1. ¿Kun lurañsa Jehová Diosajj awk taykanakar jaytawayi?

ADANAMPI Evampejja wawanïñwa munapjjäna, Jehová Diosaw jaqenakar ukham lurawayi. Ukatwa Biblian akham sispacha: ‘Wawanakajj Jehová Diosan mä herenciapawa’ sasa (Sal. 127:3, NM). Uka arunakajj kamsañsa muni uk amuytʼañatakejja, mä amigomas walja qollqe katuyaskiristam ukham sañäni. Ukham jiwasar confiyatapat wal kusissna, ¿janicha? Maysa toqetjja, ‘kunjamsa uka qollqe sum uñjarapëjja’ sasaw llakisiraksna. Niya ukhamarakiw Jehová Diosajj qollqet sipansa jukʼamp valoranïki uk awk taykanakar jaytawayi: awk taykanakajj wawanakaparuw sum uñjapjjañapa ukhamarak wawanakan kusisitäpjjañapatakiw chʼamachasipjjañapa.

2. ¿Kuna jisktʼanakarus aka yatichäwin qhanañchañäni?

² Casadonakajj wawanïpjjaniti janicha, kunapachas wawanïpjjani uk ¿khitinakas amtapjjañapa? Wawanakapan kusisitäpjjañapatakejja, ¿kunjamsa awk taykanakajj yanaptʼapjjaspa? Uka toqet suma amtanakar puripjjañapatakejja, Biblian kawkïr yatichäwinakapas cristianonakar yanaptʼaspa uk uñjañäni.

3. 1) Casadonakajj wawanïpjjaniti janicha uk ¿khitinakas amtapjjañapa? 2) Casaratanakan amigonakapasa familiaranakapasa ¿Biblian kawkïr ewjjtʼanakapsa amtapjjañapa?

³ Yaqhep markanakanjja, jichhak casarasirinakajj jankʼak wawanïpjjaspa ukwa jaqenakajj munapjje. Inas pachpa familiapasa yaqha jaqenakasa wawanïpjjañapatak jupanakar wal chʼamañchapjjchispa. Asia toqenkir Jetro * sat jilatajj akham siwa: “Wawanïpki uka jilat kullakanakat yaqhepajja, jan wawanïpki uka chacha warminakarojj wawanïpjjañapatakiw chʼamañchapjje”  sasa. Asia toqenkir Yefri sat yaqha jilatajj akham sarakiwa: “Jan wawanïpki ukanakarojja ‘jilïrëjjapjjäta ukhajj khitis uñjapjjätam’ sasaw yaqhepajj sapjje” sasa. Ukampis chacha warminakaw wawanïpjjaniti janicha uk amtapjjañapa, jupanakaruw uk amtañajj waktʼi (Gál. 6:5). Cheqas jichhak casaratanakajj wawanïsin kusisitäpjjaspa ukwa amigonakapasa familiaranakapasa munapjje, ukampis taqeniw ak amtañasa: chacha warmiw wawanïpjjaniti janicha uk amtañapa (1 Tes. 4:11).

4, 5. 1) ¿Kuna pä toqetsa casadonakajj parltʼasipjjañapa? 2) Wawanïpjjaniti janicha uka toqet ¿kunapachas parltʼasipjjañapa?

⁴ Mä chacha warmitï wawanïñ amtapjjchejja aka pä toqetwa parltʼasipjjañapa: 1) kunapachas wawanïpjjani, 2) qhawqha wawanïpjjanisa. ¿Kunapachas uka toqenakat parltʼasipjjañapajj wakisispa? ¿Kunatsa uka toqenakat amuytʼañajj wali wakiskirejja?

