1. ¿Kunjamsa kullakanakajj Diosan markapan yanaptʼapjje, kuna jan walinakans uñjasipjjaraki? (Nayrïr paginankir fotonak uñjjattʼäta).

 CONGREGACIONAN wali trabajtʼir kullakanak utjatapat wal kusistanjja. Sañäni, jupanakajj tantachäwinakanwa arstʼapjje, predicacionarus sarapjjewa, jilat kullakanakatsa llakisipjjarakiwa. Yaqhepasti Tantachasiñ Utanak askichañwa yanaptʼapjjaraki. Ukhamäkchisa kunayman jan waltʼäwinakanwa uñjasipjje. Yaqhepajja, edadani awk taykaparuw cuidapjje. Yaqhepasti familianakapan jan waltʼayataw uñjasipjje. Wawanakapar sapak uywapki uka kullakanakasti wal trabajipjjaraki.

2. ¿Kunatsa kullakanakar yanaptʼañajj wakisi?

² ¿Kunatsa kullakanakar yanaptʼañasa? Warminakajj respetomp uñjatäpjjañapawa, ukampis akapachanjja janiw ukham uñjapkapuniti, ukatwa jupanakar yanaptʼañasa. Biblia pachpaw warminakar yanaptʼañatak ewjjtʼistu. Amuytʼañataki, apóstol Pablojj ‘Febe kullakar munasiñamp katoqapjjam, kunanakantï yanaptʼatäñ munki ukarjam yanaptʼapjjarakim’ sasaw Romankir congregacionarojj säna (Rom. 16:1, 2). Pablojj fariseökän ukhajja, markapankirinakjamarakiw warminakar jiskʼachpachäna. Ukampis cristianöjjäna ukhajja, Jesusat yateqasisaw warminakarojj munasiñampi respetomp uñj-jjäna (1 Cor. 11:1).

3. 1) ¿Kunjamsa Jesusajj warminakar uñjirïna? 2) ¿Kunjamsa Awkipan munañap lurapkäna uka warminakarojj uñjarakirïna?

³ Jesusajj respetompipuniw warminakarojj uñjäna (Juan 4:27). Janiw judionakan religionap pʼeqtʼirinakjamäkänti. Biblia toqet parlir mä qellqatajj akham siwa: “Jesusajj janipuniw warminakarojj jiskʼachir arunakamp parlirïkänti” sasa. Jesusajja, Awkipan munañap lurapkäna uka warminakarojj jukʼamp respetompiw uñjäna, kullakapäpkaspasa, familiapäpkaspasa ukhamwa uñjäna (Mat. 12:50).

4. ¿Kunsa aka yatichäwin yatjjataskañäni?

⁴ Diosar serviri warminakar yanaptʼañatakejj Jesusajj jankʼakïnwa.  Jupanakampïñatakejj tiempwa apstʼasïna, wali valoranitwa uñjäna, jupanakat jan walinak parlapkäna ukhas arjjatarakïnwa. Kunjamsa Jesusat yateqasitas uñachtʼaysna uk jichhajj yatjjatañäni.

5. ¿Kunatsa yaqhep kullakanakatakejj mayninakamp chikachasiñajj chʼamakïspa?

⁵ Jilatanakas kullakanakas mayninakamp chikachasiñ munapuntanwa. Ukampis yaqhep kullakanakatakejj ukajj chʼamakïspawa. ¿Kunatsa? Uka toqet yaqhep kullakanakajj kamsapjjesa uk uñjañäni. Yordana * sat mä kullakajj akham siwa: “Solterätaj laykojja, janis congregacionan kunans yanaptʼkirista, janis aka congregacionatäkirista ukhamwa awisajj amuyasta” sasa. Kristen sat mä precursora kullakajj jukʼamp predicañatakiw yaqha congregacionar saräna, jupajj akham siwa: “Mä machaq congregacionar sartan ukhajja, sapakïksnas ukhamwa amuyastanjja” sasa. Khitinakatï Diosar jan serviri familiamp jakasipki ukanakajja, pachpa familiapatsa jilat kullakanakatsa jayarstʼatäpkaspas ukhamwa amuyasipjjaspa. Khitinakatï usutäpjjatap layku jan ukajj usut familiapar cuidapjjatap layku utat jan mistupki ukanakajja, sapakïpkaspas ukhamwa amuyasipjjarakispa. Anita sat mä kullakajj akham sarakiwa: “Niyakejjay mamitajar nayajj cuidchiyätjja, jilat kullakanakajj invittʼapkitäna ukarojj janiw sarirjamäkayätti” sasa.

