1. 1) ¿Kunatsa maynejj ewjjtʼistaspa? 2) ¿Kunatsa ewjjtʼanakar istʼañajj wali wakiskirejja?

 TAQENIW awisajj ewjjtʼatäñ muntanjja, awisasti khitirutï respetktan ukarojj jiwasaw ewjjtʼa maytanjja. Yaqha horasanakajj mä jilataw jiwasat llakisisajj ‘jan wali thakir saranukuñampïsktawa’ sasin amuytʼayistaspa, kun luratasattï qhepat arrepentisksna ukatwa amuytʼayistaspa (Gál. 6:1). Juchar purtʼasitasat cheqañchapkistu ukhaw ewjjtʼapjjarakistaspa. Kunjamsay ewjjtʼapkchistojja, uka ewjjtʼanakarojj istʼañasawa, kuna laykutejj jiwasan askisatakiwa, jakañ vidassa salvaspawa (Prov. 6:23).

2. Proverbios 12:15 textorjamajja, ¿kunatsa ewjjtʼanak istʼañasa?

² Aka yatichäwitak apstʼat textojja, ‘khitinakatï yatiñanïpki ukanakar istʼañasatakiw’ chʼamañchtʼistu (Prov. 22:17). Janiw taqe kunsa yatkapuntanti, jiwasat sipans jukʼamp yatiñani, experiencianejj utjapuniwa (Proverbios 12:15 liytʼäta). Ukhamajj ewjjtʼanak istʼktan ukhajja, humilde chuymanïtaswa uñachtʼaytanjja. Jiwas sapak jan kuns lurañ pueditasa, amtanakas phoqañatak yanaptʼa munataswa uñachtʼayaraktanjja. Salomón reyejj Jehová Diosan amuytʼayatäsajj akham sasaw qellqäna: “Walja ewjjtʼirinakampejja taqe kunas sumaruw sari” sasa (Prov. 15:22).

3. ¿Kunjam toqenakatsa ewjjtʼa katoqsna?

³ Awisajj cheqakwa ewjjtʼapjjestaspa, jan ukajj yaqha toqew ewjjtʼapjjestaspa. ¿Kunjamsa yaqha toqejj ewjjtʼa katoqtanjja? Biblia liytʼasa jan ukajj Bibliat apstʼat qellqatanak liytʼasaw ewjjtʼa katoqtanjja, ukanakaw taqe kuns kunjamsa lurasktan uk amuytʼayistu, cambionak lurañatakis chʼamañchtʼarakistu (Heb. 4:12). ¿Kunjamsa cheqak ewjjtʼa katoqaraktanjja? Mä anciano jan ukajj experienciani mä jilata jan ukajj mä kullakaw cheqak ewjjtʼistaspa, kunansa chʼamachasiñasa uk  amuyasaw ewjjtʼapjjestaspa. Jiwasar munasitapatwa maynejj Bibliarjam ewjjtʼistaspa. Ukhamajj uka ewjjtʼar istʼasasa, uka ewjjtʼarjam lurañatak chʼamachasisas yuspärasirïtaswa uñachtʼayasktanjja.

4. Eclesiastés 7:9 textorjamajja, ¿kunsa ewjjtʼatajj jan lurañasäki?

⁴ Cheqansa cheqak ewjjtʼapkistu ukhaw ukar istʼañajj chʼamakïspa, inas colerasjjaraksna. ¿Kunatsa chʼamakïspa? Pantjasirïtas amuyañajj janiw chʼamäkiti. Ukampis kunapachatï maynejj kunansa pantjastan uk cheqak ewjjtʼistu ukhajja, ukar istʼañajj chʼamakïspawa (Eclesiastés 7:9 liytʼäta). Inas pantjasitas jan uñtʼasiñ munasajj kunaymaninakak parljjsna, jan wali amtampiw ewjjtʼitu sasaw amuyjjsna, jan ukajj kunjamsa ewjjtʼistu ukat colerasjjaksnawa. Inas akham amuyjjaraksna: “Kuna derechonis nayar ewjjtʼitu, ¡jupajj pantjasirakiwa!” sasa. Janitï uka ewjjtʼajj gustkchistojja, janiw ukar istʼjjsnati, jan ukajj maynin ukaruw ewjjtʼayasiñatak sarsna, ukhamat kuntï istʼañ munktan uk istʼañataki.