⁵ Casarasiñatak parlatanakajja, janïra casaraskasaw wawanïpjjaniti janicha uka toqet parltʼasipjjañapajj walïspa, ukhamat mä amtanikïpjjañapataki. Wawanak uywañatakejj wakichatäpjjeti janicha uksa amuytʼapjjañaparakiwa. Wawanak uywañajj chʼamawa, tiempow munasiraki. Ukatwa yaqhepajj casarasipki ukhat mä mara jan ukajj pä mara suytʼañ amtapjje. Ukhamatwa janïr wawanïkasajj chacha warmjam sum yatthapipjje (Efes. 5:33).

6. Aka qhepa urunakanjja, ¿kunsa yaqhep casadonakajj amtapjje?

⁶ Yaqhep cristianonakajja Noé chachan yoqanakapampita yojjchʼanakapampita yateqasiñwa amtapjje, jupanakajj janiw jankʼakejj wawanïpkänti (Gén. 6:18; 9:18, 19; 10:1; 2 Ped. 2:5). Qhepa urunakajj Noé chachan urunakapjamäniwa sasaw Jesusajj säna, cheqas “chʼama tukuña jan wali tiemponaka[nwa]” jaktanjja (2 Tim. 3:1; Mat. 24:37). Ukatwa yaqhep casadonakajj aka tiempon jan wawanïñ amtapjje, ukhamat Jehová Diosar jukʼamp serviñataki.

7. Lucas 14:28, 29 ukhamarak Proverbios 21:5 textonakajj ¿kunjamsa casadonakar yanaptʼaspa?

⁷ Wawanïpjjaniti janicha, qhawqha wawanïpjjanisa uk amtkasajja, amuytʼasir chacha warminakajj wawanak uywañatakejj “qhawqhas munasini” ukwa amuytʼasipjjañapa (Lucas 14:28, 29 liytʼañataki). Wawa uywañatakejj janiw qollqeki munaskiti, jan ukasti tiempos chʼamas munasirakiwa sasaw experienciani awk taykanakajj sapjje. Ukatwa casadonakan akham jisktʼasipjjañapajj wakisi: “¿Familian gastonakapatakejj panpachaniti trabajipjjañajäspa? ¿Kunanakas familiatak wakisi uk  igualakti amuyapjjtjja? Panpachani trabajipjjä ukhajja, ¿khitis wawanakar uñjani? ¿Khititsa wawanakajj kun lurañsa kunjam amuytʼañsa yateqasipjjani?” sasa. Uka jisktʼanakarjam amuytʼasir chacha warminakajja, Proverbios 21:5 (liytʼañataki) qellqatan kuntï siski ukwa sum amuytʼapjje.

8. 1) ¿Kuna jan walinakansa chacha warminakajj uñjasipjjaspa? 2) ¿Esposaparu munasir mä chachajj kunsa lurani?

⁸ Awk taykanakajj panpachaniw wawanakapatakejj tiempo apstʼasipjjañapa, jupanakar sum uñjañatakis chʼamachasipjjañapawa. Jupanakatï mä jukʼa tiemponaki walja wawanïpjjaspajja sapa mayniru sum uñjañajj chʼamakïspawa, janiw kunjam uñjañatejj wakiski ukham uñj-jjapjjaspati. Yaqhep chacha warminakajja, walja wawanak uywasajj ‘wali qaritäpjjerïtwa’ sasaw sapjje. Mä taykajj ukham qaritäki ukhajja, janiw sapa kuti Bibliat yatjjatañ puedjjaspati, janirakiw orasjjaspati, ni predikiris sarjjaspati. Tantachäwinakansa janirakiw sum istʼjjaspati, ni yateqjjaspasa. Wali munasiri mä esposojja tantachäwinakansa utansa esposapar yanaptʼapuniwa. Sañäni, kunanakatï utan lurañäki ukanakampiw yanaptʼani, familiana Bibliat yatjjatkasas taqenir yanaptʼañatakis chʼamachasiniwa, sapa kutiw familiapampejj predikir sararakini.

9, 10. Wawanakapar yanaptʼañatakejj ¿kunsa awk taykanakajj lurapjjañapa?

