1, 2. ¿Diosajj adoracionas katoqasiñapatakejj kunsa lurañasa?

 ¿KUNSA adoraña aru istʼasajj jumajj amuyta? Kunjamsa mä jilatajj ikiñap ladöjjan qonqortʼasis taqe chuyma Diosar orasiski uk inas amuysta, jan ukajj kunjamsa mä familiajj wali kusisit juntuki Bibliat yatjjatasipki uk inas amuyaraksta.

² Uka jilatasa jan ukajj uka familiasa, Jehová Diosaruw adorasipki. ¿Ukham adorapjjatap Diosajj katoqtʼaspachati? Jïsa, katoqtʼasiwa. Munañaparjam munasiñampi respetompi adorañäni ukhajja, jupajj katoqtʼasiniwa. Jehová Diosarojj wal munastanjja, juparukiw adorañ munaraktanjja, ukatwa jupar wali sum adorañasa.

3. ¿Kunanakatsa aka yatichäwin yatjjataskañäni?

³ Aka yatichäwinjja, kunjam adorasiñapsa Jehová Diosajj nayrajj munäna ukwa yatjjataskañäni, jichhürun kunjam adoratäñsa munaraki ukwa kimsaqallqo toqet yatjjataskarakiñäni. Ukanakat yatjjatkasajja, kunjamsa Jehová Diosar jukʼamp sum adorsna ukwa lupʼiñasa. Diosar cheqaparjam adorañajja, kunatsa kusisitäñatak yanaptʼistu ukwa yatjjataskarakiñäni.

4. Jesusajj janïr aka oraqer jutkäna uka tiemponjja, ¿kunjamsa Jehová Diosan servirinakapajj jupar munasipjjatapsa respetapjjatapsa uñachtʼayapjjäna?

⁴ Jesusajj janïr aka oraqer jutkäna uka tiemponjja, Jehová Diosat jan jitheqtir Abel, Noé, Abrahán, Job chachanakajj jupar respetapjjatapa munasipjjatapwa uñachtʼayapjjäna. Jupar istʼasa, jupar confiyasa, sacrificionak lurasaw ukanak uñachtʼayapjjäna.  Kunjamsa Diosar adorapjjäna uka toqetjja, janiw Bibliajj sumpachpun qhanañchkiti. Ukampis Diosar jachʼañchañatakejj wal chʼamachasipjjäna, Diosasti jupanakan adoracionap katoqasïnwa. Tiempompejja Abrahanan wawanakaparojj Moisesan Leyipwa Diosajj churäna. Uka Leyinjja, kunjam adoratäñsa Diosajj muni uka instruccionanakwa churäna.

5. Jesusan jiwatap qhepata jaktatap qhepatjja, ¿kunjamsa cristianonakajj Diosar adorjjapjjañapäna?

⁵ Jesusan jiwatap qhepata jaktatap qhepatjja, Jehová Diosajj janiw markaparojj Moisesan Leyiparjam sarnaqjjapjjañap mayjjänti (Rom. 10:4). Jan ukasti cristianonakajj ‘Criston leyiparjamaw’ sarnaqjjapjjañapäna (Gál. 6:2). Ukatakejja janiw mä libror qellqsut leyinak yatsupjjañapäkänti, jan ukasti Jesusatwa yateqasipjjañapäna, yatichäwinakaparjamaw sarnaqjjapjjañaparakïna. Jichhürunakanjja cristianonakajj Jehová Diosar kusisiyañatakisa, ‘samarañ jikjjatañatakis’ Jesusat yateqasiñatakiw wal chʼamachasipjje (Mat. 11:29).

6. ¿Kunjamsa aka yatichäwejj yanaptʼistaspa?

⁶ Kunjamsa Jehová Diosar adorasktan uka toqet amuykiptʼasajja, akham sasaw jisktʼasiñasa: “¿Diosar adorañan nayrar sartaskti? ¿Diosar adorañan kunanakansa nayajj chʼamachasiñaja?” sasa. Inas nayrar sartatasat wali kusisitäskstan, ukampis kunanakansa chʼamachasiñasajj wakisi uk amuyañatakiw Jehová Diosar yanaptʼa mayisiñasa.

