1. ¿Kunsa Jehová Diosajj jiwasanak layku lurawayi?

¿KUNJAMATSA Jehová Diosan Testigopar tukuwaytan? Maya, inas ‘suma yatiyäwinak’ awk taykasata, trabajonkiri escuelankiri compañeronakasat istʼstan jan ukajj inas mä Testigojj utat uta predicasa visitʼchistu (Mar. 13:10). Ukjjarojj mayniw jiwasar Bibliat yatichañatakejj tiempo apstʼasisa chʼamachasiwayi. Ukham yatjjatasaw Jehová Diosar munasiwaytanjja, Jupas jiwasar munasitapwa yateqaraktanjja. Diosaw jupar serviñasatak markapar irpanistu, jichhasti Jesucriston discipulopjamajj wiñay jakañwa jikjjatsna (Juan 6:44). Jehová Diosaw kunatï cheqäki uk jiwasar yatichañapatak maynir yanaptʼawayi, ukatsti Jupan serviriparjamaw katoqasirakistu, ukanakat walpun Diosar yuspärtanjja.

2. ¿Kunanakatsa aka yatichäwin yatjjataskañäni?

² Niyakejjay kunatï cheqäki uk jichhajj yatjjstanjja, mayninakaruw wiñay jakañar apki uka thakin jiwasamp chika sarapjjañapatak yanaptʼañasa. Yaqhepatakejj utat uta predicañajj janiw chʼamäkiti, ukampis Bibliat yatichañatak jaqenakar invitaña, Bibliat jupanakar yatichañaw chʼamajja. ¿Jiwasatakejj ukhamarakiti? Ukhamächi ukhajja, kuntï aka yatichäwin yatjjatkañäni ukanakaw yanaptʼistani. Aka yatichäwinjja, kunas jaqenakar Jesusan discipulopar tukuyañatak chʼamañchistu, kunanakatï Bibliat yatichañ jarkʼkistu ukanak kunjamsa atipjsna ukanakatwa yatjjataskañäni. Ukampis nayraqatjja, kunatsa jaqenakar predicañasa, yatichañasaraki ukwa yatjjatañäni.

3. ¿Kunatsa jaqenakar prediktanjja?

³ Jesusajj aka oraqenkkäna ukhajja, pä kasta luräwi discipulonakapar mayïna. Maya, Reinon suma yatiyäwinakap predicapjjam sasaw säna, ukatsti kunjamsa uk lurapjjaspa ukwa uñachtʼayarakïna (Mat. 10:7; Luc. 8:1). Sañäni, jaqenakajj suma yatiyäwinak istʼapkani ukhajj kunsa lurapjjañapa, jan istʼañ munapkani ukhajj kunsa lurapjjañaparaki ukwa qhanañchtʼäna (Luc. 9:2-5). Ukatjja, discipulonakapajj walja jaqenakaru, walja lugaranakanwa predicapjjañapäna, ukatwa “taqe markanakan yatipjjañapataki” sasin arsuwayäna (Mat. 24:14; Hech. 1:8). Jaqenakajj istʼapjjpansa janisa, Diosan Reinopata, kunsa uka Reinojj lurani ukanakatwa yatiyapjjañapäna.

4. Mateo 28:18-20 textorjamajja, ¿Diosan Reinopat jaqenakar yatiyasajj kunampsa lurañasaraki?

⁴ Paya, taqe kuntï nayajj jumanakar yatichapksma ukanak phoqañ jaqenakar yatichapjjarakim sasaw Jesusajj discipulonakapar sarakïna. Ukhamajja, ¿Jesusajj yatiyapjjam yatichapjjarakim sasin maykäna ukajj nayrïr cristianonakatakikïnwa sasin yaqhepajj sapki ukajj cheqäskapuniti? Janiwa, kuntï Jesusajj maykäna ukajj jichha tiempokamaw lurasiñapäna, mä arunjja “akapachajj tukuskani ukapachkama” (Mateo 28:18-20 liytʼañataki). Amuyatajja, 500 jila discipulonakapar uñstkäna ukhaw Jesusajj uka mandato churpachäna (1 Cor. 15:6). Apóstol Juanar mä visión toqe uñjaykäna ukanjja, taqe discipulonakapajj jaqenakaru Jehová Diosat yateqañatak yanaptʼapjjaspa uk munatapaw qhan amuyasi (Apoc. 22:17).

