1. ¿Kunas Biblian profecianakapat kusisit yatjjatañatakejj yanaptʼistaspa?

 PASÏR yatichäwin parlaniwayktan uka Ben jilatajj akham siwa: “Biblian profecianakapat yatjjatañajj wal gustitu” sasa. ¿Jumajj ukhamti sarakta? Jan ukajj ¿Biblian profecianakapat yatjjatañajj wali chʼamawa qariyasiwa sasach amuyta? Ukhamächi ukhajja, kunatsa Jehová Diosajj profecianak Arupar qellqayäna uk sum amuytʼañaw jan ukham amuyjjañamatak yanaptʼätam.

2. ¿Kunanakatsa aka yatichäwin yatjjatañäni?

² Aka yatichäwinjja, kunatsa Biblian profecianakap sum uñtʼañasa, yatjjatañatakejj kunas wakisi ukwa amuytʼañäni. Ukjjarojj Daniel libron pä profecianakapat yatjjatañäni, ukatsti uka profecianakajj kamsañsa muni uk sum amuytʼañajj kunjamsa jichhürunakan yanaptʼistu ukwa yatjjatarakiñäni.

3. ¿Kunsa Biblian profecianakap amuyañatakejj lurañasa?

³ Biblian profecianakapat sum amuytʼañatakejja, yanaptʼa mayiñasawa. Jumajj jan uñtʼkta uka markarus visitkasma ukham amuytʼañäni, ukampis uka marka wali sum uñtʼiri mä amigomaw jumamp chikäski. Uka amigomajj kawkinkasipktasa, sapa callejj kawkirus api uk sum uñtʼi. ¡Uka amigoman jumar compañatapat wal kusistajja! Jehová Diosampejj ukhamarakiwa, kuna tiemponsa jakasktan, kunanakas jutïrin pasani uk jupajj sum yati. Ukhamajj Biblian profecianakap sum amuyañatakejj humilde chuymampiw Diosar yanaptʼa mayiñasa (Dan. 2:28; 2 Ped. 1:19, 20).

4. ¿Kunatsa Jehová Diosajj profecianak Arupar qellqayäna? (Jeremías 29:11; foto uñjjattʼarakïta).

⁴ Jehová Diosajj mä suma awkjamawa, wawanakaparojj jutïrin  taqe kunas sum saraspa ukwa munaraki (Jeremías 29:11 liytʼäta). Ukampis aka oraqenkir awkinakat sipansa, kunanakas jutïrin pasani ukanak wali sumwa qhanañchi. Profecianak Aruparuw qellqayäna, ukhamat kunanakatï jutïrin paskani ukanak janïräkipan yatiñasataki (Is. 46:10). Biblian profecianakapajj alajjpachankir Awkisan suma regalonakapawa, wali munasiñampiw ukanak churistu. Ukampis ¿kunatsa uka profecianakajj phoqasipuniniwa sasin confiytanjja?

5. ¿Kunsa wayn tawaqonakajj Max jilatat yateqasipjjaspa?

⁵ Escuelanjja, Testigo wayn tawaqonakajj Bibliar jukʼak respetiri jan ukajj jan respetiri jaqenak taypinkapjjewa. Kunanaktï uka jaqenakajj parlapki lurapkaraki ukajja, inas Biblian yatichäwinakapat payachasiyapjjchispa. Max jilatan experienciapat amuytʼañäni. Jupajj akham siwa: “Waynitüskayäta ukhajja, awk taykajajj yatichapkitäna uka religionajj cheqati janicha, Bibliajj cheqapunit Diosat jutpacha sasaw payachasiyäta” sasa. ¿Kunsa awk taykapajj lurapjjäna? Jilatajj akham siwa: “Awk taykajajj nayat wals llakisipkchïnjja, pacienciampiw yanaptʼapjjetäna” sasa. Awk taykapajj Bibliampiw jisktʼanakapar jaysapjjäna, Max jilatajj janiw jan kun lurasakejj quedaskänti. Jupajj akham sarakiwa: “Biblian profecianakapatwa yatjjatayäta, yatjjatkayäta ukanakatjja congregacionankir wayn tawaqonakampiw parltʼayäta” sasa. ¿Kunjamsa ukham yatjjatañajj jupar yanaptʼäna? Max jilatajj akham siwa: “Uk yatjjatasajja Bibliajj Diosan amuytʼayatäskapuniwa sasaw confiyjjayäta” sasa.

