1, 2. а) Нәјә ҝөрә Ҹәннәтин, һәгигәтән дә, олаҹағыны тәсәввүр етмәк бәзән чәтин олур? б) Аллаһын вәдләринә олан иманымызы нә мөһкәмләндирә биләр?

 ҜӘРҜИН бир ҝүн кечирәндән сонра садиг гардаш јорғун вәзијјәтдә јығынҹаға ҝәлир. О, тәләбкар мүдириндән һагсыз јерә мәзәммәт ешидиб вә аиләсинин гејдинә неҹә галаҹағынын фикрини чәкир, үстәлик, һәјат јолдашынын сағламлығына ҝөрә чох нараһатдыр. Јығынҹаг ҝөрүшүндә мусиги сәсләнмәјә башлајанда о, дәриндән нәфәсини дәрир. Ибадәт евиндә баҹы-гардашларын арасында олмаг она хошдур. Маһны Ҹәннәт һаггындадыр. Маһнынын сөзләри ону ҝәләҹәк үмиди барәдә хәјала далмаға вә өзүнү орада тәсәввүр етмәјә тәшвиг едир. Бу, онун севимли маһнысыдыр. Вә инди аиләси илә бирҝә бу маһныны охујаркән үрәјиндә јаранан үмид она раһатлыг вә тәравәт ҝәтирир.

² Һеч бу ҹүр һиссләр кечирмисиниз? Бу һиссләр чохларымыза танышдыр. Етираф етмәк лазымдыр ки, јашадығымыз бу дүнјада Ҹәннәти реал олараг тәсәввүр етмәк чох чәтиндир. Биз «сон дәрәҹә чәтин бир вахт»да јашајырыг вә дүнја ҹәннәт шәраитиндән тамамилә узагдыр (2 Тим. 3:1). Үмидимизин ҝерчәк олдуғуну јадда сахламаға бизә нә көмәк едә биләр? Нәјә ҝөрә әминик ки, Аллаһын Падшаһлығы тезликлә бүтүн бәшәријјәт үзәриндә һөкмранлыг едәҹәк? Ҝәлин Јеһова Аллаһын бир нечә пејғәмбәрлијини нәзәрдән кечирәк. Онун гәдимдә јашамыш халгы бу пејғәмбәрликләрин јеринә јетмәсинин шаһиди олмушду. Сонра исә бу вә диҝәр пејғәмбәрликләрин бу ҝүн һејрәтамиз шәкилдә неҹә јеринә јетдијини мүзакирә едәҹәјик. Вә нәһајәт, мөһкәм имана саһиб олмагла бу ҹүр пејғәмбәрликләрин ҝәләҹәкдә неҹә һәјата кечәҹәјинә бахаҹағыг.

3. Бабилдә сүрҝүндә олан јәһудиләрә һансы вәд тәсәлли верирди?

³ Ерамыздан әввәл VI әсрдә Бабилдә сүрҝүнлүкдә јашајан јәһудиләрин һәјатыны тәсәввүр един. Валидејнләри кими, онларын чоху әсирликдә бөјүмүш вә әзаб-әзијјәт ичиндә јашамышды. Јеһова Аллаһа иман етдикләринә ҝөрә бабиллиләр онлары әлә салырдылар (Зәб. 137:1—3). Садиг јәһудиләр онилликләр әрзиндә јалныз бир үмидлә јашајырдылар: Јеһова онлары јенидән вәтәнләринә  гајтараҹағыны вә онлар үчүн ҝөзәл шәраит јарадаҹағыны вәд етмишди. О, һәтта бәрпа олунмуш Јәһуда торпағыны Әдән бағы илә — ҹәннәтлә мүгајисә етмишди. (Әшија 51:3 ајәсини охујун.) Бу вәдләр Аллаһын халгынын үрәјиндә әминлик јаратмаг вә бүтүн шүбһәләри арадан галдырмаг үчүн верилмишди. Ҝәлин бир нечә пејғәмбәрлијә нәзәр салаг.

4. Јеһова јәһудиләри өз вәтәнләриндә тәһлүкәсизлик ичиндә јашајаҹагларына неҹә әмин етмишди?

