1, 2. ¿Kunsa bautisasktan uka qhepat luraskakiñasa, ukat kunatsa?

 ¿QHAWQHA kutis jumajj utam qʼomachta? Inas uka utan jakañ janïr qalltkasin sum qʼomachsta. Ukampis jan qʼomachjjasma ukhajj ¿kunas pasaspa? Ratukiw polvontjjaspa, qʼañöjjarakispa. Utasan qʼomäñapatakejja, sapa kutiw qʼomachañasa.

² Amuyunakasampisa chuymasampis niya ukhamarakwa lurañasa. Janïr bautisaskasajja, jakäwisan cambionak lurañataki, “kunanakatï cuerporusa amuyurusa qʼañuchki” ukanak qʼomachañatakiw chʼamachasiwaytanjja (2 Cor. 7:1). Ukampis jichhajj apóstol Pablon aka ewjjtʼapar istʼañasawa, jupajj akham sänwa: “Jumanakajja amuyunakam machaqar tukuyasipkakiñamawa” sasa (Efes. 4:23). ¿Kunatsa uk lurañatakejj sapa kuti chʼamachasiñasa? Kuna laykutejj aka mundon ‘qʼañupasa’ ‘polvopas’ ratukiw chuymas qʼañuchaspa. Jiwasar jan uk pasañapatakisa, Jehová Dios nayraqatan qʼomäskakiñatakisa, sapa kutiw amuyussa, chuymassa, kunanaktï munktan ukanaks uñakiptʼasiñasa.

3. ¿Kunanaksa amuyus machaqar tukuyañatakejj lurañasa? (Romanos 12:2).

³ ¿Kunanaksa amuyus machaqar tukuyañataki jan ukajj amuyus cambiañatakejj lurañasa? (Romanos 12:2 liytʼäta). Ukatakejj janiw mä qhawqha suma luräwinak lurañakejj wakiskiti. Jan ukasti chuymasan kunjamäsktansa ukwa uñakiptʼasiñasa,  Jehová Diosan leyinakaparjam sarnaqañatakejj kuna cambionakatï jakäwisan lurañajj wakiski ukanak lurañatakis chʼamachasiñasarakiwa. Janiw mä kutik uk lurañasäkiti, jan ukasti sapa kutiw lurañasa.

4. ¿Kunsa akapachankir jaqenakan amuyunakapamp jan apayasiñasatakejj lurañasa?

⁴ Perfectöjjañäni ukhajja, taqe kunanwa Jehová Diosar kusisiykir sarnaqjjañäni. Uka urun puriniñapkamajja, Jehová Diosar kusisiyañatakejj chʼamachasiskakiñasawa. Romanos 12:2 textot amuytʼañäni, ukanjja apóstol Pablojj kuntï Jehová Diosajj lurañas munki uk lurañatakejj amuyus machaqar tukuyañajj wali wakiskirïtapwa qhanañchäna. Akapachankir jaqenakan amuyunakapamp apayasiñat sipansa, kunanaktï jutïrin lurañ munktan ukanakasa amtanakasas Jehová Diosan amuyuparjamäskiti janicha uk uñakiptʼasiñasajj wali wakiskiriwa.

5. ¿Jehová Diosan urupajj wali jakʼankjjatapat kunsa amuytan uk kunjamatsa yatsna? (Fotonak uñjjattʼäta).

⁵ Jehová Diosajja, ‘urup puriniñap wali amuyump suytʼaskaksna’ ukwa muni (2 Ped. 3:12). Ukhamajj akham jisktʼasiñasawa: “¿Akapachan tukusiñap wali jakʼankatap amuytti, jakäwijans ukajj qhanat amuyasi? ¿Kunanaktï yateqañatsa trabajotsa amtkta ukanakajj Jehová Diosar serviñajj nayatak wali wakiskirïtapti uñachtʼayi? ¿Nayarus familiajarus Diosaw cuidapjjetani sasat confiytjja, jan ukajj yänak jikjjatañatakti llakisisktjja?” sasa. Jehová Diosajja, jupan munañaparjam jakañatak chʼamachastan ukhajj wal kusisi (Mat. 6:25-27, 33; Filip. 4:12, 13).

