Aka oraqpachanjja, walja jaqenakaw sapakïpkaspasa, janis amigonakanïpkaspa ukham amuyasipjje. ¿Kunas jupanakar yanaptʼaspa? Yaqhep doctoranakajja, “uka aynachtʼayir amuyunakar atipjañatakejj mayninakaruw yanaptʼañasa” sasaw sapjje.

•   “Mayninakar yanaptʼañajja, kusisit jakasiñataki, mayninakat jan jayarstʼañataki ukhamarak sapakjam jan amuyasiñatakiw yanaptʼistaspa” (Institutos Nacionales de la Salud, de Estados Unidos).

 Bibliajja, mayninakar yanaptʼañatakejj kunanaksa lursna ukwa yatichistu. Ukarjam lurañäni ukhajja, janiw sapakïksnasa ukham amuyasjjañäniti.

 Wajjtʼasirïñamawa. Kunanakatï utjktam ukanakampiw mayninakar yanaptʼasma. Sañäni, mayninakar yanaptʼañatakejj tiempwa apstʼasisma. Mayninakamp jikisis parltʼasiñatakiw chʼamachasirakisma. Kunapachatï maynejj yanaptʼasirïki wajjtʼasirïki ukhajja, mayninakajj jupan amigopäñwa munapjje, wal yuspärapjjaraki.

•   Texto: “Yaqhanakar churasipkakim, churatäpjjarakïtawa” (Lucas 6:38).

 Tiempomampi chʼamamampi mayninakar yanaptʼam. Jan waltʼäwinakan uñjasipki ukanakar kunjamanakatsa yanaptʼasma uk amuyañatakiw chʼamachasisma. Sañäni, wali munasiñampiw kunas jupanakar llakisiyi uk istʼasma, jan ukajj “¿kun lurasas yanaptʼirisma?” sasaw jisktʼarakisma.

•   Texto: “Cheqpach amigojja taqe tiempon munasiriwa” (Proverbios 17:17).

 Kunjamatsa suma amigonak jikjjatasma uk yatiñ munsta ukhajja, “Familiampi amigonakamp sum apasiña” sat yatichäwi liytʼasma.