⁴ Әмин-аманлыг. Сүрҝүнлүкдән гуртулан әсирләр һәрфи мәнада ҹәннәтә јох, 70 ил башлы-башына галмыш, һәтта араларында бир чохларынын ҝөрмәдији јерә гајыдаҹагдылар. Һәмин дөврдә Мүгәддәс Китабда тәсвир олунан әразиләрдә, адәтән, ширләрә, ҹанаварлара, бәбирләрә вә диҝәр јыртыҹы һејванлара раст ҝәлинирди. Аилә башчылары арвад-ушагларыны вә мал-гараларыны неҹә горујаҹаглары үчүн нараһат ола биләрдиләр. Бу кими шејләр үчүн нараһат олмаг нормал иди. Аллаһын Әшија 11:6—9 ајәләриндә гәләмә алынан вәди үзәриндә, еләҹә дә бу вәдин неҹә тәсәлли верә биләҹәји үзәриндә дүшүн. (Ајәләрини охујун.) Ҝөзәл поетик дилдә јазылмыш бу сөзләрлә Јеһова әсирликдә оланлары әмин етмишди ки, өзләри дә, мал-гаралары да тәһлүкәсизликдә олаҹаг. Ширин саман јејәҹәји ону билдирирди ки, о, јәһудиләрин мал-гарасына дәјмәјәҹәк. Садиг инсанларын бу ҹүр вәһши һејванлардан горхмаларына һеч бир сәбәб олмајаҹагды. Јеһова сөз вермишди ки, Өз халгыны бәрпа олунмуш Јәһуда дијарынын һәр јериндә, һәтта сәһраларында вә мешәләриндә белә мүдафиә едәҹәк (Һизг. 34:25).

5. Һансы пејғәмбәрликләр әсирликдән ҝери гајыданлары әмин едирди ки, Јеһова онларын тәләбатларыны артыгламасы илә өдәјәҹәк?

⁵ Рузи-бәрәкәт. Јәһуди әсирләрин арасында диҝәр бир нараһатчылыг да ортаја чыха биләрди. Онлар дүшүнә биләрдиләр: «Вәтәнә гајыданда аиләми доландыра биләҹәјәмми? Һарада јашајаҹағыг? Орада иш тапа биләҹәјәмми вә ја һәмин иш бурадакындан даһа бетәр олмајаҹаг ки?» Јеһова анлајыш ҝөстәрәрәк пејғәмбәрликләр васитәсилә бу кими суаллары да ҹавабландырмышды. О, итаәткар халгына вәд етмишди ки, орада һәмишә јағышлар јағаҹаг вә нәтиҹәдә торпаг «бол вә бәрәкәтли» мәһсул верәҹәк (Әшј. 30:23). Јеһова Өз халгынын сығынаҹаг вә мәналы ишлә тәмин олунаҹағыны да вәд етмишди: «Онлар евләр тикиб ичиндә јашајаҹаг, үзүм бағлары салыб барыны јејәҹәк. Тикдикләри евдә өзҝәләр јашамајаҹаг, әкдикләринин барыны өзҝәләр јемәјәҹәк» (Әшј. 65:21, 22). Бәли, бүтпәрәст Бабилдә әсирликдә олдуглары вахтла мүгајисәдә онларын вәзијјәти гат-гат јахшы олаҹагды. Бәс онлары әсирлијә ҝәтириб чыхардан ән ҹидди вә башлыҹа проблемләри неҹә һәлл олунаҹагды?

6. Аллаһын халгы сағламлыгла бағлы һансы проблем уҹбатындан узун мүддәт әзијјәт чәкмишди вә О, әсирликдән гајыданлары нәјә әмин етмишди?

