1. ¿Kunatsa cristianonakajj yaqhep qoqanakjamäñasa? (Dibujo uñjjattʼarakïta).

 “UKSAR AKSAR altʼki uka qoqarojj janiw thayajj pʼakjkaspati”. Uka arunakajja, wali chʼamamp thaytʼanki ukhajj kunjamsa mä qoqarojj uksar aksar altʼañajj jan pʼakisiñapatak yanaptʼi ukwa uñachtʼayi. Jehová Diosar kusisit serviskakiñatakejja, jiwasajj uka qoqar uñtasitäñasarakiwa, janiw kuns munañasarjam lurasiñapatak waytʼirïñasäkiti, amuytʼirïñasawa. ¿Kunas ukhamäñatak yanaptʼistani? Kuna cambionakatï jakäwisan utjki ukar yatinoqtañasawa, mayninakan amuyunakapsa amtanakapsa respetañasarakiwa.

2. ¿Kunjam chuymanïñas cambionakar yatinoqtañatakejj yanaptʼistani, ukat kunanaksa aka yatichäwin yatjjatañäni?

² Jehová Diosan servirinakapajj taqeniw amuytʼirïñasa. Humilde chuymanïñasawa, sinttʼasirïñasarakiwa. Aka yatichäwinjja, kunjamsa yaqhep cristianonakajj ukham chuymanïpjjatapat cambionakar yatinoqtapjjäna, kunjamsa jiwasajj jupanakjam luraraksna ukwa yatjjatañäni. Ukampis nayraqatajj suma amuytʼir Jehová Diosampita Jesusampitwa yatjjataskañäni.

3. ¿Kunjamatsa Jehová Diosan amuytʼirïtap yattanjja?

³ Jehová Diosajj suma thurtʼata suma saytʼata ukhamawa, ukatwa Bibliajj jupat parlkasin ‘Qarqasawa’ sasin qhanañchi (Deut. 32:4). Ukhamäkchisa, jupajj amuytʼirirakiwa. ¿Kunjamatsa uk yattanjja? Aka mundon kunayman cambionakas utjchejja, Diosasajj uka cambionakar yatinoqtawayiwa, ukhamat amtanakap phoqasiñapataki. Niyakejjay Jehová Diosajj jupar  uñtasit lurawaychistojja, jiwasajj cambionakar yatinoqtaraksnawa. Qhana amuykañ wiñay yatichäwinakwa Biblian churistu, ukanakaw jan walinakan uñjaskasas suma amtanakar puriñatak yanaptʼistu. Jehová Diosajj luratanakapansa wiñay yatichäwinakapans mä qarqar uñtasitäkaspas ukhamsa uñachtʼaykchejja, jupajj amuytʼir Diosarakiwa.

4. Kunas Jehová Diosan amuytʼirïtap uñachtʼayi uk qhanañchtʼam (Levítico 5:7, 11).

⁴ Jehová Diosan leyinakapajj perfectowa, phoqañas janiw chʼamäkiti. Jupajj janirakiw munañaparjamakejj jaqenakar kuns luraykiti. Kunjamsa israelitanakarojj uñjäna ukanwa Jehová Diosan amuytʼirïtapajj qhan uñjasïna. Jupajj wali utjirininakarus pobrenakarus janiw mä pachpa sacrificio churapjjañapatak maykänti. Leyirjamajja, maynejj kunjamsa jakasïna ukarjamaw ofredanakap apaspäna (Levítico 5:7, 11 liytʼäta).

5. Kunjamsa Jehová Diosajj humilde chuymanïtapsa sinttʼasirïtapsa uñachtʼayäna uk qhanañchtʼam.

⁵ Jehová Diosajj humilde chuymani sinttʼasiri ukhamawa, ukatwa jupajj amuytʼiriwa sistanjja. Sodoma markankir jan wali jaqenakar tukjañampïskäna ukhaw humilde chuymanïtap uñachtʼayäna. Jupajj angelanakapampiw qollunak toqer escapañapatak Lot serviripar yatiyäna. Ukampis Lot chachajj uka qollunakar escapañ ajjsarayasïnwa. Ukatwa Zóar sat mä jiskʼa markar familiapamp escapjjañatak ruwtʼasïna, Diosajj uka mark tukjañsa amtkchïnjja, ukaruw jupajj escapañ munäna. Jehová Diosajj kuntï siskäna ukarjampun phoqañapatakiw Lot chachar mayispäna, ukampis janiw uk lurkänti. Zóar markar janis tukjañapäjjchïnjja, Lot chachan mayitaparjamaw luräna (Gén. 19:18-22). Walja patak maranak qhepatjja, Nínive markan jakirinakarojj sinttʼasirïtapwa Jehová Diosajj uñachtʼayarakïna. Nínive markas ukan jakirinakas jan walinak lurapjjatap laykojj tʼunjatäniwa sasin yatiyañapatakiw Jonás profetar khitäna. Ukampis ninivitanakan arrepentisipjjatapatjja, Jehová Diosajj jupanakat sinttʼasïnwa, markpacharuw perdonarakïna (Jon. 3:1, 10; 4:10, 11).

