1. ¿Atip atipa sarnaqañajj kunarus purtʼasiyistaspa?

AKAPACHANJJA, walja jaqenakajj mayninakat jilankkaspas ukham amuyasiñatakejj kuns lurapjjakiwa. Sañäni, empresani mä jaqejj empresapak mayninakat jilankañapatakejj mayninakaruw jan waltʼayaspa. Mä pelot anatiristi, atipañ laykojj aleqatwa mayni equipon anatiriparojj usuchjaspa. Mä yateqerejj wali uñtʼat universidadar mantañatakejj examenan trampwa lurarakispa. Ukanak lurañajj jan walïtap cristianonakajj yattanwa, kuna laykutejj ukanakajj ‘jañchin lurañanakapawa’ (Gál. 5:19-21). Congregacionanjja, yaqhep jilat kullakanakajj inas jan amuyasisa, atip atipa sarnaqañar chʼamañchasipkchispa. Ukanakat amuyasiñasawa. ¿Kunatsa? Ukham sarnaqaña utjaspa ukhajja, congregacionajj janiw mayachtʼatäjjaspati.

2. ¿Kunanakatsa aka yatichäwin yatjjataskañäni?

² Aka yatichäwinjja, kunanakas jilat kullakanakat jilanksnas ukham amuyasiñar apistaspa ukanakatwa yatjjataskañäni. Ukatjja, Diosar jan jitheqtas servirinakapat Biblian parlki ukanakajj kunjamsa uka kasta amuyumpi jan apayasipkäna ukwa yatjjataskarakiñäni. Ukampis nayraqatjja, kunjamäsktansa uk jiwas pachpaw uñakiptʼasiñasa. ¿Kunjamsa uk lursna?

3. ¿Kunanaksa jisktʼasiñasa?

³ Kunjamäsktansa uk sapa mä qhawqha tiempotwa uñakiptʼasiñasa. Akham sasaw jisktʼassna: “¿Mayninakat jilankkiristsa ukham amuyasta ukhakit sum jikjjatastjja? ¿Kunatsa congregacionan wal trabajtjja? ¿Mayninakat jilankañ layku, jan  ukajj mä jilataru mä kullakaru atipañ laykucha? ¿Jan ukajj Jehová Diosar kusisiyañ laykuch ukham trabajtjja?” sasa. ¿Kunatsa uka jisktʼanakar qhanañchañajj wakisi? Bibliajj kamsisa uk uñjañäni.

4. Gálatas 6:3, 4 texton siski ukarjamajja, ¿kunatsa mayninakamp jan igualayasiñasäki?

⁴ Bibliajja, janiw mayninakamp igualayasiñasäkiti sasaw ewjjtʼistu (Gálatas 6:3, 4 liytʼañataki). ¿Kunatsa? Mayninakamp igualayasisin jupanakat jilanksnas ukham amuyassna ukhajj jachʼa jachʼaw tukjjsna. Maysa toqetjja, igualayasisin jupanakat minusäksnas ukham amuyassna ukhajj aynachtʼjjsnawa. Uka paypach amuyunakajj janiw walïkiti (Rom. 12:3). Grecia markankiri, Katerina * sat mä kullakajj akham siwa: “‘Mayni kullakanakaw nayat sipan jukʼamp suma uñnaqtʼanïpjje, jukʼamp sum predicapjje, wali munasirïpjje’ sasaw sapa kuti igualayasirïta. Ukham igualayasisajj janis kunatak sirvkirista ukhamaw amuyasirïta” sasa. Jehová Diosajj janiw suma uñnaqtʼanïtasata, sum parltʼañ yatitasata, wali uñtʼatätasat markapar irpankistuti, jan ukasti Jupar munasitasata, Yoqapar istʼatasatwa irpanistu (Juan 6:44; 1 Cor. 1:26-31).

5. ¿Kuntï Hyun sat jilatajj lurkäna ukat kunsa yateqsna?

⁵ Akham sasaw jisktʼasiraksna: “¿Mayninakamp sum apasiritti jilat kullakanakajj uñtʼapjjetu, jan ukajj mayninakamp jankʼak jan waltʼayasiritcha uñtʼapjjetu?” sasa. Corea del Sur markankiri, Hyun sat jilatat parltʼañäni. Jupajja, congregacionan privilegioni jilatanakajj jupat jilankañsa munapkaspa ukhamwa mä tiempojj amuyäna. Jilatajj akham siwa: “Jilatanakar jiskʼachiriyätwa, kuntï sapkäna ukarojj sapa kutiw janiw walïkiti sirïyäta” sasa. ¿Kunjamsa ukajj congregacionar jan waltʼayäna? Jupajj akham saskakiwa: “Ukham luratajajj congregacionaruw tʼaqjtayäna” sasa. Amigonakapaw jan wal luraskatap amuyasiñapatak yanaptʼapjjäna. Hyun jilatasti, jankʼakiw cambiäna. Jichhajj wali munasiri ancianöjjewa (jilïr irpiri). ¿Kunsa jupat yateqsna? Jiwasatï sumankañ thaqañat sipansa, atip atipa sarnaqañatak chʼamañchaskatas amuyastan ukhajj jankʼakiw cambiañasa.