⁶ Руһани сағламлыг. Аллаһын халгы әсир дүшмәмишдән узун илләр өнҹә руһани хәстәлијә тутулмушду. Әшија пејғәмбәр васитәсилә Јеһова халгына демишди: «Башынызы јара басыб, үрәјиниз азара дүшүб» (Әшј. 1:5). Онлар руһани ҹәһәтдән кор вә кар идиләр, чүнки Јеһованын мәсләһәтләрини ешитмәмәк үчүн гулагларыны тыхајыр вә үзәрләринә сачдығы руһани ишығы ҝөрмәмәк  үчүн ҝөзләрини бағлајырдылар (Әшј. 6:10; Әрм. 5:21; Һизг. 12:2). Әҝәр әсирликдән гајыдан јәһудиләрдә ејни проблемләр јенидән баш галдырсајды, һансы тәһлүкәсизликдән сөз ҝедә биләрди? Онлар тәзәдән Јеһованын рәғбәтини итирмәздиләр? Јеһованын вәди сөзүн әсил мәнасында онлара тәсәлли верирди. О демишди: «О ҝүн карлар китабдакы сөзләри ешидәҹәк, кор ҝөзләр гаранлыгдан, зүлмәтдән азад олуб ҝөрәҹәк» (Әшј. 29:18). Бәли, Јеһова тәмизләнмиш вә төвбә етмиш халгына руһани сағламлығыны гајтараҹагды. Әҝәр онлар һај вериб итаәткарлыгларыны горусајдылар, Јеһова онлары һәјати ваҹиб рәһбәрлик вә тәлимләрлә тәмин едәҹәкди.

7. Аллаһын әсирликдә олан халгына вердији вәд неҹә јеринә јетди вә нәјә ҝөрә бу бизим иманымызы мөһкәмләндирир?

⁷ Јеһова сөзүнүн үстүндә дурдуму? Бу суалын ҹавабыны фактлар верир. Вәтәнләринә гајыдан јәһудиләр тәһлүкәсизлик, бол немәт вә руһани сағламлыгла хејир-дуаландылар. Мисал үчүн, Јеһова халгыны онлардан гат-гат ҝүҹлү олан чохсајлы гоншу халглардан мүдафиә етди. Јыртыҹы һејванлар јәһудиләрин мал-гарасына хәләл вурмады. Дүздүр, јәһудиләр Әшија, Әрәмја вә Һизгијал пејғәмбәр тәрәфиндән гәләмә алынан ҹәннәтлә бағлы пејғәмбәрликләрин кичик мигјасда јеринә јетмәсинин шаһиди олдулар. Бу пејғәмбәрликләрин јеринә јетдијини ҝөрмәк Аллаһын халгы үчүн тәкҹә һәјәҹанландырыҹы бир шеј дејил, һәм дә еһтијаҹ дујдуглары бир шеј иди. Јеһова Аллаһын кечмишдә Өз халгы үчүн етдикләри үзәриндә дүшүнмәк бизим иманымызы даһа да мөһкәмләндирир. Әҝәр бу пејғәмбәрликләрин илк дәфә јеринә јетмәси бу гәдәр тәсирли идисә, ҝөрүн, ҝениш мигјасда јеринә јетәндә неҹә бөјүк әкс-сәдаја сәбәб олаҹаг! Ҝәлин Јеһованын бу ҝүн бизим үчүн етдикләринә нәзәр салаг.

8. Бу ҝүн Аллаһ Өз халгына нә ҹүр «өлкә» вериб?

⁸ Бу ҝүн Јеһованын халгы һәрфи мәнада бир халгдан ибарәт олуб ајрыҹа бир өлкәдә јашамыр. Мәсһ олунмушлар руһани халгы, јәни Аллаһын Исраилини тәшкил едирләр (Гал. 6:16). Мәсһ олунмушлар вә онларын әмәкдашлары олан «башга гојунлар» руһани «өлкә»дә јашајыр вә Јеһова Аллаһа бирҝә ибадәт едирләр. Ибадәт онларын һәјат јолудур (Јәһ. 10:16; Әшј. 66:8). Бәс Јеһованын бизә вердији «өлкә» неҹә өлкәдир? Бу, руһани ҹәннәтдир. Бурада биз Аллаһын Ҹәннәт шәраити илә бағлы вәдләринин руһани мәнада јеринә јетдијини ҝөрүрүк. Ҝәлин бәзи нүмунәләрә бахаг.

