1, 2. 1) Apóstol Pablojj hebreonakar carta qellqkäna ukhajj ¿kuna jan walinakas Judean pasaskäna? 2) ¿Kunjamsa uka cartajj jilat kullakanakar yanaptʼäna?

 JESUSAJJ jiwjjäna uka qhepatjja, judío cristianonakajj kunayman jan waltʼäwinakan uñjasipjjäna. Cristiano congregacionajj uttʼayaskäna uka qhepat jilat kullakanakajj arknaqataw uñjasipjjäna (Hech. 8:1). Mä 20 maranak qhepatjja, Criston arkirinakapajj qollqet pistʼataw uñjasipjjäna, inas manqʼat pistʼañ utjatap layku ukhaman uñjasipjjchïna (Hech. 11:27-30). Ukampis 61 antes de Cristo maranakanjja, jilat kullakanakajj arknaqatäpjjänwa, ukampis jutïrin jukʼamp arknaqatäpjjañapänwa. Uka tiemponwa apóstol Pablon qellqat mä carta katoqapjjäna, uka cartajj wal jupanakar yanaptʼäna.

² Niyakejjay jilat kullakanakajj jutïrin jukʼamp arknaqat uñjasipjjañapächïnjja, Hebreonakar Qellqat Cartajj wal jupanakar yanaptʼäna. Pablon suma ewjjanakapajj jan walin uñjasipjjañapäkäna uk aguantañatakiw hebreonakar yanaptʼäna. Kuna laykutejj Jesusan arunakaparjamajja, judionakan tiempopaw niya tukusiñampïskäna (Luc. 21:20). Ukampis ukajj kunapachas pasani ukjja, janiw Pablosa ni Judeankir cristianonakas yatipkänti. Ukhamajj janïr uk purinkipanjja, jilat kullakanakajj Diosar jukʼamp confiyañataki aguantirïñatakiw chʼamachasipjjañapäna (Heb. 10:25; 12:1, 2).

3. ¿Kunjamsa Hebreonakar Qellqat Cartajj yanaptʼarakistaspa?

³ Hebreo jilat kullakanakat sipansa niyarakiw jiwasajj jukʼamp jachʼa tʼaqesiñan uñjasiñäni (Mat. 24:21; Apoc. 16:14,  16). Ukatwa jichhajj kuna ewjjtʼanaktï Jehová Diosajj jupanakar churkäna ukanakat mä qhawqha yatjjataskañäni. Ukanakajj jiwasar yanaptʼarakistaspawa.

‘DIOSAR SERVIÑAN SUMA SAYTʼATÄÑASAWA’

4. ¿Kuna jan walinsa judío jilat kullakanakajj uñjasipjjäna? (Dibujo uñjjattʼarakïta).

⁴ Judío jilat kullakanakajj mä jachʼa jan waltʼäwin uñjasipjjäna. Jerusalenajj walja maranakaw Diosan ajllit markapäna. Diosan uttʼayat reyejj uka markatpachwa markachirinakar apnaqäna, uka markankir templonwa Jehová Diosar adorapjjarakirïna. Diosat jan jitheqtir taqe judionakajj Moisesan Leyiparjama, kuntï pʼeqtʼirinakapajj yatichapkäna ukarjamaw sarnaqapjjäna. Manqʼañ toqetsa, circuncidasiñ toqetsa, kunjamsa yaqha markankirinakar uñjapjjañapa uka toqets leyinakanïpjjarakïnwa. Maysa toqetjja, Jesusajj jiwjjäna uka qhepat janiw Jehová Diosajj templon loqtat sacrificionak katoqjjänti. Ukarjam lurañajj judío cristianonakatakejj chʼamakïnwa, kuna laykutejj Moisesan Leyiparjam lurañar yatitäpjjänwa (Heb. 10:1, 4, 10). Apóstol Pedrjam Diosar serviñan suma saytʼat cristianonakatakis uka cambionakar yatinoqtañajj chʼamakïnwa (Hech. 10:9-14; Gál. 2:11-14). Yaqha yatichäwinakar creyjjapjjatap laykojja, uka jilat kullakanakajj judío religión pʼeqtʼirinakamp arknaqataw uñjasipjjäna.

