lurasiñapataki (Mat. 6:10).

4. Génesis 17:1, 2, 6 textorjamajja, Diosajj arskäna uka markata, mä arunjja Reinot ¿kunsa Abrahanajj yatïna?

⁴ Diosan Reinopajj kunjam organizatäñapänsa uk janiw Abrahanajj sum yatkänti. Walja tiempow ukajj ‘Diosan imantat amtapäna’ (Efes. 1:8-10; Col. 1:26, 27). Ukampis jupat jutiri yaqhep wawanakapajj reyinakäpjjañap yatïnwa, Jehová Diosaw ukhamäñapatak jupar mä promesa arsüna (Génesis 17:1, 2, 6 liytʼañataki). Diosan promesanakaparojj Abrahanajj wal confiyäna, Diosan Reinopan reyïñapäkäna uka Ajllitaru, mä arunjja, Mesiasar niyas uñjkaspa ukhamwa amuyäna. Ukatwa Jesusajj judionakar akham säna: “Jumanakan Abrahán awkimasti, nayan uruj uñjañ suykasajj wal kusisïna. Ukjja uñjänwa, kusisirakïnwa” sasa (Juan 8:56). Ukhamasti Abrahanajja wawanakapat yaqhepajj Jehová Diosan Reinopankapjjañap yatïnwa, Diosarojj uka promesap phoqañapkam suyañatakis listokirakïnwa.

5. Abrahanajj Diosan uttʼayat markapwa suyäna, ¿kunjamatsa uk yattanjja?

⁵ ¿Kunjamsa Abrahanajj Diosan uttʼayat markapa, mä arun Diosan Reinop suyatap uñachtʼayäna? Abrahanajj janiw akapachankir reinonakan markachiripar tukkänti, janiw mä cheqan utjanoqañsa, ni mä reyir yanaptʼañsa amtkänti. Janirakiw jupatak mä reino uttʼayañ amtkänti. Jan ukasti Jehová Diosar istʼasapuniw sarnaqäna, promesap phoqañapwa suyarakïna. Ukham lurasaw Diosar wal confiyatap uñachtʼayäna. Jichhajj kuna jan walinakansa uñjasïna, kunsa jupat yateqassna uk uñjañäni.

6. ¿Ur markajj kunjamänsa?

⁶ Abrahanajj Ur markatwa sarjjäna, uka markajj suma jarkʼaqatänwa, taqe kunanïnwa, jaqenakas wali yatjjattʼatänwa, wali qollqenïpjjarakïnwa. Uka markajj jachʼa perqanakampi muyuntatänwa, umani wali manqha canalanakampi kimsa toqet jarkʼaqatänwa.  Ur markankirinakajj qellqañ toqetsa, matemática toqets wali yatjjattʼatäpjjänwa. Ur markan negocionak wal lurapjjerïna, ¿kunatsa ukham sistan? Arqueologonakajj negocionak toqet parlir documentonakwa jikjjatapjjäna. Utanakas ladrillot luratänwa, perqanakapas yesompi kʼachachtʼatänwa. Yaqhep utanakajj 13 jan ukajj 14 cuartonakanïnwa, pationakapas empedratänwa.

7. ¿Kunatsa Abrahanajj ‘Jehová Diosaw cuidapjjetani’ sasin confiyañapäna?

⁷ Abrahán chachajja ‘Jehová Diosaw nayarusa familiajarus cuidapjjetani’ sasin ¿kunatsa confiyañapäna? Familiapampejj Ur markan suman jakaskasajja, carpanakana ukhamarak Canaán oraqen wasar pampanakan jakiriw sarjjäna. Canaán oraqen janiw jachʼa perqanakasa, ni umani manqha canalanakas jarkʼaqasiñatak utjkänti. Ukhamajj enemigonakajj facilakiw jan waltʼayapjjaspäna.

8. ¿Kuna jan walinakansa Abrahanajj uñjasïna?

