Aka revista liytʼirinakan jisktʼäwinakapa
¿Isaías 60:1 texton parlki uka ‘warmejj’ khitisa, kunjamsa sartasi ukat qhantʼaraki?
Isaías 60:1 textojj akham siwa: “Warmi, sartasim, qhantʼam, kuna laykutejj qhanamajj jutiwa. Jehová Diosan kʼajkiripajj jumjjaruw qhantʼi” sasa. Bibliarjamajja, ‘warmejj’ Sionawa, mä arunjja Jerusalenawa, uka markaw uka tiempon Judá markan capitalapänjja (Is. 60:14; 62:1, 2). a Jerusalenajj taqe Israel markpachamp sasiwa. Ukampis ¿kunjamsa ukat kunapachas Jerusalenajj sartasïna ukat qhantʼañ qalltarakïna? Isaiasan arunakapajj ¿jichha tiempont jukʼamppach phoqasi? Uka pä jisktʼaruw jichhajj qhanañchtʼañäni.
¿Kunjamsa ukat kunapachas Jerusalenajj sartasïna ukat qhantʼañ qalltarakïna? Judionakajj 70 maranakaw Babilonian katuntat uñjasipjjäna. Uka tiemponjja, Jerusalenasa templopas qʼala tukjatänwa. Ukampis medonakampi persanakamp Babilonia marka katuntapkäna ukhajja, uka markan jakir taqe israelitanakaw markapar kuttʼjjapjjaspäna, ukhamat Jehová Diosaruk wasitat adorasjjañapataki (Esd. 1:1-4). 537 antes de Cristo marat qalltasinjja, Diosat jan jitheqtir 12 tribunakankir judionakaw Jerusalenar kuttʼapjjäna (Is. 60:4). Jupanakajj wasitatwa Jehová Diosar sacrificionak loqtapjjäna, fiestanak lurapjjäna, templo saytʼayapjjarakïna (Esd. 3:1-4, 7-11; 6:16-22). Ukhamajj wasitatwa Diosan kʼajkir qhanapajj Jerusalén markjjar qhantʼäna, mä arunjja, wasitat saytʼayatäjjäna uka Diosan markapjjaruw qhantʼäna. Diosan uka markapajj chʼamakankir markanakatakejj mä qhanäkaspas ukhamänwa.
Ukampis Isaiasan profecianakapajj mä jukʼakiw uka tiempon phoqasïna. Jilaparte israelitanakajj janiw Jehová Diosar istʼjjapjjänti (Neh. 13:27; Mal. 1:6-8; 2:13, 14; Mat. 15:7-9). Qhepatjja, Mesiasäkäna uka Jesucristorus rechazapjjänwa (Mat. 27:1, 2). 70 maranjja, Jerusalenasa templopas mayampiw tukjat uñjasïna.
Jehová Diosaw ukham pasañapätap nayratpach sisjjäna (Dan. 9:24-27). Kuntï Isaías capítulo 60 ukan parlki uka profeciajja, janiw taqpachajj Jerusalén markjjaruk phoqasiñapäkänti, janirakiw ukajj Jehová Diosan amtapäkänti.
Isaiasan arunakapajj ¿jichha tiempont jukʼamppach phoqasi? Jïsa, ukampis ‘warmejj’ ‘alajjpachankir Jerusalenamp’ sasiwa. ¿Kunas alajjpachankir Jerusalenajja? Diosan alajjpachankir servirinakapawa. Ukjjat parlkasajj apóstol Pablojj akham sänwa: “Jupajj jiwasan taykasawa” sasa (Gál. 4:26). Uka warmin ‘wawanakapajj’ Jesusampi 144.000 ajllit cristianonakampïpjjewa, jupanakat maynïrejj Pablowa, alajjpachan jakañatak suytʼäwinïpjjarakiwa. Jupanakajj ‘sagrado markäpjjewa’, ‘Diosan Israelapäpjjarakiwa’ (1 Ped. 2:9; Gál. 6:16).
¿Kunjamsa alajjpachankir Jerusalenajj sartasïna ukat qhantʼarakïna? Aka oraqenkir ajllit wawanakap toqew qhantʼäna. Isaías capítulo 60 ukankir profeciarjamajj kunanaksa jupanakajj lurawayapjje uk jichhajj uñjañäni.