⁹ ¿Kunsa awk taykanakajj wawanakapan Jehová Diosar munasipjjañapatak lurapjjaspa? ¿Kunjamsa jan walinakat wawanakapar jarkʼaqapjjaspa? Ukanakat mä qhawqha yatjjatañäni.

¹⁰ Jehová Diosar yanaptʼa mayisipjjam. Manoa chachampi esposapampejj kunsa lurapjjäna uk amuytʼañäni. Manoa chachajj Sansón sat wawapan nasiñap yatïna ukhajja, Jehová Diosaruw uka wawa uywañatakejj yanaptʼa wal mayisïna.

11. Jueces 13:8 textorjamajja, ¿kunjamsa awk taykanakajj Manoa chachat yateqasipjjaspa?

¹¹ Bosnia-Herzegovina markan jakasiri Nijad jilatampi Alma sat esposapampejj Manoa chachatwa yateqasipjjäna. Jupanakajj akham sapjjewa: “Manoa chachjamarakiw suma awk taykäñataki Jehová Diosar yanaptʼa wal mayisipjjta. Diosajj kunaymanitwa yanaptʼapjjetu: Bibliampi, qellqatanakampi, tantachäwinakampi, jachʼa tantachäwinakampiw yanaptʼapjjetu” sasa (Jueces 13:8 liytʼañataki).

12. ¿Kunjamsa Joseampi Mariampejj wawanakapar yatichapjjäna?

¹² Luratanakampi yatichapjjam. Awk taykanaka, kuntï wawanakamar sapkta ukajj wakiskiriwa. Ukampis kuntï lurapkta ukwa jupanakajj  jukʼampi yateqapjjani. Joseampi Mariampejj luratanakapampiw Jesusarusa mayni wawanakaparus yatichapjjäna. Joseajj walsa familiapatak trabajkchïnjja, Jehová Diosar serviñajj kunja wakiskirisa uk amuyapjjañapatakiw familiapar chʼamañchäna (Deut. 4:9, 10). Leyirjamajj janis wakiskchïnjja, Joseajj “sapa maraw” familiaparojj Pascua amtañatak Jerusalenar irpirïna (Luc. 2:41, 42). Yaqhep awkinakajja, ‘ukham familpach sarañajj wali chʼamawa, wali jayawa, wali gastorakiwaʼ sasaw amuyapjjpachäna. Ukampis Joseajja Diosar adorañarojj wali valoranitwa uñjäna, ukham uñjapjjañapatakiw wawanakapar yaticharakïna. Mariasti sumwa Qellqatanak uñtʼäna. Jupas ukhamarakiw arunakampi luratanakampi wawanakapar Diosan Arupar munasiñ yatichpachäna.

13. ¿Kunjamsa mä chacha warmejj Joseampit Mariampit yateqasipjjäna?

¹³ Nijad jilatampit Alma sat esposapampit parltʼaskakiñäni, jupanakajj Joseampit Mariampit yateqasipjjäna. ¿Kunjamsa wawaparojj Diosar munasiñsa serviñsa yatichapjjäna? Jupanakajj akham sapjjewa: “Kunjamtï jakapkta kunanaktï lurapkta ukanakampiw wawajar yatichañ munapjjta, Diosan yatichäwinakaparjam sarnaqañajj qhawqha bendicionanaksa apani uk amuyañapwa munapjjta” sasa. Nijad jilatajj saskakiwa: “Wawaman kunjam jaqëñapsa munta ukham jaqëñatakiw chʼamachasiñama” sasa.

14. ¿Kunatsa awk taykanakajj khitinakas wawanakapan amigopäpjje uk yatipjjañapa?

¹⁴ Suma amigonakanïñ wawanakamar yatichapjjam. Awk taykajja, wawanakapajj khitinakampis chikachasipjje kunsa lurapjje uk yatipjjañapawa. Redes sociales ukanakan khitinakampis parlapjje uksa yatipjjañaparakiwa. ¿Kunatsa? Uka amigonakapjamaw amuyjjapjjaspa, kunsa lurjjapjjarakispa (1 Cor. 15:33).