6. ¿Kunanakas Jesusan Jehová Diosjam amuytʼirïtap uñachtʼayi?

⁶ Jesusajj aka oraqen yatiykäna ukhajja, Jehová Diosjam amuytʼirïtapajj qhanaw amuyasïna. Jupajj “khitinakatï Israel markan chhaqat ovejanakar uñtasitäpki” ukanakar predicañatak khitanitäkchïnsa, mä kutejj jan israelitäkäna uka warmiruw yanaptʼäna. Uka warmejj imill wawapar qolltʼañapatakiw wal ruwtʼasïna, imill wawapajj ‘demonion mantataw wal tʼaqesiskäna’. Jesusajj uka warmit sinttʼasisajj imill wawapar qollänwa (Mat. 15:21-28). Yaqha toqet amuytʼarakiñäni. Jesusajj aka oraqen yatiyañ qalltkäna uka qhepatjja, jupajj akham sänwa: “Maynitï jaqenak nayraqatan nayar rechazitanejja, […] jupar rechazarakïwa” sasa (Mat. 10:33). Ukampis janiw Pedrorojj kimsa kuti jupar jan uñtʼatap laykukejj rechazkänti. Jesusajj Pedron arrepentisitapsa Diosat jan jitheqtirïtaps yatïnwa. Jesusajj jaktjjäna ukhajja, Pedroruw uñstäna, inas perdonatapsa munasiskakitapsa sarakchïna (Luc. 24:33, 34).

7. Filipenses 4:5 textorjamajj ¿kunjam jaqet uñtʼatäñsa muntanjja?

 ⁷ Jehová Diosasa Jesusas kunjam amuytʼirïpjjesa ukwa uñjawaytanjja. ¿Jiwasat kamsasirakispasa? Jehová Diosajj amuytʼirïsna ukwa munaraki (Filipenses 4:5 liytʼäta). Akham sasaw jisktʼassna: “¿Mayninakajj amuytʼiri, pacienciani, munañajaruk jan lurasiñap muniri ukham jaqetti uñtʼapjjetu? Jan ukajj ¿jan amuytʼiri, munañajar kuns lurayiri, jan istʼasiri ukham jaqetcha uñtʼapjjetu? ¿Mayninakarojj kunjamtï nayajj munkta ukarjam lurapjjañapatakit waytʼtjja? Jan ukajj ¿kuntï mayninakajj amuyapki ukar istʼti, wakischi ukhas ukarjamat luraraktjja?” sasa. Jiwasatï amuytʼir jaqëñatak chʼamachasiñäni ukhajja, Jehová Diosjama Jesusjam amuyirïtasajj jukʼamp qhanäniwa. Kunanakansa jakäwisan amuytʼirïñajj wakisi ukanakat pä toqet jichhajj yatjjatañäni: cambionakajj utjki ukapacha, amuyunakasasa amtanakasas mayninakan amuyunakapamp amtanakapamp jan igualtʼki ukapacha.   

8. ¿Cambionakajj utjki ukhajj kunanakas amuytʼirïñatak yanaptʼistaspa? (Nota liytʼarakïta).

⁸ Cambionakajj utjki ukhajja, amuytʼirïñasawa, ukanakar yatinoqtañatakiw chʼamachasiñasa. Inas mä akatjamat wali usuntata jan ukajj qollqet pistʼat uñjassna, jan ukajj markasan política toqet jan waltʼañanakaw utjaspa. Ukanakaw jakäwis qʼal mayjtʼayaspa, jan suykayätan uka jan walinakanwa uñjasiyarakistaspa (Ecl. 9:11; 1 Cor. 7:31). Jehová Diosan markapan mä asignacionat cambiapkistu ukas llakisiyarakistaspawa. Kuna cambionakay utjchini, aka pusi ewjjtʼanakaw uka cambionakar yatinoqtañatak yanaptʼistani: 1) cambionakar yatinoqtaña, 2) kunanaksa luräta ukat lupʼiña, 3) kuna sumanaksa jichhajj jikjjataskta ukar chuym uchaña, 4) mayninakar yanaptʼaña. b Kunjamsa uka pusi ewjjtʼanakajj yaqhanakar yanaptʼi uk jichhajj uñjañäni.