6. Gálatas 5:26 textorjamajja, ¿kuna jan walinakas atip atipa sarnaqañar apistaspa?

⁶ (Gálatas 5:26 liytʼañataki). ¿Kuna jan walinakas atip atipa sarnaqañar apistaspa? Maya, wali wal tukuña. Ukham jaqejja, jachʼa jachʼaw tuku, jupatakikiw taqe kuns munaraki. Paya, envidiasiña. Ukham jaqejja, janiw kunatï yaqhan utjki ukak munkiti, jan ukasti kunapatï maynin utjki uk apaqañwa munaraki. Cheqas maynir envidiasiñajj jupar uñisiñampi sasiwa. Ukhamajja, apkatir jan wali usutsa jarkʼaqasksna ukhamwa ukanakat jarkʼaqasiñasa.

7. ¿Kunatsa wali wal tukuñasa envidiasiñas jan walïki uk kuna uñachtʼäwis sum amuytʼayistu?

⁷ Wali wal tukuñampi envidiasiñampejja, kunanakatï avionan combustiblepar qʼañuchki ukampi sasiwa. Uka qʼañunakajj avión jalkipan combustiblen mangueranakap taptʼaspa ukhajja, janïr jalnoqkasaw motoranakajj jan chʼamanëjjaspati, ukatsti avionajj jalaqtjjakispawa. Maynin chuymapantï wali wal tukuña, envidiasiñajj utjani ukhajja, ukhamarakiw Jehová Diosar mä qhawqha tiempo sirvkasajj aynachtʼjjani (Prov. 16:18). Diosar janiw sirvjjaniti, jupa pachpaw jan waltʼayasini, mayninakarus jan waltʼayarakiniwa. ¿Kunsa wali wal jan tukuñataki jan envidiasiñatak lursna?

8. ¿Kunjamsa wali wal tukuñar atipjsna?

 ⁸ Apóstol Pablon ewjjtʼaparjam lurañäni ukhajj wali wal tukuñar atipjañäniwa. Filipos markankirinakar akham sasaw jupajj ewjjtʼäna: “Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam, jumanakat sipansa jilïrïpkaspas ukhama” sasa (Filip. 2:3). Mayninakajj jiwasat sipan jilïrïpkaspas ukham amuyañäni ukhajja, janiw jiwasat sipan jukʼamp sum lurañ yatipki ukanakampejj atip atipa kuns lurkañäniti, antisas jukʼamp sum lurapjjatapat kusisiñäniwa. Kuntï sum lurañ yatipki ukamp Jehová Diosar servisa jachʼañchapjje ukhajj jukʼamp kusiskañawa. Mä kuns sum lurañ yatipki uka jilat kullakanakatï Pablon ewjjtʼaparjam lurapjjani ukhajja, kuntï sum lurktan uk amuyapjjaniwa. Ukhamatwa congregacionan sumankañ utjañapataki, mayachtʼatäñapataki taqenis chʼamachasipjjañäni.

9. ¿Kunas mä jilatata jan ukajj mä kullakat jan envidiasiñatak yanaptʼistani?

⁹ ¿Kunas jan envidiasiñatak yanaptʼistani? Humilde chuymanïña, mä arunjja, qhawqtï lurirjamäktan uk amuyasiña. Humilde chuymanïñäni ukhajja, janiw jilat kullakanakat sipan jukʼamp sums lurañ yatksna ukham sarnaqkañäniti. Antisas khitinakatï kuns jukʼamp sum lurañ yatipki jupanakat yateqañatakiw chʼamachasiñäni. Sañäni, mä jilatatï suma arstʼirïchi ukhajja, kunjamsa wakichtʼasi ukwa jisktʼsna. Mä kullakatï suma phaytʼirïchi ukhajja, sum phaytʼirïñasatakejj juparuw yanaptʼa maysna. Mä waynatakitï jan ukajj mä tawaqotakitï amigonakanïñajj chʼamächi ukhajja, khititï facilak amigonak jikjjatañ yatki, juparuw yanaptʼa mayispa. Ukham lurañaw jan envidiasiñatak yanaptʼistani, kunanaktï lurañ yatktan ukanak jukʼamp sum lurañatakis yanaptʼarakistani.

10. ¿Kunas Gedeonar pasäna?