5. 1 Corintios 3:6-9 textorjamajja, ¿predicañampi yatichañampejj kunamp sasiwa sänsa Pablojja?

⁵ Apóstol Pablojja, jaqenakar Jesusan discipulopar tukuyañajj alinak ayruñampi, jilayañampi sasiwa sänwa. Ukhamatwa ayruñat sipansa jukʼamp luraña munasitap qhanañchäna. Corinto markankir cristianonakarojj akham sasaw amtayäna: “Nayaw ayruntayäta, Apolosasti umampiw warjjatarakïna [...]. Jumanakajj Diosan oraqepäpjjtawa, juparakiw uka oraqer yapuchaski” sasa (1 Corintios 3:6-9 liytʼañataki). ‘Diosan oraqepan’ trabajirinakäpjjtanwa, ukhamajja predicasaw jathanak ayrunttanjja, yatichasaw umampi warjjataraktanjja (Juan 4:35). Ukampis Diosaw uka jathanak jilayi.

6. Jesusan discipulopar tukupjjañapatakejja, ¿kunanak lurapjjañapatakis yatichirinakajj yanaptʼañasa?

⁶ ‘Wiñay jakañatak suma chuymanïpki’ ukanakaruw thaqtanjja (Hech. 13:48). Yateqerinakan Jesusan discipulopar tukupjjañapatakejja, akanak lurapjjañapatakiw yanaptʼañasa: 1) kuntï Bibliat yateqapki uk amuyapjjañapataki, 2) uk creyipjjañapataki, 3) ukarjam sarnaqapjjañapataki (Juan 17:3; Col. 2:6, 7; 1 Tes. 2:13). Congregacionanjja, taqeniw yateqerinakar munasiñampi uñjasa yanaptʼsna, tantachäwinakar jutapkani ukhajj sum katoqtʼasaw yanaptʼaraksna (Juan 13:35). Yatichirejja, inas yateqerir yanaptʼañatakejj walja tiempo apsusiñapächini, chʼamachasiñaparakïchini, ukhamat “wali suma saytʼayatäki” uka pantjat amuyunakapa, jan wali luräwinakap apanukuñapataki (2 Cor. 10:4, 5). Yateqerin taqe uka cambionak lurañapatakisa, bautisasiñatak wakichtʼatäjjañapatakisa, walja phajjsinak yanaptʼañaw munasispa. Ukampis chʼamachasitasajj janiw inamayäkaniti.

7. ¿Kunatsa jaqenakar prediktan Jesusan discipulopar tukupjjañapatakis yaticharaktanjja?

⁷ ¿Kunatsa jaqenakar prediktan, Jesusan discipulopar tukupjjañapatakis yaticharaktan?  Maya, Jehová Diosar munatasatwa uk lurtanjja. Jesusan uka mandatop phoqañatak wal chʼamachastan ukhajja, Diosar munataswa uñachtʼaytanjja (1 Juan 5:3). Ak amuytʼañäni: Jehová Diosar munatasatwa utat uta prediktan. ¿Jesusan uka mandatopar istʼañajj facilakïnti? Inas chʼamakïchïna. Mä utar nayrïr kuti leqtʼkayätan ukhajj inas wal ajjsarayaschiyätan. Ukampis Jesusan uk lurañas munatap yatisaw ukham lurtanjja. Inas jichhajj predicañ jan ajjsarayasjjstanti, ukampis ¿mayniru Bibliat yatichañ ajjsarayastanti? Ukhamächi ukhajja, Jehová Diosaruw yanaptʼa mayiñasa, Jupaw jan ajjsarañatakisa, jaqenakar Bibliat yatichañatak invittʼañatakis chʼam churistani. Juparakiw Jesusan discipulopar tukuyañ munañatakis yanaptʼistani.