⁸ Abrahanajj Diosan munañapsa lurkchïnjja, Canaán oraqen machʼajj utjkäna ukhajj jupasa familiapas manqʼat pistʼapjjarakïnwa. Ukhaman uñjasisajj Egipto markaruw familiapamp jakir sarjjapjjäna. Egiptonsti faraonaw Sararojj warmipäñapatak irpasjjäna. Ukampis Jehová Diosaw faraonar castigäna, ukhamatwa faraonajj Abrahanar warmip kuttʼayjjäna. Ukañkamajj Abrahanajj wal llakispachäna (Gén. 12:10-19).

9. ¿Kuna jan walinakas Abrahanan familiapan utjäna?

⁹ Abrahanan familiapajj jan walinakanwa uñjasïna. Sara munat esposapajj janiw wawanïñ puedkänti, ukaw jupanakar walja maranak llakisiyäna. Wawanïñ jan puedesajja, Sarajj Agar sirvientaparuw Abrahanan esposapäñapatak churäna. Ukhamatwa Abrahanampi Sarampejj Agar warmi taypi wawanïpjjaspäna. Ukampis Agarajj usurëjjäna ukhajja Sararojj uñisjjänwa. Ukham jan walin uñjasisajja, Sarajj Agar warmir jiskʼachasinwa escapayjjäna (Gén. 16:1-6).

10. ¿Kunanak pasipansa Diosar confiyañajj Abrahanatak chʼamakïna?

¹⁰ Tiempompejja, Sarajj usuriptjjänwa, ususkäna uka wawarojj Isaac sasaw Abrahanajj sutiyäna. Abrahanajj Ismaelampiru Isaacampirojj wal munasïna. Ukampis Ismaelajj Isaacarojj jiskʼachänwa, ukatwa Abrahanajj Ismaelampiru Agarampiru khitanukjjäna (Gén. 21:9-14). Qhepatjja Diosajj Isaacaru sacrificiot churañapatakiw Abrahanar mayïna (Gén. 22:1, 2; Heb. 11:17-19). Ismaelar khitanukkäna ukhasa, Isaacar sacrificiot loqtañapäkäna ukhasa, Abrahanajj ‘kuntï wawanakajat Jehová Diosajj arsuwayki uk phoqaniwa’ sasaw confiypachäna.

11. ¿Kunatsa Abrahanajj Diosar pacienciampi suyäna?

¹¹ Abrahanajj pacienciampiw Diosan promesap phoqasiñap suyäna. Familiapampi Ur markat sarjjapjjäna ukhajja, inas 70 marats jilanëjjchïna (Gén. 11:31-12:4). Ukatjja, niya patak maraw carpanakan jakäna, Canaán oraqnamwa viajirakïna. 175 maraniw Abrahanajj jiwjjäna (Gén. 25:7). Ukampis Jehová Diosajj ‘Canaán oraqejj wawanakamar churatäniwa’ siskäna uka promesa phoqasir janiw uñjkänti. Janirakiw Diosan Reinopajj apnaqjjañapäkäna uksa uñjkänti. Walja jan walinakansa uñjaskchïnjja, Abrahanajj taqe chuymaw Diosar confiyaskakïna, promesap phoqañapsa kusisitaw suyaskakïna. ¿Kunas aguantañatak yanaptʼäna? Jehová Diosaw Abrahanarojj jan walinakat jarkʼaqäna, amigoparjamaw uñjarakïna (Gén. 15:1; Is. 41:8; Sant. 2:22, 23).

12. 1) ¿Diosan servirinakapajj kunsa suyasktanjja? 2) ¿Kunsa jichhajj yatjjataskañäni?

