1. ¿Jichha tiempot Jehová Diosajj kamsänsa?

 JICHHA tiempot parlkasinjja, Jehová Diosajj akham sänwa: “Khä urunjja, tunka jan uñtʼatanakaw yaqha markankirinakata mä judío jaqerojj isipat katuntasipjjani, sapjjarakiniwa: ‘¡Jumanakamp saraña munapjjta, nanakasti istʼapjjtwa Diosajj jumanakampïtapa!’” sasa (Zac. 8:23). Uka “mä judío” jaqejja Diosajj espíritu santopampi ajllki uka cristianonakawa, jupanakajj ‘Diosan Israelapa’ sasin uñtʼatäpjjarakiwa (Gál. 6:16). “Tunka” jaqenakajja aka oraqen wiñayatak jakañ suyasipki ukanakarakiwa, ajllitanakarojj Jehová Dios pachpaw ajlli, uksa yatipjjarakiwa. Ukatwa ajllitanakamp chika Diosar serviñajj jupanakatak wali kusiskañajja.

2. ¿Kunjamatsa tunka jaqenakajj ajllitanakamp sarapjje?

² Aka oraqen jakasipki uka ajllitanakan sutinakapajj janis jichhürunakan yatiskchejja, * aka oraqen jakañ suyasipki uka cristianonakajj jupanakampiw ‘sarapjje’. ¿Kunjamsa jupanakamp sarapjje? Biblianjja akham siwa: “Tunka [jaqenakaw] mä judío jaqerojj isipat katuntasipjjani, sapjjarakiniwa: ‘¡Jumanakamp saraña munapjjta, nanakasti istʼapjjtwa Diosajj jumanakampïtapa!’” sasa. Uka textonjja mä judiotakwa parli, ukampis uka judiojj waljanïpkaspas ukhamwa tunka jaqenakajj ‘jumanaka’ sasin sapjje. Ukaw judío jaqen jan sapakïtap qhanañchistu, ukhamatwa ajllitanakan mä grupötap amuytanjja. Jan ajllitäpki uka cristianonakajj ajllitanakamp chikaw  Jehová Diosar servipjje. Ukampis janiw ajllitanakarojj pʼeqtʼirinakäpkaspas ukham uñjapkiti, ¿kunatsa? Jesús sapakiw jupanakan pʼeqtʼiripajja (Mat. 23:10).

3. ¿Kuna jisktʼanakarus aka yatichäwin qhanañchasiskani?

³ Jichhürunakanjja yaqhep ajllitanakajj jiwasamp chikäsipkiwa. Ukatwa yaqhepanakajj akham sasin jisktʼasipjjaspa: ¿kunjamsa ajllitanakajj jupa pachpar uñjasipjjañapa? Jesusan jiwatap amtktan uka tantachäwin tʼantʼa manqʼeri vino umtʼiri cristianorojj ¿kunjamsa uñjañasäspa? ¿Ajllitanakan sapa mara waljaptatapat llakisiñasäspati? Aka yatichäwinwa uka jisktʼanakar qhanañchasiskani.

4. ¿Ajllitanakatakejj kuna suma ewjjtʼanakas 1 Corintios 11:27-29 texton utji, kunatsa ajllitanakajj uk amtapjjañapa?

⁴ Ajllitanakajja 1 Corintios 11:27-29 (liytʼañataki) texton utjki uka ewjjanakatwa sum amuytʼasipjjañapa. Jesusan jiwatap amtaski uka tantachäwinjja, ¿kunjamatsa mä ajllit cristianojj ‘juchachasispa’? Mä ajllitatï Jehová Diosan leyinakapar jan phoqkasin tʼantʼsa manqʼaspa vinsa umtʼarakispa ukhaw juchachasispa (Heb. 6:4-6; 10:26-29). “Diosajj Cristo Jesús taypi alajjpachar sarañatak jawski uka premio” katoqañatakejja, ajllitanakajj  Diosat jan jitheqtasaw servipjjañapa, uk sum yatipjje (Filip. 3:13-16).

5. ¿Kunjamsa ajllit cristianonakajj jupa pachpar uñjasipjjañapa?