6. Jumatï payachassta ukhajj ¿kunsa lurañama, ukat kunatsa?

⁶ ¿Jumajj Max jilatjamarakit Bibliajj cheqti yatichpacha sasin payachasta? Ukhamächi ukhajj jan juchañchasimti, ukampis janirak jan kun lurasak quedasimti. Payachasiñajj saruntat metalar uñtasitawa. Kunatï wali valoranïki ukatï saruntatäspa, uk chhaqtayañatak janirak kuns lurksna ukhajja, kunatï wali valoranïki ukarojj jukʼat jukʼatwa chhaqtayaspa. Jumatejj payachasisma ukhajja, Diosar confiyatamajj ukhamarakiw chhaqtjjaspa, uk jan pasañapatakejj ¿kunsa lurasma? Nayraqat akham jisktʼasim: “¿Kuntï Bibliajj jutïrit yatichki ukarojj creytti?” sasa. Jumatï payachasta ukhajja, phoqasiwayjje uka profecianakatwa yatjjatañama. ¿Ukanak yatjjatañamatakejj kunas yanaptʼätam?

7. ¿Kunas Danielarojj profecianakat yatjjatañatak yanaptʼäna? (Daniel 12:10; foto uñjjattʼarakïta).

⁷ Profecianakat yatjjatañatakejj Daniel profetatwa yateqassna. Jupajj suma amtampiw yatjjatirïna, kunatï cheqäki ukwa yatiñ munäna. Humilde chuymanïñaw yanaptʼarakïna. Jupajj akwa yatirakïna: Diosat jan jitheqtaspäna istʼarakispäna ukhajja, Jehová Diosajj profecianakap amuytʼañapatakejj yanaptʼaspänwa (Dan. 2:27, 28; Daniel 12:10 liytʼäta). Jehová Diosan yanaptʼap mayisisajj humilde chuymanïtapwa uñachtʼayäna (Dan. 2:18). Ukhamarus Danielajj wali amuyumpiw Qellqatanakat yatjjatirïna. Jupajj jakkäna uka tiempon utjir sagrado qellqatanakat wali sum yatjjatirïna (Jer. 25:11, 12; Dan. 9:2). ¿Kunjamsa jupat yateqassna?

8. ¿Kuna amtampis yaqhepanakajj profecianakat yatjjatapjje, ukampis kunsa jiwasajj lurañasa?

 ⁸ Kuna amtampis profecianakat yatjjataskta uk amuytʼam. ¿Kunatsa Biblian profecianakapat yatjjataskta? ¿Biblian cheqa yatichäwinakap uñtʼañatakit yatjjataskta? Ukhamächi ukhajj Jehová Diosaw yanaptʼätam (Juan 4:23, 24; 14:16, 17). Ukampis yaqhepanakajj yaqha amtampiw Bibliat yatjjatapjje. Bibliajj janiw Diosan amuytʼayatäkiti sasin parlañatakiw yatjjatapjje. Bibliajj janiw Diosan amuytʼayatäkiti sasinjja, kunatï walïki jan walïkaraki ukanak munañaparuw amtapjje. Ukampis suma amtampiw profecianakat yatjjatañasa. Ukhamarus profecianakat sum amuytʼañatakejj ¿kunjam chuymanïñas wakisi?

9. ¿Biblian profecianakap amuytʼañatakejj kunjam chuymanïñasasa, ukat kunatsa?

⁹ Humilde chuymanïñamawa. Jehová Diosajj humilde chuymaninakar yanaptʼañwa arsuwayi (Sant. 4:6). Jiwasatï Biblian profecianakap amuyañ munstan ukhajja, yanaptʼa mayiñatakiw orasiñasa. Jiwasatï humilde chuymanïñäni ukhajja, suma phoqeri esclavon yanaptʼap katoqasiñäniwa, Jehová Diosajj uka esclavo toqew Biblian yatichäwinakap tiempopar churistu (Luc. 12:42). Niyakejjay Jehová Diosajj suma organiztʼatächejja, suma phoqeri esclavo toqekiw Biblian cheqa yatichäwinakap amuytʼañasatakejj yanaptʼistu, janiw yaqhanak toqejj uk lurkaspati (1 Cor. 14:33; Efes. 4:4-6).

