1, 2. ¿Kuna jan walins mä waynajj uñjasïna, kunatsa niya ukhamanwa uñjasiraktanjja sasajj sissna?

 MÄ WAYNAT amuytʼañäni. Jupan tatap mamapajj wali qollqenïpjjewa. Ukampis mä urojja, tatap mamapajj mä accidenten jiwapjjatapwa jupar yatiyapjje. Janiw ukakïkiti, tatap mamapajj qollq qʼal tukjapjjäna, wali manunïpjjarakïnwa. Ukhamajj janiw uka waynajj kuna qollqsa herenciat katoqkiti, antisas tatap mamapan manunakap phoqañaw jupar waktʼi. Jaqenakajj manüki uka qollq jankʼak kuttʼayasiñatakiw waytʼapjjaraki. Ukampis walja qollqe manuniwa, janiw jupajj kunjamats uk phoqerjamäkiti.

² Jaqenakajj uka waynjamarakiw uñjastanjja. Nayrïr awk taykasajja, mä arun Adanampi Evampejja, perfecto jaqenakäpjjänwa, mä suma paraisonwa jakasipjjarakïna (Gén. 1:27; 2:7-9). Jupanakajj wiñayatakiw wali kusisit ukan jakasipjjaspäna. Ukampis mä akatjamatwa paraison jakasiñsa, wiñayatak jakasiñs aptʼasipjjäna. Ukhamajj ¿kuna herenciaksa wawanakapar jaytapjjäna? Bibliajj akham siwa: “Mä sapa jaqen [jan ukajj Adanan] juchapatwa juchajj aka mundor mantani, uka juchan utjatapatwa jiwañajj mantaniraki, ukhamatwa jiwañajj taqe jaqenakar katunti, taqenin juchachasipjjatap layku” sasa (Rom. 5:12). Ukhamajj jiwañar apki uka juchakwa Adanajj herenciat jaytawayistu. Uka juchajj mä jachʼa manump sasiwa, janiw khitis jiwasanakat uka manu kuttʼaykaspati (Sal. 49:8).

 3. ¿Kunatsa juchanakasajj manump sasispa?

³ Juchanakasajj ‘manump’ saskaspas ukhamwa Jesusajj  parläna (Mat. 6:12; Luc. 11:4). Jucha lurtan ukhajja, Jehová Diosampejj manurus mantksna ukhamawa. Jupar uka manu phoqañaw waktʼarakistu, ukampis Diosajj uka manu phoqañatakejj yanaptʼistuwa, janitï ukhamäkaspänjja, jiwañampikiw uka manu phoqasäna (Rom. 6:7, 23).

 4. 1) Jan yanaptʼatajj ¿kunjamans taqenis uñjassna? (Salmo 49:7-9). 2) ¿Biblian aytaski uka jucha arojj kamsañs muni? (“ Jucha” siski uka recuadro liytʼäta).

⁴ Kunanaktï Adanampi Evampejj aptʼawayapki ukjja, janiw jiwas sapakejj kutirayasiñ puedksnati (Salmo 49:7-9 liytʼäta). Jan yanaptʼatajja, janiw wiñay jakañatakisa jiwañat jaktañatakis mä suytʼäwejj utjkistaspati, animalanakjamarakiw jan mayampitak jiwjjsna (Ecl. 3:19; 2 Ped. 2:12).

 5. Manus phoqañatakejj ¿kunjamsa Jehová Diosajj yanaptʼistu? (Dibujo uñjjattʼäta).

⁵ Párrafo 1 ukan parlaniwayktan uka waynat amuytʼaskakiñäni. Wali qollqen mä jaqetï “nayaw taqe manunakam pagäjja” saspa ukhajj ¿kunjamas uka waynajj jikjjatasispa? Jupajj wali kusisitaw iyaw saspa, ukham khuyaptʼayatäsajj wal yuspärarakispa. Jehová Dios Awkisajj niya ukhamarakiwa, niyakejjay jupajj wal munaschistojja, Adán awkisajj herenciat jaytkistu uka manu phoqañatakejj mä regalo churistu. Uka regalot Jesusajj akham sasaw qhanañchäna: “Diosajj aka mundor wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa (Juan 3:16). Uka regalojj Jehová Diosamp sum apasiñatakiw yanaptʼistu.

 6. ¿Bibliankir kawkïr arunakatsa aka yatichäwin yatjjataskañäni, ukat ukajj kunatakis yanaptʼistani?