Niyakejjay apostolonakan jiwapjjatapat apostasiajj wal utj-jjchïnjja, ajllit cristianonakajj sartasipjjañapänwa, kuna laykutejj nayrïr pä patak maranakan chʼamakankapkaspas ukhamänwa (Mat. 13:37-43). Jachʼa Babiloniamp apnaqatäpjjänwa, mä arunjja oraqpachankir falso religionanakamp apnaqatäpjjänwa. 1914 maran ‘akapachan tukusiñapajj’ qalltkäna ukhakamaw falso religionanakamp apnaqat uñjasipjjäna (Mat. 13:39, 40). Mä qhawqha maranak qhepatjja, 1919 maran janiw ukamp apnaqatäjjapjjänti, jankʼakirakiw Diosar serviñan qhantʼañ qalltapjjäna. ¿Kunjamsa uk lurapjjäna? Taqe chuymaw predicapjjäna. b Ukhat jichhakamaw taqe markanakankir jaqenakajj uka qhanar mantapjje, ukanakat yaqhepajj Diosan Israelap taypinkapjjewa, jupanakajj Isaías 60:3 texton parlki uka ‘reyinakäpjjewa’ (Apoc. 5:9, 10).
Jutïrinjja, ajllit cristianonakajj jukʼampiw Jehová Diosan qhanap qhantʼapjjani. Jupanakajj aka oraqen jiwjjapjje ukhaw alajjpachar sarjjapjje, ukhamat ‘Machaq Jerusalenankañataki’, mä arunjja Criston noviapäñataki. 144.000 reyinakampi sacerdotenakampiw uka taypinkapjje (Apoc. 14:1; 21:1, 2, 24; 22:3-5).
Machaq Jerusalenajja, Isaías 60:1 textonkir profecian phoqasiñapatakejj wali wakiskiriwa (Isaías 60:1, 3, 5, 11, 19, 20 textjja, Apocalipsis 21:2, 9-11, 22-26 textomp igualtʼayam). Kunjamtï nayra Israelan Jerusalén markatpach apnaqaskänjja, ukhamarakiw Machaq Jerusalenampi Cristompejj machaq mundon Gobiernopäni. Ukhamajj Apocalipsis librorjamajj ¿kunjamarak Machaq Jerusalenajj ‘alajjpachata, mä arun Diosan ukat saraqanispasti’? Oraqenkirinakar llakisitap uñachtʼayasaw saraqankaspas ukhamäni. Uka markat parlkasinjja, Diosat jan jitheqtir taqe markanakankir jaqenakajj “uka markan qhanapampiw” sarnaqapjjani, juchampit jiwañampit salvatäpjjaniwa sasaw Bibliajj qhanañchi (Apoc. 21:3, 4, 24). Ukhamïpanjja, kuntï Isaías profetampi mayni profetanakampejj sapkäna ukhamaw ‘taqe kunas askichasini’ (Hech. 3:21). Kunapachatï Jesucristojj Reyëjjäna ukhaw taqe kunas askichasiñ qalltäna, Waranqa Maranak Apnaqañ tukuyjjani ukhaw tukuyjjarakini.
a Machaq Mundon Jakirinakataki Biblianjja, Isaías 60:1 texton “Sion” jan ukajj “Jerusalén” sasin aytañat sipansa “warmi” sasaw ayti, yaqhep Biblianakan ukham sarakiwa, kuna laykutejj “sartasim”, “qhantʼam”, ‘jumjjaru’ siski uka arunakajja, hebreo arun mä warmitsa parlkaspa ukhamawa. Ukhamajj “warmi” siski uka arojja, aymar parlirinakarojj uka texto sum amuyañatakiw yanaptʼi.
b Ezequiel 37:1-14 ukat Apocalipsis 11:7-12 textonakajja, 1919 maran Jehová Diosar adorañajj wasitat uttʼayaskäna ukwa qhanañcharaki. Ezequielan profeciaparjamajja, walja tiempo yaqha markan katuntat uñjasisajj taqe ajllit cristianonakaw Diosar wasitat adorjjapjjañapäna. Apocalipsis libronkir profeciarjamajja, predicañ sarayapki uka mä qhawqha ajllit cristianonakajj ina chʼusat mä qhawqha tiempo carcelan llawintatäsajj wasitatwa Diosar librek adorjjapjjañapäna. 1919 maranjja, uka grupojj ‘suma phoqeri amuyasir esclavot’ uttʼayatänwa (Mat. 24:45; Jehová Diosarukiw oraqpachan adorasjjani sat libronkir página 118 liytʼäta).
