Mary kullakampi John a esposopampejja, kawkjantï walja filipino jaqenakajj trabajiñatak jakir sarapki uka lugaranwa jakapjje, jupanakar predicañatakiw chʼamachasipjjaraki. COVID-19 pandemianjja, Mary kullakajj pachpa markapankirinakaru yaqha markanakan jakir jaqenakampiruw Bibliat yatichäna. ¿Kunjamsa uk luräna?

Mary kullakajj akham sasaw yateqerinakapar jisktʼirïna: “¿Khitis Bibliat yateqañ munaspa uk janit yatkta?” sasa. Jupanakat maynejj “jïsa” sirïna ukhajja, “¿presentitasmati?” sasaw sarakirïna. Ukham jisktʼañakiw kullakar wal yanaptʼawayi. ¿Kunatsa ukham sistanjja? Kuna laykutejj Diosan Arupar wali valoranit uñjirinakajja, familiaranakaparusa amigonakaparus kuntï yateqapki uk yatiyañ munapjjapuniwa. Kunjamsa Mary kullakar ukham jisktʼañajj yanaptʼäna uk uñjañäni.

Mä yateqeripajj Jasmin satänwa, jupajj Bibliat yateqañ muniri pusi jaqenakaruw Mary kullakar presentäna. Jupanakat maynejj Kristine satänwa, kuntï yateqkäna ukajj wal gustäna, ukatwa semanan pay kuti yateqapjjerïna. Mary kullakajj “¿khitimpis Bibliat yateqañ munaspa uk janit yatkta?” sasin jisktʼäna ukhajja, Kristine sat yateqeripajj “jïsa, amiganakajaw munarakispa, presentämawa” sasaw säna. Mä qhawqha semananakatjja, Bibliat yateqañ munir pusi amiganakaparuw presentäna. Qhepatjja, Kristine yateqeripajj yaqhanakampiruw kullakar presentäna, jupanakat yaqhepajj ukhamarak presentapjjäna.

Mary kullakar amiganakap presentasajja, Kristine sat yateqeripajj Filipinas markankir familiapan Bibliat yateqañapwa munarakïna. Ukatwa Andrea sat phuchapamp parläna. Qalltan Andrea phuchapajj akham sasaw amuyäna: “Testigonakajj mä sectakïpjjewa. Janiw Jesusan utjatapar creyipkiti, Antiguo Testamentok apnaqapjjaraki” sasa. Ukampis mä jukʼak yateqasaw taqe ukanakan kʼarïtap amuyasïna. Bibliat yateqkäna ukhajj akham sänwa: “Bibliantï ukham sischejja, ¡kuntï siski ukajj cheqäpachawa!” sasa.

Mä qhawqha tiempotjja, Andreajj pä amigapampiru trabajopankir mä compañerapampiruw Mary kullakar presentäna, jupanakajj ukhamarakiw Bibliat yateqañ qalltapjjäna. Andreajj Angela sat mä tianïnwa, uka tiapajj juykhünwa, Mary kullakajj Andrear Bibliat yatichkäna ukhajj amukiw ischʼukirïna. Mä urojja, Angela tiapajj Andrearuw Mary kullakar presentayasiñatak mayïna, jupajj Bibliat yateqañwa munarakïna. Angela tiaparojj walpun Bibliat yateqañajj gustäna. Janïraw mä phajjsis yateqapkänti ukhaw walja textonak pʼeqepar yatsüna, ukhamarus ¡semanan pusi kutiw Bibliat yateqañ munäna! Andrean  yanaptʼatajj videoconferencia toqew Angela tiapajj tantachäwinakar jan faltasis conectasjjäna.

Kristine yateqeripar yatichkäna ukhajja, jupan Joshua sat esposopajj uka jakʼanakanwa istʼaskirïna. Mary kullakajj uk amuyäna ukhajja, jupanakamp chik Bibliat yateqañapatakiw invitäna. Ukampis jupajj akham sänwa: “Ya, walikiwa, ukampis aleqak nayajj istʼapjjäma. Janiw nayar kuns jisktʼitätati, jan ukajj ukspachaw sarjjäjja” sasa. Janiw ukhat ni mä phesqa minutonakas paskänti, ukampis Kristine esposapat sipans jukʼampinak jupajj Mary kullakar jisktʼäna, Bibliat yateqañ munatapwa jupar sarakïna.

Mary kullakajj mä jisktʼampikiw walja jaqenakar Bibliat yatichañ qalltäna. Kullakajj yaqha jilat kullakanakaruw uka jaqenakar Bibliat yatichapjjañapatak churäna. ¡Mary kullakajj pusi markanakankir 28 jaqenakaruw Bibliat yatichañ qalltäna!

Qalltan parlaniwayktan uka Jasmin yateqeripajj abril de 2021 maranwa bautisasjjäna. Kristine sat yateqeripajj mayo de 2022 maranwa bautisasirakïna, jichhajj Filipinas markanwa familiapamp jakjjaraki. Kristine yateqeripajj presentkäna ukanakatjja, paniniw bautisasjjarakïna. Angelajj mä qhawqha phajjsinakatwa bautisasjjarakïna, jichhajj precursora regularat serviskaraki. Kristine kullakan Joshua esposopasa, Andrea phuchapasa, yaqha yateqerinakasa, jukʼampiw Bibliat yateqasipkaraki.

Nayrïr patak maranakanjja, jankʼakirakiw familiaranakarusa amigonakarus suma yatiyäwinakajj yatiyasïna (Juan 1:41, 42a; Hech. 10:24, 27, 48; 16:25-33). ¿Janit Bibliat yateqerinakamarusa yaqhanakarus jisktʼkasma? Jupanakarojj “¿khitis Bibliat yateqañ munaspa uk janit yatkta?” sasaw jisktʼasma. Ukham jisktʼasakiw waljanimp Bibliat yateqañ qalltasma.