15. ¿Kunsa awk taykanakajj Jesé jilatat yateqasipjjaspa?

¹⁵ Awk taykanakajj computadoranaka tabletanaka celularanaka jan sum apnaqañ yatipkchi ukhajja, ¿kunsa lurapjjaspa? Filipinas markankiri Jesé sat mä jilatajj akham siwa: “Janis computadorsa celularsa sum apnaqañ yatipkstjja, uka aparatonak jan sum apnaqasajj kuna jan walinakansa uñjasipjjaspa uka toqet wawanakajar parlapjjapuntwa” sasa. Uka jilatajj janis uka aparatonak apnaqañ yatkchïnjja, janiw wawanakaparojj ukanak apnaqañ jarkʼkänti. Jupajj akham siwa: “Wawanakajarojj akham sistwa: ‘Uka aparatonakajj yaqha aru yateqañatakisa, tantachäwinakatak wakichasiñatakisa, Biblia sapüru liyiñatakisa yanaptʼapjjeristamwa’ sasa”. Awk taykanaka, Internetankiri jw.org^® cheqan “Jóvenes” siski ukan uñstki uka ewjjanak wawanakamampi liytʼasajj ¿yatjjatapjjerïtati? Ukanjja kawkïr mensajenak fotonak apayañas walïski jan walïkaraki uka toqetwa parli. Ukatjja akïr videonakaw utjaraki: ¿Tabletamsa celularamsa janit jaytirjamäkta? ukat Redes sociales ukanak wali amuyumpiw apnaqañama. * ¿Uka videonak wawanakamamp uñtasajj yatjjatapjjerïtati? Uka yatichäwinakampiw kunjamsa computadorsa tabletsa celularsa sum apnaqapjjaspa uk wawanakamar yatichapjjasma (Prov. 13:20).

16. ¿Kunsa walja awk taykanakajj lurapjjäna, ukajj kunjamsa wawanakapar yanaptʼäna?

¹⁶ Walja awk taykanakajja, wawanakapajj Jehová Diosan yateqaskay servirinakapamp chikachasipjjañapatakiw chʼamachasipjje. Costa de Marfil markankiri Dani jilatampi Bomine esposapampejj ukhamwa lurapjjäna. Jupanakajj congregacionanak tumptʼir jilatarojj  utapar katoqtʼapjjapunirïnwa. Dani jilatajj akham siwa: “Ukajj wawajar wal yanaptʼawayi. Qhepatjja precursorat serviñwa qalltawayi, jichhajj congregacionanak tumptʼir jilatan sustitutopawa” sasa. Awk taykanaka, ¿wawanakamar yanaptʼañatakejj ukham lurapjjarakismati?

17, 18. ¿Kunapachatsa awk taykanakajj wawanakapar yatichañ qalltapjjañapa?

¹⁷ Wawanakamar jiskʼatpach yatichapjjam. Jiskʼatpach yatichapjjäta ukhajja, jupanakar jukʼampiw yanaptʼapjjäta (Prov. 22:6). Ukhamwa Timoteon Eunice mamapampi Loida awichapampejj lurapjjäna. Jupanakajj wawatpachwa Timoteor Jehová Diosat yatichapjjerïna (2 Tim. 1:5; 3:15). Tiempompejja, Timoteojj apóstol Pablompiw viaj-jjäna.

¹⁸ Costa de Marfil markankiri Jean-Claude jilatampi Peace esposapampejja sojjta wawanakaparojj Jehová Diosar munasiña serviñwa yatichapjjäna. Jupanakarojj Eunicempit Loidampit yateqasiñaw yanaptʼäna. Jupanakajj akham sapjjewa: “Wawanakajarojj nasipkäna ukhatpachwa Diosan Arup yatichapjjerïta” sasa (Deut. 6:6, 7).

