1, 2. 1) ¿Kuna jan walinakansa Jehová Diosan walja servirinakapajj uñjasipjje? 2) Jan walinakan uñjasisajj ¿kunjamsa yaqhepajj jikjjatasipjjaspa?

 KUNA jan walinakas wali llakit uñjasiyistaspa uk kimsa toqet amuytʼañäni. Mä wayna jilatarojja chʼama apaqeri usunïtawa sasaw doctorajj yatiyäna. 50 marat jila marani wali trabajtʼir mä jilatarojja, trabajopatwa jaqsupjjäna, yaqha trabajo walsa thaqkchïnjja janiw jikjjatkänti. Diosar taqe chuyma serviri mä kullakajja, edadanëjjasajj janis Jehová Diosar nayrjam sirvjjaspa ukhamwa amuyasïna.

² Jiwasatï uka jan walinakan uñjasstanjja, janis kunatak sirvjjsna ukhamwa amuyassna. Ukham jan walinakan uñjasisajj llakitaw jakasjjsna, janiw jiwas pachpas munasjjsnati, yaqhanakampis janiw sum apasjjaraksnati.

3. ¿Kunjamsa Supayasa jupjam amuyiri jaqenakasa jakañ vidar uñjapjje?

³ Akapachankir jaqenakajja, Supayjamarakiw jakañ vidarojj jan valoranit uñjapjje. Jaqenakajj janis kunatak sirvksna ukhamwa Supayajj nayratpach uñjistu. Diosar jan istʼirinakan jiwapjjañap Supayajj yatkchïnsa, Eva warmirojj jan sinttʼasisaw ‘librew jakasisma’ sasin engañjäna. Supayaw jachʼa negocionakjjarusa, politicarusa, falso religionanakarusa nayratpach apnaqe. Ukatwa jachʼa negocionak luririnakasa, politiconakasa, religión pʼeqtʼirinakasa jakañ vidarojj Supayjam jan respetapkiti, jaqenakajj kunjamäsipkisa uka toqetsa janiw llakisipkiti.

4. ¿Kuna toqetsa aka yatichäwin yatjjataskañäni?

⁴ Jehová Diosajja, jiwaspach munassna ukwa muni, jan kunatak servirjam amuyastan ukhasa yanaptʼistuwa (Sal. 136:23; Rom. 12:3). Aka yatichäwinjja, usutäktan ukhasa, qollqet pistʼat uñjasktan ukhasa, edadanëjjatas laykojj Diosan  markapan janis kun lurañatak chʼamanëjjsna ukham amuyastan ukhasa, Diosajj kunjamsa yanaptʼistu ukanakatwa yatjjataskañäni. Nayraqatajja, Diosatakejj wali valoranïtanwa sasin kunatsa sissna uka toqet yatjjatañäni.

5. ¿Kunatsa Jehová Diosatak wali valoranïtanwa sistanjja?

⁵ Jehová Diosajj laqʼatsa lurawaykchistojja, jupajj wali valoranitwa uñjistu (Gén. 2:7). Jehová Diosajj kunatsa wali valoranit uñjistu uk mä qhawqha yatjjatañäni. Jehová Diosajj jupat yateqasirwa lurawayistu, ukhamatwa aka oraqen utjki uka luratanakapat sipansa jukʼamp suma luratätanjja (Gén. 1:27). Diosarakiw oraqempiru animalanakampiru uñjañatakejj uchawayistu (Sal. 8:4-8).

6. Jaqenakajj pantjasirïkstansa, ¿kunatsa Jehová Diosajj wali valoranitwa uñjistu saraktanjja?

⁶ Adán chachajj juchar purtʼaskäna uka qhepatjja, jaqenakajj Diosatak valoranïskakïnwa. Cheqas Diosatakejj wali valoranïtanwa, ukatwa Yoqaparojj juchanakas layku jiwañapatak khitanïna (1 Juan 4:9, 10). Jaqenakajj Adanan juchachasitap laykuw jiwtanjja, ukampis Diosajj Jesusan jiwatapatwa cheqapar sarnaqer jaqenakarusa jan cheqapar sarnaqer jaqenakarusa jaktayani (Hech. 24:15). Usutäkstansa, pobrëkstansa, edadanïkstansa, Bibliarjamajj Diosatak wali valoranïskaktanwa (Hech. 10:34, 35).