9, 10. а) Әшија 11:6—9 ајәләриндәки пејғәмбәрлик бу ҝүн неҹә јеринә јетир? б) Аллаһын халгы арасында сүлһүн һөкм сүрдүјүнү нә ҝөстәрир?

⁹ Тәһлүкәсизлик. Әшија 11:6—9 ајәләриндә јазылмыш пејғәмбәрликдә вәһши һејванларла ев һејванлары вә инсанлар арасында һармонија вә сүлһүн һөкм сүрдүјү әсрарәнҝиз мәнзәрә тәсвир олунуб. Бу пејғәмбәрлик сөзләри бу ҝүн руһани мәнада јеринә јетирми? Бәли, јеринә јетир! 9-ҹу ајәдән бу ҹүр варлыгларын нәјә ҝөрә зәрәрсиз вә зијансыз олаҹагларыны өјрәнирик. Һәмин ајәдә дејилир: «Чүнки сулар дәнизи долдурдуғу  кими, дүнја башдан-баша Јеһова барәдә биликлә долаҹаг». Бәс «Јеһова барәдә [билик]» һејванларын давранышыны дәјиширми? Хејр, бу биликләр анҹаг Күлли-Ихтијар Аллаһы таныјыб Онун јоллары илә ҝедәрәк сүлһдә јашамағы өјрәнән инсанлары бүсбүтүн дәјишир. Елә она ҝөрә дә бу ҝүн биз руһани ҹәннәтдә һәмин пејғәмбәрлијин үрәји риггәтә ҝәтирән тәрздә јеринә јетмәсинин шаһиди олуруг. Падшаһлығын рәһбәрлији алтында Мәсиһин давамчылары өз гәддар, һејвани хүсусијјәтләрини тәрҝидир вә руһани баҹы-гардашларла сүлһ вә әмин-аманлыг ичиндә јашамағы өјрәнирләр.

¹⁰ Мисал үчүн, бу нәшрдә биз Мәсиһин давамчыларынын битәрәфликлә бағлы һәм Мүгәддәс Јазылара әсасланан тәлимләрини, һәм дә битәрәф мөвге тутдуглары үчүн үзләшдикләри тәгибләри арашдырдыг. Мәҝәр бу ҹүр амансыз вә гәддар дүнјада, һәтта өлүмлә үз-үзә галса белә, бу дүнјанын чиркаб ишләринә булашмајан бөјүк бир халгын олмасы һејрәтамиз дејил?! Бу, Аллаһын Падшаһлығынын тәбәәләринин, Әшија пејғәмбәрин тәсвир етдији кими, һәгигәтән дә, сүлһ ичиндә јашадыгларына данылмаз сүбутдур! Иса Мәсиһ демишди ки, онун давамчылары араларындакы мәһәббәтдән танынаҹаглар (Јәһ. 13:34, 35). Мәсиһ јығынҹагда «садиг вә ағыллы нөкәр» васитәсилә бүтүн давамчыларына сүлһпәрвәр вә нәзакәтли олмағы, еләҹә дә бир-бирләрини севмәји сәбирлә өјрәдир (Мәт. 24:45—47).

11, 12. Бу ҝүн дүнјада нә ҹүр аҹлыг һөкм сүрүр, бәс Јеһова халгына бол гиданы неҹә тәгдим едир?

 ¹¹ Рузи-бәрәкәт. Дүнја руһани аҹлыг ичиндәдир. Мүгәддәс Китабда габагҹадан јазылмышды: «Күлли-Ихтијар Јеһова бәјан едир: “Елә ҝүнләр ҝәлир ки, мән өлкәјә аҹлыг ҝөндәрәҹәјәм. Халг чөрәјә вә суја јох, Јеһованын сөзләринә һәсрәт галаҹаг”» (Амс. 8:11). Бәс Аллаһын Падшаһлығынын вәтәндашлары да аҹлыгдан әзијјәт чәкирми? Јеһова Өз халгы илә дүшмәнләри арасында кәскин фәрг олаҹағыны демишди: «Бах, Мәним гулларым јејәҹәк, сиз исә аҹ галаҹагсыныз. Гулларым ичәҹәк, сиз исә сусузлугдан јанаҹагсыныз, гулларым севинәҹәк, сиз исә хәҹаләт чәкәҹәксиниз» (Әшј. 65:13). Сиз бу пејғәмбәрлик сөзләринин јеринә јетдијини ҝөрүрсүнүзмү?