7. ¿Chuymatpach lurat oracionanakasarojj kunjamsa Jehová Diosajj uñji?

⁷ Orasisaw Jehová Diosar adortanjja. Oracionanakasajj inciensor uñtasitawa sasaw Bibliajj qhanañchi, qalltanjja inciensojj tabernaculonwa loqtasirïna, qhepatsti templonwa loqtasjjarakïna (Sal. 141:2). Uka inciensojja, Jehová Diosatakejj chuymar purtʼkiri wali suma oloranïnwa. Janisay mayninakjam wali suma arunakamp oraskchiñänejja, chuymatpach orasiñäni ukhajja ukhamarakiw Jehová Diosajj ‘wal kusisini’ (Prov. 15:8; Deut. 33:10). Oraskasajj qhawqsa jupar munastan uk sistan, yuspäraraktan ukhajja, Jehová Diosajj wal kusisi, ukham amuyañatakejj walja razonanakaw utji. Kunanaksa muntan, kunanakas llakisiyistu, kunsa jutïrit suytʼasktan uka toqet jupamp parlsna ukjja, wal jupajj muni. Ukhamajj janïr oraskasajj ¿kamsañänisa uka toqet sum amuytʼañajj janit wakiskaspa? Ukhamtï lurañänejja, alajjpachankir Awkisarojj wali suma “incienso” loqtañäni.

8. ¿Kun lurasas Diosar jachʼañchtanjja?

⁸ Jachʼañchasaw Jehová Diosar adortanjja (Sal. 34:1). ¿Kunjamsa Jehová Diosarojj jachʼañchtanjja? Jupajj kunjam chuymanisa, kunanaksa lurawayi uka toqet munasiñamp parlasaw jachʼañchtanjja. Jehová Diosar yuspärasirïñäni ukhajja, wali sumanakwa jupat parlañäni. Jehová Diosan munasiñapat lupʼiñatak tiempo apstʼasiñäni ukhajja, mä arunjja kuna sumanaktï jiwas layku lurawayki uka toqet lupʼiñatak tiempo apstʼasiñäni ukhajja, jupar jachʼañchañatakejj razonanakajj utjapuniniwa. Predikir sarasaw ‘jachʼañchir sacrificio Diosar loqttanjja, mä arunjja lakasat mistur arunakampiw jachʼañchtanjja’ (Heb. 13:15). Kunjamtï Jehová Diosar janïr oraskasajj kamsañänisa uk wali sum amuytʼasiñasäkejja, ukhamarakiw predikir sarasajj kuna toqetsa jaqenakamp parltʼañäni uk wali sum amuytʼasiñasa. ‘Diosar jachʼañchir sacrificiosajj’ wali sumäñapwa muntanjja, ukatwa cheqa yatichäwinak yatiyir sarasajj chuymatpach parltanjja.

9. 1) ¿Tantachäwinakar sarañajj kunjamsa Diosan markapar yanaptʼäna? 2) ¿Kunjamsa tantachäwinakajj yanaptʼawaytam?

 ⁹ Tantachäwinakar sarasaw Jehová Diosar adortanjja. Israelitanakarojj ak lurapjjañapwa Diosajj mayïna: “Maranjja kimsa kutiw taqe chachanakajj Jehová Diosam nayraqatan uñstapjjañapa, jupajj ajllkani uka lugaranwa aka fiestanakan uñstapjjañapa” sasa (Deut. 16:16). Ukar sarañatakejj jupanakajj utanakapsa yapunakapsa jan khiti uñjirinwa jaytapjjañapäna. ¿Kunatsa ukhamak jaytapjjañapäna? Jehová Diosajj akham sänwa: “Jehová Diosam nayraqatar uñstiri sarapkäta ukhajja, janiw khitis oraqem katuntaskaniti” sasa (Éx. 34:24). Maran utjkäna uka fiestanakarojja, Jehová Diosar taqe chuyma confiyasaw israelitanakajj sarapjjäna. Ukham lurañajj wal jupanakar yanaptʼäna. Sañäni, Diosan Leyipat jukʼampwa yateqapjjäna, Jehová Diosan khuyapayasirïtapatwa lupʼipjjäna, Diosan mayni servirinakapampi chikäsajj wal kusisipjjarakïna (Deut. 16:15). Jiwasajj tantachäwinakar sarañatak wal chʼamachastan ukhajja, ukhamarakiw yanaptʼistu. Jukʼa arunakampi suma amuytʼat arunakamp arstʼañatak tantachäwinakar wakichtʼat sarktan ukhajja, Jehová Diosajj wal kusispacha.