⁶ Juchanakasan perdonatäñapatak yanaptʼkistu uka suma regalon jiwasar yanaptʼañapatakejj ¿kunsa lursna? Uka jisktʼar jaysañatakejja, Biblian uñstir aka arunakatwa aka yatichäwin yatjjataskañäni: Diosamp sumankthapiña, juchanakat perdonayasiña, juchampit jiwañampit kutsuyatäña, salvatäña, cheqapar sarnaqer jaqet uñjatäña. Uka arunakajj kamsañs muni uka toqet lupʼiñajja, taqe kunanaktï Jehová Diosajj jiwasar perdonañatak lurawayki ukanakat jukʼamp yuspärañatakiw yanaptʼistani.

DIOSAMP SUMANKTHAPIÑA

 7. 1) ¿Kunsa Adanamp Evampejj aptʼasipjjarakïna? 2) ¿Kunsa Adanampin Evampin wawanakapajj wal muntanjja? (Romanos 5:10, 11).

⁷ Adanampi Evampejj janiw wiñay jakañak aptʼasipkänti. Jehová Dios Awkipamp sum apasipkäna uks aptʼasipjjarakïnwa. Janïr juchar purkasajj Diosan familiap taypinkapjjarakïnwa (Luc. 3:38). Ukampis Jehová Diosar  jan istʼapjjatapatjja, janiw familiap taypinkjjapjjänti. Janïr wawanïpkäna ukhaw ukajj pasarakïna (Gén. 3:23, 24; 4:1). Ukatwa wawanakapajj Jehová Diosamp sumankthapiñ muntanjja (Romanos 5:10, 11 liytʼäta). Mä arunjja, jupamp wasitat sum apasiñasaw wakisi. Mä qellqatarjamajja, Diosamp sumankthapiñat parlki uka texton griego arut mä aruw uñsti, uka arojj “kunjamsa mä enemigojj amigor tukuspa” uka toqet parlañatakiw apnaqasirakispa. Ukampis Jehová Diosaw jaqenakamp sumankthapiñ amtawayi, ukajj wali musparkañawa. ¿Kunsa jupajj jaqenakamp sumankthapiñatakejj luräna?

JUCHANAKAT PERDONAYASIÑA

 8. ¿Kunas juchanakat perdonayasiñajja?

⁸ Jehová Diosaw juchanakat perdonayasiñ utjayi, ukhamat jaqenakajj wasitat jupamp sum apasipjjañapataki. Kuntï Adanajj aptʼkäna ukajj wali valoranïnwa. Ukhamajj kunatï aptʼaskäna uk kutsuyañatakejja, kunatï uka pachpa valoranïki uk churañaw wakisirakïna. Griego Arut Qellqatanakanjja, juchanakat perdonayasiñat parlasajj kunsa Jehová Diosajj jaqenakan jupamp sum apasipjjañapatak luri uka toqetwa parlaraki (Rom. 3:25).

 9. Israelitanakan juchanakap perdonañatakejj ¿kunsa Jehová Diosajj uttʼayäna?

⁹ Israelitanakamp sum apasiñatakejja, kunsa juchanak perdonayasiñatakejj lurapjjaspa ukwa Jehová Diosajj amtäna. Juchanakat Qʼomachayasiñ Urojj maran mä kutiw amtasïna, uka uruw jachʼa jilïr sacerdotejj markan juchanakap laykojj animalanak sacrificiot loqtirïna. Cheqas uka sacrificionakajj janiw israelitanakan juchanakap phoqatpach qʼomachkaspänti. Ukampis Jehová Diosajj israelitanakan juchanakap perdonañatakejj jankʼakïnwa, ukatakejj arrepentisipjjañapänwa, mayitaparjamaw sacrificionak loqtapjjañaparakïna (Heb. 10:1-4). Ukhamajj Juchanakat Qʼomachayasiñ Uruna jan ukajj yaqha horasanakan sacrificionak loqtapkäna ukanakajja, juchararäpjjatapa, ukhamarak kunatï juchanakat phoqatpach qʼomachkaspa ukan wakisitapwa israelitanakar amtayäna.

10. ¿Kunsa Jehová Diosajj taqe jaqenakan juchanakap perdonañatakejj luräna?

¹⁰ Taqe jaqenakan juchanakap perdonañatakejja, Jehová Diosajj munat Yoqaparuw khitanïna, ukhamat Cristojj ‘mä kutiki jupa pachpa loqtasisajj waljanin juchanakap apasjjañapataki’ (Heb. 9:28). Jesusajj “vidap churañatakiw ju[täna], ukhamat waljanir juchat kutsuyañataki” (Mat. 20:28). Ukhamajj ¿kunas juchampit jiwañampit kutsuyañajja?

JUCHAMPIT JIWAÑAMPIT KUTSUYATÄÑA

11. 1) Bibliarjamajj ¿kunas juchampit jiwañampit kutsuyatäñajja? 2) Juchampit jiwañampit kutsuyatäñatakejj ¿kunas wakisïna?