¹² Руһани гиданын боллуғуну ашыб-дашан, дәрин чајын сулары илә мүгајисә етмәк олар. Мүгәддәс Китаба әсасланан нәшрләр, еләҹә дә аудио вә видеојазылар, јығынҹаг вә бөјүк топланты ҝөрүшләри вә веб-сајтымызда чыхан материаллар сајәсиндә руһани ҹәһәтдән аҹлыг чәкән дүнјада боллуг ичиндә јашајырыг (Һизг. 47:1—12; Јуил 3:18). Мәҝәр Јеһованын боллугла бағлы вәдләринин ҝүндәлик һәјатынызда јеринә јетдијини ҝөрмәк сизи риггәтә ҝәтирмир? Бәс сиз Јеһованын сүфрәсиндән мүнтәзәм олараг гидаланырсынызмы?

13. Корларын ҝөзләрини ачылмасы вә карларын гулагларынын ешитмәси илә бағлы Јеһованын вәдинин јеринә јетдијинин шаһиди олмусанмы?

¹³ Руһани сағламлыг. Руһани ҹәһәтдән корлуг вә карлыг бу ҝүн ҝениш сурәтдә јајылыб (2 Кор. 4:4). Анҹаг Мәсиһ бүтүн дүнјада хәстәликләрә шәфа верир. Сиз нә вахтса корларын ҝөзләринин ачылдығыны вә карларын гулагларынын ешитдијини ҝөрмүсүнүз? Әҝәр сиз инсанларын бир заманлар онлары кор вә кар едән дини јаланлары бурахыб Аллаһын Кәламындан һәгигәт барәсиндә дәгиг билијә јијәләндијини ҝөрмүсүнүзсә, демәли, нөвбәти вәдин јеринә јетдијинин шаһиди олмусунуз: «О ҝүн карлар китабдакы сөзләри ешидәҹәк, кор ҝөзләр гаранлыгдан, зүлмәтдән азад олуб ҝөрәҹәк» (Әшј. 29:18). Бүтүн дүнјада һәр ил јүз минләрлә инсан бу ҹүр руһани шәфа тапыр. Бөјүк Бабили тәрк едән һәр бир инсанын руһани ҹәннәтдә ибадәт етмәк үчүн бизә гошулмасы Јеһованын вәдләринин ҝерчәк олдуғуна ҹанлы сүбутдур!

14. Нәјин үзәриндә дүшүнмәк иманымызы мөһкәмләндирә биләр?

¹⁴ Бу китабын һәр бир фәсли Мәсиһин өз давамчыларыны бу ахыр заманда әсил руһани ҹәннәтә доғру апардығына ҝүҹлү сүбутдур. Ҝәлин бу ҹәннәтдә алдығымыз чохлу сајда хејир-дуалар үзәриндә даим дүшүнәк. Бунун сајәсиндә Јеһованын ҝәләҹәклә бағлы бүтүн вәдләринин мүтләг јеринә јетәҹәјинә даир иманымыз даһа да мөһкәмләнәҹәк.

15. Јер үзүнүн ҹәннәт олаҹағына нә үчүн әмин ола биләрик?

¹⁵ Јеһованын әзәли нијјәти бүтүн јер үзүнү ҹәннәт етмәк олуб. О, Адәмлә Һәвваны ҹәннәт бағында јерләшдирәрәк төрәјиб чохалмаларыны вә јер үзүнү долдурмаларыны, еләҹә дә бүтүн ҹанлыларын гајғысына галмаларыны тапшырмышды (Јар. 1:28).  Адәмлә Һәвва исә Шејтана гошулараг үсјанкарлыг етдиләр вә бүтүн нәсилләрини гејри-камиллијә, өлүмә вә ҝүнаһа сүрүкләдиләр. Анҹаг Аллаһын вәди һеч вахт дәјишмир, ағзындан чыхан сөз мүтләг јеринә јетир. (Әшија 55:10, 11 ајәләрини охујун.) Демәли, Адәмлә Һәвванын нәсли јер үзүнү бүрүјүб она саһиб олаҹаг вә јерүзү ҹәннәтдә Јеһованын јаратдыгларынын мәһәббәтлә гајғысына галаҹаг. Һәмин вахт ҹәннәт шәраити илә бағлы илк дәфә сүрҝүндә олан јәһудиләрә верилмиш пејғәмбәрликләр јүз фаиз јеринә јетәҹәк! Ҝәлин нөвбәти нүмунәләрә бахаг.

