“¿NAYAJJ yuspärasirïtti?” sasaw taqenis jisktʼasiñasa. Qhepa urunakanjja walja jaqenakaw “jan yuspärasirinaka” ukhamäpjjani sasaw Biblian nayratpach sisjjäna (2 Tim. 3:2). Jaqenakajj ukham chuymanëjjapjjewa, jupanakar taqe kun churapjjañapas wakiskaspa, mayninakajj jupanakatak taqe kun lurapjjañapas wakiskaspa ukhamwa amuyjjapjje, ukatwa janis yuspärasiñajj wakiskaspa ukham amuyasipjje. Ukham jaqenakar uñtʼpachätawa. Janiw khitirus ukham jaqenakamp chikachasiñajj gustkistuti.

Ukampis Jehová Diosajj servirinakapar akham sistuwa: “Yuspärasirïpjjapunim”, “taqe kunatsa yuspärapjjapunim” sasa (Col. 3:15; 1 Tes. 5:18). Cheqansa yuspärasir chuymanïñajj wal yanaptʼistu. Kunatsa ukham sistanjja uk jichhajj yatjjatañäni.

Yuspärasirïñäni ukhajja janiw jiwas pachpar jiskʼachaskañäniti, jan ukasti jiwas pachpat wal kusisiñäni. Yuspäririsa yuspär katoqerisa kusisitäpjjewa. ¿Kunatsa ukham sistanjja? Amuytʼañäni, maynejj jiwas layku kuns luri ukhajja, jiwasat llakisitapwa uñachtʼayistu. Ukaw jiwas pachpat kusisiñatak yanaptʼistu. Rut sat tawaqorojj ukaw paspachäna. Boazajj jupar khuyaptʼaykäna ukhajja, Rut tawaqojj maynin jupat llakisitapa yatisajj wal kusispachäna (Rut 2:10-13).

Taqe kunat sipansa Diosarojj yuspärañasapuniwa. Diosajj walja bendicionanakwa churawayistu, jichhas churaskakistuwa, ukanakat awisajj amuytʼirïpachätawa (Deut. 8:17, 18; Hech. 14:17). Ukampis janiw Diosan bendicionanakapat aleqak amuytʼañasäkiti, jan ukasti Jehová Diosajj qhawqsa jiwasarusa familiasarusa churistu ukanakat lupʼiñatakejj tiempwa apstʼasiñasa. Ukhamatwa Diosar jukʼamp yuspärañäni, Diosan jiwasar munasitapatsa wali valoranit jiwasar uñjatapatsa janiw pächaskañäniti (1 Juan 4:9).

Jehová Diosajj qhawqha wajjtʼasirisa qhawqha bendicionanaksa churistu ukanakat lupʼiñasawa, ukatjja suma Diosätapat yuspärañasarakiwa (Sal. 100:4, 5). Jiwasatï yuspärasirïñäni ukhajja wali kusisitaw jakasiñäni.

¿Kunatsa yuspärasirïñasaraki? Yuspärasirïtan ukhajja amigonakasampejj sum apastanjja. Taqeniw suma uñjatäñ muntanjja. Mä amigosajj yanaptʼistu ukhajja chuymatpachwa yuspärtanjja, ukhamatwa jupampejj jukʼamp suma amigor tuktanjja (Rom. 16:3, 4). Maysa toqetjja, yuspärasir jaqenakajj mayninakar yanaptʼañatakejj listokïpjjewa. Niyakejjay kunjamsa mayninakajj jupanakar yanaptʼapjje uk amuyapjjchejja, mayninakarojj ukham munasiñampiw yanaptʼapjjaraki. Jaqe masisar yanaptʼtan ukhajja wal kusistanjja. Jesusajj akham sarakïnwa: “Katoqañat sipansa churañanwa jukʼamp kusisiñajj utji” sasa (Hech. 20:35).

California markankiri mä universidadanjja, yuspärasiñ toqetwa yatjjatapjjäna, ukan Robert Emmons sat mä pʼeqtʼirejj akham sänwa: “Yuspärasirïñatakejja kunjamsa maynit maynikamajj yanaptʼastan uk amuyañaw wakisi; awisajj mayninakaw jiwas laykojj kunsa lurapjje, awisasti jiwasaw mayninak laykojj kunsa luraraktanjja” sasa. Ukhamäskapuniwa, mayninakaw sum jakasiñatakisa walikïskañatakisa yanaptʼapjjestu. Amuytʼañataki, awisajj mayninakaw manqʼa churapjjestu, jan ukajj qolljjattʼapjjestu (1 Cor.  12:21). Yuspärasir jaqenakajja, kunsa mayninakajj jupar yanaptʼañatak lurapjje uk amuyapjjewa. Ukatwa ‘¿nayajj yuspärasirïtti?’ sasin jisktʼasiñasa.