6. Lucas 10:38-42 textorjamajj ¿kunjamsa Jesusajj Martampir Mariampir yanaptʼäna?

⁶ Jesusajja, Diosar serviri warminakamp parltʼasiñatakejj tiemp apstʼasipunirïnwa, jupanakatakis wali suma amigönwa. Sañäni, Mariampi Martampejj Jesusan amigapäpjjänwa, amuyatajj jupanakajj solteranakäpjjänwa (Lucas 10:38-42 liytʼañataki). Jesusajj arupampisa luratapampisa janiw jupanakar mayjtʼasiykänti. Ukatwa Jesusajj yatichkäna ukhajja, Mariajj jan ajjsartʼasis kayup jakʼar qontʼasïna. * Martas jan ajjsarasaw ‘Mariajj janiw yanaptʼkituti’ sasin Jesusar qhan säna. Jesusasti ukham visitkasaw suma yatichäwinak jupanakar yatichäna. Mariatsa Martatsa Lazarotsa Jesusajj llakisïnwa, ukatwa yaqha horasanakan visittʼarakïna (Juan 12:1-3). Lazarojj wal usuntkäna ukhajja, Mariampi Martampejj jan ajjsarasaw Jesusar yanaptʼa mayipjjäna (Juan 11:3, 5).

7. ¿Kunjamatsa kullakanakarojj chʼamañchtʼsna?

⁷ Yaqhep kullakanakajja, tantachäwinakanwa jilat kullakanakampejj jukʼamp chikachasipjje. Ukhamasti tantachäwinakan jupanakar sum katoqapjjañäni, jupanakamp parltʼasipjjañäni, jupanakat llakisitassa uñachtʼayapjjarakiñäni. Yordana kullakajj akham siwa: “Tantachäwinakan arstʼatajat felicitapkitu, predicañatakis invittʼapkitu, jan ukajj nayat llakisipki ukhajja, wal chʼamañchtʼapjjetu” sasa. Ukhamajj jupanakat llakisipjjatas kullakanakar uñachtʼayapjjapuniñäni. Kia sat mä kullakajj akham sarakiwa: “Tantachäwir jan sarkt ukhajja, mä jilatasa jan ukajj mä kullakasa kunjamäsktsa uk yatiñatakejj qellqtʼanipunituwa” sasa.

8. ¿Kunjamanakatsa Jesusat yateqasitas uñachtʼaysna?

⁸ Jesusat yateqasisa kullakanakamp parltʼañatak tiemp apstʼasiñäni. Inas manqtʼasiñataki jan ukajj anattʼañatak utasar invittʼsna. Ukanjja, kunatï chʼamañchtʼkaspa ukanakatwa  parltʼañasa (Rom. 1:11, 12). Jilïr irpirinakas Jesusjamarakiw kullakanakar uñjapjjañapa. Solteröñajj yaqhepatakejj janiw faciläkiti uk Jesusajj yatïnwa. Ukampis kusisit jakasiñatakejj janiw casarasiñapunisa ni wawanïñapunisa wakiskiti, antisas Diosar serviñ nayrar uchañaw wakisi sasaw qhan säna (Mat. 19:12; Luc. 11:27, 28).

9. ¿Kunjamsa jilïr irpirinakajj kullakanakar yanaptʼapjjaspa?

⁹ Yamas jilïr irpirinakajja, kullakanakarojj taykaparjama, kullakaparjamaw uñjapjjañapa (1 Tim. 5:1, 2). Jupanakamp parltʼañatakejja, tantachäw janïr qalltkipansa tukuyatarusa tiemp apstʼasipjjañapawa. Kristen kullakajj akham siwa: “Mä jilïr irpirejj jan tiempon sarnaqataj amuyasajja, horariojajj kunjam waktʼayatänsa ukwa yatiñ munäna. Nayat llakisitapat wal yuspärta” sasa. Jilïr irpirinakajj kullakanakamp parltʼañataki tiempo apstʼasipki ukhajja, jupanakat llakisipjjatapwa uñachtʼayapjje. * ¿Kunatsa kullakanakajj jilïr irpirinakampi sapa kuti parltʼasipjjañaparaki? Anita kullakajj akham siwa: “Jilïr irpirinakarojj sumwa uñtʼta, jupanakas ukhamarakiw nayar sum uñtʼapjjetu. Ukatwa jan walinakan uñjaskta ukhajj jan ajjsaras jupanakar yanaptʼa mayta” sasa.