5. ¿Kuna jan walinakansa cristianonakajj uñjasipjjäna?

⁵ Pä kasta gruponakaw Judeankir cristianonak contrajj saytʼapjjäna. Mä toqetjja, judío religión pʼeqtʼirinakajj apostatanakarjamaw jupanakar uñjapjjäna. Maysa toqetjja, Criston arkirinakapjamajj Moisesan Leyiparjam phoqañasaw wakisi sasaw yaqhep cristianonakajj sapjjäna, inas jan arknaqatäñ layku ukham sapjjchïna (Gál. 6:12). ¿Kunas uka cristianonakarojj Diosat jan jitheqtañatakejj yanaptʼaspäna?

6. ¿Kun lurapjjañapatakis Pablojj hebreonakar chʼamañchtʼäna? (Hebreos 5:14-6:1).

⁶ Cartapanjja, Pablojj Diosan Arupat jukʼamp yatjjatapjjañapatakiw hebreonakar  chʼamañchtʼäna (Hebreos 5:14-6:1 liytʼäta). Hebreo Arut Qellqatanakat aytasajja, kunatsa judionakan Diosar adorapjjatapat sipans hebreo cristianonakan Diosar adorapjjatapajj jukʼamp sumäna ukwa Pablojj qhanañchäna. a Kunatï Qellqatanakat cheqäki uk sum yatjjatapjjañapataki sum amuyapjjañapatakiw Pablojj jilat kullakanakar chʼamañchtʼäna, ukhamat kawkïris kʼari yatichäwinakajj uk amuyasin ukanak rechazapjjañapataki, janirak cheqa yatichäwit jitheqtapjjañapataki.

7. ¿Kuna jan walinakas jichha tiempon utjaspa?

⁷ Jiwasajj hebreo cristianonakjamarakiw Jehová Diosan cheqap mandatonakap conträki uka yatiyäwinakarusa yatichäwinakarus saykattanjja. Biblian mandatonakaparjam sum sarnaqañ munatasat yaqhepanakajj janis amuytʼañ munksna, janis sinttʼasirïksna ukhamwa parlapjje. Kuntï akapachankir jaqenakajj amuyapki lurapkaraki ukajja, urut urutjamajj janiw kunjamtï Jehová Diosajj amuyki ukhamäjjeti (Prov. 17:15). Ukhamajj uka jan wali amuyunakat amuyasiñasa ukanak rechazañas wali wakiskiriwa, janiw jiwas contra saytʼirinakampejj desanimayasiñasäkiti, janirakiw cheqa yatichäwinakat apaqayasiñasäkiti (Heb. 13:9).

8. ¿Kunsa Diosar serviñan suma saytʼatäñatakejj lursna?

⁸ Pablojj Diosar serviñan suma saytʼatäpjjañapatakiw hebreo cristianonakar ewjjtʼäna. Jiwasajj uka ewjjtʼar istʼañasarakiwa. Ukatakejj Bibliat sum yatjjatañasawa, Jehová Diosjam amuyañatakiw chʼamachasiñasaraki. Jehová Diosar jakäwis katuyasjjasasa bautisasjjasas uk luraskakiñasawa. Walja maranakasa jan ukajj jukʼa maranakakis Diosar sirvstanjja, taqeniw Diosan Arup sapür liytʼañasa, yatjjatañasaraki (Sal. 1:2). Bibliat sapak yatjjatañajj Diosar jukʼamp confiyañatakiw yanaptʼistani, ukwa Pablojj cartapan qhanstayäna (Heb. 11:1, 6).

‘JAKAÑAS JAN APTʼASIÑATAKEJJ DIOSAR CONFIYAÑASAWA’

9. ¿Kunatsa cristianonakan Diosar jukʼamp confiyapjjañapajj wakisïna?