6. ¿Kun lurañatakis chʼamachasiskakiñasa?

⁶ Kunsa amuyasktan uk sapa kutiw amuykiptʼasiñasa, cambiañasatï wakischi ukhajja, cambiañasawa. Apóstol Pablojj akham sasaw Corinto markankir cristianonakar ewjjtʼäna:  “Jumanakajj cristianjamat jakasipkta janicha ukjja amuykiptʼasisipkakim, kunjam jaqëpjjtasa uksa uñakiptʼasisipkakim” sasa (2 Cor. 13:5). ‘Cristianjam jakañajja’, janiw tantachäwinakar sarañakïkiti, janirakiw awisaki predicañakïkisa. Jan ukasti, kunanaksa amuyasktan, kunanaksa muntan, kunatsa mä kuns muntan uksa uñakiptʼasiñasarakiwa. Ukhamasti amuyus machaqar tukuyañatakejja, Diosan Arupat liytʼaskakiñasawa, jupjam amuyañs yateqaskakiñasawa, jupar kusisiyañatakis jan walinak apanukuskakiñasawa (1 Cor. 2:14-16).

7. Efesios 4:31, 32 textorjamajja, ¿kunampsa lurañasa, ukat kunatsa uk lurañajj chʼamäspa?

⁷ (Efesios 4:31, 32 liytʼäta). Janiw amuyus machaqar tukuyañakejj wakiskiti, jan ukasti “machaq jaqëñampi” isthapisiñasaw wakisiraki (Efes. 4:24). Uk lurañatakejj wal chʼamachasiñasawa. Uñisisiñanaka colerasiñanaka apanukuñatakejj wal chʼamachasiñasarakiwa. ¿Kunatsa ukanak jaytañajj chʼamakïspa? Kuna laykutejj uka jan walinakarojj wali yatintatäsnawa. Cheqas Biblianjja, ‘coleratak sarnaqer jaqetwa’ parli (Prov. 29:22). Bautisasjjtan uka qhepatsa, inas jan wali jaqëñampi jan atipayasiñatakejj chʼamachasiñasajj wakisiskakchini. Ukjja mä experienciamp amuytʼañäni.

8, 9. Kunjam jaqëyätansa uk apanukuskakiñajj wali wakiskiriwa, ¿kunjamsa Stephen jilatan experienciapajj uk uñachtʼayistu?

⁸ Stephen sat mä jilatajja, jan jankʼak colerasiñatakiw chʼamachasiñapäna. Jupajj akham siwa: “Bautisasjjta uka qhepatsa, coleramp jan atipayasiñatakejj chʼamachasiskakiñajänwa. Mä urojja, familianakar predicañatakiw visitasipkayäta, ukhamaruw mä lunthatarojj autojan radiop apasiskir uñjta. Ukatwa jupan qhepap tʼijuyäta. Niya katthapiñampïskayäta ukhajja, radiojj jaqtawayasajj tʼijuskakïnwa. Uka urun predikir mistupkäna uka jilat kullakanakarojja, kunjamsa radiojj aparasinjjayäta ukwa cuenttʼayäta, experienciani mä jilatasti akham sasaw jisktʼitäna: ‘¿Lunthatar katusmän ukhajj kunsa lurasmäna?’ sasa. Jilatan nayar ukham jisktʼatapatjja, nayrajj kunjam jaqëkayätti uk jan taqpach apanukutajwa amuyasiyäta” sasa. b