10. ¿Kunas kullakanakarojj kusisitäpjjañapatak yanaptʼaspa?

¹⁰ Kunanaktï sum lurañ yatktan uk mayninakajj amuyapki, ‘walik ukham lurtajja’ sasin sapkistu ukhajj wal kusistanjja, ukampis jan khitis kamskistu ukhajj llakistanwa. Abigaíl sat mä precursorajj janis jupar khitis uñjkaspa ukhamwa amuyasïna. Jupajj akham siwa: “Jilat kullakanakajj janiw sum uñtʼapkituti, khitin wawapätsa, khitin kullakapätsa ukakwa yatipjje. Awisajj janjakiw uñjapkitusa” sasa. Pamela sat yaqha soltera kullakat parltʼañäni, jupajj walja maranakaw misionerat servïna. Ukampis qhepatjja, tatap mamapar cuidiriw kuttʼjjäna. Jichhajj 70 jila maranëjjchisa, precursorat serviskakiwa. Jupajj akham siwa: “Luratajat yuspärapkitu ukaw jukʼamp chʼamañchtʼitu” sasa.

11. ¿Kunjamsa Jesusajj jupar yanapapkäna uka warminakar wali valoranit uñjatap uñachtʼayäna?

¹¹ Diosar taqe chuyma serviri yaqhep warminakaw Jesusarojj “kunatï jupanakan utjkäna ukanakamp yanaptʼapjjäna”, Jesusajj wali valoranitwa uk uñjäna (Luc. 8:1-3). Uka warminakatakejj ukham yanaptʼañajj wali kusiskañänwa, Jesusajj janiw uka privilegiok jupanakar churkänti jan ukasti cheqa yatichäwinakwa qhanañcharakïna. Sañäni, kunjamsa jaqenakajj jupar jiwayapjjañapäna kunjamsa jaktaniñapäna ukwa jupanakar qhanañchäna (Luc. 24:5-8). Kunjamtï apostolonakar wakichtʼkänjja, ukhamarakiw uka warminakarojj jan walinakar saykatapjjañapatak wakichtʼäna (Mar. 9:30-32; 10:32-34). Jesusar jiwayañatak katuntapkän ukhajja, apostolonakajj escapjjapjjänwa. Ukampis Jesusar yanapapkäna uka warminakajj janiw escapapkänti, Jesusar lawan tʼaqesiskirsa uñjasipkänwa, ukajj wali musparkañawa (Mat. 26:56; Mar. 15:40, 41).

12. ¿Kuna lurañanaksa Jesusajj yaqhep warminakar churäna?

¹² Jesusajj yaqhep warminakarojj wali importante lurañanakwa churäna. Sañäni, Jesusan jaktatapatjja Diosar serviri warminakaw nayraqat yatipjjäna. Jupanakaruw jaktatapat apostolonakar yatiyapjjañapatak mayïna (Mat. 28:5, 9, 10). Pentecostés 33 maran cristianonakajj espíritu santo katoqapkäna ukhajja, warminakajj katoqapjjarakpachänwa. Ukhamächi ukhajja, jupanakajj “Diosan musparkañ luräwinakapatwa” kunayman arut parlapjjpachäna (Hech. 1:14; 2:2-4, 11).

13. 1) ¿Kunjamsa kullakanakajj Jehová Diosar servisipki? 2) ¿Kunjamanakatsa jumajj luratanakap sum uñjatam uñachtʼayasma?

¹³ Kullakanakarojja, Diosar servisajj kunanaksa lurasipki ukanakat yuspärañasawa. Jupanakajj Tantachasiñ Utanak lurañana, askichañanwa yanaptʼapjje. Yaqhepajja, yaqha aru parliri gruponakanwa yanaptʼapjje, Betelan voluntariotwa servipjjaraki, jan waltʼäwinakansa yanaptʼapjjarakiwa. Yaqhepasti, traductorata, precursorata, misioneratwa servipjjaraki. Ukatjja, jilatanakjamarakiw Precursoranakatak Escuelarusa, Diosan Reinopat Yatiyirinakataki Escuelarusa, Galaad Escuelarus sarapjje. Yaqhep kullakanakajj esposonakaparuw Diosan markapansa congregacionansa lurañanakap phoqapjjañapatak yanaptʼapjje. Janitï esposanakapajj yanaptʼapkaspa ukhajja, janiw lurañanakap sum phoqapkaspati, uka jilatanakajj ‘mä bendicionar uñtatäpjjewa’ (Efes. 4:8). ¿Kunjamanakatsa esposanakapar chʼamañchtʼsna?