10. ¿Kunsa Esther kullakat yateqsna?

¹⁰ Wali amuyumpiw Bibliat yatjjatañama. Kawkïr profecias jumar gusttam uk amuytʼam, uka profeciat yatjjatañ qalltarakim. Pasïr yatichäwin parlaniwayktan uka Esther kullakajj ukwa luräna. Mesiasan puriniñapat parlki uka profecianakatwa jupajj yatjjatañ munäna. Kullakajj akham siwa: “15 maranïkayäta ukhaw Mesiasat parlir profecianakat yatjjatañ munayäta, uka profecianakajj Jesusajj janïr aka oraqer jutkäna uka nayra maranakapunit qellqaspachäna janicha uk naya pachpaw yatjjatañ munayäta” sasa. Ukhamajj ¿kunsa kullakajj luräna? Rollos del mar Muerto sat qellqatanakat parlir yatichäwinakwa liytʼäna, ukaw jan payachasjjañapatakejj yanaptʼäna. Esther kullakajj akham sarakiwa: “Jesusajj janïr aka oraqer jutkäna uka nayra maranakaw uka rollonakat yaqhepajj qellqasïna. Ukhamajj uka rollonakankir profecianakajj Diosatwa juti” sasa. Kullakajj akham saskakiwa: “Yaqhep cheqanak amuyañatakejj walja kut liytʼañajänwa” sasa. Ukham chʼamachasitapat kullakajj wal kusisi. Walja profecianak sum yatjjatasajj kunjamas jikjjatasïna uk kullakajj akham siwa: “Biblian cheq yatichatapajj nayatak qhanäjjänwa, naya pachpaw uk yatjjatayäta” sasa.

11. Bibliajj cheq parlatap jiwas pachpa yatjjattan ukhajj ¿kunjamsa yanaptʼistu?

¹¹ Biblian yaqhep profecianakapajj kunjamsa phoqasiwayi uk jiwas pachpa yatjjattan ukhajja, Jehová Diosarus instruccionanakaparus jukʼampiw confiytanjja. Ukhamarus Biblian profecianakapajj jutir urunak taqe chuyma suytʼaskakiñatakiw yanaptʼistu, kunas kunäskpan jutir urunak kusisit suytʼaskakiñatakiw yanaptʼarakistu. Jichhajja, Daniel libron pä profecianakapat mä jukʼa yatjjatañäni, ukanakajj jichhürunakanwa phoqasiski. Uka profecianakajj kamsañs muni uk amuytʼañajja, suma amtanakar puriñatakiw yanaptʼistani.

12. ‘Hierrompi chʼaran ñeqʼempi mezclatäki’ uka jachʼa estatuan kayunakapajj ¿kunanakamp sasisa? (Daniel 2:41-43).

¹² (Daniel 2:41-43 liytʼäta). Nabucodonosor reyejj mä jachʼa estatua mä samkan uñjäna, uka jachʼa estatuan kayunakapajj ‘hierrompi chʼaran ñeqʼempi mezclatänwa’. Uka profeciampi, Daniel libron yaqha profecianakapampi, Apocalipsis libron yaqha profecianakapamp igualtʼayasajja, uka jachʼa estatuan kayunakapajj Reino Unido ukat Estados Unidos mayachtʼat markanakamp sasitapwa amuytanjja. Uka pä markanakajj jichhürunakan apnaqki uka potencia mundialawa. Daniel profetajj Nabucodonosor reyin samkapajj kamsañs muni uk qhanañchkäna ukhajja, uka potencia mundialat akham sänwa: “Uka reinon mä partepajj chʼamanïni[wa], mä partepajj ja[niw] chʼamanïkaniti” sasa. ¿Kunatsa mä partejj jan chʼamanïñapäkäna? Kuna laykutejj uka potencia mundialajj hierror uñtat chʼamanïkchisa, chʼaran ñeqʼempi saski uka jaqenakajj janiw kuns luraykiti. b

13. ¿Kuna importante cheqa yatichäwinak amuyañatakis uka profeciajj yanaptʼistu?