5. ¿Kunanakatsa aka yatichäwin yatjjataskañäni?

⁵ Aka yatichäwinjja, Biblian parlki uka yaqhep jaqenakatwa yatjjataskañäni, jupanakat yaqhepajj ewjjtʼatajj janiw katoqasipkänti, yaqhepasti katoqasipjjarakïnwa. Ukatjja kunas ewjjtʼanak katoqasiñatakejj yanaptʼistaspa, ukarjam lurañajj kunjamsa yanaptʼarakistaspa ukanakatwa yatjjataskarakiñäni.

6. ¿Rehoboam reyit kunsa yateqtanjja?

⁶ Rehoboam chachat parltʼañäni. Israel markan reyipäjjäna ukhajja, tatamajj mä arunjja Salomonajj nanakan yukuj wali jathir tukuyawayki uk phisnaptayarapipjjeta sasaw markankirinakajj mayipjjäna. Ukhamïpanjja Rehoboam reyejj Israel markan ancianonakaparuw jisktʼasïna, ukham luratapajj wali askïnwa. Jupanakajja kuntï markankirinakajj mayipktam ukanak istʼäta ukhajja, jumarojj servipjjapunïtamwa sasaw jupar sapjjäna (1 Rey. 12:3-7). Amuyatajja kuntï jupar ewjjtʼapkäna ukajj Rehoboam reyirojj janiw gustkänti, ukatwa jupamp chik jilsupkäna uka chachanakar jisktʼasir saräna. Inas uka chachanakajj 40 jila maranïpjjchïna, ukhamajj mä jukʼa experiencianïpjjpachänwa (2 Crón. 12:13). Ukampis janiw Rehoboam reyirojj sum ewjjtʼapkänti, markar jukʼamp tʼaqesiyañapatakiw ewjjtʼapjjäna (1 Rey. 12:8-11). Rehoboam reyejj pä kasta ewjjtʼanakwa katoqäna. Kawkïris walejja uk amtañatakejj Jehová Diosaruw oracionan jisktʼasispäna, ukampis janiw ukham lurkänti. Jupamp chik jilsupkäna uka chachanakan ewjjtʼapaw jukʼamp gustäna, ukatwa ukar istʼäna. Ukham amtatapatjja, jupasa markasa jan walinwa uñjasipjjäna. Jiwasampejj ukaw pasarakispa, yaqhep ewjjtʼanakajj janiw gustkapunistaspati. Ukampis Bibliarjamächi ukhajja, katoqtʼasiñasawa.

7. ¿Kunatï Uzías reyirojj paskäna ukat kunsa yateqtanjja?

⁷ Uzías reyejj janiw ewjjtʼanak katoqaskarakïnti. Incienso loqtañatakiw templon kawkirutï sacerdotenakak mantapjjerïkäna ukar mantäna. Sacerdotenakajj akham sasaw jupar sapjjäna: “¡Uzías, Jehová Diosar incienso nakhayañamajj janiw jumar waktʼktamti! Sacerdotenakakiw incienso nakhayapjjañapa” sasa. Ukham ewjjtʼatajj Uzías reyejj ¿kamachänsa? ‘Wal colerasïna’ sasaw Bibliajj qhanañchi. ¿Kunatsa ewjjtʼa jan katoqaskänjja? Reyïtap laykojj munañaparukis taqe kuns lurañapäkaspa ukham inas amuychïna. Ukampis Jehová Diosajj janiw ukham amuykänti. Uziasatï humilde chuymanïspänjja, ewjjtʼarojj istʼaspänwa, jankʼakiw templotsa sarjjarakispäna, Jehová Diosajj inas perdonarakchispäna. Ukampis jachʼa jachʼa tukutapatjja, Jehová  Diosajj lepra usumpiw castigäna, “jiwañkamaw lepra usunïskäna” (2 Crón. 26:16-21). ¿Kunatï Uzías reyir paskäna ukat kunsa yateqtanjja? Khitïskchiñänisa, Biblian ewjjtʼanakaparutï jan istʼkañäni ukhajj janiw Jehová Diosampejj sum apasjjsnati.