9. Jan suyapkäna uka llakin uñjasisajj ¿kunsa Emanuele jilatampi Francesca kullakampejj lurapjjäna?

⁹ Cambionakar yatinoqtaña. Emanuele jilatampi Francesca kullakampejj misioneronakäpjjewa, yaqha markanwa servipjjaraki. Uka markar purisajja, ukan parlaski uka aru yateqasipkäna, machaq congregacionapankir jilat kullakanakaruw uñtʼasipkarakïna, ukhamaruw COVID-19 pandemiajj qalltäna, janiw jilat kullakanakampejj mä lugaran tantachasiñ puedjjapjjänti. Francesca kullakan mamapas mä akatjamatwa jiwarakïna. Kullakajj wal uka tiempon familiapampïñ munäna, ukampis pandemia utjatapat janiw viajiñ puedkänti. Uka llakin uñjaskäna ukhajj ¿kunanakas kullakar yanaptʼäna? Maya, Emanuele jilatampi Francesca kullakampejj juntuw Jehová Diosar orasipjjäna, kuna jan walintï sapürus uñjasipkäna ukar saykatañataki jan sinti llakisiñatakiw yatiña mayisipjjäna. ¿Kunjamsa Jehová Diosajj oracionanakapar jaysäna? Kunanaktï necesitapkäna ukanak markap toqe horasapar churasaw jaysäna. Jupanakarojj kuntï mä jilatajj mä videon siskäna ukaw wal chʼamañchtʼäna, uka jilatajj akham sänwa: “Kunjamsa jichhajj jakasjjtan uka toqet pienstan ukhajja, kusisitäñatakiw ukajj yanaptʼistu, ukatjja Jehová Diosar serviskakiñataki yaqhanakar yatichañatakiw yanaptʼarakistu” sasa. c Paya, teléfono toqe jukʼamp sum predicañatakiw chʼamachasipjjäna, mayniruw Bibliat yatichañ qalltapjjarakïna. Kimsa, jilat kullakanakan jupanakar chʼamañchtʼapjjatapsa yanaptʼapjjatapsa katoqasipjjarakïnwa, munasiñamp jupanakar uñjapjjatapats yuspärapjjarakïnwa. Wali munasiri mä kullakajja, marpachaw jupanakarojj  mä qhawqha arunakampi mä textompi qellqtʼasajj mä mensaje sapür apayirïna. ¿Kunsa jupanakat yateqsna? Cambionakajj utjki ukanakarutï yatinoqtañänejja, kuntï lurirjamäktan uk lurasajj kusisitäñäniwa.

10. ¿Kunsa mä kullakajj mä jachʼa cambior yatinoqtañatakejj luräna?

¹⁰ Kunanaksa luräta ukat lupʼiñampi kuna sumanaksa jichhajj jikjjataskta ukar chuym uchañampi. Rumania markankir Christina kullakajj Japón markanwa jakasi, inglés congregacionapajj jistʼantasjjäna ukhajj wal jupajj llakisïna. Ukampis kunatï paskäna ukat janiw sinti lupʼkänti. Antisas japonés congregacionar jukʼamp yanaptʼañataki, uka arut taqe chuym predicañatakiw chʼamachasïna. Nayrajj trabajkäna uka compañeraparuw japonés aru jukʼamp sum parlañ yateqañatak yanaptʼa mayïna, Bibliampi ¡Wiñayatakiw kusisit jakasisma! sat folletomp yatichayasiñatakiw jupar mayïna, compañerapajj iyaw sarakïnwa. Ukatwa Christina kullakajj japonés aru jukʼamp sum parljjäna. Uka compañerapajj Bibliat yateqañwa qalltjjarakïna. ¿Kunsa kullakat yateqsna? Jiwasatï kunanaksa lurañäni ukanakat lupʼiñäni, kuna sumanaksa jichhajj jikjjatasktan ukanakar chuym ucharakiñäni ukhajja, jan suyat cambionakat jan suyat bendicionanakwa katoqsna.