¹³ Danielajj qhanañchkäna uka jachʼa estatuatjja, jukʼampis uka estatuan kayunakapatjja, wali importante cheqa yatichäwinakwa yateqsna. Maya, Reino Unido ukat Estados Unidos mayachtʼat potencia mundialajj wali chʼamanïtapwa uñachtʼayäna. Primera ukat Segunda Guerra Mundialanjja, uka potencia mundialaw atipirinakarojj yanaptʼäna. Ukampis uka potencia mundialajj janiw nayrjamajj chʼamanëjjeti, markachirinakapajj jupanakkam chʼajjwapjjatapat aynachtʼaskakiniwa. Paya, Diosan Reinopajj aka oraqenkir taqe gobiernonak tukjkani ukhajja, uka potencia mundial sapakiw utjani. Inas awisajj yaqha markanakajj uka potencia mundial contrajj saytʼasipjjchini, ukampis janiw uka potencia mundial lantejj uttʼasipkaniti. ¿Kunatsa ukham sistanjja? Daniel libron profeciaparjamajja, Diosan Reinopamp saski uka ‘qalaw’ uka jachʼa estatuan kayunakaparojj jiskʼa jiskʼa tʼunjani (Dan. 2:34, 35, 44, 45).

14. “Hierrompi chʼaran ñeqʼempi mezclat” kayunakat parlir profeciat sum amuytʼañajj ¿kunjamsa suma amtanakar puriñatak yanaptʼistu?

¹⁴ ¿Daniel profetajj jachʼa estatuan kayunakapat qhanañchkäna ukajj cheqäskapuniwa sistati? Cheqätap amuysta ukhajja, jakäwimanwa ukajj qhan uñjasini. Aka mundojj niyaw tukjatäjjani, uk yatisajj janiw walja qollqe jikjjatañatakisa ni walja yänak jikjjatañatakis chʼamachaskätati (Luc. 12:16-21; 1 Juan 2:15-17). Ukhamarus uka profeciat sum amuyañajja, predicañsa Bibliat yatichañsa nayrar uchañatakiw yanaptʼätam (Mat. 6:33; 28:18-20). Niyakejjay uka profeciat yatjjatawaystanjja, akham jisktʼasiñasawa: “¿Kunanaktï amtkta ukajj niyas Diosan Reinopajj taqe gobiernonakar tukjañampïkaspa ukhamti uñachtʼayi?” sasa.

15. ¿Khitinakas jichhürunakan ‘rey del norte’ ukat “rey del sur” ukanakäpjje? (Daniel 11:40).

¹⁵ (Daniel 11:40 liytʼäta). Daniel capítulo 11 ukanjja, pä reyinakata jan ukajj pä gobiernonakat parli, jupanakajj aka oraqpach apnaqañatakiw chʼajjwapjje. Biblian uka profeciampi yaqha profecianakampi igualtʼayasajja, “rey del nortejj” jichhürunakan Rusia markampi uka markar mayachtʼat markanakampïtapwa amuytanjja, “rey del sur” ukajj Reino Unido ukat Estados Unidos mayachtʼat potencia mundialätapwa amuytanjja. c

16. “Rey del nortejj” apnaqki uka markanakan ¿kuna jan walinakansa Diosan servirinakapajj uñjasipjje?

 ¹⁶ Kawkïr markanaktï “rey del nortejj” apnaqki uka markanakanwa Diosan servirinakapajj arknaqat uñjasipjje. Biblian yatichäwinakapar creyipjjatapatwa yaqhep Testigonakarojj nuwjapjje, carcelarus jistʼantapjje. Ukampis kunanaktï “rey del nortejj” lurki ukanak uñjasajj janiw jilatanakasajj ajjsarayasipkiti. Jan ukasti jukʼampiw jichhajj Diosar confiyapjje. ¿Kunatsa? Kuna laykutejj jupanakajj yatipjjewa, arknaqat uñjasipjjatapajj janïräkipanwa Daniel libron qellqatäjjäna (Dan. 11:41). Uka profecian phoqasitap yatiñajja, jutir urunak suytʼaskakiñataki, Diosat jan jitheqtas suytʼaskakiñatakiw yanaptʼistu. d

17. “Rey del sur” ukan apnaqat markanakan ¿kuna jan walinakansa cristianonakajj uñjasipjje?