⁹ Nayrajj kunjam jaqëyätansa uk apanukutjams amuyastanjja, wasitampiw ukajj jakäwisan mä akatjamat uñstaspa, ukwa Stephen jilatan experienciapajj uñachtʼayistu. Ukhamatï pasistaspa ukhajja, janiw aynachtʼañasäkiti, janis suma cristianöksna ukham janirakiw amuyañasäkiti. Apóstol Pablorus ukaw pasarakïna, jupajj akham sänwa: “Kunatï walïki uk lurañ nayajj munkta ukhajja, kunatï jan walïki ukaw nayamp chikäski” sasa (Rom. 7:21-23). Niyakejjay pantjasirïstanjja, kunjamtï mä utan qʼañus polvos wasitat uñstkejja, ukhamarakiw nayrajj kunjam jaqëyätansa ukajj wasitat jakäwisan uñstaspa. Ukatwa qʼomäskakiñatakejj chʼamachasiskakiñasa. ¿Kunas ukatakejj yanaptʼistaspa?

10. ¿Kunsa jan wali jaqëñ apanukuskakiñatakejj lursna? (1 Juan 5:14, 15).

¹⁰ Mä jan wal jaytañatak chʼamachasiskstan ukhajja, Jehová Diosajj istʼitaniwa yanaptʼarakitaniwa sasin jan payachasis orasiñäni (1 Juan 5:14, 15 liytʼäta). Cheqas Jehová Diosajj janiw mä milagro toqejj uk chhaqtaykaniti, ukampis ukamp jan aynachtʼañasatakejj chʼamwa churistani (1 Ped. 5:10). ¿Kunjamsa mayisitasarjam lursna? Kunanaktï jaytawayktan ukar kuttʼañatak chʼamañchkistaspa ukanak janiw lurañasäkiti. Jaytañatak chʼamachasisktan ukanak walïkaspas ukham  uñachtʼayki uka peliculanakampisa, televisionan programanakapampisa jan ukajj kuntï liyktan ukampis janiw kusistʼañasäkiti. Janirakiw amuyunakasans jan wali munañanakampejj apayasiñasäkiti (Filip. 4:8; Col. 3:2).

11. ¿Kunjamsa machaq jaqëñampejj isthapisiskaksna?

¹¹ Nayrajj kunjamäyätansa uk apanukusajja, machaq jaqëñamp isthapisiskakiñasajj wali importantewa. ¿Kunjamsa uk lursna? Jehová Diosaru, jupajj kunjam chuymanisa uk jukʼamp sum uñtʼañataki, jupat yateqasiñatakiw chʼamachasiñasa (Efes. 5:1, 2). Jehová Diosajj kunja perdonasirisa uk uñachtʼayir mä sarnaqäwit Biblian liytʼañäni ukhajja, akham jisktʼasiñasawa: “¿Nayajj mayninakar perdontti?” sasa. Jan ukajj kunjamsa Jehová Diosajj jan waltʼäwinakan uñjasirinakar khuyaptʼayi uka toqet liytʼtan ukhajja, akhamwa jisktʼasiñasaraki: “¿Yanaptʼa munapki uka jilat kullakanakat llakistti, jupanakar yanaptʼañatakejj kunsa lurtjja?” sasa. Machaq jaqëñampi isthapisisajj amuyus cambiaskakiñäni, jiwas pachpatakis paciencianïñäni.

12. Bibliajj jaqenakar cambiapjjañapatak yanaptʼañatakejj chʼamaniwa, ¿kunjamsa Stephen jilatan experienciapajj uk uñachtʼayi?

¹² Párrafo 8 ukan parlaniwayktan uka Stephen jilatajja, jukʼat jukʼatwa machaq jaqëñamp isthapisjjäna. Jupajj akham siwa: “Bautisaskta ukat aksarojja, colerampi jan atipayasiñatak chʼamachasiñajj awisajj janiw faciläkänti. Jan nuwasiñatakejj sarjjerïtwa, jan ukajj sumat askichañatakiw chʼamachasirïta. Esposajasa ukat yaqhanakas coleramp jan atipayasitajatjja felicittʼapjjetänwa, nayatakejj ukham chʼamachasitajajj janiw cheqaw sañjamäkänti. Janiw chʼamajampik ukanak jaytawaykti. Bibliajj jaqenakar nayra jakäwinakap jaytañatak yanaptʼañatak chʼamanïtaparuw confiyta” sasa.