14. Kunjamtï Salmo 68:11 qellqatajj siskejja, ¿kunsa suma jilïr irpirinakajj lurapjje?

¹⁴ Suma jilïr irpirinakajja, kullakanakan ‘mä jachʼa ejercitöpjjatap’ amuyapjjewa. Kullakanakajj trabajiñatakejj jankʼakïpjjewa, yaqhepanakajj Jehová Diosan arunakapsa sumwa  yatiyapjje (Salmo 68:11 notat liytʼañataki). * Ukatwa jilïr irpirinakajj uka kullakanakat yateqasiñatak chʼamachasipjje. Abigaíl kullakat parltʼañäni, kunjamsa jaqenakamp parlañ qallti uk jilatanakajj jisktʼapjje ukhajja, jupajj wal kusisi. Kullakajj akham siwa: “Jisktʼapjjetu ukhajja, Diosan markapan yanaptʼaskatajwa amuyasta” sasa. Diosar jan jitheqtas servisipki, ukhamarak experiencianïpki uka kullakanakajja, tawaq kullakanakarojj problemanïpki ukhajj wal yanaptʼapjjaspa, uk jilïr irpirinakajj sum yatipjje (Tito 2:3-5). Ukhamajja, kullakanakarojj wali valoranitwa uñjapjjañasa, munasiñampiw uñjañasaraki.

15. ¿Kunapachanakas kullakanakajj arjjatatäñsa yanaptʼatäñsa munapjjaspa?

¹⁵ Awisajja, yaqhep kullakanakajj jan waltʼañan uñjasipki ukhaw arjjatatäñsa yanaptʼatäñsa munapjje (Is. 1:17). Sañäni, mä viuda kullakasa jan ukajj divorciata mä kullakasa, jupat jan wal parlapkaspa ukhaw arjjatatäñ munaspa, jan ukajj kuntï esposopajj lurirïkäna uka lurañanakan yanaptʼatäñwa munaspa. Edadani mä kullakajja, doctorampi parlañatakiw yanaptʼa munarakispa. Yaqhep precursora kullakanakajja, Diosan markapanwa yaqhep proyectonakan yanaptʼapjje, ukatwa kunatsa mayni precursoranakjam jan predicapki sasin jupanakat jan wal parlapjjaspa, ukapachaw jupanakajj arjjatatäñ munapjjarakispa. ¿Kunanakampsa jupanakar yanaptʼañatakejj lursna? Jesusat parltʼaskakiñäni.

16. Marcos 14:3-9 textorjamajja, ¿kunjamsa Jesusajj Mariat jan wal parlapkäna ukhajj arjjatäna?

¹⁶ Jesusajja, kullakanakat jan wal parlapjjäna ukhajja, jan pächasisaw jupanakar arjjatäna. Sañäni, Martajj Mariat jan wal parlkäna ukhajja, Jesusajj arjjatänwa (Luc. 10:38-42). Yaqha horasan Marian luratapat jan wal parlapkäna ukhajja, ukhamarakiw jupar arjjatäna (Marcos 14:3-9 liytʼañataki). Kunatsa Mariajj ukham luräna uk Jesusajj sumwa yatïna, ukatwa jupar chʼamañchtʼañatakejj akham säna: ‘Kuntï jupajj naya layku lurki ukajj wali suma luräwiwa. Kuntï lurirjamäki ukwa luraraki’ sasa. Ukatjja, mä profecía arsurakïna, akham sasa: “Kawkjanakantï oraqpachan suma yatiyäwinakajj yatiyaskani uka cheqanakanjja, aka warmin luratapajj yatiyasirakiniwa” sasa. Aka yatichäwinsa Mariatwa parlaskaraktanjja. Jesusan uka arunakap istʼañajj Mariar wal chʼamañchpachäna. Cheqas kawkjanakantï oraqpachan suma yatiyäwinakajj yatiyaski ukawjanakanwa Marian luratapajj yatiyasiraki.

17. ¿Kunapachas mä kullakajj arjjatatäñ munaspa?