8. Marcos 6:34 textorjamajja, ¿kunatsa jaqenakar Bibliat yaticharaktanjja?

⁸ Paya, jaqenakar munasitasatwa Bibliat yaticharaktanjja. Mä kutejja, Jesusampi discipulonakapampejj wal predicapjjatap laykojj wali qaritäjjapjjänwa, ukatwa samartʼañatak yaqha cheqar sarjjapjjäna. Ukampis walja jaqenakaw ukan suyasipkäna. Jupanakat sinttʼasisasti, Jesusajj “kunayman toqenakat yatichañwa qalltäna” (Marcos 6:34 liytʼañataki). ¿Kunatsa Jesusajj uk lurañatak chʼamachasïna? Kunjamas uka jaqenakajj jikjjatasipjjäna uk amuyasajj yanaptʼañwa munäna. Jupanakajj wal tʼaqesitapa, mä suytʼäwi munapjjatapwa yatïna. Jichha tiemponjja, jaqenakajj kusisitjamäpkchisa, jan walinakan uñjasisajj ukhamarakiw mä suytʼäwi munapjje. Jupanakajj jan awatirini, ananukuta, chhaqat ovejanakjamäpjjewa. Apóstol Pablojja, jan suytʼañani, Diosar jan uñtʼasa, ukhamaw jakapjje sasaw säna (Efes. 2:12). Jupanakajj ‘jiwañar apir thakinwa sarasipkaraki’ (Mat. 7:13). Territoriosankir jaqenakan Diosar uñtʼapjjañapajj kunja wakiskirisa uka toqet lupʼtan ukhajja, jupanakar munasisa sinttʼasisajj wal yanaptʼañ muntanjja. Bibliat yatichañatak invittʼasaw jupanakar yanaptʼsna.

9. Filipenses 2:13 textorjamajja, ¿kunjamsa Jehová Diosajj yanaptʼistaspa?

⁹ Bibliat maynir yatichañatakejj tiempow munasi, ukatwa Bibliat yatichañatak invitañ ajjsarayassna. Ukhamajja, kunjamas jikjjatastan uk Jehová Diosaruw yatiyañasa. Ukatsti, Bibliat yateqañ munirinakar jikjjatañ munañataki ukat Bibliat yatichañatakiw yanaptʼa mayisiñasaraki (Filipenses 2:13 liytʼañataki). Jiwasatï Diosan munañaparjam oracionanakasan kunsa mayiñäni ukhajja, Jupajj istʼistaniwa sasaw apóstol Juanajj sistu (1 Juan 5:14, 15). Ukhamajja, Bibliat maynir yatichañ munañasatakejj Jehová Diosaw yanaptʼistani, janiw ukat pächasiñasäkiti.

10, 11. ¿Kunatsa maynir Bibliat yatichañajj chʼamäspa?

¹⁰ Jaqenakar Bibliat yatichañajj wali importantëtap yattanwa, ukampis kunanakas jaqenakar Bibliat yatichañ jarkʼistaspa, ukanakatwa mä qhawqha yatjjatañäni, ukatsti kunjamsa ukanak atipjsna ukwa yatjjatarakiñäni.

¹¹ Qhawqtï lurañ munktan uk janis lurañ puedksna ukham amuyaña. Yaqhep jilat kullakanakajja, edadanëjjapjjewa jan ukajj usutäpjjewa. Jiwasatï ukhaman uñjasstan ukhajja, kunsa COVID-19 sat usu utjatapajj yatichawayistu ukat amuytʼañäni. Maynirojja, utasatpachwa teléfono toqe jan ukajj Internet toqe Bibliat yatichañ qalltsna, jan ukajj Bibliat yatichsna. Janiw ukakïkiti, yaqhep jaqenakajj Bibliat yatichayasiñ munasipkiwa, ukampis jilat kullakanakajj predicapki uka horasanakajj janiw puedipkiti. Ukhamajj kuna horarutï puedipki uka horasanakaw Bibliat yatichsna. Inas wali alwata yatichsna jan ukajj  arumanaka yatichsna. Nicodemojj arumaw yatichayasiñ munäna, ukatwa Jesusajj arumaru yatichäna (Juan 3:1, 2).