7. Jehová Diosatakejj wali valoranïtanwa sasin ¿kunatsa saraksna?

⁷ Jehová Diosan servirinakapajja, kunatsa Diosajj wal munasistu uk sum yattanjja. Sañäni, jupaw markaparojj irpanistu, suma yatiyäwinak kunjam chuymampis katoqayätan uksa uñjarakïnwa (Juan 6:44). Jehová Diosar jakʼachasiyätan ukhajja, Jupajj jiwasar jakʼachasirakïnwa (Sant. 4:8). Janiw ukakïkiti, Diosajj jiwasar yatichañatakiw tiempo apsusi chʼamachasiraki. Jichhajj kunjam jaqëtansa, qhepat kunjam jaqerakïsnasa uksa yatirakiwa. Cheqañchasaw qhawqsa munasistu uk uñachtʼayarakistu (Prov. 3:11, 12). Taqe ukanakajja, Diosatak wali valoranïtaswa uñachtʼayistu.

8. ¿Kunjamsa Salmo 18:27-29 qellqatajj jan walinakan uñjasisajj jan sinti llakisiñatak yanaptʼistaspa?

⁸ David reyirojja Jehová Diosajj wal munasïna yanaptʼarakïnwa, Davidajj uk sumwa yatïna. Uk yatiñaw ‘jan kunatak servir jaqe’ sasin sapkäna ukhajj jan sinti llakisiñatak yanaptʼäna (2 Sam. 16:5-7). Kunapachatï wali llakitäktan, jan walinakan uñjasktan ukhajja, Jehová Diosajj jan sint llakisiñatakiw yanaptʼistaspa, jan walinakar atipjañatakis yanaptʼarakistaspawa (Salmo 18:27-29 liytʼañataki). Diosatï yanaptʼaskchistojja, janiw kunas jupar kusisit serviñ jarkʼkistaspati (Rom. 8:31). Usutäkstansa, qollqet pistʼatäkstansa, edadanëjjstansa qhawqsa Diosajj munasistu, jupatak kunja valoranïtansa ukwa amtañasa, jichhajj uk yatjjatañäni.

9. ¿Usutäsajj kunjamsa amuyassna?

⁹ Usutäsajja wali llakitaw uñjassna, janipunis kunatak sirvjjsna ukhamwa amuyasiraksna. ‘Usutäjjewa, yanaptʼañaw wakisi sasaw sapjjetani’ sasaw ajjsarayassna. Mayninakajj janis usutätas yatipkchejja, jan nayrjam lurañ puedjjasajj wal phenqʼassna. Ukham llakitäktan ukhajja, Jehová Diosaw chʼamañchtʼistu. ¿Kunjamsa?

10. Proverbios 12:25 textorjamajja, ¿kunas usutäktan ukhajj jan sinti llakisiñatak yanaptʼistaspa?

¹⁰ Usutäktan ukhajja, mä ‘suma arojj’ wal chʼamañchtʼistaspa (Proverbios 12:25 liytʼañataki). Jehová Diosajj suma arunak Bibliar  qellqayawayi, ukanakaw usutäktan ukhajj Jupatak qhawqha valoranïtansa uk amtayistu (Sal. 31:19; 41:3). Jiwasatï uka arunak mä kuti, jan ukajj walja kuti liytʼañänejja, usutäkstansa Diosaw jan sinti llakisiñatak yanaptʼistani.

11. ¿Kunjamsa Jehová Diosajj mä jilatar yanaptʼäna?

¹¹ Kunas Jorge jilatar pasäna uk amuytʼañäni. Jupajj waynäkäna ukhaw ratuk jan waltʼayiri mä usu katüna, uka usojj janis kunatak sirvjjaspa ukhamwa jupar amuyayäna. Uka jilatajj akham siwa: “Usutäsajj wal llakisiyäta, jaqenakajj uñchʼukipjjetäna ukhas wal phenqʼasiyäta, nayajj janiw ukatakejj wakichtʼatäkayätti. Jukʼampi usutäjjayäta ukhajja, kunjamsa vidajajj mayjtʼani ukwa piensirïta. Walpun llakisirïta, ukatwa Jehová Diosar wal yanaptʼa mayisiyäta” sasa. ¿Kunjamsa Diosajj yanaptʼäna? Jilatajj akham siwa: “Liykasajj usujatakwa lupʼiskirïta, ukatwa kuntï liykayäta uk jan amuyirïkti. Ukatwa Jehová Diosajj qhawqsa servirinakapat llakisi uka toqet parlir mä qhawqha Salmonak liytʼañajatak chʼamañchapjjetäna. Sapüruw uka textonak liyirïta. Uka arunakajj wal yanaptʼitäna, chuymachtʼarakitänwa. Tiempompejja mayninakajj sapa kutitjamwa jukʼamp kusisit uñjapjjetäna. ‘Ukham kusisitäsajj nanakarus chʼamañchtʼapjjestawa’ sasaw sapjjetäna. Jehová Diosajj oracionanakaj istʼatapwa amuyayäta. Diosajj naya pachpat jan sinti llakisjjañatakiw yanaptʼitäna. Wali usutäkstsa, Jehová Diosajj kunjamsa uñjitu ukaw Biblian qhanañchasi, uka toqet jukʼamp lupʼiñatakiw chʼamachasiyäta” sasa.