8. ¿Ewjjtʼatajj Job chachajj kamachänsa?

⁸ Bibliajja ewjjtʼanak katoqasiri jaqenakatwa parlaraki, ukham lurapjjatapatjja Diosajj jupanakar bendisïnwa. Job chachat parltʼañäni. Jupajj Jehová Diosar kusisiykirsa sarnaqañ munkchïnjja, janiw perfecto jaqëkänti. Jan walin uñjasisajja, jan walinakwa parläna. Ukatwa Jehová Diosasa Elihú chachas jupar cheqak ewjjtʼapjjäna. ¿Ukham ewjjtʼatajj Job chachajj kamachänsa? Humilde chuymampiw ewjjtʼanak katoqtʼasïna. Jupajj akham sänwa: “Jan amuytʼasisaw parlayäta [...]. Ukatwa nayajj ukanak arsutajat arrepentista, uk uñachtʼayañatakejj laqʼa patjjana qhella patjjan qontʼasirakta” sasa. Humilde chuymanïtapatjja Jehová Diosajj Job chachar bendisïnwa (Job 42:3-6, 12-17).

9. ¿Jehová Diosan ewjjtʼatajj Moisesajj kamachänsa, ukat kunatsa jiwasatakejj wali yateqaskayajja?

⁹ Moisesajja mä jan wali luratapat Jehová Diosan cheqañchäwip katoqasïnwa, ewjjtʼanak katoqasiñ toqet jupajj wali yateqaskayawa. Mä kutejja coleramp atipayasisajj janiw Jehová Diosar jachʼañchjjänti, ukatwa suma oraqer jan mantjjänti (Núm. 20:1-13). Diosan ukham amtatapamp jan acuerdökäna ukhajja, Jehová Diosajj akham sasaw jupar säna: “Jan mayampis uka toqet parljjestati” sasa (Deut. 3:23-27). Colerasiñat sipansa, kuntï Jehová Diosajj amtjjäna ukarojj respetänwa. Israel markar pʼeqtʼañapatakis Jehová Diosajj yanaptʼaskakïnwa (Deut. 4:1). Job chachasa Moisesasa jiwasatakejj wali yateqaskayawa. Job chachajj janiw nayrjam amuyjjänti, juchap jan uñtʼasiñ laykus janiw kunaymaninak parlkänti. Moisesajj suma oraqer mantañ aptʼaskchïnsa, jan jitheqtasaw Jehová Diosar serviskakïna. Ukhamatwa Jehová Diosan cheqañchäwip katoqasitap uñachtʼayäna.

10. 1) Proverbios 4:10-13 textorjamajja, ¿kunjamsa ewjjtʼanak katoqasiñajj yanaptʼistu? 2) ¿Kunjamsa yaqhep jilat kullakanakajj ewjjtʼanak katoqasiwayapjje?

¹⁰ Job chachasa Moisesasa janiw Jehová Diosat jitheqtapkänti, jupanakat yateqasiñajj wal yanaptʼistani (Proverbios 4:10-13 liytʼäta). Walja jilat kullakanakaw ukham lurawayapjje. República Democrática del Congo ukan jakasiri Emmanuel * jilatajja, mä qhawqha jilatanakatwa ewjjtʼanak katoqäna. Jilatajj akham siwa: “Congregacionajankir experienciani yaqhep jilatanakajja, Diosar serviñan niya aynachtʼaskatajwa amuyapjjäna, ukatwa nayar yanaptʼañatakejj jutapjjäna. Ewjjtʼanakaparojj istʼayätwa, ukhamïpansti janiw jan walinakan uñjaskayätti” sasa. Canadá markankiri Megan sat precursora kullakajj akham siwa: “Mayninakajj ewjjtʼapkitäna ukajj janiw gustkapunitänti, ukampis uk istʼañajajj wakisïnwa” sasa. Croacia markankiri Marko sat jilatajj akham sarakiwa: “Congregacionan mä privilegio aptʼasiyäta, ukampis mayninakan ewjjtʼanakapajj Jehová Diosamp wasitat sum apasjjañatakiw yanaptʼitäna, ukwa nayajj amuyta” sasa.