11. Qollqe toqet jan waltʼañajj utjkäna ukhajj ¿kunsa mä jilat kullakajj lurapjjäna?

¹¹ Mayninakar yanaptʼaña. Kawkjantï predicañas tantachasiñas jarkʼatäki uka lugaranjja, casarat mä jilat kullakaw jakasipjje, kunapachatï markan qollqe toqet jan waltʼañajj utjkäna ukhaw jan trabajon uñjasipjjäna. ¿Kunanaks uka cambior yatinoqtañatakejj lurapjjäna? Maya, kunatï wakiski ukampik jakañatakiw chʼamachasipjjäna. Paya, llakinakapar chuym uchañat sipansa taqe horasan predicasaw mayninakar yanaptʼapjjäna (Hech. 20:35). Kullakan esposopajj akham siwa: “Predicacionamp ocupatäsajja, janiw llakinakat lupʼiñatakejj tiemponïpkayätti, Diosan munañap lurañatakis jukʼampiw tiempojj utjapjjetäna” sasa. ¿Kunsa uka jilat kullakat yateqsna? Kuna cambionakas utjani ukhajja, mayninakar yanaptʼaskakiñajj wali importantepuniwa, jukʼampis predicasaw uk lurtanjja, janipun uk armañäniti.

12. ¿Kunjamsa apóstol Pablot yateqasiñajj kunayman jaqenakar predicañatak yanaptʼistaspa?

¹² Kunjamsa jaqenakajj jikjjatasipjje ukarjam predicañajj wali wakiskiriwa. Predicacionanjja, Diosat kunayman creyiri, kunayman markanakat jutiri, kunayman chuymani jaqenakampiw parltanjja. Apóstol Pablot yateqasiñasawa, jupajj kunayman jaqenakampiw parlirïna. Jesusajj ‘yaqha markanakar khitat apostolotwa’ uttʼayarakïna (Rom. 11:13). Yaqha markanakar khitat apostoljamajja, judionakaru, griegonakaru, yatjjattʼat jaqenakaru, campon jakasirinakaru, jilïr autoridadanakaru, reyinakaruw Pablojj predicäna. “Kunaymani jaqenakar yanaptʼañatakejja taqe kunaruw” apóstol Pablojj tuküna, ukhamat kunayman jaqenakan chuymanakapar purtʼañataki (1 Cor. 9:19-23). Diosan Arup yatiyañatakejja, jaqenakajj kunanakar yatitäpjjesa, kunanakarus creyipjje ukanakwa amuytʼirïna. ¿Kunsa apóstol Pablot yateqsna? Jiwasatï kunayman jaqenakar parlañäni, kunjamsa sapa maynir yanaptʼsna uk amuytʼarakiñäni ukhajja, jukʼamp suma predikirïñäniwa.

13. ¿Kunatsa mayninakan amuyunakap respetañasa? (1 Corintios 8:9).

¹³ Jiwasatï amuytʼirïñäni ukhajja, mayninakan amuyunakap respetañajj janiw jiwasatak chʼamäkaniti. Yaqhep kullakanakarojj pintasiñas jan ukajj maquillasiñas wal gusti, ukampis yaqheparojj janiw gustkiti. Yaqhep cristianonakatakejj alcoholani umañanak mä jukʼa umtʼañajj walikïskiwa, ukampis yaqhepajj janiw munapkaspati. Taqpach cristianonakaw kʼumara jakasiñ munapjje, ukampis kunaymanitwa cuerpop  cuidasipjje. Jiwasatï amuyusas jukʼamp sumäkaspa ukham amuysna, mayninakar jiwasjam lurapjjañapatak waytʼaraksna ukhajja, jupanakarojj lanktʼasiysnawa, congregacionarojj tʼaqanoqtayaraksnawa. ¡Janipuniw kunäkipansa uk lurañasäkiti! (1 Corintios 8:9 liytʼäta; 10:23, 24). Biblian wiñay yatichäwinakaparjam lurañajja, amuyump kuns lurañataki, sumankañ utjañapatakiw yanaptʼistani. Kunjamsa ukarjam lursna uk jichhajj pä toqet uñjañäni.

14. ¿Biblian kawkïr wiñay yatichäwipas isthapisiñatakis kʼachachtʼasiñatakis yanaptʼistaspa?