¹¹ Biblian juchampit jiwañampit kutsuyañatak apnaqaski uka arojja, juchanakat perdonañataki sumankthapiñatak churaski uka preciomp sasiwa. Jehová Diosatakejja, kunatï aptʼaskäna uk kutirayañatakejj uk pagañaw wakisirakïna. Amtañäni, Adanampi Evampejj jan pantjasir jaqenakäpjjänwa, wiñayatakiw jakapjjarakispäna, ukampis taqe ukanak aptʼasipjjänwa. Ukhamajj kunatï aptʼaskäna uk kutirayañatakejja, aptʼaskäna ukajj qhawqha valoranïnsa uka pachpa precio pagañaw wakisïna (1 Tim. 2:6). Ukatakejj aka kimsa toqenakan sum phoqeri mä chachaw wakisïna: 1) perfectöñapänwa, 2) aka oraqen wiñayatak jakirjamäñapänwa, 3) jiwas laykojj jakañ vidap aptʼasiñatakejj dispuestokïñapänwa. Aptʼasiwayki uka jakañ vida lantejja, ukanakamp phoqer  chachan jakañ vidapakiw churasispäna, juchanakasas qʼomachatarakïspäna.

12. Jiwasar juchampit jiwañampit kutsuyañatakejj ¿kunanakampis Jesusajj phoqäna?

¹² Jiwasar juchampit jiwañampit kutsuyañatakejja, Jesusajj akanakampiw phoqäna: 1) jupajj perfectönwa, “janiw kuna juchsa lurkänti”, 2) ukatwa aka oraqen wiñayatak jakaspäna, 3) jakañ vidap aptʼasisajj jiwas layku jiwañatakejj dispuestokïnwa (1 Ped. 2:22; Heb. 10:9, 10). Kunjamtï Adanajj janïr juchar purtʼaskasajj perfectökänjja, ukhamarakiw Jesusajj perfecto jaqëna (1 Cor. 15:45). Ukhamajj Jesusaw jiwatapampejj Adanan juchap qʼomachäna, mä arunjja Jesusajj phoqatpach precio pagäna (Rom. 5:19). Ukhamat kuntï Adanajj aptʼkäna uka lantejj yaqha ukham kuttʼayañataki, ukhamatwa Jesusajj “qhep qhepa Adanäjjäna”. Kuntï Adanajj aptʼkäna ukan preciop wasitat pagañatakejja, janiw yaqha perfecto jaqejj wakiskiti. Jesusajj ‘mä kutikiw wiñayatak jiwäna’ (Heb. 7:27; 10:12).

13. Juchanak qʼomachañampi juchampit jiwañampit kutsuyañampejj ¿kunans jan igualäpki?

¹³ Ukhamajj juchanak qʼomachañampi juchampit jiwañampit kutsuyañampejj ¿kunans jan igualäpki? Juchanakat qʼomachañajja, kuntï Diosajj jaqenakamp wasitat sum apasipjjañapatak lurki ukawa. Juchampit jiwañampit kutsuyañajja, jaqenakan juchanakap qʼomachañatak pagaski uka preciowa. Uka preciojja, Jesusajj jiwas layku wilap wartawayki ukamp sasirakiwa (Efes. 1:7; Heb. 9:14).

SALVATÄÑAMPI CHEQAPAR SARNAQER JAQET UÑJATÄÑAMPI

14. ¿Kunsa jichhajj yatjjatañäni, ukat kunatsa ukanakat yatjjataskañäni?

¹⁴ Juchanakat qʼomachatäñajj ¿kunjamsa yanaptʼistu? Biblian uñstki uka pä arunakatwa yatjjataskañäni. Uka arunakajj kamsañs muni uk amuyañajja, kunjamsa Jehová Diosan perdonatapajj yanaptʼistu uk amuyañatakiw yanaptʼistani.

15, 16. 1) Bibliarjamajj ¿kunjamatsa salvatätanjja? 2) Juchampit jiwañampit salvatäsajj ¿kunjamas jikjjatastanjja?

¹⁵ Bibliarjamajja, juchampit jiwañampit kutsuykistu uka precion pagasitapatwa salvatätanjja. Apóstol Pedrojj akham sasaw uka toqet qhanañchäna: “Jumanakajj yatipjjtawa, nayra awkinakamat katoqapkta uka inamay jakäwinakamatjja janiw tukusir qollqempisa ni qorimpisa salvatäpktati. Jan ukasti Criston wali suma wilapampi salvatäpjjtawa, uka wilajj jan kamachtʼata qʼoma corderon wilapjamawa” sasa (1 Ped. 1:18, 19).