¿Kunatsa yuspärasirïñajj wali wakiskirirakejja? Yuspärasirejj kunanakatï walïki ukanakatwa jukʼamp amuytʼi. Amuyupajj mä filtrökaspas ukhamawa, sumäkis ukanakak katoqe, jan walinakäki ukanakjja apanukuwa. Yuspärasirinakajj kunatï sumäki uk amuyañatakiw chʼamachasipjje, janiw problemanakar chuyma churapkiti. Jukʼampi yuspärasirïtan ukhajja, mayninakan suma luratanakapwa jukʼamp uñjtanjja, ukaw jukʼampi yuspärasirir tukuyistu. Ukham jakastan ukhajja, kuntï apóstol Pablojj siskäna ukaruw phoqasktanjja, jupajj akham sänwa: “Tatitur servipjjatam laykojj kusisipjjapunim” sasa (Filip. 4:4).

Yuspärasirejj janiw mayninakatsa jupa pachpatsa jan walinak amuykiti. Janiw mä yuspärasirejj envidiaskaspati, ni llakitäkaspasa, janirakiw maynitakejj colerat sarnaqkaspati. Yuspärasir jaqejj janiw qollqe chuymäkiti, kunatï jupan utjki ukarojj wali valoranit uñji, janirakiw jukʼamp qollqe jikjjatañatakis chʼamachaskiti (Filip. 4:12).

Aka qhepa urunakanjja problemanakajj chʼam apaqestaspa llakisiyistaspa ukwa Supayajj muni, cristianonakajj uk sum amuytanjja. Jan walïki ukanakar chuym chursna, taqe kunatsa quejassna ukwa Supayajj munaraki. Ukham chuymanïsna ukhajja, suma yatiyäwinaksa janiw sum predikjjsnati. Ukampis yuspärasirïtan ukhajja, espíritu santon achupwa uñachtʼaytanjja. Sañäni, jukʼamp kusisitätanwa, Diosarus jukʼampiw confiyaraktanjja (Gál. 5:22, 23).

Kuntï yuspärasiñ toqet jichhakam yateqawayktan ukanakarojja, inas cristianonakajj “ukhamapunïskiwa” sasin sisstan. Ukampis yuspärasirïñasa, ‘taqe kunas walikïskaniwa’ sirïñasa janiw faciläkiti. Ukhamäkchisa chʼamachasiskakiñasawa. Yuspärasirïñjja yateqsnawa, yuspärasirïskakiñatakisa chʼamachassnawa. Ukatakejja, kunanakatsa Diosarusa mayninakarus yuspärsna uk amuytʼañatakejj sapüruw tiempo apstʼasiñasa. Ukham lurañäni ukhajja, yuspärasirïñajj janiw jiwasatak chʼamäjjaniti. Problemanakar chuyma churirinakat sipansa, jukʼamp kusisitäñäniwa. Jehová Diosasa mayninakasa jiwasar chʼamañchañatakejj kunanaksa lurapjje ukanakat pienstʼañasawa, ukajj kusisitäñatakiw yanaptʼistani. Ukhamarakiw kunanakatsa yuspärsna ukanak paya jan ukajj kimsa mä cuadernor sapüru qellqtʼassna.

Wali yuspärasiri jaqen lejjwipajja jan yuspärasir jaqen lejjwipat sipansa mayjawa, kunatï walïki ukanakatwa jukʼamp amuytʼaraki sasaw cientificonakajj sapjje. Yuspärasir jaqenakajj jukʼamp kusisitäpjjewa. Ukhamasti kuna bendicionanaksa katoqtan ukanak amuyapjjapuniñäni, kuna sumanakatï jakäwin paskistu ukanakatsa kusisipjjañäni, yuspärasirïpjjapuniñäni. Kunanaktï katoqktan ukanak aleq ukhamak uñjañat sipansa, yuspärasirïñasawa. Biblian akham siwa: “Tatitur yuspagarapjjam, jupasti sumawa, munasiñapasa wiñayatakiwa”, “taqe kunatsa yuspärapjjapunim” sasa (1 Crón. 16:34; 1 Tes. 5:18).