⁵ Jehová Diosan espíritu santopajja, humildëñapatakiw maynirojj chʼamañchi, janiw jachʼa jachʼa tukuñapatakejja (Efes. 4:1-3; Col. 3:10, 12). Ukatwa ajllitanakajj mayninakat sipansa jukʼampïpkaspas ukham jan amuyasipkiti. Diosajj mayni servirinakapat sipansa, janiw ajllitanakarojj jukʼamp espíritu santo churkiti, uk sum yatisipjje. Janirakiw jupanakakis Biblia sum uñtʼapkaspa ukham amuyasipkiti. Jupanakajj janipuniw maynirojj akham sapkaspati: “Jumajj ajllitarakïtawa, Jesusan jiwatapajj amtaski uka tantachäwinjja tʼantʼsa manqʼañamawa vinsa umtʼañamawa” sasa. Antisas ‘Jehová Diosakiw alajjpachar sarañatak maynirojj jawsaspa’ sasaw humilde chuymamp amuyapjjaraki.

6. 1 Corintios 4:7, 8 textorjamajja, ¿ajllitanakajj kunjamäpjjañapasa?

⁶ Alajjpachar sarañatak jawsatäñajj mä suma bendicionawa, uk sumsa ajllitanakajj yatipkchejja, janiw mayninakamp suma uñjatäñ suyapkiti (Filip. 2:2, 3). Ukhamarus akwa yatipjjaraki, kunapachatï Jehová Diosajj jupanakar ajllkäna ukhajj janiw taqenir yatiykänti. Ukatwa mä cristianojj ajllitäki ukhajja jan jankʼaki yaqhepajj creyipkaspati, ukham jan creyipjjatapatjja jupajj janiw mayjtʼasiñapäkiti, kuntï Bibliajj siski ukwa amtañaparaki. Bibliarjamajja, mä suma luräwi nayajj katoqta sirinakarojj janiw jankʼak creyiñasäkiti (Apoc. 2:2). Ukhamarusa, ajllitanakajj janiw mayninakamp wal uñtʼayasiñ munapkiti, janirakiw maynimp uñtʼasipki ukhas “ajllitätwa” sasin jankʼak yatiyapkiti. Janipuniw ajllitäpjjatapat jachʼa jachʼa tukupkiti (1 Corintios 4:7, 8 liytʼañataki).

7. ¿Kunsa ajllitanakajj jan lurapjjañapäki, kunatsa?

⁷ Ajllitanakajj janiw mayni ajllitanakampikejj chikachasipkiti, yaqhachat mä grupöpkaspas ukhama. Janirakiw mayni ajllitanakarus alajjpachar sarañatakejj kunjam ajllitäpjjesa uka toqet parlañatak thaqapkiti, ni jupanakkam Bibliat yatjjatañatakis tantachasipkiti (Gál. 1:15-17). Jupanakatï ukham lurapjjaspajja, tʼaqa tʼaqa sarnaqañaw congregacionan utjaspa. Ukham lurasajja espíritu santo contraw saytʼapjjaspa. Espíritu santojja, mayachtʼata suman jakasiñ utjañapatakiw congregacionar chʼamañchi (Rom. 16:17, 18).

8. Ajllitanakarojj kunjamsa uñjtan uka toqetjja, ¿kunatsa amuyasiñasa? (Qhanañchäwi uñjjattʼäta).

⁸ Ajllitäpki uka jilat kullakanakar ¿kunjamsa uñjañasa? Criston jilapäpansa, mä arunjja  alajjpachar sarañatak ajllitäpansa janiw juparojj jachʼañchañasäkiti (Mat. 23:8-12). Jilïr irpirinakat parlkasajja Bibliajj akham siwa: “Diosar confiyapjjatapsa yateqasipjjarakim” sasa, ukampis janiw jaqenakan arkiripar tukupjjam sasin siskiti (Heb. 13:7). Yaqha textonjja akham sarakiwa: “[Yaqhep cristianonakajj] wali respetomp uñjatäpjjañapawa” sasa. Janiw ajllitäpjjatap laykojj ukham uñjañasäkiti, jan ukasti Diosan markapan ‘sum pʼeqtʼapjjatapata’ ‘parlañansa yatichañansa wal chʼamachasipjjatapatwa’ ukham uñjañasa (1 Tim. 5:17). Ajllitanakarutï wal jachʼañchjjsna ukhajja, jan waltʼaysnawa, * awisajj jachʼa jachʼaruw tukuyjjaraksna (Rom. 12:3). Cheqas janiw khitis mä ajllitar jachʼa jachʼa tukuyañ munktanti (Luc. 17:2).