⁹ Hebreo cristianonakajj Jehová Diosaruw jukʼamp confiyapjjañapäna, ukaw Judean utjañapäkäna uka tʼaqesiñan jan jiwañatakejj yanaptʼaspäna (Heb. 10:37-39). Jerusalenar ejercitonakamp muyuntat uñjapjjäta ukhajja, qollunakar escapjjapjjañamawa sasaw Jesusajj arkirinakapar säna. Uka ewjjtʼapajj markan jakirinakataki jan ukajj marka anqäjjan jakir taqe cristianonakatakïnwa (Luc. 21:20-24). Uka tiempon marka anqäjjan jakir jaqenakajja, ejercitonakamp muyuntatäsajj murallanakamp jarkʼantat markaruw escapapjjerïna. Ukhamajj jaqenakan amuyupatakejj janiw qollunakar escapañajj walïkaspänti, Diosar jukʼamp confiyañaw wakisirakïna.

10. Hebreos 13:17 textorjamajj ¿kunsa Diosar wal confiyir cristianonakajj lurapjjañapäna?

¹⁰ Hebreo cristianonakajja, khitinakarutï Jesusajj congregacionan irpirïpjjañapatak uttʼaykäna ukanakaruw confiyapjjañaparakïna. Uka irpirinakajj inas kunapachasa ukat kunjamsa escapapjjañapa uka toqet parlir instruccionanak congregacionankirinakar churapjjchïna (Hebreos 13:17 liytʼäta). Hebreos 13:17 texton “istʼapjjam” sasin traducitäki uka griego arojja, kunjamsa maynejj instrucción churirir confiyatap laykojj istʼi uka toqetwa parli, janiw instruccionanak churañatak autoridadanïtap layku istʼañat parlkiti.  Ukhamajj hebreo cristianonakajja, janïr uka tʼaqesiñ qalltkipan ancianonakar jukʼamp confiyañatakiw chʼamachasipjjañapäna. Jupanakatï janïr uka tʼaqesiñ utjkipan istʼasirïpjjaspäna ukhajja, tʼaqesiñ tiempon ancianonakar istʼañajj jukʼamp facilakïspänwa.

11. ¿Kunatsa Diosar wal confiyañasa?

¹¹ Jiwasajj hebreo cristianonakjamarakiw Jehová Diosar jukʼamp confiyañasa. Jichha tiempon jilaparte jaqenakajja, janiw akapachan tukusiñapat Bibliajj parlki uk creyipkiti, ukar creyitas laykojj jiwasat burlasipjjewa (2 Ped. 3:3, 4). Jachʼa tʼaqesiñ tiempot Bibliajj mä qhawqhanak qhanañchkchistusa, janiw taqpachpun yatktanti. Jachʼa tʼaqesiñ tiempojj Jehová Diosan amtataparjamaw horasapar purinini, “jupaw cuidaskistani” sasin amuyañatakejj Diosar wal confiyañasawa (Hab. 2:3).

12. ¿Kunas jachʼa tʼaqesiñ tiempon salvasiñatakejj yanaptʼistani?

¹² Jehová Diosajj ‘suma phoqeri amuyasir esclavo’ toqew jichhürunakan irpistu, ukar jukʼamp confiyañatakiw chʼamachasiñasaraki (Mat. 24:45). Jachʼa tʼaqesiñajj qalltkani ukhajja, inas salvasiñatakejj qhana instruccionanak katoqchiñäni. Romanonakajj Jerusalenar muyuntapkäna ukhajj ukhamarakiw hebreo cristianonakajj instruccionanak katoqapjjpachäna. Ukhamajj Jehová Diosan markapan irpirinakar jukʼamp confiyañatakejj jichhaw chʼamachasiñasa. Jichha tiempontï instruccionanakapar istʼañasa confiyañas jiwasatak chʼamächi ukhajja, jachʼa tʼaqesiñ tiempon jukʼamp chʼamäniwa.

13. ¿Kunatsa Hebreos 13:5 textonkir ewjjtʼajj wali wakiskirïna?