¹² Jiwasajj Abrahanjamarakiw kawkïr markatejj  cheqpach cimientonïki uk suyasktanjja. Ukampis janiw uka marka uttʼayasiñap suyktanti, kunattejj Diosan Reinopajja 1914 maranwa uttʼayasiwayjje. Uka Reinojj alajjpachan apnaqjjewa (Apoc. 12:7-10). Aka oraqen apnaqjjarakispa ukwa suyasktanjja. Ukañkamasti kuna jan walinakantï Abrahanas Saras uñjasipkäna ukhamanakanwa uñjasirakiñäni. Jichha tiempon ¿Abrahanat yateqasis sarnaqerinakajj utjarakiti? Jïsa. Walja jilat kullakanakan experiencianakapajj Yatiyañataki revistan qellqatawa. Jupanakajj Abrahanampit Sarampit yateqasisaw Diosar taqe chuyma confiyasipki, pacienciampirakiw Diosar suyasipki. Uka experiencianakat mä qhawqha uñjañäni, kunsa yateqassna ukwa amuytʼarakiñäni.

13. ¿Kunsa Bill Walden jilatan experienciapat yateqsna?

¹³ Diosar jukʼamp serviñatakejj kunayman sacrificionakwa lurañasa. Diosan Reinop nayrar uchañ munstan ukhajja, Abrahanatwa yateqasiñasa, Diosar kusisiyañatakejj kunanak jaytañay wakischini ukanak jaytañatakejj listokïñasarakiwa (Mat. 6:33; Mar. 10:28-30). Bill Walden jilatan experienciap uñjañäni. * 1942 maranjja, ingenierjamaw universidadat niya graduasiñampïskäna. Ukhaw Jehová Diosan Testigonakapampi Bibliat yateqañ qalltäna. Mä profesorapaw trabajo thaqarapïna, ukhamat universidadat mistjjasin trabajonïñapataki. Ukampis Bill jilatajj uka trabajo janiw katoqaskänti. Jehová Diosar jukʼamp serviñ laykuw uka suma pagat trabaj jan katoqaskänti. Uka qhepatjja, cuartelar mantañapatakiw jawsayapjjäna. Jan sarañ munatapatjja, walja qollqempiw multapjjäna, phesqa maratakiw carcelar llawintapjjarakïna. Ukampis kimsa maratwa carcelat antutjjapjjäna. Tiempompejja, Galaad Escuelaruw invittʼapjjäna, ukatjja misionerotwa África cheqar servir khitapjjäna. Bill jilatajj Eva kullakampiw casarasïna, ukatjja panipaw África cheqan sirvjjapjjäna, ukan serviñajj janiw faciläkänti. Mä qhawqha maranakatjja, jilatan mamitapar cuidañatakiw  Estados Unidos markar kuttʼjjapjjäna. Jupajj akham siwa: “Jehová Diosarojj 70 maranak jilaw serviwayta, uk amtasajj wal kusista. Diosajj Jupar phoqatpacha serviñatak yanaptʼawaykitu ukatsa walrak yuspärta” sasa. Diosar jukʼamp serviñatakejj ¿jumajj Bill Walden jilatjam chʼamachasirakismati?

14, 15. ¿Kunsa Aristotelis jilatampina esposapampin experienciapajj yatichistu?

¹⁴ Diosar serviñan jan walinakajj utjakipuniniwa. Jehová Diosar phoqatpacha serviri jilat kullakanakas jan walinakan uñjasipjjarakiniwa, ukwa Abrahán chachan sarnaqäwipat yateqtanjja (Sant. 1:2; 1 Ped. 5:9). Ukaw Aristotelis Apostolidis jilatarojj pasäna. * Jilatajj 1946 maranwa Grecia markan bautisasïna. 1952 maransti Eleni kullakampi casarasiñatakiw parläna, kullakajj jupjamarakiw Jehová Diosar jukʼamp serviñ munäna. Ukampis kullakajj usuntänwa, pʼeqen mä tumoranïtapwa doctoranakajj yatiyapjjäna. Operasajj uka tumor apsupjjänwa, ukampis casarasipkäna uka qhepat mayampiw uka tumorajj uñstäna. Mayampi operapkäna ukhajja, cuerpopan mä cheqajj janiw onjjtjjänti, janirakiw sum parlañsa puedjjänti. Uka tiempon gobiernojj Testigonakar arknaqkchïnsa, kullakajj usutpachas taqe chuymaw predicaskakïna.