11. ¿Kunsa Karl Klein jilatajj amuyasïna?

¹¹ Karl Klein jilatarojja, ukhamarakiw ewjjtʼanak katoqasiñajj yanaptʼäna, jupajj Cuerpo Gobernantenkirïnwa. Sarnaqäwipat parlki uka qellqatanjja, kunjamsa mä kutejj Joseph Rutherford wali munat amigopajj wali qhan jupar ewjjtʼäna ukwa jilatajj cuenttʼäna. Qalltanjja uka jilatan ewjjtʼap janiw sum  uñjkänti. Klein jilatajj akham sänwa: “Rutherford jilatajj mayamp uñjitäna ukhajja, kusisitaw akham sitäna: ‘¡Karl, kunjamäsktasa!’ sasa. Niyakejjay chuyma ustʼatakïskchïyätjja, janiw taqe chuym aruntkayätti. Ukatwa jupajj akham sitäna: ‘¡Karl, amuyasim! ¡Supayaw trampapar jaltʼayañ munasktamjja!’ sasa. Phenqʼasiñatjja ‘jilata Rutherford, janiw kunäkisa’ sasaw sayäta. Ukampis jan cheq saskataj amuyasajja, mayampiw akham sitäna: ‘Walikiwa. Ukampis amuyasim. Supayaw trampapar jaltʼayañ munasktamjja’ sasa. ¡Cheqakwa jilatajj saskäna! Maynejj kuntï jiwasar sañapäki ukakwa saskistaspa, ukampis ukham satapat jupatak chuyma ustʼatakïsksna ukhajja, Supayajj facilakwa trampapar jaltʼayistaspa” sasa * (Efes. 4:25-27). Klein jilatajj Rutherford jilatan ewjjtʼap istʼänwa, ukat wali sumaw apasisipkakïna.

12. ¿Kunjamsa humilde chuymanïñajj ewjjtʼanak katoqasiñatak yanaptʼistu? (Salmo 141:5).

¹² Humilde chuymanïñaw ewjjtʼanak katoqasiñatak yanaptʼistani. Cheqas humilde chuymanïñaw pantjasirïtassa, awisajj jan amuytʼasis kuns lurirïtassa amtayistu. Kunjamtï uñjaniwayktanjja, qalltan Job chachajj janis sum amuykchïnjja qhepat janiw ukham amuyjjänti. Elihú chachajj jupat sipans sullkäkchïnsa, humilde chuymampiw Job chachajj ewjjtʼanakap istʼäna (Job 32:6, 7). Humilde chuymanïtapatjja Jehová Diosajj Job chacharojj bendisïnwa. Ewjjtʼatäñajj janis wakiskaspa ukham amuyañäni jan ukajj jiwasat sipans jukʼamp sullkäki ukajj ewjjtʼistani ukhajja, humilde chuymanïñaw uka ewjjtʼanak katoqasiñatak yanaptʼistani. Canadá markankiri mä anciano jilatajj akham siwa: “Janiw kunjamtï mayninakajj uñjapkistu ukham jiwaspachpajj uñjasktanti, ukhamajj jan khitin ewjjtʼatajj ¿kunjamarak Diosar serviñan nayrar sartañänisti?” sasa. Taqeniw espíritu santon achupan luräwinakap uñachtʼayañ yateqaskakiñasa, suma yatichirïñatakis chʼamachasiskakiñasawa (Salmo 141:5 liytʼäta).

13. ¿Kunjamsa ewjjtʼanak uñjañasa?

¹³ Jehová Diosajj munasiñatwa ewjjtʼistu. Jupajj sum jakasiñaswa muni (Prov. 4:20-22). Jehová Diosajj Biblia toqe, Bibliat apstʼat qellqatanak toqe, experienciani mä jilata jan ukajj mä kullak toqe ewjjtʼkistu ukajja, jiwasar munasitapwa uñachtʼayistu. Kunjamtï Hebreos 12:9, 10 textojj siskejja, Jehová Diosajj “jiwasan askisatakiw” ewjjtʼistu.