10. ¿Kunatsa jiwasatakejj Jehová Diosar cantas adorañajj wali importantejja?

¹⁰ Jilat kullakanakamp cantasaw Jehová Diosar adortanjja (Sal. 28:7). Israelitanakatakejja, Jehová Diosar cantas adorañajj wali importantënwa. Sañäni, David reyejj 288 levitanakwa templon cantapjjañapatak ajllïna (1 Crón. 25:1, 6-8). Jichhürunakanjja Diosar qhawqsa munastan uk uñachtʼayañatakejj jupar jachʼañchir cancionanakwa cantaraktanjja. Ukatakejj janiw suma cantirïñajj wakiskapuniti. Akham amuytʼañäni: parlasajj “taqeniw walja kuti pantjastanjja”, ukhamäkchisa congregacionansa predicacionansa parlañ janiw ajjsarktanti (Sant. 3:2). Ukhamajja jan sum cantañ yatkasas Jehová Diosar jachʼañchir cancionanak jan ajjsartʼasaw cantañasa.

11. Salmo 48:13 qellqatarjamajja, ¿kunatsa familpach Bibliat yatjjatañatakejj tiempo apstʼasiñasa?

¹¹ Bibliat yatjjatasa wawanakasar jupat parlasaw Jehová Diosar adortanjja. Israelitanakajja sábado urunakajj janiw trabajipjjerïkänti, antisas uka urojj Jehová Diosamp jukʼamp sum apasiñatakiw tiempo apstʼasipjjerïna (Éx. 31:16, 17). Taqe chuyma servir israelitanakajja, Jehová Diosata khuyapayasirïtapatwa wawanakapar yatichapjjäna. Jiwasajj ukhamarakiw Biblia liyiñataki, yatjjatañatak tiempo apsusiñasa. Ukham lurasajj Jehová Diosaruw adorasktanjja, jupar jukʼamp jakʼachasiñatakiw yanaptʼarakistu (Sal. 73:28). Familpach Diosat yatjjatasajja, wawanakasaruw alajjpachankir Awkisar munasipjjañapatak yanaptʼaraktanjja (Salmo 48:13 liytʼäta).

12. 1) Tabernáculo lurañarusa, kunanakatï ukan utjkäna ukanak lurañarus ¿kunjamsa Jehová Diosajj uñjäna? 2) ¿Kunsa ukat yateqtanjja?

¹² Jupar serviñatak utanak lurasa ukat cuidasaw Jehová Diosar adortanjja. Tabernáculo lurañasa ukat kunanakatï ukan utjkäna ukanak lurañasa, Jehová Diosatakejj sagradönwa (Éx. 36:1, 4). Jichha tiemponjja, Tantachasiñ Utanakajj luraski ukasa, Jehová Diosar adorañatak yaqha ukham utanak luraski ukanakasa, Diosatakejj sagradorakiwa. Yaqhep jilat kullakanakajj walja horanakaw ukan trabajipjje, Diosan Reinopat jukʼamp yatiyasiñapatak ukham yanaptʼapjjatapatjja, walpun uka jilat kullakanakar yuspärtanjja. Jupanakajja predicañatakejj tiempo apsusipjjarakiwa. Yaqhepajj inas precursor regularat serviñ munapjjarakchi. ¿Kunjamsa ancianonakajj construccionar yanaptʼapjjatap uñachtʼayapjjaspa? Uka wali trabajtʼiri jilat kullakanakatï precursor  regularat serviñ puedipjjchi ukhajja, ukham servipjjañapatakiw jupanakar uttʼayapjjaspa. Jiwasajj construccionan trabajtʼañatakejj yatjjatatästansa janisa, taqeniw Diosar serviñatak utji uka utanak qʼomachsna jan ukajj sumäskakiñapatak yanaptʼsna.