¹⁵ Aristotelis jilatajj 30 maranakaw esposapar cuidäna. Uka tiempon jilïr irpiritwa servïna, comités de asambleas ukanakanwa yanaptʼarakïna, mä Salón de Asambleas lurasiñapatakis yanaptʼarakïnwa. 1987 maranjja, esposapajj predicaskäna ukhajj hierrot lurat mä punkuw jistʼkattasin khämar jaqtäna. Kimsa maranakaw ikiñan jaqontatäna, chuymapakiw jakaskäna, qhepatsti kullakajj jiwjjänwa. Aristotelis jilatajj akham siwa: “Vidajanjja, kunayman jan walinakanwa uñjasiwayta. Ukanakat yaqhepajj mä akatjamatwa pasäna. Ukhamajj jan aynachtʼañataki, aguantañatakejj wal chʼamachasiñajänwa. Uka jan walinakan aguantañatakejj Jehová Diosaw chʼamapamp yanaptʼawayitu” sasa (Sal. 94:18, 19). Jan walinakan uñjaskasas Diosar serviskakiñatak chʼamachasipki  ukanakarojja, Jehová Diosajj wal munasi.

16. ¿Kamsasas Nathan Knorr jilatajj esposapar chʼamañchtʼäna?

¹⁶ Kuntï jutïrin katoqkañäni ukwa lupʼiñasa. Abrahanajja, kuntï Diosat jutïrin katoqkani ukanakatwa lupʼirïna, ukatwa jan walinakan uñjasisajj aguantäna. Audrey Hyde kullakajja, ukham lurañatakiw chʼamachasirakïna. Nathan Knorr sat nayrïr esposopajj cancerampiw jiwäna. Glenn Hyde sat payïri esposopajj Alzheimer usumpiw tʼaqesirakïna. * Kuntï Nathan Knorr jilatajj siskäna ukaw aguantañatak kullakar yanaptʼäna. Janïr jiwkasajj akham sasaw kullakar sawayäna: “Jiwjjasajj Diosat kuntï katoqañ suyktan uk jutïrin katoqañäniwa, janirakiw mayamps usuntjjañäniti” sasa. Ukatjja akham sarakïnwa: “Kuntï jutïrin katoqkañäni uk lupʼiñamapuniwa, ukankiw premiomajja” sasa. Ukatsti saskakïnwa: “Mayninakar yanaptʼañatak chʼamachasipunim. Ukaw kusisit jakasiñatak yanaptʼätam” sasa. Jichhürunakansa uka arunakajj wali yanaptʼkiriwa. Ukhamajj mayninakaru yanaptʼañatakejj wal chʼamachasiñäni, kuntï jutïrin katoqkañäni ukatsa wal lupʼirakiñäni (Rom. 12:12).

17. 1) Jutïrit lupʼiñatakejj ¿kuna razonanakas utji? 2) Kunatï Miqueas 7:7 texton qellqatäki ukajja, ¿kunjamsa jutïrin bendicionanak katoqañatak yanaptʼistani?

¹⁷ Nayrat sipansa jichhürunakan jukʼamp razonanakaw kuntï jutïrin katoqkañäni ukat lupʼiñatak utji. Kunatï oraqpachan pasaski ukanakajj qhep qhepa urunakan jakaskataswa uñachtʼayi. Niyaw Diosan Reinopajj aka oraq apnaqjjani. Kuna bendicionanaktï katoqkañäni ukanakat mayajja, munat familiaranakasajj jaktanipkani ukawa. Jutïrinjja, Diosaru wal confiyatapata, pacienciampi suytʼatapatwa Abrahanar Diosajj jaktayani, familiaparus jaktayarakini. ¿Jupanakar katoqañatakejj ukankätati? Jumatï Abrahanat yateqasisa Diosan Reinop jakäwiman nayrar uchäta, ukhamarak jan walinakan uñjaskasas Diosar confiyaskakïta, pacienciampis Jehová Diosar suytʼaskakïta ukhajja, ukankätawa (Miqueas 7:7 liytʼañataki).