¹⁰ Kunas Manasés tribunkiri Gedeón chachampi, Efraín tribunkiri chachanakampejj pasäna uk amuytʼañäni. Jehová Diosan yanaptʼapampejja, Gedeonajj 300 jaqenakapampejj  mä guerranwa atipjapjjäna, ukham lurapjjatapat wal jachʼañchasipjjaspäna. Maysa toqetjja, Efraín tribunkirinakajj Gedeonampi parlir sarapjjäna ukhajja, felicitañat sipans toqjapjjänwa. ¿Kunatsa? Amuyatajj coleratäpjjänwa, kunattejj janiw qalltatpach jupamp chika Diosan enemigonakapampi nuwasiñatakejj Efraín tribunkirinakar jawskänti. Jupanakajja, tribupan respetatäñapatakwa llakisipjjäna, kunas jukʼamp importantëna ukat armasipjjänwa. Gedeonajj Jehová Diosan sutip jachʼañchatäñapataki, markap jarkʼaqañatakiw yanaptʼäna, ukaw jukʼamp importantëna (Juec. 8:1).

11. ¿Efraín tribunkirinakar Gedeonajj kamsänsa?

¹¹ Humilde chuymampiw Gedeonajj Efraín tribunkirinakar akham säna: ‘¿Janit jumanakajj nayat sipans jukʼamp lurapkta?’ sasa. Ukatjja, kunjamsa Diosajj jupanakar bendisïna ukwa amtayäna. Uk istʼasasti, ‘jupanakajj colerap apjtayasipjjänwa’ (Juec. 8:2, 3). Gedeón chachajja, Diosan markapan sumankañ utjañapatakejj janiw jachʼa jachʼa tukkänti.

12. ¿Kunsa Efraín tribunkirinakatsa Gedeonats yateqtanjja?

¹² ¿Kunsa ukat yateqsna? Jachʼañchayasiñat sipansa, Jehová Diosar jachʼañchasiñapatakiw yanaptʼañasa, ukwa Efraín tribunkirinakat yateqtanjja. ¿Kunsa familia pʼeqtʼirinakasa ancianonakas Gedeonat yateqapjjaspa? Maynejj jupatak coleratäki ukhajja, kunatsa colerata uk amuyañatakiw chʼamachasiñapa. Kuna sumti lurki ukatwa felicittʼapjjarakispa. Ukatakejj humilde chuymanïñaw munasi. Yamas maynin pantjasitapajj qhanäski ukhajj jukʼampiw ukajj munasi. Jiwasas razonanïksna uk uñachtʼayañat sipansa, jilat kullakanakampi sum apasiñaw jukʼamp wakiskirejja.

13. ¿Kuna jan walinsa Anajj uñjasïna, ukat kunsa luräna?

¹³ Jichhajj Ana warmit parltʼañäni. Jupajj Elcaná sat levitan esposapänwa, chachapajj jupar wal munasïna. Ukampis uka levitajj Peniná sat yaqha esposanirakïnwa. Jupajj Peninat sipansa Anaruw jukʼamp munasïna. Ukampis ‘Peniná warmejj wawanakanïnwa, Anasti janiw wawanïkänti’. Peninajj ‘jiskʼachänwa, jan sinttʼasisaw Anat burlasirakïna’, ukatwa ‘Anajj wal jachirïna, janirakiw manqʼañs munirïkänti’ (1 Sam. 1:2, 6, 7). Ukhamäkchïnsa, ukhamat ukhamwa Anajj kuttʼayäna sasajj janiw Bibliajj qhanañchkiti. Antisas Jehová Diosaruw kunjamas jikjjatasïna uk Anajj yatiyäna, Jupaw yanaptʼitani sasaw confiyarakïna. Peninajj cambiänti janicha uk janiw Bibliajj qhanañchkiti. Ukampis Anajj sumakiw jikjjatasjjäna, kusisitakëjjarakïnwa. ¿Kunatsa ukham sistan? Bibliajj Anat akham siwa: ‘Janiw llakit ajanunëjjänti’ sasa (1 Sam. 1:10, 18).

14. ¿Kunsa Ana warmit yateqtan?

¹⁴ ¿Kunsa Anat yateqtan? Maynitï jupas  jukʼamp sum lurañ yatkaspa ukham amuyayistani ukhajja, janiw jiwasas jukʼamp sum lurañ yatksna ukham tukuñasäkiti. Maynir jan walit jan walimpi kuttʼayañat sipansa, jupamp sum apasiñatakiw chʼamachasiñasa (Rom. 12:17-21). Maynejj janis cambiykchinejja, jiwasajj sumakiw jikjjatasiñäni.

15. ¿Apolos chachampi Pablompejj kunansa igualakïpjjäna?