12. Usuta uñjasisajj ¿kunsa Jehová Diosan yanaptʼap katoqañatakejj lurañasa?

¹² Usutäktan ukhajja, kunjamäsktansa uk Jehová Diosajj sum yati, janiw ukat pächasiñasäkiti. Ukhamajj jan sinti llakisiñatakiw  Diosar yanaptʼa mayisiñasa. Ukatsti, Jehová Diosajj suma arunak Biblian qellqayawayki ukwa liytʼañasaraki. Diosajj qhawqsa servirinakapar munasi uka toqet parlir textonakatsa jukʼampiw lupʼiñasa. Ukham lurañäni ukhajja, Jehová Diosajj qhawqsa jupar taqe chuyma servirinakar munasi ukwa amuyañäni (Sal. 84:11).

13. Familiani mä chachajja, ¿kunsa trabajopat jaqsutäsajj amuyjjaspa?

¹³ Familiani chachanakajja, taqeniw kunatï jakañatak munaski uk familiapar churañ munapjje. Mä jilatarus trabajopat jan juchanïkipan jaqsupkaspa ukham sañäni. Jilatajj walsa yaqha trabajo jikjjatañatak chʼamachaskchejja, janiw jikjjatkiti. Ukhaman uñjasisajja, janis kunatak sirvkaspa ukhamwa amuyasi. ¿Kunjamsa Jehová Diosan promesanakap amtañajj uka jilatar yanaptʼaspa?

14. ¿Kunatsa Jehová Diosajj promesanakap phoqapuni?

¹⁴ Jehová Diosajj promesanakap phoqapuniwa (Jos. 21:45; 23:14). ¿Kunatsa phoqapuni? Nayraqatajj sutip laykuw ukham luri. Jupa pachpaw ‘servirinakajar nayaw uñjaskäjja’ sasin arsuwayi, ukatwa uka arunakap phoqañatakejj obligatäkaspas ukham amuyasi (Sal. 31:1-3). Maysa toqetjja, Jehová Diosajj familiap taypinkirinakat jan llakiskaspa ukhajj kunja llakitas uñjassna uk yatiwa. Diosajja, kunatï jakañatakisa jupar taqe chuyma serviskakiñatakis munaski ukanak churañwa arsuwayi, janiw kunas uka promesap phoqañatakejj jarkʼkaspati (Mat. 6:30-33; 24:45).

15. 1) Nayrïr patak maranakan jakir cristianonakajja, ¿kuna jan walinakansa uñjasipjjäna? 2) ¿Kunar confiyañatakis Salmo 37:18, 19 qellqatajj yanaptʼistu?

¹⁵ Jehová Diosajj kunatsa promesanakap phoqe uk amttan ukhajja, qollqet pistʼat uñjasisajj Diosaw yanaptʼitani sasaw confiytanjja.  Nayrïr patak maranakan jakir cristianonakat parltʼañäni. Jerusalenankir congregacionar jan waltʼayañatak arknaqañ qalltaskäna ukhajja, taqeniw “ananukut uñjasipjjäna, apostolonakakiw Jerusalenan quedasipjjäna” (Hech. 8:1). Yaqha toqenakar sarjjasajja, qollqet pistʼataw uñjasipjjpachäna. Inas utanakapsa, trabajonakapsa, negocionakapsa aptʼasipjjchïna. Ukampis Jehová Diosajj janiw jupanakat armaskänti, jupanakas kusisitakïsipkänwa (Hech. 8:4; Heb. 13:5, 6; Sant. 1:2, 3). Diosaw jupat jan jitheqtiri uka cristianonakarojj kunatï jakañatak wakiski uk churäna, jiwasarojj ukhamarakiw yanaptʼistani (Salmo 37:18, 19 liytʼañataki).