¹⁷ ¿Kullakanakat jan wal parlapki ukhajj arjjattanti? Congregacionansa mä kullakat jan wal parlapkaspa ukham sañäni, jupan esposopajj janiw Testigökiti, walja kutiw tantachäwinakarus qheptʼat puri, tukuyjjepansti jankʼakiw sarjjaraki, wawanakaparus awisakiw tantachäwir irparaki. Uk uñjasajja, ‘kunatsa Testigjamajj esposopampi jan respetayaski’ sasaw jupat jan wal parlapjje. Ukampis kullakajj qhawqtï puedki ukarjamaw chʼamachasiski. Jupajj janiw kuna horaruy mistuñ munchi jan ukajj puriñ munchi ukarjam sarnaqkaspati, ni wawanakaparus munañaparjamak apnaqkaspati. ¿Kunjamsa kullakar arjjatsna? Kullakan chʼamachasitapat felicitañasawa, mayninakarus kuntï luraski ukajj walikïskatapwa amuytʼayañasa, ukhamat jan jukʼamp jupat jan wal parljjapjjañapataki.

18. ¿Kunjamanakatsa kullakanakar yanaptʼaraksna?

¹⁸ Maysa toqetjja, kunanakantï yanaptʼatäñ  munapki ukanakan yanaptʼasaw kullakanakat llakisitas uñachtʼaysna (1 Juan 3:18). Usut mamitapar cuidkäna uka Anita kullakajj akham siwa: “Yaqhep jilat kullakanakajja, awisajj yanaptʼiriw jutapjjerïna, ukhamatwa yaqhanak lurañatakejj tiempojj utjitäna, awisasti manqʼwa apanipjjerïna. Ukanwa qhawqsa munasipjjetäna uk amuyasiyäta” sasa. Yordana kullakarojj mä jilataw autop kunjamsa cuidaspa uk yatichtʼäna, jupajj akham siwa: “Jilat kullakanakajj nayat llakisipjje, jan kuna accidenter purtʼasiñaj munapjje ukhajj wal kusista” sasa.

19. ¿Kun lurasas jilïr irpirinakajj kullakanakar yanaptʼapjjarakispa?

¹⁹ Jilïr irpirinakajj ukhamarakiw kullakanakajj kuna yanaptʼsa munapjje ukanakat llakisipjje. Kunjamsa Jehová Diosajj kullakanakar uñjasiñap muni uksa yatipjjarakiwa (Sant. 1:27). Ukatwa Jesusjam amuytʼirïpjjatap uñachtʼayapjje, janiw kunatï jan phoqañjamäki ukanak mayipkiti (Mat. 15:22-28). Jupanakajj kullakanakar yanaptʼañatak chʼamachasipjje ukhajja, kullakanakajj jupanakat llakisipjjatap amuyapjjewa. Kia kullakajj yaqha utar jakir sarjjäna ukhajj ukhamwa amuyäna. Grupo uñjir jilatajj uk yatisajja, jankʼakiw jilat kullakanakamp yanaptʼayäna. Kullakajj akham siwa: “Ukham yanaptʼasasa, arunakapampisa walpun chʼamañchtʼapjjetu. Jachʼa llakpun apaqapjjetu. Jilïr irpirinakajja, congregacionan wali munatätaja, jan waltʼäwinakar saykatañatakis jan sapakïtajwa amuyayapjjetu” sasa.

20, 21. ¿Kunjamsa taqe kullakanakar wali valoranit uñjatas uñachtʼaysna?

²⁰ Walja kullakanakaw congregacionan wal trabajisipki, jupanakar yanaptʼañasawa. Jesusajj kunjamsa kullakanakar uñjirïna ukat ¿kuns yateqsna? Kullakanakampïñatakis jupanakar uñtʼañatakis tiempo apstʼasiñasawa. Diosar serviñatakejj kunanaktï lurapki ukanakatsa yuspärañasawa. Jupanakat jan wal parlapkani ukhas arjjatañasarakiwa.

²¹ Pablojj Romankir cristianonakar carta qellqkäna ukhajja, tukuyarojj llätunka kullakanakan sutinakapwa aytäna (Rom. 16:1, 3, 6, 12, 13, 15). Jupanakar sutipat aruntatapatsa, chʼamañchtʼatapatsa kullakanakajj wal kusisipjjpachäna. Jiwasatï congregacionasankir kullakanakar yanaptʼañäni ukhajja, jupanakarojj kullakanakasarjam wali valoranit uñjataswa uñachtʼayañäni.