16. Мүгәддәс Китаб јерүзү Ҹәннәтдә һөкм сүрәҹәк әмин-аманлығы неҹә тәсвир едир?

¹⁶ Әмин-аманлыг. Әввәл-ахыр Әшија 11:6—9 ајәләриндә бәдии диллә тәсвир олунан вә үрәји исиндирән сөзләр һәрфи мәнада јеринә јетәҹәк. Һәм кишиләр, һәм гадынлар, һәм дә ушаглар дүнјанын истәнилән јериндә тәһлүкәсизликдә вә әмин-аманлыгда олаҹаглар. Һеч бир ҹанлы варлыг — нә инсанлар, нә дә һејванлар тәһлүкәли олмајаҹаг. Бир анлыг дүшүнүн: елә бир вахт ҝәлиб ки, планетин һәр јериндә өзүнүзү евиниздәки кими һисс едирсиниз. Сиз горху-һүркү билмәдән чајларда, ҝөлләрдә вә дәнизләрдә үзүр, дағларда, тәпәләрдә ҝәзир, чәмәнликләри сејрә чыхырсыныз. Ҝеҹәләр архајынлыгла башынызы јастыға гојурсунуз. Бәли, Һизгијал 34:25 ајәсиндәки сөзләр ҝерчәкләшәҹәк вә Аллаһын халгы чөллүкдә асудә јашајаҹаг вә мешәләрдә јатаҹаг.

17. Нәјә ҝөрә әмин ола биләрик ки, Падшаһлыг бүтүн јер үзүнү идарә етмәјә башлајанда Јеһова бизим еһтијаҹларымызы бол-бол өдәјәҹәк?

¹⁷ Рузи-бәрәкәт. Хәјалынызда касыбчылығын, гида чатышмазлығынын, аҹлығын, еләҹә дә сосиал тәминат фондларынын олмајаҹағы бир вахты ҹанландырын. Бу ҝүн Аллаһын халгынын саһиб олдуғу руһани боллуг Аллаһын Падшаһлығынын Падшаһынын өз тәбәәләрини һәр ҹәһәтдән тәмин едәҹәјинә зәманәтдир. Иса Мәсиһ јер үзүндә минләрлә инсаны бир нечә чөрәк вә балыгла дојуздурмагла бу вәдләри һәјата кечирмәјә гадир олдуғуну кичик мигјасда ҝөстәрмишди (Мәт. 14:17, 18; 15:34—36; Марк 8:19, 20). Аллаһын Падшаһлығы бүтүн јер үзүнү идарә етмәјә башлајанда нөвбәти пејғәмбәрлијә охшар пејғәмбәрликләр там шәкилдә јеринә јетәҹәк. Биз Аллаһын Кәламында охујуруг: «Онда Аллаһ сәпдијиниз тохумлара јағыш јағдыраҹаг, торпағын мәһсулу бол вә бәрәкәтли олаҹаг. О ҝүн мал-гараныз ҝениш отлагларда отлајаҹаг» (Әшј. 30:23).

18, 19. а) Әшија 65:20—22 ајәләриндәки сөзләр сизин үчүн нә мәна кәсб едир? б) Һансы мәнада өмрүмүз «ағаҹ өмрүтәк» олаҹаг?