13. ¿Kunatï walïki uk luraskakiñatakejj kunas yanaptʼistani? (Gálatas 5:16).

¹³ (Gálatas 5:16 liytʼäta). Jehová Diosajja, munasiñapatwa kunatï walïki uk lurañatak chʼamachasiskakiñasatakejj espíritu santopamp yanaptʼistu. Diosan Arup yatjjatktan ukhajja, espíritu santopampiw yanaptʼayastanjja. Tantachäwinakar sarktan ukhajja, espíritu santo katoqaraktanjja. Ukanwa jilat kullakanakasampejj jikistanjja, jupanakajj jiwasjamarakiw kunatï walïki uk lurañatakejj chʼamachasisipki, ukajj walpun chʼamañchtʼistu (Heb. 10:24, 25; 13:7). Jehová Diosar chuymatpach orastan, mä jan walir atipañatak yanaptʼa mayistan ukhajja, jan aynachtʼañasataki ukhamarak chʼamachasiskakiñasatakiw espíritu santop churistu. Cheqas ukanak lurañatak chʼamachaskchiñänisa, jan wali munañanakajj inas jan chhaqtkchiniti, ukampis jan wali munañanakampi jan apayasiñasatakejj chʼamwa churistani. Kunjamtï Gálatas 5:16 textojj siskejja, espíritu santompi irpayasirinakajj ‘janiw jañchin munañanakap lurapkaniti’.

14. ¿Kunatsa kunatï walïki uk amuyañatakejj chʼamachasiskakiñasa?

¹⁴ Jehová Diosamp sum apasiñatak yanaptʼkistaspa ukanak lurañ qalltjjstan ukhajja, ukanak janiw jaytañasäkiti, kunatï walïki uksa lupʼiskakiñasawa. ¿Kunatsa? Kuna laykutejj jiwas contra nuwasir mä enemigow utjistu, ukajj tentacionawa, sapüruw jiwas contra nuwasiraki. Bautisasjjtan uka qhepatsa, kunanaktï jan lurañasäki ukanak lurañ munaskaksnawa, qollqet anataña, machantasiña, pornografía uñchʼukiña jan ukajj yaqha jan walinakwa lurañ munjjsna (Efes. 5:3, 4). Mä wayna jilatajj akham siwa: “Chacha masijar munasiñajj chuymajan utjki uk jaytañaw nayatak jukʼamp chʼamajja. Ukajj pasjjakiniwa sasaw  amuyayäta, ukampis janiw apanukuñ puedkti, chuymajankaskakiwa” sasa. ¿Kunsa mä jan wali munañajj chuymasankaskakchi ukhajj lursna?

15. Taqeniw jan wali munañanak apanukuñatak chʼamachasipjjañapa, ¿kunjamsa uk yatiñajj chʼamañchtʼistu? (Foto uñjjattʼäta).

¹⁵ Mä jan wali munañ apanukuñatak chʼamachasiskstan ukhajja, janiw sapäktanti, uk amtañasapuniwa. Bibliajj akham siwa: “Kuna yantʼanakantï jaqenakajj uñjasipki uka pachpa yantʼanakanwa jumanakajj uñjasipjjtajja” sasa (1 Cor. 10:13a). Uka arunakajja, Corinto markankir cristianonakatakiw qellqasïna. Jupanakat yaqhepajja, adulterio juchan sarnaqerinaka, chachapura jan ukajj warmipura ikintasirinaka, machirinaka ukhamäpjjänwa (1 Cor. 6:9-11). Bautisasjjapjjäna uka qhepat jan wali munañanakap apanukuñatakejj ¿janit chʼamachasjjapjjañapäna? Cheqas janiw ukhampunïkänti. Jupanakat taqenis alajjpachar sarañatak ajllitäpkchïnjja, pantjasirïsipkakïnwa. Ukatwa jan wali munañanakapampi jan apayasiñatakejj chʼamachasisipkakiñapäna. Uk yatiñajj walpun chʼamañchtʼistu, kuna laykutejj yaqhepanakajj jiwasjamarakiw uñjasiwayapjje, ukampis jan wali munañanakaparojj atipjawayapjjewa. Ukhamajj ‘Diosar confiyañan suma saytʼatäñasawa. Jiwasajj yattanwa, kunjamtï jiwasajj tʼaqesisipktanjja uka pachparakiw oraqpachan jilatanakasajj tʼaqesisipki’ (1 Ped. 5:9).