16. Diosan markapan janis nayrjam lurañ puedjjsna ukham ¿kunatsa amuyassna?

¹⁶ Edadanëjjasajja, Diosan markapan janis nayrjam lurañ puedjjsna ukhamwa amuyassna. David reyejj edadanëjjäna ukhajj ukhamaw amuyaspachäna (Sal. 71:9). ¿Kunjamsa Jehová Diosajj yanaptʼistu?

17. ¿Kunsa Jheri kullakan experienciapajj yatichistu?

¹⁷ Jheri sat mä kullakat parltʼañäni. Juparojja, Tantachasiñ Uta askichasiñapatak mä curso apaskäna ukaruw invittʼapjjäna, ukampis jupajj janiw sarañ munkänti. Akham sänwa: “Taykäjjtwa, viudäjjaraktwa, janirakiw Tantachasiñ Uta askichañan kunjam yanaptʼañsa yatkti, janiw kunatakis sirvkti” sasa. Ukampis cursojj janïr apaskäna uka arumajja, taqe chuymapuniw Jehová Diosar orasïna. Qhepürojj Tantachasiñ Utar purïna ukhajja, ukankañapajj wakisïnti janicha uka toqet pächasiskakïnwa. Uka cursonjja, ‘Jehová Diosamp yatichatäñ munañ chuymanïñaw jukʼamp wakiskirejja’ sasaw mä jilatajj discursopan walja kuti säna. Jheri kullakajj akham sasaw  amti: “Uka arunak istʼasajja, ‘nayajj ukham chuymanïtwa’ sasaw sayäta. Jehová Diosajj kunjamsa oracionajar istʼaskäna uk amuyasajj jachayätwa. Diosarojj kunatï nayatak wali valoranïki uk churiristwa, jupajj wal yatichañ munarakitu sasaw amuyjjayäta” sasa. Uka urunakat amtasajja, kullakajj akham siwa: “Cursojj apaskäna uka tantachäwirojj ajjsartʼasisa, llakita, aynachtʼata ukhamaw mantayäta. Ukampis mistunjjasajja, janiw ajjsarjjayätti, ni llakitäjjayätsa, janirakiw janis kunatak sirvkirista ukham amuyasjjayätti” sasa.

18. Edadanëjjtan ukhasa Jehová Diosajj wali valoranitwa luratanakas uñjaskaki, ¿kunjamsa Bibliajj uk qhanañchi?

¹⁸ Edadanëjjstansa, Diosan markapan walja lurañanakaw jiwasatak utjaskaki (Sal. 92:12-15). Kuntï Jehová Diosatak lurktan ukajj janis kunäkaspa, janis kunatakis chʼamanëjjsna ukhamsa amuyasstanjja, Jehová Diosajj wali valoranitwa luratanakas uñji, Jesusajj ukhamwa yatichäna (Luc. 21:2-4). Ukhamasti, kuntï lurirjamäktan uk lurañatak chʼamachasiñäni. Jehová Diosat yaqhanakar parlapjjañäni, jilat kullakanakatakejj Diosat mayirapipjjañäni, Diosat janipun jitheqtapjjañapatak chʼamañchapjjañäni. Jehová Diosajja, janiw kunanaktï lurktan ukarjamajj ‘jupamp chika trabajirit’ uñjkistuti, jan ukasti qhawqsa aruparjam sarnaqañatak chʼamachastan ukarjamaw uñjistu (1 Cor. 3:5-9).

19. ¿Kuna toqet jan pächasiñatakis Romanos 8:38, 39 textojj yanaptʼistu?

¹⁹ Jehová Diosar servitasat walpun yuspärtanjja. Jupajja servirinakaparojj wal munasi. Niyakejjay Diosajj munañap lurañatak lurawaychistojja, Jupar adortan ukhajj wali kusisitätanwa (Apoc. 4:11). Akapachankir jaqenakajja, janis kunatak sirvksna ukhamwa uñjapjjestaspa, ukampis Jehová Diosajj janiw ukham uñjkistuti (Heb. 11:16, 38). Usutätas layku, jan qollqeni uñjasitas layku, jan ukajj edadanëjjatas layku wali llakit uñjasiñäni ukhajja, ak amtañasawa: alajjpachankir Awkisan munasiñapatjja janipuniw kunas apaqkistaspati (Romanos 8:38, 39 liytʼañataki).