¹⁸ Бу ҝүн бир чох инсанлар раһат евләринин вә мәмнунлуг ҝәтирән јахшы ишләринин олаҹағыны тәсәввүр белә едә билмирләр. Бу пис системдә чохлары ҝеҹә-ҝүндүз гул кими ишләјиб мүгабилиндә гара гәпик алдыглары һалда, онларын һесабына доланан аҹҝөз вә тамаһкар варлылар һеч нә дә өзләринә јох демирләр. Тәсәввүр едирсиниз, Әшија пејғәмбәрин нөвбәти сөзләри јеринә јетәндә һәјат неҹә олаҹаг?! О демишди: «Онлар евләр тикиб ичиндә јашајаҹаг, үзүм бағлары салыб барыны јејәҹәк. Тикдикләри евдә өзҝәләр јашамајаҹаг, әкдикләринин барыны өзҝәләр јемәјәҹәк. Халгымын өмрү ағаҹ өмрүтәк узун олаҹаг, сечилмишләрим әлләринин зәһмәтиндән дојунҹа зөвг алаҹаг» (Әшј. 65:20—22).

 ¹⁹ Өмрүмүзүн «ағаҹ өмрүтәк» узун олаҹағыны неҹә баша дүшмәк олар? Тәсәввүр един ки, бөјүк, гоҹаман бир ағаҹын алтында дајанмысыныз. Онун нә гәдәр узунөмүрлү олдуғу барәдә дүшүнәндә үрәјиниз риггәтә ҝәлмирми? Бәлкә дә, бу ағаҹ улу нәнә-бабаныздан да чох-чох әввәл әкилиб. Әҝәр сизин әбәди јашамаг үмидиниз олмасајды, бу ағаҹ сиздән чох јашајарды, сиздән јалныз хатирәләр галдығы һалда о, бурада дурмаға давам едәрди. Јеһова Ҹәннәтдә өмрүмүзүн узун олаҹағына вә әмин-аманлыг ичиндә јашајаҹағымыза бизи әмин едир. Буну билмәк неҹә дә хошдур! (Зәб. 37:11, 29). Елә вахт ҝәләҹәк ки, һәтта узунөмүрлү ағаҹ белә азөмүрлү от кими ҝөрүнәҹәк — онлар ҝәлди-ҝедәр олаҹаг, биз исә әбәдијјән јашајаҹағыг!

20. Падшаһлығын садиг тәбәәләри мүкәммәл сағламлыға неҹә говушаҹаглар?

²⁰ Мүкәммәл сағламлыг. Бу ҝүн хәстәлик вә өлүм дүнјада баш верән һәр шејә өз тәсирини ҝөстәрир. Мүәјјән мәнада һамымыз хәстәјик — ҝүнаһ адланан өлүмҹүл хәстәлијә тутулмушуг. Бу хәстәлијин јеҝанә чарәси Мәсиһин фидјә гурбанлығыдыр (Ром. 3:23; 6:23). Миниллик Һөкмранлыг дөврүндә Мәсиһ вә һакимијјәт шәрикләри инсанлара фидјә гурбанлығындан там фајдаланмаға көмәк едәрәк тәдриҹән садиг инсанлардан ҝүнаһын бүтүн изләрини тәмизләјәҹәкләр. Әшијанын пејғәмбәрлик сөзләри там шәкилдә јеринә јетәҹәк: «Һеч бир сакин “хәстәјәм” демәјәҹәк. Орада јашајанларын ҝүнаһы бағышланаҹаг» (Әшј. 33:24). Тәсәввүр един, елә бир ан ҝәләҹәк ки, һеч кәс кор, кар вә ја шикәст олмајаҹаг. (Әшија 35:5, 6 ајәләрини охујун.) Елә бир физики, әгли вә емосионал хәстәлик јохдур ки, Иса Мәсиһ ону сағалда билмәсин. Падшаһлығын садиг тәбәәләри мүкәммәл сағламлыға говушаҹаг!

21. Өлүмлә нә баш верәҹәк вә нәјә ҝөрә бу вәд бизи севиндирир?