14. ¿Ewjjtʼapkistani ukhajj kunsa amuyañasa?

¹⁴ Kunjamsa ewjjtʼapjjestu uk amuyañat sipansa kunsa ewjjtʼapjjestu uk amuyañasawa. Awisajja maynejj janis sum ewjjtʼkistaspa ukhamwa amuyassna, cheqas ewjjtʼirejj wali  amuyumpi ewjjtʼañatakiw chʼamachasiñapa (Gál. 6:1). * Ukampis jiwasarutï ewjjtʼapjjestanejja, janiw sum ewjjtʼkituti sasin amuyañat sipansa, kunsa ewjjtʼasipkistu uk amuyañasawa. Inas akham jisktʼassna: “Janisay kunjamtï munkta ukham ewjjtʼkchitojja, ¿razonanikti saskpachïtu? ¿Ewjjtʼirin pantjasitanakap uñchʼukiñat sipansa kuntï sawaykitu ukar istʼiristti?” sasa. Ewjjtʼapkistani ukhajj katoqtʼasiñajj wali askïspawa (Prov. 15:31).

15. ¿Kunatsa ewjjtʼa mayiñasa?

¹⁵ Bibliajj ewjjtʼanak mayiñasatakiw chʼamañchtʼistu. Proverbios 13:10 textojj akham siwa: “Yatiñajja khitinakatï ewjjtʼa thaqapki ukanakatakiwa” sasa. ¡Ukajj cheqäskapuniwa! Jilapartejja khitinakatï ewjjtʼayasiñ suyañat sipans ewjjtʼa mayipki ukanakaw Diosar serviñan jukʼamp nayrar sartapjje. Ukhamajj ewjjtʼa suyaskañat sipans jiwasaw ewjjtʼa mayiñasa.

16. ¿Kunapachas ewjjtʼa maysna?

¹⁶ ¿Kunapachas congregacionasankir mä jilataru jan ukajj mä kullakar ewjjtʼa maysna? Uka toqet mä qhawqha uñjañäni. 1) Mä kullakajja, Bibliat yatichki ukar compañtʼayasiñatakiw experienciani mä publicadorar mayi, ukatsti jukʼamp suma yatichirïñatakejj kunansa chʼamachasiñapa ukwa jisktʼaraki. 2) Mä soltera kullakajj pantalonanakwa alasiñ muni, ajlliski uka pantalonanakajj walikïskiti janicha uka toqetwa experienciani mä kullakar jisktʼasi. 3) Mä jilatajja congregacionapanwa nayrïr discursop arstʼañapa, jupajj discurso arstʼañ toqet experienciani mä jilataruw discursop istʼañapatak mayi, ukhamat kunanakansa chʼamachasiñapa uka toqet ewjjtʼañapataki. Discurso arstʼañ toqet experiencianëjjapjje uka jilatanakasa, yaqha jilatanakaruw kunansa chʼamachasipjjañapa uka toqet ewjjtʼa mayipjjaspa, ukatjja uka ewjjtʼarjamaw lurapjjarakispa.

17. ¿Ewjjtʼanakajj jiwasar yanaptʼañapatakejj kunsa lurañasa?

¹⁷ Jutïr semananakasa jan ukajj jutïr phajjsinakasa inas cheqaki jan ukajj yaqha toqnam ewjjtʼa katoqchiñäni. Ukhamäni ukhajja, kuntï aka yatichäwin yateqawayktan ukanakwa amtañasa: humilde chuymanïñasawa, kunjamsa ewjjtʼapjjestu uk amuyañat sipansa kunsa ewjjtʼapjjestu uk amuyañasawa, ewjjtʼapkistu ukarjamaw lurañasaraki. Janiw khitis yatiñanejj naskiti. Ukampis jiwasatï ewjjtʼanaksa cheqañchäwsa katoqasiñäni ukhajja, yatiñani jaqeruw tuküta sasaw Bibliajj qhanañchistu (Prov. 19:20).