19. ¿Wawanakar Diosan Arup yatichañajj kamsañsa muni?

¹⁹ ¿Wawanakar Diosan Arup yatichañajj kamsañsa muni? Deuteronomio 6:7 qellqatan hebreo arut yatichaña sasin traducitäki ukajja, sum yateqañapkama kutin kutini yatichaña sañ muni. Ukatwa awk taykanakajj wawanakapampïñatak tiempo apstʼasipjjañapa. Awisajja kutin kutini yatichasajj qaritaw uñjasipjjaspa. Ukampis ukham yatichasajja, Diosan Arup sum amuytʼapjjañapataki ukarjam sarnaqapjjañapatakiw wawanakapar yanaptʼapjjani.

20. Salmo 127:4 qellqatajja, ¿kunjamsa awk taykanakarojj wawanakar uywañatak yanaptʼaspa?

²⁰ Wawanakamar sum uñtʼapjjam. Salmo 127 qellqatanjja wawanakajj flechanakar uñtataw siwa (Salmo 127:4 liytʼañataki). Kunjamtï flechanakajj jachʼan jiskʼanïki, ukhamarak kunayman materialatäkejja, ukhamarakiw wawanakajj jan mä igualäpkiti. Ukatwa awk taykanakajj kunjamsa sapa maynir yatichapjjani uk amuytʼapjjañapa. Jichha tiempon utjki uka Israel markankir mä chacha warmejja, pä wawanakaparuw Diosar serviñ yanaptʼapjjäna. Kunas yanaptʼäna uk jupanakajj akham sapjjewa:  “Sapa mayniruw Bibliat yaqha yaqh yatichapjjerïta” sasa. Awisajja sapa mayniru yatichañaw wakisispa, ukham lurañas janirakiw chʼamäkaspati. Ukhamasti familia pʼeqtʼirinakaw wawanakapar juntokiti jan ukajj sapa mayniruch yatichapjjani uk amtapjjañapa.

21. ¿Kunjamsa Jehová Diosajj awk taykanakar yanaptʼi?

²¹ Wawanakar uywañajj wali chʼamawa, ukatwa awisajj awk taykanakajj wali qarita llakita ukham uñjasipjjaspa. Ukampis wawanakajj Jehová Diosan regalopäpjjewa. Diosajja, awk taykanakarojj wal yanaptʼañ muni. Oracionanakapsa sumwa istʼi, ukatwa Bibliampi, qellqatanakampi, experienciani awk taykanakan ewjjtʼanakapampi, jupanakan yateqaskay sarnaqatanakapampi yanaptʼi.

22. ¿Kunas taqe kunat sipansa wawanakatakejj jukʼamp valoranejja?

²² Wawanakar uywañajj 20 maratakiwa sasaw yaqhepajj sapjje, ukampis janiw awk taykäñajj ukaruk tukuskiti. Awk taykanakajj wawanakapar munasipjjañapawa, jupanakampïñatakejj tiempsa apstʼasipjjañapawa, Bibliatsa yatichapjjañaparakiwa; ukanakaw taqe kunat sipansa jukʼamp valoranejja. Janiw taqpach wawanakajj awk taykapan yatichäwip mä igualak katoqasipkiti. Ukampis Jehová Diosar munasir awk taykanakan uywat walja jilat kullakanakajja, Asia toqenkiri Joanna Mae sat kullakjamaw sapjjaraki, jupajj akham siwa: “Kunjamsa awk taykajajj cheqañchapjjetäna, Jehová Diosar munasiñsa yatichapjjetäna uk amtasajja, walpun jupanakar yuspärta. Janiw jakañak churapkituti, jan ukasti kusisit jakasiñatakiw yanaptʼapjjetu” sasa (Prov. 23:24, 25). Jehová Diosar servirinakat waljaniw ukham sapjjarakispa.