13. ¿Diosan Reinopat yatiyasiñapataki donacionanak churktan ukarojj kunjamsa uñjañasa?

¹³ Diosan Reinopat yatiyasiñapataki donacionanakasamp yanaptʼasaw Jehová Diosar adortanjja. Israelitanakajj janiw chʼusa amparaki Jehová Dios nayraqatan uñstapjjañapäkänti (Deut. 16:16). Qhawqtï puedipkäna ukarjamaw ofrenda apapjjañapäna. Ukham lurasaw kunanaktï Jehová Diosajj jupanak laykojj lurkäna ukanakat yuspärapjjatap uñachtʼayapjjäna. ¿Kunjamsa Jehová Diosar munasitasa kunanaktï jiwas layku lurawayki ukanakat yuspäratas uñachtʼaysna? Mä toqetjja, qhawqtï puedktan ukarjamaw congregacionasataki ukat oraqpachan yatiyasiski ukar yanaptʼañatak qollqe chursna. Apóstol Pablojj akham sänwa: “Taqe chuyma churktan ukaw Diosarojj wal kusisiyi. Diosajj janiw kuntï maynejj jan churirjamäki uk suykiti, jan ukasti qhawqhatï maynin utjki ukarjam churañapwa jupajj suyi” sasa (2 Cor. 8:4, 12). Jehová Diosatakejja, taqe chuyma churktan uka donacionanakasajj jukʼäkchis wali valoraniwa (Mar. 12:42-44; 2 Cor. 9:7).

14. Proverbios 19:17 textorjamajja, ¿yanaptʼa munapki uka jilat kullakanakar yanaptʼktan ukarojj kunjamsa Jehová Diosajj uñji?

¹⁴ Yanaptʼa munapki uka jilat kullakanakar yanaptʼasaw Jehová Diosar adortanjja. Pobrenakar yanaptʼiri israelitanakarojj bendisiñwa Jehová Diosajj arsuwayäna (Deut. 15:7, 10). Yanaptʼa munir mä jilataru, jan ukajj mä kullakar yanaptʼtan ukhajja, Jehová Diosajj mä regalsa jupar churksna ukhamwa uñji (Proverbios 19:17 liytʼäta). Sañäni, Pablojj katuntatäkäna ukhajja, Filipos markankir cristianonakajj mä regalo jupar apayapjjäna, aka regalojj ‘Diosan chuymapar purtʼkiri sacrificiowa’ sasaw jupajj säna (Filip. 4:18). Congregacionasankir jilat kullakanakat amuytʼasajj akham jisktʼasiñäni: “¿Khitirus yanaptʼiristjja?” sasa. Yanaptʼa munapki ukanakarojj tiempo apstʼasisa, chʼamasampi, kunanaktï lurañ yatktan ukanakampi, kunanakatï utjkistu ukanakamp yanaptʼktan ukajja, Jehová Diosar wal gusti. Ukanak lurasajj juparus adorksna ukhamwa jupajj uñji (Sant. 1:27).

15. ¿Jehová Diosar adorañatak tiempo apstʼasiñasa chʼamachasiñas kunatsa jan chʼamäki?

¹⁵ Kunjamtï Jehová Diosajj munki ukham jupar adorañatakejja, tiempo apstʼasiñasawa, chʼamachasiñasarakiwa. Ukanak phoqañajj janiw chʼamäkiti (1 Juan 5:3). Jehová Diosarojj munastanwa, ukatwa ukanak phoqañajj jan chʼamäkiti. Mä wawas papitupar mä regalo churañ munkaspa ukham amuytʼañäni. Uka jiskʼa wawajj inas walja horanakan mä dibujo lurchi, ukampis niyakejjay papitupar munaschejja, uka dibujo jupar wal churañ munarakchejja, uka dibujo lurañajj wali chʼamäkaspas ukham janiw uñjkiti. Jiwasampejj ukhamarakiwa, niyakejjay Jehová Diosar munasstanjja, jupar adorañatakejj kusisitaw tiempo apstʼastanjja, chʼamachasiraktanjja.