¹³ Janïr qollunakar escapkasajja, hebreo cristianonakajj janiw ‘qollqe sinti munirïpjjañapäkänti’, wakiski ukampikiw jakasipjjañapäna (Hebreos 13:5 liytʼäta). Jupanakat yaqhepajj manqʼat pistʼatäñsa pobren jakasiñs yatipjjarakïnwa (Heb. 10:32-34). Mä tiempojj suma yatiyäwinak laykojj jan walinak aguantapkchïnsa, inas yaqhepajj jan walinakat jarkʼaqasiñatakisa qollqet jan pistʼañatakis qollqe jikjjatañar uchasjjapjjchïna. Ukampis Jerusalenajj tukjatäñapäkäna ukat janiw kuna qollqes jarkʼaqkaspänti (Sant. 5:3). Antisas qollqe munirinakatakejja, utanakapa utjirinakap jaytasin escapañajj wali chʼamäspänwa.

14. ¿Kunjamsa jichha tiempon Diosar confiyatasajj yantʼat uñjasispa?

¹⁴ Akapachajj tukusipuniniwa sasin confiyañäni ukhajja, janiw qollqenïñas yänakanïñas jiwasatak nayrankkaniti. Jachʼa tʼaqesiñ tiemponjja, qollqejj janiw kuna valoranëjjanisa. Bibliajja jaqenakajj “qollqep callenakaruw jaqtapjjani”, kuna laykutejj “janiw qollqepasa qoripasa Jehová Diosan colerasiñ urupat jupanakar salvkaniti” sasaw qhanañchi (Ezeq. 7:19). Walja qollqe jikjjatañat sipansa, kunatï jiwasarusa familiasarus sumäskakiñatak yanaptʼkistaspa Jehová Diosar serviskakiñatak yanaptʼkarakistaspa uka amtanakaruw puriñasa. Janiw amanut manur mantañasäkiti, janirakiw kunanakatï utjkistu ukanak uñjañ laykojj tiemp ina chʼusar aptʼasiñasäkiti. Kunanakatï utjkistu ukanakarojj janiw wal munasiñasäkiti (Mat. 6:19, 24). Akapachan tukusiñap jakʼachasinkipanjja, Jehová Diosarut confiytan jan ukajj kunanakatï utjkistu ukanakaruch confiytan uk ajlliñasawa.

‘AGUANTAÑASAWA’

15. ¿Kunatsa cristianonakan aguantapjjañapajj wali wakiskirïna?

¹⁵ Niyakejjay jukʼamp jan waltʼäwinakan uñjasipjjchïnjja, Judeankir cristianonakajj Jehová Diosar serviñan aguantasipkakiñapänwa  (Heb. 10:36). Jupanakat yaqhepajj wali arknaqatas uñjasipkchïnjja, janïr jan waltʼäwi qalltkipanwa waljanejj Criston arkiripar tukupjjäna. Ukatwa Pablojj jukʼamp arknaqatäñatakisa jiwañkam Diosat jan jitheqtañatakis wakichtʼatäpjjañapatak amtayäna, kunjamtï Jesusajj jiwañkam aguantkäna ukhama (Heb. 12:4). Ukampis walja jaqenakan Criston arkiripar tukusipkatapatjja, contra saytʼir walja judionakaw coleratäsajj chʼajjwañ munapjjäna. Mä qhawqha maranak nayrajja, Pablojj Jerusalenan predicaskäna ukhajj walja jaqenakaw jupa contra saytʼapjjarakïna. “Pablor jiwayañkamajj janipuniw manqʼkañäniti ni umkañänisa. Jiwasatï uka juramentor jan phoqkañänejja, maldisitäñäniwa” sasaw 40 jila judionakajj sapjjäna (Hech. 22:22; 23:12-14). Ukham uñisitpachasa arknaqatpachasa, cristianonakajj Diosar adorañatakejj tantachasisipkakiñapänwa, predicasipkakiñapänwa, Diosarus jukʼampiw confiyapjjañapäna.

16. Arknaqatäktan ukhajj ¿kun amuyañatakis Hebreonakar Qellqat Cartajj yanaptʼistaspa? (Hebreos 12:7).

¹⁶ ¿Kunas hebreo cristianonakarojj aguantañatak yanaptʼaspäna? Apóstol Pablojja kunjamsa aguantañajj jupanakar yanaptʼaspa ukwa cristianonakar amuytʼayäna. Kunapachatï maynejj yantʼat uñjaski ukhajja, Diosajj ukarjamaw suma cristianöñatak yatichaspa, ukwa Pablojj jupanakar qhanañchäna (Hebreos 12:7 liytʼäta). Cheqas ukaw jupanakarojj Diosatakjam suma chuymanïñatakejj yatichaspäna jan ukajj yanaptʼaspäna. Yantʼanakan uñjasiñajj kunjamsa suma cristianöñatak yanaptʼasi uk amuyañajja, hebreo cristianonakarojj yantʼanakan aguantañatakiw yanaptʼaspäna (Heb. 12:11).

