SAPAKIS mä jan walin uñjaskasma ¿ukhamti amuyasta? “Chʼama tukuña jan wali tiempona[kan]” jakasajja, sapaki wali llakita ukhamaw amuyasiraksna, ukampis janiw uka llakinakar sapaki saykatañasäkiti (2 Tim. 3:1). Bibliarjamajja, “jan walinakajj utjki ukhajj” cheqpach amigonakaw yanaptʼistani (Prov. 17:17).

Apóstol Pablojj viajkäna ukhajja, amigonakapajj kunaymanitwa yanaptʼapjjerïna (Col. 4:7-11). Roma markan preso katuntatäkäna ukhajja, kuntï Pablojj jan lurirjamäkäna ukwa lurapjjerïna. Epafroditojj kuntï Pablojj necesitkäna, kuntï Filipos markankir jilat kullakanakajj apayanipkäna ukanakwa jupar churäna (Filip. 4:18). Tiquicojj Pablon qellqat cartanakwa congregacionanakar lakiräna (Col. 4:7). a Pablojj utapan arrestatäkäna ukhasa, qhepat carcelan llawintatäkäna ukhasa, amigonakapan yanaptʼataw congregacionanakar chʼamañchtʼaskakïna. ¿Kunjamsa jiwasajj cheqpach amigötas uñachtʼayaraksna?

Jichhürunakan walja jilat kullakanakaw qhawqha valoranïpjjes cheqpach amigonakajj uk uñachtʼayapjje. España markankir Elísabet kullakat amuytʼañäni, jupajj precursora regularawa. Kunapachatï mamapan jan qollkañ canceranïtap yatiyapjjäna ukhajja, mä kullakajj jupatak cheqpach amigapunïnwa, sapa kutiw mensajenak toqejj chʼamañchtʼkir textonak apayirïna. Elísabet kullakajj akham siwa: “Mensajenakapajj janis sapäkirista ukham amuyasiñatakiw yanaptʼitäna, kuntï uka urun lurañajäkäna uk lurañatakis chʼamañchtʼarakitänwa” sasa (Prov. 18:24).

Jilat kullakanakar predicacionana jan ukajj tantachäwinakan yanaptʼasajja, jupanakampejj jukʼamp suma amigöpjjañäniwa. ¿Janit mä jilïr jilatarusa jan ukajj jilïr kullakarus predicacionaru jan ukajj tantachäwir apksna? Ukhamatwa maynit maynikam chʼamañchtʼassna (Rom. 1:12). Ukampis yaqhep jilat kullakanakajj janiw utapat misturjamäpkiti. ¿Kunjamsa jupanakatak cheqpach amigösna?

Yaqhep jilat kullakanakajj usutäpjjatapatsa jan ukajj yaqha ukhamanakan uñjasipjjatapats janiw tantachäwinakar sarañ puedipkiti. Ukaw David jilatampejj pasäna, juparojj linfoma sat usunïtapwa yatiyapjjäna, sojjta phajjsinakaw quimioterapia sat tratamiento katoqarakïna. Uka tratamientomp phoqkasajja, jilatasa Lidia esposapas videoconferencia toqew tantachäwinakar conectasipjjäna.

¿Kunjamsa congregacionankirinakajj yanaptʼapjjäna? Tantachäw tukuyatarojj Salonankirinakat yaqhepajj videoconferencia toqe parltʼasiñatakiw  tiemp apstʼasipjjerïna. David jilatampi Lidia kullakamp tantachäwinakan comentapjjerïna ukhajja, jilat kullakanakajj chʼamañchtʼkir mensajenak apayapjjerïna. Ukhamïpanjja, David jilatampi Lidia kullakampejj amigonakapan wali munataw amuyasipjjerïna.

¿Janit utapat jan misturjamäpki ukanakamp predicañatak chʼamachasksna? Jupanakar yanaptʼañatak tiempo apstʼasisajja, jupanakat amtasitaswa uñachtʼaysna (Prov. 3:27). ¿Janit jupanakamp carta toqesa jan ukajj teléfono toqes predikksna? Maysa toqetjja, predikir mistuñatak tantachäwir videoconferencia toqe conectasipjjañapatakiw ancianonakajj amtapjjaspa. David jilatampi Lidia kullakampejj ukham conectasipjjatapat walpun yuspärapjje. Jilatajj akham siwa: “Grupojankir predicañatak tantachäwir conectasiñasa, ukan Bibliat mä qhawqha arunak arstʼañasa, orasiñas walpun yanaptʼapjjetäna” sasa. Bibliat yateqerisatï utjchi ukhajj ¿janit awisajj utapat jan misturjamäki uka jilatana jan ukajj uka kullakan utapan yatichañatak invitksna? Cheqas uka lugaratï seguröchi, uk lurañajj wakisirakchi ukhakiw uk lursna.

Utapat jan misturjamäpki uka jilat kullakanakampïñatak tiemp apstʼastan ukhajja, jupanakan suma chuymanïpjjatapwa uñjtanjja, jukʼamp amigöpjjaraktanwa. Kunjamsa Diosan Arupamp chuymar purtʼkir yatichapjje uk uñjasajja, jukʼampiw jupanakar respettanjja. Jilat kullakanakar ukham yanaptʼasajj jukʼamp amigonakanïñäniwa (2 Cor. 6:13).

Pablorojj Tito amigopanïñajj wal chuymachtʼäna (2 Cor. 7:5-7). Cheqas janiw amigonakasarojj aru mayak chuymachtʼañasäkiti, jan ukasti jupa chiktʼatäsasa, jupanakatak mä kun lurasas chuymachtʼaraksnawa, ukwa ukajj amtayistu (1 Juan 3:18).

Maynit maynikam yanaptʼasiñ toqetjja, Rusia markankir jilat kullakanakasajj wali yateqaskañäpjjewa. Serguéi jilatampin Tatiana esposapampin experienciapat amuytʼañäni. Policiajj qʼal thaqsuñatakiw utapar mantäna, ukat jupanakar jisksuñatakiw preso apapjjarakïna. Nayraqatajj Tatiana kullakaruw antutapjjäna, ukat jupajj utaparuw kuttʼjjarakïna. Kullakajj utapar kuttʼäna ukhajj kunas pasäna uk Serguéi jilatajj akham siwa: “Jan ajjsarir mä kullakaw utajar purïna. Uka qhepat jukʼamp jilat kullakanakaw puripjjäna, ukat utaj sum ordentʼañatakiw yanaptʼapjjarakïna” sasa.

Jilatajj akham sarakiwa: “Kuntï Proverbios 17:17 textojj siski ukajj gustapunirïtuwa, ukan akham siwa: ‘Cheqpach amigojja taqe tiempon munasiriwa, mä cheqpach amigojja jan walinakajj utjki ukhajj mä jilar uñtasitawa’ sasa. Arknaqat uñjasisaw jukʼampis uka texto sum amuyta. Cheqas janiw sapakejj aka jan waltʼäw aguantkiristti. Jehová Diosajj jan ajjsartʼir amigonak churitu, jupanakajj janiw jaytjapkituti” sasa. b

Jukʼamp chʼama tukuña jan wali tiemponakan uñjasisajja, jiwasar chʼamañchtʼir cheqpach amigonakwa munaraktanjja. Jachʼa tʼaqesiñ tiempon jukʼampiw jupanakar necesitañäni. Ukhamajj jichhatpach cheqpach amigöñatak chʼamachasiñäni (1 Ped. 4:7, 8).