16. Hebreos 6:10 textorjamajja, ¿jupar kusisiyañatak chʼamachasitam kunjamsa Jehová Diosajj uñji?

¹⁶ Wawanakapar munasir awk taykanakajja, janiw wawanakapan mä pachpa regalo jupanakar churapjjañap suyapkiti. Sapa mayni wawanakajja, may may chuymanïpjjewa, janiw mä pachpa jakasipkarakiti, awk taykanakajj uk yatipjjewa. Alajjpachankir Awkisampejj ukhamarakiwa, kunjamanakansa sapa  maynejj jakastan uk sum yati. Inas jilaparte amigonakamat sipans jukʼamp lurañ puedsta, jan ukajj inas edadanëjjatam layku, usuntatätam layku, jan ukajj familiaman lurañanak utjatap layku jan mayninakjam lurañ puedkstati. Ukampis jan aynachtʼamti (Gál. 6:4). Kuntï jumajj lurkäta uk janiw Jehová Diosajj armaskaniti. Jumatï Jehová Diosatak taqe kuns sum lurañatak chʼamachasïta, suma chuymamp uk lurarakïta ukhajja, jupajj kusisiniwa (Hebreos 6:10 liytʼäta). Kunjam chuymampis jumajj lurta uk Jehová Diosajj sum uñjaski. Jupar adorasajj wali kusisita, chuymas chuyma jikjjatasisma ukwa muni.

17. 1) Yatjjataniwayktan ukanakamp phoqañajj chʼamakïchi ukhajja, ¿kunsa lursna? 2) “ ¿Jukʼamp kusisitäñatakejj kunanaksa lurañasa?” sat recuadron uñstki ukanakat ¿kawknïris yanaptʼawaytamjja?

¹⁷ ¿Yatjjataniwayktan ukanakat yaqhepamp phoqañajj chʼamakïchi ukhajj kunsa lursna, sañäni, Bibliat yatjjatañasa predicañas chʼamakïchi ukhajj kunsa lursna? Ukanak lurañatak jukʼamp tiempo apstʼasiñäni ukhajja, wal yanaptʼistani, kusisitarakïñäniwa. Diosar adorañajja, ejercicionak lurañampi jan ukajj mä instrumento tukañampi sasiwa. Awisaki ukanak lurañäni ukhajja, janiw ukanak sum lurkañäniti. Ukampis jiwasatï ukanak sapüru lurañäni ukhajja, jukʼamp sumwa ukanak lurjjañäni. Qalltan inas jukʼa tiempok lursna, qhepat jukʼamp tiempo lurjjaraksna. Tiempompejja inas ukanak lurañ wal suyjjchiñäni, wal gustjjarakchistani. ¿Jehová Diosar adorañan janit ukham lurkaraksna?

18. ¿Kuna amtampitï Diosajj lurtʼawaykistu ukampejj kunjamsa phoqsna, ukham lurañäni ukhajj kuns jikjjatañäni?

¹⁸ Jehová Diosar taqe chuyma adorasajja, kuna amtampitï Jehová Diosajj lurtʼawaykistu ukampiw phoqasktanjja. Ukaw wali kusisita chuymas chuyma jakasiñatakejj yanaptʼistu, ukarakiw ‘Jehová Diosarojj wiñayatakiw adoräjja’ sasin suytʼañatakejj yanaptʼistu (Prov. 10:22). Jan waltʼäwinakan uñjasktan ukhajja, Jehová Diosaw yanaptʼistu, ukatwa jichhas chuymasan sumak jikjjatastanjja (Is. 41:9, 10). Munasir awkisar kusisit adorañatakejja, walja razonanakaw utjistu, ‘¡jupakiw taqe luratanakapat jachʼañchäwi, honra katoqañatakejj derechoni!’ (Apoc. 4:11).