17. ¿Kunsa Pablojj arknaqatäsin aguantañ toqet yatïna?

¹⁷ Pablojja hebreo cristianonakarojj yantʼanakamp jan aynachtʼañataki aguantapjjañapatakiw chʼamañchäna. Jupajj ukhaman uñjasiñ yatitap laykojja ewjjtʼanak churañatakejj  wakichtʼatänwa. Niyakejjay jupajj nayra tiempon cristianonakar arknaqerïchïnjja, kuna jan walinakans uñjasipjjañapäna uk jupajj yatirakïnwa. Jupajj arknaqatäsajj aguantarakïnwa, yamas cristianöjjäna ukhajj kunayman yantʼanakaruw saykatañapäna (2 Cor. 11:23-25). Ukhamajj aguantañatakejj kunas wakisïna uk Pablojj sum yatïna. Ukatwa uka cristianonakarojj yantʼanakan uñjasisajj jan jupanak pachpar confiyasipjjañapataki, Jehová Diosar confiyapjjañapatak amtayäna. Jupa pachpaw jan ajjsartʼas akham säna: “Jehová Diosaw yanapirijajja, janiw ajjsarkäti” sasa (Heb. 13:6).

18. ¿Kunsa Bibliajj qhanañchistu, ukat kunsa jichhatpach wakichtʼasiñatak lurañasa?

¹⁸ Yaqhep jilat kullakanakajj arknaqataw uñjasisipki. Jupanakar munasitas uñachtʼayañatakejja, jupanakatakejj orarapiñasawa, jan ukajj kunanaktï necesitapki ukanak churasaw yanaptʼaraksna (Heb. 10:33). Ukampis “taqe khitinakatejj Cristo Jesusan arkiripjam jakañ munapki, Dios chuym jakañ munapkaraki ukanakajja, jan waltʼayañatak arknaqataw uñjasipjjarakini” sasaw Bibliajj qhanañchistu (2 Tim. 3:12). Ukhamajj taqeniw jutkani uka jan waltʼäwinakatak wakichtʼasiñasa. Jehová Diosar taqe chuym confiyasipkakiñäni, jupaw kuna yantʼar atipjañatakis yanaptʼistani sasin confiyapjjarakiñäni. Jupajj horasaparuw jupat jan jitheqtir taqe servirinakaparojj salvani (2 Tes. 1:7, 8).

19. ¿Kunanak lurañas jachʼa tʼaqesiñ tiempotak wakichtʼatäñatakejj yanaptʼistaspa? (Dibujo uñjjattʼarakïta).

¹⁹ Pablojj hebreonakar qellqkäna uka cartajja, niy pasañampïkäna ukatak wakichtʼasiñatakiw jupanakar yanaptʼäna. Pablojja Qellqatanakat jukʼamp sum yatjjatapjjañapataki sum amuytʼapjjañapatakiw chʼamañchtʼäna. Ukhamatwa Diosar confiyañan aynachtʼaykaspa uka yatichäwinak amuyañatakisa rechazañatakis wakichtʼatäpjjaspäna. Diosar jukʼamp confiyapjjañapatakiw jupanakar chʼamañchtʼarakïna, ukhamat Jesusampiru congregación irpirinakampir jankʼak istʼapjjañapataki. Yantʼanakan aguantasipkakiñapatakejja, kunjamsa munasir Awkipajj uka yantʼampejj suma cristianöñatak yatichäna uk amuyañatakiw jupanakar yanaptʼäna. Jiwasatï Bibliajj ewjjtʼkistu ukarjam lurañatak chʼamachasiñäni ukhajja, tukuykamaw Jehová Diosat jan jitheqtas aguantañäni (Heb. 3:14).