²¹ Бәс хәстәликләрин ҝениш јајылмыш вә ҝүнаһын гачылмаз нәтиҹәси олан өлүм барәдә нә демәк олар? «Ахырынҹы дүшмән»имиз олан өлүм ҝеҹ-тез һәр бир гејри-камил инсанын бојун әјдији јеҝанә дүшмәндир (1 Кор. 15:26). Бәс өлүм Јеһова үчүн о дәрәҹәдәми горхулу дүшмәндир? Әшијанын пејғәмбәрлијиндә дејилир: «Өлүмү әбәдилик мәһв едәҹәк, Күлли-Ихтијар Јеһова бүтүн үзләрдән ҝөз јашларыны силәҹәк» (Әшј. 25:8). Һеч тәсәввүр едирсиниз, һәмин вахт неҹә ҝөзәл олаҹаг?! Нә матәм, нә гәбиристанлыг, нә дә ки гәм-кәдәр олаҹаг! Јеһова Өз мөһтәшәм вәдини һәјата кечирәндә, јәни өлүләри дирилдәндә инсанлар севинҹ ҝөз јашларыны сахлаја билмәјәҹәкләр! (Әшија 26:19 ајәсини охујун.) Нәһајәт, өлүмүн вурдуғу сајсыз-һесабсыз јаралар сағалаҹаг.

22. Мәсиһин идарә етдији Падшаһлыг јер үзүндә Аллаһын бүтүн вәдләрини јеринә јетирәндә нә баш верәҹәк?

²² Миниллијин сонунда Падшаһлыг јер үзүндә Аллаһын бүтүн вәдләрини һәјата кечирәҹәк вә Мәсиһ һакимијјәти Атасына тәһвил верәҹәк (1 Кор. 15:25—28). Фәалијјәтсиз вәзијјәтдә олан Шејтан зиндандан бурахыланда камиллијә говушан бәшәријјәт онун сонунҹу сынағы илә үзләшмәјә һазыр олаҹаг. Ән сонда  Мәсиһ алчаг иланы вә онун тәрәфдарларыны бирдәфәлик мәһв едәҹәк (Јар. 3:15; Вәһј 20:3, 7—10). Јеһованы севән садиг инсанларын ҝәләҹәји исә парлаг олаҹаг. Аллаһын Кәламында вәд олунур ки, садиг инсанлар «Аллаһын өвладларынын шанлы азадлығына [говушаҹаг]». Чәтин ки, биз бу мәнзәрәни Мүгәддәс Китабдан јахшы тәсвир едә биләк (Ром. 8:21).

23, 24. а) Нәјә ҝөрә Аллаһын вәдләри мүтләг һәјата кечир? б) Нә етмәјә гәтијјәтлисиниз?

²³ Јеһованын бу вәдләри бош үмидләрә вә арзулардан ибарәт дејил. Онлар мүтләг һәјата кечир! Бу китабын биринҹи фәслиндә мүзакирә етдијимиз Исанын сөзләрини јадыныза салын. О шаҝирдләринә белә дуа етмәји өјрәтмишди: «Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мәт. 6:9, 10). Аллаһын Падшаһлығы киминсә тәхәјјүлүнүн мәһсулу дејил. О, реал бир һөкумәтдир! Инди ҝөјләрдә идарә едир. Дүз бир әсрдир ки, Падшаһлыг Јеһованын вәдләрини һәјата кечирир вә биз буну мәсиһи јығынҹағында ајдын шәкилдә ҝөрүрүк. Әмин ола биләрик ки, Аллаһын Падшаһлығы бүтүн ҝүҹүнү сәфәрбәр едиб јер үзүнә јөнәлдәндә Јеһованын бүтүн вәдләри јеринә јетәҹәк.

²⁴ Биз Аллаһын Падшаһлығынын мүтләг ҝәләҹәјинә әминик. Биз әминик ки, Јеһованын ағзындан чыхан һәр бир сөз јеринә јетәҹәк. Нәјә ҝөрә? Чүнки АЛЛАҺЫН ПАДШАҺЛЫҒЫ ҺӨКМРАНЛЫГ ЕДИР! Һәр кәс өзүнә белә бир суал вермәлидир: «Мән бу Падшаһлығын рәһбәрлијинә табе олураммы?» Ҝәлин индидән Падшаһлығын садиг тәбәәләри кими јашамаг үчүн әлимиздән ҝәләни едәк ки, бу мүкәммәл, әдаләтли һакимијјәтин рәһбәрлији алтында әбәдијјән јашајаг!