¹⁶ Juchampit jiwañampit kutsuyatäsajja, wal tʼaqesiykistu uka juchampit jiwañampitwa salvatätanjja (Rom. 5:21). Cheqas Jesusaw jiwasar salvañatakejj wilap wartawayi jan ukajj jakañ vidap churawayi, ukatwa Jehová Diosarus Jesusarus walpun yuspärtanjja (1 Cor. 15:22).

17, 18. 1) Cheqapar sarnaqer jaqet uñjatätas laykojj ¿kunas jan wakisjje? 2) ¿Kunjamsa cheqapar sarnaqer jaqet uñjatäñajj yanaptʼistu?

¹⁷ Bibliarjamajja Jehová Diosan servirinakapajj cheqapar sarnaqer jaqet uñjatätanwa, ukhamajj janiw Diosatakejj juchanakas laykojj kuna pagañas wakisjjeti. Ukham lurasinjja Jehová Diosajj janiw leyinakap pʼakintkiti, kunatï cheqapäki ukarjamaw luri. Jupajj janiw kuna sumanaktï lurktan ukarjam cheqapar sarnaqer jaqet uñjkistuti, janirakiw juchanakas janis kunäkaspa ukham uñjkiti. Jan ukasti kuntï Jehová Diosampi Jesusampejj juchampit jiwañampit jiwasar kutsuyañatak lurapki ukar confiyatasatjja, Jehová Diosajj juchanakas perdonañatakejj dispuestokiwa (Rom. 3:24; Gál. 2:16).

¹⁸ Jehová Diosajj cheqapar sarnaqer jaqet uñjkistu ukajj ¿kunjamsa yanaptʼistu? Yaqhep  cristianonakajja, Jesusamp chik alajjpachan apnaqañatak ajllitäpjjewa, Diosan wawanakapjam uñjatäpjjarakiwa (Tito 3:7; 1 Juan 3:1). Jupanakan juchanakapajj perdonatäjjewa, janis kunapachas juch lurapkaspäna ukhamarakiwa. Ukatwa Diosan Reinopan katoqatäpjjaspa (Rom. 8:1, 2, 30). Yaqhep cristianonakajj aka oraqen wiñay jakañatak suytʼäwinïpjjewa, jupanakajj Diosan amigopäjjapjjewa, juchanakapas perdonatäjjewa (Sant. 2:21-23). Yaqha ovejanakat uñtʼatäpki ukanakajj Armagedón pasatat wiñay jakañ suytʼäwinïpjjarakiwa (Juan 11:26). ‘Cheqapar sarnaqer jaqet’ uñjatäpki ‘jan cheqapar sarnaqer jaqet’ uñjatäpkaraki ukanakajja, jiwatäpkchis jaktanipjjaniwa (Hech. 24:15; Juan 5:28, 29). Tiempompejja Jehová Diosat jan jitheqtas servirinakapat aka oraqen jakirinakajj ‘Diosan wawanakapjamaw libre jakapjjani’ (Rom. 8:21). Kunjamtï uñjaniwayktanjja, juchanakasat qʼomachatäñajj Jehová Dios Awkisamp sumankthapiñatakiw yanaptʼistu, ukajj ¡mä jachʼa bendicionapuniwa!

19. Jehová Diosamp Jesusamp jiwasar yanaptʼapjjatapat ¿kuna bendicionanakas utji? (“ ¿Jehová Diosajj kunanaksa jiwasar perdonañatakejj luri?” sat recuadro liytʼarakïta).

¹⁹ Jiwasajj jan kun kamachtʼirjamäkäna uka waynjamarakiw jan kunan uñjasiyätanjja, jan paguirjam walja manunakaniw uñjasirakiyätanjja. Ukampis Jehová Diosaw yanaptʼistäna, kuntï juchanakasat qʼomachañatakejj lurkäna, juchampit jiwañampit kutsuyañatak pagkäna ukanakampejja, janiw ukhaman uñjasjjayätanti. Jesucristor confiyatasajja, juchampit jiwañampit salvatäñatakiw yanaptʼistu. Juchanakasajj chhaqtayatäspawa, janis kunapachas jucha lurkasäna ukhamäspawa. Ukampis taqe kunat sipansa, alajjpachankir wali munasir Jehová Dios Awkisamp sum apasitasaw jukʼamp importantejja.

20. ¿Kunsa jutïr yatichäwin yatjjataskañäni?

²⁰ Taqe kunanaktï Jehová Diosampi Jesusampejj jiwas layku lurawayapki ukanak sum amuykiptʼtan ukhajja, jupanakarojj walpun yuspärtanjja (2 Cor. 5:15). Jupanakatï jan yanaptʼapkistaspänjja, jiwasatakejj janiw kuna suytʼäwis utjkaspänti, ukhamajj ¿kunjamsa Jehová Diosan jiwasar perdonatapajj sapa maynir yanaptʼistu? Ukwa jutïr yatichäwin yatjjataskañäni.