¹⁵ Tukuyañatakejja, Apolos discipulompita Pablompit kunsa yateqsna uk uñjañäni. Panpachaniw Qellqatanak sum uñtʼapjjäna, wali uñtʼatäpjjänwa, suma yatichirïpjjarakïnwa. Panpachanirakiw Jesusan discipulopar tukupjjañapatak waljanir yanaptʼapjjäna. Ukampis janiw jupanakpurajj envidiasipkänti.

16. ¿Apolos chachajj kunjam jaqënsa?

¹⁶ Apolos chachajj “Alejandría markan nasirïnwa”, uka markajj wali uñtʼatänwa, ukaruw jaqenakajj yateqer sarapjjerïna. Amuyatajja, Apolos chachajj wali suma arstʼirïnwa, “Qellqatanaksa wali sum uñtʼarakïna” (Hech. 18:24). Corinto markan mä tiempo quedasïna ukhajja, mayni jilatanakat sipans juparuw yaqhep jilat kullakanakajj jukʼamp munasipjjäna. Pablot sipans jukʼampiw Apolosar munasipjjäna (1 Cor. 1:12, 13). ¿Apolosat ukham tʼaqjtañapatak congregacionar chʼamañchäna? Janiw jupajj uk lurkaspänti. ¿Kunatsa ukham sistan? Apolos chachajj Corintot sarjjäna ukhat mä qhawqha tiempo pasatatjja, kuttʼaniñapatakiw Pablojj jupar wal mayïna (1 Cor. 16:12). Pablotï Apolos chachan congregacionar tʼaqjtayaskatap piensaspäna ukhajj janiw kuttʼaniñap maykaspänti. Cheqasa, kuntï sum lurañ yatkäna ukampejj wali sumwa Apolos chachajj yanaptʼaskäna. Suma yatiyäwinakwa predicäna, jilat kullakanakaruw  chʼamañchtʼarakïna. Jupajj humilde chuymanïnwa, janiw ukat pächasktanti. ¿Kunatsa? Aquilampi Priscilampejj “Diosan thakipat cheqaparjam wali sum qhanañchapjjäna” ukhajj colerasïnwa sasajj janiw Bibliajj siskiti (Hech. 18:24-28).

17. ¿Kunsa Pablojj sumankañ utjañapatakejj luräna?

¹⁷ Apolos chachan suma luratanakap Pablojj yatïnwa. Ukampis ukham sum luratapat janiw mayjtʼaskänti. Corinto markankir congregacionar ewjjtʼkäna uka cartapanjja, Pablon humildëtapa, amuytʼirïtapa, llampʼu chuymanïtapaw qhan amuyasi. “Nayajj Pablon arkiripätwa” sasin yaqhepajj sapkäna ukhajja, janiw kusiskänti. Antisas Jehová Diosaru, Jesusar jachʼañchapjjañapatakiw chʼamañchäna (1 Cor. 3:3-6).

18. 1 Corintios 4:6, 7 textorjamajja, ¿kunsa Apolos chachampita Pablompit yateqtanjja?

¹⁸ ¿Kunsa Apolos chachampit Pablompit yateqsna? Inas Jehová Diosatak wal trabajstan, waljanirus bautisasipjjañapatak yanaptʼarakstan. Taqe ukanakjja, Jehová Diosan yanaptʼapampiw lurtanjja. ¿Kunsa yateqaraksna? Congregacionan jukʼamp privilegionak katoqasajj jukʼampirakiw congregacionan sumankañ utjañapataki, mayachtʼatäñapatak yanaptʼsna. ¿Kunjamsa ancianonakasa siervo ministerialanakas uk lurapjje? Bibliarjam ewjjtʼasaw uk lurapjje, importantet uñjayasiñat sipans Jesusar istʼapjjañapataki, jupat yateqasipjjañapatak congregacionar yanaptʼasaw uk lurapjjaraki. Jupanakan ukham lurapjjatapat wal yuspärtanjja (1 Corintios 4:6, 7 liytʼañataki).

19. ¿Kunsa sapa maynejj lursna? (“ Maynejj mayninakat jilankkaspas ukham jan amuyayañäniti” sat recuadro uñjjattʼäta).

¹⁹ Cheqas sapa mayniw mä kuns sum lurañ yattanjja, Diosaw uk churistu. Ukampejj ‘maynit maynikamaw yanaptʼassna’ (1 Ped. 4:10). Luratasajj jukʼaks yanaptʼkaspa ukham inas amuyassna. Ukampis kunjamtï chʼukunakajj isir mayachthapkejja, ukhamarakiw jukʼa luratasajj congregacionan mayachtʼatäñapatak yanaptʼi. Ukhamajja, taqeniw mayninakat jilanksnas ukham jan amuyasiñataki chʼamachasiskakiñasa. Congregacionan sumankañ utjañapatakisa mayachtʼatäñapatakis wal chʼamachasiskakiñasaraki (Efes. 4:3).