12. Bibliat yatichañatak janis wakichtʼatäksna ukham amuyasstan ukhajja, ¿kunanakas jan ajjsarañatak yanaptʼistaspa?

¹² Maynir Bibliat yatichañatak janis wakichtʼatäksna ukham amuyaña. ‘Nayraqatajj Bibliat jukʼamp yatjjatañajaw wakisi, suma yatichirïñajaw wakisiraki’ sasin inas ajjsarayastan. Ukhamächi ukhajja, kunanakas jan ajjsarañatak yanaptʼistaspa uk kimsa toqet uñjañäni. Maya, Jehová Diosajj Bibliat yatichañatak wakichtʼatätaswa amuyi (2 Cor. 3:5). Paya, ‘alajjpachansa ukhamaraki aka oraqensa taqe munañanïki’ uka Jesusaw mayninakar yatichañ mayistu (Mat. 28:18). Kimsa, janiw sapakïktanti. Jesusjamarakiw Jehová Diosaw kuntï sañajäki uk parlañatak yanaptʼitani sasin confiyañasa (Juan 8:28; 12:49). Janiw ukakïkiti, predicación sarayir jilatampi, sum yatichañ yatki uka precursorampi, jan ukajj experienciani publicadorampiw parltʼsna. Jupanakaw yatichañ qalltañatakisa, Bibliat yatichañatakis yanaptʼistaspa. Yatichasipki ukar compañtʼañäni ukhajja, jupanakjam suma yatichirïñäniwa.

13. ¿Kunatsa machaq cambionakar yatinoqtañasa?

¹³ Kunjamsa jichhajj yatichasjje ukar yatinoqtañasa, machaq herramientanakar yatinoqtañas chʼamäkaspas ukham amuyaña. Jichhajj janiw Bibliat nayrjam yatichjjtanti. Disfrute de la vida sat librompiw yatichjjtanjja, uka librompi yatichañatakejj sum wakichtʼasiñasaw wakisi, janirakiw nayrjam yatichañasäjjeti. Sañäni, janiw walja parrafonak liyjjtanti, jan ukasti yateqerimpiw jukʼamp parltanjja. Walja videonakampi, Internetan utjki uka yanaptʼanakampi, JW Library^® aplicacionampiw yatichjjtanjja. Uka herramientanak apnaqañajj chʼamjamächi ukhajja, mayniruw jiwasar uk yatichañapatak yanaptʼa maysna. Niyakejjay kunjamtï nayrajj lurirïkayätan ukar yatitästanjja, uka cambionakar yatinoqtañajj janiw faciläkiti. Ukampis Jehová Diosana jilat kullakanakan yanaptʼapampejja, ukanakar yatinoqtañajj janiw chʼamäkaniti, Bibliat yatichañas wal gustarakistani. Uka toqet mä precursor jilatajj akham siwa: “Kunjamtï jichhajj yatichjjtan ukajja, yateqeritakisa yatichiritakis wali sumawa” sasa.

14. 1) ¿Territoriosan jaqenakajj jan istʼañ munapki ukhajj kunsa amtañasa? 2) ¿Kunjamsa 1 Corintios 3:6, 7 textojj chʼamañchtʼistu?