9. ¿Kunjamsa ajllitanakar respetatas uñachtʼaysna?

⁹ ¿Kunjamsa Jehová Diosan ajllitanakaparojj respetomp uñjsna? Jupanakarojj kunjamatsa ajllitäpjje uka toqet janiw jisktʼañasäkiti. Uk yatiñajj janiw jiwasar waktʼkistuti. Jupanakakiw uk yatisipjje (1 Tes. 4:11; 2 Tes. 3:11). Maysa toqetjja, janirakiw familpachas ajllitäpkaspa ukham amuyañasäkiti. Alajjpachar sarañjja janiw maynejj mä herenciar uñtat familiat katoqkiti, jan ukasti Diosatwa katoqe (1 Tes. 2:12). Ukhamarusa, janirakiw mayninakar chuym ustʼayir jisktʼanak lurañasäkiti. Amuytʼañataki, mä ajllitan esposaparojj janipuniw akham jisktʼañasäkiti: “¿Kunjamas jumajj aka oraqen jan esposomampejj wiñayatak jakasïta?” sasa. Kunjamtï yatktanjja, Jehová Diosajj taqe jakirinakaruw kuntï munapki ukanak machaq oraqen churani (Sal. 145:16).

10. ¿Kunatsa mayninakar jan jachʼañchañasäki?

¹⁰ Kunapachatï ajllitanakar jan jachʼañchktan ukhajja, jiwas pachpaw jan walinakat jarkʼaqastanjja. ¿Kunatsa ukham sistanjja? Yaqhep ajllitanakajj Diosat jitheqtapjjaspawa sasaw Bibliajj sistu (Mat. 25:10-12; 2 Ped. 2:20, 21). Jiwasajj janiw mayninakar jachʼañchir jaqëñasäkiti, ukhamatwa jaqenakan arkiripar jan tukkañäniti. Maynejj ajllitäskpansa, wali uñtʼatäskpansa, jaya tiempos Jehová Diosar serviskpanjja, janiw arkiripar tukuñasäkiti (Jud. 16). Jupanakajj Diosat jitheqtapkani ukhasa, congregacionat saraqapkani ukhasa, jiwasajj Jehová Diosar confiyaskakiñäniwa, janiw Diosat jitheqtkañäniti.

11. Jesusan jiwatap amtañatak tantachäwinjja, ¿kunanakas pasaski?

¹¹ Mä qhawqha maranak nayrajja, Jesusan jiwatap amtañatak tantachäwin tʼantʼa manqʼerinakas vino umtʼirinakas marat mararjamaw jukʼanir tukuskäna. Ukampis aka qhepa maranakanjja, marat mararjamaw jukʼamp jiljjattawayi. ¿Ukanak uñjasajj llakisiñasäspati? Janiwa. Kunatsa ukham sistan uk mä qhawqha uñjañäni.

12. Jesusan jiwatap amtañatak tantachäwin tʼantʼa manqʼerinakana vino umtʼirinakana waljar tukupjjatapatjja, ¿kunatsa jan llakisiñasäki?

¹² “Jehová Diosajja jupankirinakarojj uñtʼasiwa” (2 Tim. 2:19). Khitinakas cheqpachapun ajllitäpjje ukjja Jehová Diosajj sum yati, ukampis Jesusan jiwatap amtañatak tantachäwin qhawqhanis tʼantʼsa manqʼapjje vinsa umtʼapjje uk jaktʼirinakajja, janiw khitinakas cheqpachapun ajllitäpjje uk yatipkiti. Ukatwa informenjja jan ajllitäpki ukanakamppach jakthapisi. Yaqhepanakajj tʼantʼsa manqʼapjjänwa vinsa umtʼapjjarakïnwa, ukampis jichhajj janiw uk lurjjapjjeti. Yaqhepanakasti pʼeqet usutäsaw Cristomp chik  alajjpachat apnaqaniñ munapjje. Ukatwa qhawqhanipunis aka oraqen ajllitanakat jiltʼaski ukajj jan sum yatiskiti.

