Jichhürunakanjja, noticianakajj jaqenakar uñisiñat parlir discursonakata, jaqenakar jiwayañata, yaqha markankirinakar uñisiñata, guerranakatwa jukʼamp parli.

•   “Israel markampi Gaza markampi guerra utjatap laykojja, redes sociales ukanakan uñisisiñat parlirinakajj waltʼatapuniwa” (The New York Times, 15 de noviembre de 2023).

•   “7 de octubre urutjja, uñisisiñanakasa, jaqenakar uñisiñat parlir discursonakasa, jaqe jiwayañanakas jukʼampiw jiljjattawayi, taqeniw uk uñjtanjja” (Dennis Francis, presidente de la Asamblea General de las Naciones Unidas, 3 de noviembre de 2023).

 Uñisisiñat parlir jaqenakasa, nuwasiñanakasa, guerranakas janiw jichha tiemponak utjkiti. Bibliajja, nuwasir jaqenakatwa parli, jupanakajj guerra utjañap toqetwa saytʼasipjjäna, arunakapas ‘flechanakar uñtatänwa’ (Salmo 64:3; 120:7; 140:1). Ukampisa, kunatsa jichhürunakan uñisisiñajj utji uk Bibliajj qhanañcharakiwa.

 Bibliarjamajja, pä razonanakatwa jichhürunakan uñisisiñajj utji.

1.  1. Qhepa urunakanjja, “niya taqe jaqenakan munasiñapaw thayarani” sasaw Bibliajj yatichi (Mateo 24:12). Ukhamajj munasiñat sipansa, jilaparte jaqenakajj uñisisiñanak utjayiri ukhamäpjjañapänwa (2 Timoteo 3:1-5).

2.  2. “Mundpachajj Supayan munañapankiwa” sasaw Bibliajj yaticharaki (1 Juan 5:19; Apocalipsis 12:9, 12). Ukhamajj Supayaw jichhürunakan jan sinttʼasirïpjjañapataki uñisirïpjjañapataki jaqenakar chʼamañchtʼaski.

 Ukampis Bibliarjamajja, niyaw Diosajj uñisisiñanak utjayiri Supayar chhaqtayjjani, uñisisiñanak utjayki uka tʼaqesiñanaksa chhaqtayjjarakiniwa. Bibliajj akham siwa:

•   “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” (Apocalipsis 21:4).