¹⁴ Territoriosan Bibliat maynir yatichañ qalltañajj chʼamäkaspas ukham amuyaña. Yaqhep jaqenakajj janiw suma yatiyäwinak istʼañ munapkaspati jan ukajj Testigonak conträpjjaspawa. ¿Kunas jupanakar jan qarjtas predicaskakiñatak yanaptʼistani? Aka jan wali pachanjja, jaqenakan jakäwipajj mä akatjamatwa mayjtʼaspa, ukhamajja khitinakatï jan istʼañ munapki ukanakajj Diosat yatjjatañajj kunja wakiskirisa uk qhepat amuyasipjjaspawa (Mat. 5:3). Bibliat apstʼat qellqatanak jan munapjjerïkäna ukanakat yaqhepajja, tiempompejj Bibliat yateqjjapjjewa. Janiw ukakïkiti, Jehová Diosaw cosecha apthapiñ yapun Dueñopajja (Mat. 9:38). Jupajj ayruskaksna, umamp warjjataskaksna ukwa muni, ukampis Jupaw jatharojj jilayaskani (1 Cor. 3:6, 7). Inas jichhajj jan khitirus Bibliat yatichkstanti, ukampis Jehová Diosajja, mayninakar yanaptʼañatak chʼamachasktan ukaruw bendisistu, janiw qhawqhanirus Bibliat yatichasktan ukarjam bendiskistuti. *

15. Maynejj Bibliat yatichayasi, yateqki ukarjam sarnaqaraki ukhajja, ¿kunjamas Jehová Diosajj jikjjatasi?

¹⁵ Mä jaqejj Bibliat yatichayasi ukat kuntï yateqki uk mayninakar parlaraki ukhajja, Jehová Diosajj wal kusisi (Prov. 23:15, 16). Jichhürunakan markapar kusisita predicaskiri yatichaskir uñjasajj ukhamarakiw wal kusispacha. Pandemia usu utjkipansa, 2019 septiembre phajjsit 2020 agosto phajjsikamajja, 7.705.765 ukhaniruw Bibliat yatichasiwayi, ukajj 241.994 jaqenakaruw Jehová Diosar vidap katuyasiñapataki, bautisasiñapatak yanaptʼawayi. Jupanakajja, ukhamarakiw yaqhanakar Bibliat yatichapjjani, bautisasipjjañapatakis yanaptʼapjjarakini (Luc. 6:40). Cheqas Jesusan discipulopar tukupjjañapatak jaqenakar yanaptʼasajj Diosan chuymapwa kusisiytanjja.

16. ¿Kun lurañatakis chʼamachassna?

¹⁶ Jaqenakaru Jesusan discipulopar tukuyañajj chʼamakiwa, ukampis Jehová Diosan yanaptʼapampejj Bibliat yatjjatasipki ukanakarojj alajjpachankir Awkisar munasipjjañapatakejj yanaptʼsnawa. ¿Janit maynirukis Bibliat yatichañatak chʼamachasksna? Wakiskani ukhajja, khitinakampitï parlktan ukanakaruw ‘¿Bibliat yateqañ janit munkasma?’ sasin jisktʼsna. Ukham lurañäni ukhajja, jupanakat maynikis yateqañ munaniwa. Jehová Diosajj ukham chʼamachasitasarojj bendisistaniwa.

17. ¿Kunjamas Bibliat mayniru yatichasajj jikjjatastanjja?

¹⁷ Kunatï cheqäki uk yaqhanakar predicañasa yatichañas mä suma bendicionawa. Uk lurañajj wal kusisiyistu. Apóstol Pablojj Tesalónica markankirinakat waljaniruw Jesusan discipulopäñapatak yanaptʼäna, ukham yanaptʼasajj kunjamas jikjjatasïna uk akham sänwa: “Jesús Tatitusajj kuttʼanjjani uka tiemponjja, ¿jupa nayraqatan khitinakänisa nanakan suytʼañanakajasa, kusisiñanakajasa, jan ukajj kusiskañ coronanakajasa? ¿Janit jumanakäpkta? Cheqpachansa jumanakäpjjtawa nanakan jachʼañchasiñanakajasa, kusisiñanakajasa” sasa (1 Tes. 2:19, 20; Hech. 17:1-4). Jichhürunakan waljaniw ukham kusisita jikjjatasipjjaraki. Stéphanie sat mä kullakajja, esposopamp chikajj walja yateqerinakaruw bautisasipjjañapatak yanaptʼawayi, jupajj akham siwa: “Jehová Diosar vidap katuyasipjjañapatak jaqenakar yanaptʼañajj wali kusiskañapuniwa” sasa.