¹⁷ Nayra maranakanjja “rey del sur” ukajj ukhamarakiw Diosan markapar atacäna. Ukaw Primera ukat Segunda Guerra Mundialan uñjasïna, walja jilatanakaw guerrar jan sarañ munapjjatapat carcelan llawintatäpjjäna, yaqhep  wawanakas banderar jan aruntañ munapjjatapat escuelanakat jaqsutäpjjänwa. Aka qhepa maranakanjja, “rey del sur” ukan apnaqat markanakan jan amuykañak yantʼataw Jehová Diosan servirinakapajj uñjasipjje. Campañas electorales ukanakajj utjki ukhajja, inas mä cristianojj mä partidoru jan ukajj mä candidator apoyañ munchispa. Janis khititakis voto jaqontkchinejja, inas amuyupansa jan ukajj chuymapans maynin atipañap munchini. Ukampis jiwasatï maynir jan apoyañ munkstan, mayni contra jan saytʼañ munkarakstan ukhajja, janiw luratanakasatak amuyasiñasäkiti, jan ukasti kunanakatï amuyusans chuymasans utjki ukanakat amuyasiñasarakiwa (Juan 15:18, 19; 18:36).

18. ¿Pä reyinakar chʼajjwir uñjasajj kunjamas jikjjatastanjja? (Dibujonakampi fotonakampi uñjjattʼarakïta).

¹⁸ Kunjamsa “rey del sur” ukampi ‘rey del norte’ ukampejj ‘wajjrantasipjje’ uk uñjasajja, Biblian profecianakapar jan confiyirinakajj inas wal llakisipjjchi (Dan. 11:40, nota). Uka pä reyinakajj bombas nucleares ukanakampejj oraqpachankir taqe jaqenakaruw jiwarayapjjaspa. Ukampis Diosajj janiw ukan pasañap permitkaniti (Is. 45:18). Ukatwa jiwasajj jan llakisktanti ni ajjsarkaraktansa. Jan ukasti ‘rey del norte’ ukampi “rey del sur” ukampi chʼajjwapjjatap uñjasajj jukʼampiw Diosar confiytanjja, ukaw akapachan tukusiñapajj wali jakʼankatap uñachtʼayistu.

19. ¿Kunsa Biblian profecianakapat amtañasa?

¹⁹ Kunjamsa yaqhep profecianakajj phoqasini uk janiw yatktanti. Janiw Daniel profetas taqe kuntï qellqkäna ukanak sum amuykänti (Dan. 12:8, 9). Ukampis kunjamsa mä profeciajj phoqasini uk janis phoqatpach amuykstanjja, ukajj janis phoqasiñapäkaspa ukham janiw sañ munkiti. Kunjamtï Jehová Diosajj nayra tiempon lurkänjja, ukhamarakiw kunanaktï yatiñ munktan ukanak tiempopar qhanañchistani, janiw ukat payachasktanti (Amós 3:7).

20. ¿Kuna profecianakas niya phoqasiñampïski, ukat kunanaksa luraskakiñasa?

²⁰ Markanakajj “¡Suman jakasiñampi jan ajjsaras jakasiñampiw utj-jje!” sasaw sapjjani (1 Tes. 5:3). Ukhaw aka mundonkir gobiernonakajj falso religionanakar atacasajj qʼal tʼunjapjjani (Apoc. 17:16, 17). Ukatjja Diosan markaparuw atacapjjarakini (Ezeq. 38:18, 19). Ukjjarusti Armagedón sat qhep qhepa guerraw qalltani (Apoc. 16:14, 16). Taqe ukanakajj niyaw phoqasini, janiw ukat payachasktanti. Ukañkamajj kunjamsa Biblian profecianakapajj phoqasini uk amuyaskakiñäni, jaqenakarus uka pachpa lurapjjañapatak yanaptʼaskakiñäni, ukhamatwa alajjpachankir suma Awkisar yuspäratas uñachtʼayaskakiñäni.