16. ¿Kuna tramparus jan jaltʼañasäki, ukat kunatsa?

¹⁶ Mä jan wal apanukuñatak chʼamachasiskta uk janiw khitis entiendkitaspati sasin janiw amuyañasäkiti. Ukham amuyañajj mä trampäspawa, mä jan wal jaytañatak chʼamachasitasajj inamayäkaspasa, janipunis ukajj jaytañjamäkaspa ukham amuyjjsna. Ukampis ukham amuyañajj janiw Bibliarjamäkiti, Bibliajj akham siwa: “Diosajj arunakap phoqeriwa, jupajj janiw munkaniti jumanakajj jan aguantirjamäpkta ukat jukʼampi yantʼatäpjjañamjja.  Jupaw yantʼanakan aguantapjjañamatakejj yanaptʼapjjätam” sasa (1 Cor. 10:13b). Ukhamajj chuymasantï mä jan wal lurañajj wal utjchejja, Jehová Diosarojj jan jitheqtas serviskaksnawa. Diosan yanaptʼapampejja, uka jan wal lurañ munañampejj janiw apayaskañäniti.

17. Mä jan wal lurañ munañajj chuymasan utjakipunchinisa, ¿kunsa jiwasajj lurañasa?

¹⁷ Ak amtapjjapuniñäni: pantjasirïtas laykojja, mä jan wal lurañ munañajj chuymasan utjakipuniniwa. Ukampis mä jan wal lurañ munañäni ukhajja, José waynjamarakiw ukanak jankʼak apanukuñasa, jupajj Potifaran esposap nayraqatat jankʼakiw escapjjäna (Gén. 39:12). Janipuniw mä jan wal lurañ munktan ukarojj mä esclavjam katuyasiñasäkiti.

18, 19. ¿Kuna jisktʼanakas amuyus machaqar tukuyaskakiñatak yanaptʼistani?

¹⁸ Amuyus machaqar tukuyañatakejj chʼamachasiskakiñasawa, ukhamat amuyusasa luratanakasas Jehová Diosar kusisiyañapataki. Ukatakejj sapa kutiw jiwaspachpat amuykiptʼasiñasa, akham jisktʼasiñasarakiwa: “¿Luratanakajampejj akapachan tukusiñap jakʼankatap uñachtʼaytti? ¿Machaq jaqer tukuñatakejj chʼamachasiskaktti? ¿Jan walinak lurañ munañampi jan apayasiñatakejj Jehová Diosan espíritu santopamp yanaptʼayasisktti?” sasa.

¹⁹ Jiwas pachpat amuykiptʼasisajja, janiw perfectöñ thaqañasäkiti, jan ukasti qhawqsa mejorasktan ukwa amuytʼañasa. Mä kunan mejorañasatï wakischini ukhajja, chʼamachasiskakiñäni. Filipenses 3:16 texton ewjjtʼaparjam lurarakiñäni, ukan akham siwa: “Kawkjakamajjay Diosar serviñan jiltawaystan uka thaknam sum sarnaqaskakiñäni” sasa. Ukhamtï lurañänejja, amuyus machaqar tukuyañatak chʼamachasitasat Jehová Diosajj bendisistaniwa.