¹⁴ Isimpi kʼachachtʼasiñampi. Kunjamsa isisiñasa uk sañat sipansa, Jehová Diosajj Biblian wiñay yatichäwinakapampiw yanaptʼistu. Kunjamsa isthapistan ukajj Jehová Diosaruw jachʼañchañapa, amuytʼirïtasasa, ‘humilde chuymanïtasasa, wali amuyumpi sarnaqatasas’ qhanäñaparakiwa (1 Tim. 2:9, 10; 1 Ped. 3:3). Ukhamajj janiw mayninakajj kunjam isthapitätansa ukak piensasipkañap munktanti. Biblian wiñay yatichäwinakapajj ancianonakar yanaptʼarakispawa, ukhamat isisiñ toqetsa, peinasiñ toqetsa jan amuyunakaparjamak lurasiñapataki. Mä congregacionanjja, yaqhep wayna jilatanakajj uka tiempon uñstir modarjamaw ñikʼutanakap jiskʼak khuchurayasipjjäna, chʼaskpachakiw jutapjjeri. Jupanakaruw ancianonakajj yanaptʼañ munapjjarakïna. ¿Kunsa ancianonakajj amuyunakaparjamak jan ewjjtʼañatakejj lurapjjäna? Jilat kullakanakar amuytʼayapjjañapatakejja, superintendente de circuito jilatajj akham sapjjañapatakiw ancianonakar säna: “Jumatï plataformar makatasma, ukat tantachasirinakajj kuntï siskta uk amuyañat sipans jumaruk uñchʼukjjapjjeristam ukhajj ¿janit isisitamansa kʼachachtʼasitamans mejorañamajj wakiskaspa?” sasa. Kunjams isisipjjañapa uk sañat sipansa, uka wayna jilatanakan amuyasipjjañapatakejj ukham sañakiw yanaptʼäna. d

15. Kunjamsa kʼumar jakasiñatakejj qollasiñäni uk amtañatakejj ¿Biblian kawkïr leyinakapasa wiñay yatichäwinakapas yanaptʼistani? (Romanos 14:5).

 ¹⁵ Kʼumara jakasiñ toqeta. Sapa cristianow kunsa kʼumara jakasiñatakejj lurani uk amtjjañapa (Gál. 6:5). Kunjamsa qollayasiñäni uk amtañatakejja, Biblian utjki uka leyinakapajj kamsis wila toqetsa espiritunakamp parlañ toqets ukwa amuytʼañapa (Hech. 15:20; Gál. 5:19, 20). Ukat uksarojj kunjamsa qollayasiñäni ukajj sapa maynitäjjewa. Yaqhep cristianonakajj medicina convencional ukampiw qollasipjje, yaqhepajj medicina alternativa ukampiw qollasipjjaraki. Kawkïr tratamientos walïspa kawkïris jan walïkarakispa uk jiwasajj sums amtjjstanjja, kunjamsa jilat kullakanakajj qollasiñ amtapjje uk respetañasawa. Ukatakejj aka pusi ewjjtʼanak amtañasawa: 1) Diosan Reinopakiw taqpach usunak wiñayatak chhaqtayani (Is. 33:24), 2) sapa cristianojj kunjamsa qollayasini “ukat janipuniw payachasiñapäkiti” (Romanos 14:5 liytʼäta), 3) janiw mayninakarojj juzgañasäkiti, janirakiw khitirus lanktʼasiyañasäkiti (Rom. 14:13), 4) cristianonakkamajj munastanwa, kunanaktï amuyktan ukat sipansa, congregacionan mayachtʼatäñaw jukʼamp importantejja (Rom. 14:15, 19, 20). Jiwasatï uka ewjjtʼanakarjam kuns lurañänejja, jilat kullakanakampejj wali sum apasiñäni, congregacionan sumankañ utjañapatakiw yanaptʼarakiñäni.

16. ¿Kunjamsa ancianonakajj amuytʼirïpjjatap jupanakkam uñachtʼayasipjjaspa? (Fotonakampi dibujompi uñjjattʼarakïta).

¹⁶ Amuytʼirïñ toqetjja ancianonakaw yateqaskañ sarnaqapjjañapa (1 Tim. 3:2, 3). Mä anciano jilatajja, janiw jilïrïtap laykukejj munañaparjamak kuns lurayañ munañapäkiti. Mä suma amtar puriñatakejja, Jehová Diosan espíritu santopajj cuerpo de ancianos uka taypinkirinakat khitirus mä suma amuyu arsuyakispawa, jilïr jilatajj uk amuyarakiwa. Janitï Biblian wiñay yatichäwinakapajj pʼakintaskchi ukhajja, amuytʼir ancianonakajj mayjs amuyapkchejja kuntï jilaparte ancianonakajj amtapki ukarojj taqe chuymaw apoyapjje.

17. ¿Kuna bendicionanaksa amuytʼirïtasat katoqtanjja?

¹⁷ Jiwasatï amuytʼir jaqëñänejja, walja bendicionanak katoqañäni. Ukanakat yaqhepajj akanakawa: jilat kullakanakampejj jukʼamp sumaw apasiñäni, congregacionan sumankañaw utjarakini. Kunayman chuymani, kunayman markanakat jutir jilat kullakanakar uñjañajj wali kusiskañawa. Jupanakamp mä familiaki Jehová Diosan markapan jupar adorañajj kusiskañarakiwa. Taqe kunat sipansa, amuytʼiri Jehová Diosat yateqasitasatwa kusisitätanjja, ukaw jukʼamp importantejja.