13. Jachʼa tʼaqesiñ urojj qalltkani ukhajja, ¿qhawqhanipunis ajllitanakat aka oraqen jiltʼaskani uk Bibliajj qhanañchiti?

¹³ Jesusajj ajllitanakaru alajjpachar apasjjañatak jutkani ukhajja aka oraqpachanwa ajllitanakajj utjaskani (Mat. 24:31). Qhepa urunakanjja ajllitanakat mä jukʼanejj aka oraqen utjaskakiniwa sasaw Bibliajj qhanañchi (Apoc. 12:17). Ukampis jachʼa tʼaqesiñ urojj qalltkani ukhajj qhawqhanipunis jiltʼasipkani uk janiw qhanañchkiti.

14. Romanos 9:11, 16 textonakajj ¿kunsa ajllitanakat yatichistu?

¹⁴ Mä ajllitajj kunapachas jawsatäni uk Jehová Diosaw amti (Rom. 8:28-30). Jehová Diosajja Jesusajj jiwatat jaktjjäna uka qhepatwa alajjpachar saririnakar ajlliñ qalltäna. Amuyatajja, taqe cristianonakaw apostolonak tiempon ajllitäpjjäna. Ukampis qhepa maranakanjja, khitinakatï cristianötwa sapkäna ukanakajj janiw cheqpachapun Criston arkiripäpkänti. Uka tiemponjja cheqpach cristianonakajj jukʼanikiw utj-jjäna, jupanakarojj ukhamarakiw Jehová Diosajj alajjpachar sarapjjañapatak ajllïna. Kunjamtï Jesusajj siskänjja, uka cristianonakajj jan wali qora taypin jilsuri trigor uñtasitäpjjänwa (Mat. 13:24-30). Aka qhepa urunakanjja, 144.000 taypinkapjjañapatakejj Jehová Diosajj ajlliskakiwa. * Ukhamajj Diosatï akapach janïr tukuskipan ajlliskakchi ukhajja, janiw ukham luratapat pächasiñasäkiti (Romanos 9:11,  16 liytʼañataki). * Jiwasajj janiw Jesusajj parlkäna uka trabajirinakar uñtasitäñ munktanti, uka trabajirinakajj qhep purinipki ukanakar mä igualak pagasitap laykojja uvas yapuni contraw quejasipjjäna (Mat. 20:8-15).

15. ¿Janiw taqe ajllitanakajj Mateo 24:45-47 texton parlki uka ‘suma phoqeri amuyasir esclavo’ taypinkapkiti sasajj kunatsa sissna?

¹⁵ Janiw taqe ajllitanakajj ‘suma phoqeri amuyasir esclavo’ taypinkapkiti (Mateo 24:45-47 liytʼañataki). Jehová Diosasa, Jesusasa mä qhawqha servirinakap toqekiw cheqa yatichäwinak waljanir yatichi, nayrïr cristianonak tiemponsa ukhamarakwa luräna. Uka maranakanjja, alajjpachar sarañatak ajllitanakat mä qhawqhanikiw Griego Arut Qellqatanak qellqapjjäna. Jichhürunakanjja, ajllit cristianonakat mä qhawqhanikiw Diosan markaparojj “tiempopar manqʼa” churapjjaraki.

16. ¿Kunsa jumajj aka yatichäwin yateqawayta?

¹⁶ Kunanaksa aka yatichäwin yateqawaytan ukanak amtañäni. Jehová Diosajja jupan servirinakapat waljaniruw aka oraqen wiñay jakañ churani, mä qhawqhanirusti Jesusamp chika apnaqanipjjañapatakiw alajjpachan jakañ churarakini. Diosajja “mä judío” jaqer uñtatäpki uka servirinakaparusa, ‘tunka jaqenakaru’ uñtatäpki uka servirinakaparusa taqeniruw mä premio churani. Ukampis Diosajj paypach gruporuw mä pachpa leyinak phoqapjjañapa ukhamarak jupat jan jitheqtapjjañapa mayi. Taqe jupanakajj humilde chuymanïpjjañapawa, mayachtʼataw servipjjañaparaki. Congregacionan sumankañ utjañapatakis taqenirakiw chʼamachasipjjañapa. Akapachajj niyaw tukusjjani, ukhamajj Jehová Diosar serviskakiñäni, Jesusarus ‘mä sapa tamaki’ arkaskakiñäni (Juan 10:16).