Eclesiastés 5:8 textojj wal lupʼiyistu, Traducción del Nuevo Mundo Biblianjja uka textojj akham siwa: ‘Jumatï provinciaman mä pobre jaqer tʼaqesiyapjjatap uñjsta, justiciasa, jaqenakan derechonakapas pʼakintasitap uñjsta ukhajja, uka toqet jan musparamti. Marka apnaqerirojja jupat sipansa jukʼamp jilïriw uñchʼukiski, uka paninit sipansa jukʼamp jilïrinakaw utjaraki’ sasa.

Jaqenakan amuytʼaparjamajja, uka arunakajj aka oraqenkir gobernantenakataksa parlkaspa ukhamäspawa. Ukampis uka toqet jukʼamp sum amuytʼipanjja, Jehová Diosamppachat parlaskatapwa amuytanjja, ukajj wal chuymachtʼistu.

Eclesiastés 5:8 textojja, pobre jaqenakar tʼaqesiyiri, jan cheqapar uñjiri mä gobernantetwa parli. Uka jaqejj jupat sipansa jukʼamp jilïrin uñchʼukitäskatapwa amtañapa. Cheqas jupat sipan jukʼamp jilïrinakaw utjaskaspa. Ukampis akapachankir taqe jilïrinakajj jan wali luririnakkamakïpjjewa, ukatwa jaqenakajj wal tʼaqesipjje.

Jan waltʼäwinakajj janis askichasirjamäkchejja, Jehová Diosaw ‘marka apnaqerinakarojj uñchʼukiski’ ukaw wal chuymachtʼistu. Ukhamajja, Jehová Diosaruw yanaptʼa mayisiñasa, ukatsti taqe llakinakasjja juparuw katuyañasa (Sal. 55:22; Filip. 4:6, 7). Jehová Diosajja, “sumwa uñjaski taqe akapachana kunanakatejj lurasiski ukanakjja, ukhamata chʼama churañataki khitinakatejj cheqpachana juparu iyawsasipki ukanakaru” (2 Crón. 16:9).

Ukhamajja, ¿Eclesiastés 5:8 textojj kunsa amuytʼayistu? Aka oraqenkir gobernantenak taypinjja, jukʼamp jilïrejj utjapuniwa. Ukampis taqe uka apnaqerinakat sipansa Jehová Diosaw jukʼamp jilïrejja ukwa uka textojj amtayistu. Jichha tiemponjja, Reinopan uttʼayatäki uka Jesús toqew Diosajj apnaqaski. Taqe kun uñjiri Taqe Chʼamani Diosajj cheqaparjamaw taqenirus uñji, Yoqapas jupjamarakiwa.